ايام من عمري

بداية المتاهة

صار فد حديث عابر بيناتنا وبدت تصير مرونة بالكلام كلت يلا هذا يجوز جان محرج وميعرفني وراها سكتنا ظل يباوع حوالية منو ينظف ومنو يسوي هيج هاي اسألته فبديت احجي واشرح واتفيك واني ام البيت بعدها شرحت عن وضعنا وحياتنا جان يكول سما !!!! وسكت بعدين كمل كال اني شفت امج من جبتوهاا من عمان وشفتج انتي هم ....ظليت صافنة وساكتة لان ما ركزت ولاشايفته صراحة وظليت ساكتة لان عبالك حجيت هوايه وراها هو بدا يسال شنو وضع امي قبل وفاتها وشلون تجاوزنا وضعنا خلال مرضها فحجيتلة  اللي اعرف وموضوع الطبخ وشغل البيت وشلون اتعلمت وصرت شاطره واعتمدت على نفسي وبابا نحس وميقبل غريب يسوي الشي اللي هو يستخدم وياكل فضحك وجان يكول اني هم نحس ترا فاني بكل فطاريه كلت يبو عزا شنو هالحظ شكو نحس الله شامر بدربي هو ضحك اتذكر بس اني اتذكرت جفصت فسكتت بخجل  ظل يباوعلي جان يكول انتي بيتكم حيل نظيف وانتي هم مبينه نادره ونظيفة  توقعتج مايعه ومدلعه. اشو طلعتي خام فد نوب ابتسمت وجاوبته  اشكرك ولو مفهمت شنو خام ابتسم كال خواتي عركه تصير من يصبون غدا عاد مو تنظيف كتله تعويد ويجوز لو امي وضعها جان اني هم هيج اصير ....
مشت الامور والايام عاديه ومن يوم الشفته ما خابر وقليل يجي الا ما ندر وبابا يجيبه ورا مده بدى يجي بس مها اخته الصغيره وياه ونحجي شي عادي وما كان اي مبادره منة، وصارت الامتحانات وانشغلت بدراسه وامتحانات لحد اخر يوم !!!! اسمع موبيلي يرن فتحته لكيت رقم اول مره ما جاوبت ثاني مره جاوبت طلع غوث تفاجئت كتلة من وين جبت رقمي ضحك كال يعني شنو غريبة ؟ رقمج عندي من انخطبنا فرأسا كال يلا اني برا وما اعرف انتي بيا قسم صدك ضحكت كتله صار كم شهر مخطوبين مسالت ولا تدري اني بيا قسم !!!! المهم كتله اوك اني جايه رحت علية  لكيتة  واكف برا شفته مدني سالتة  اشو متلبس عسكري ليش جاوب هاي مو وارده بالعراق لان اللي يلبس عسكري وضابط لو ينخطف لو ينقتل غير الموضوع كال نروح نتغدا سكتت صعدت وياه واحنا بالطريق كال ابوج يعرف وموافق نروح نشوف محلات نجهز وهيج شي، جوايه شي يكلي افرحي بس احسها فرحة ناقصة جانت صديقاتي يكلولي سما  شتريدين وسيم ومركز وثلاثيني مثل قصص الحب شتريدين بس والله لو يجون مكاني جان صدكو جنت اعرف اكو غلط بالقصه افترينا وخلصنا صار دنيه مغرب رجعني للبيت فات كعد شويه يحجي ويه بابا وجان وقتها بابا يتوسطله لحتى ينقله للمنطقه الخضرا بعدها بابا استاذن كال اروح اصلي المغرب واقرا قران وانتو اخذو راحتكم،ظليت كاعده وياه وساكتين حسيته يتململ ما فهمت شبيه حاولت ابادر واكون لطيفه وياه لاكسر الحاجز بس هو يمكن فهمني بغير طريقة ابد مو على بالي وبدون اي مقدمات اشو هذا جرني وراسا لزمني من وجهي  وباسني بطريقه ابدا مو طبيعيه كلش غريبه خفت اني جمدت بمكاني ومثل العصرت ايدي بحيث اتصلبت  وابد ما بينت اي تجاوب وما اعرف ليش وقتها هيج صار شي جديد جان وابد مو ماره بهالحالة، ولا احد متقربلي بهالطريقة،وراها ابتعد وهو ساكت بس مو على بعضه مثل الواحد كابت بروحة شي  كام بعدين كال اروح وطلعت ورا اشو مشى وجان يكول سما  اني مااحب  البنيه حجاره ويمشي وابد ميباوعلي فراجعي نفسج !!!.
انسطرت اني من كلامة  شنو حجاره شبيه هذا واني منين اعرف واتعلم اني معندي احد اسالة ولا مارة بهيج تجارب، كلت يلا شسويله يتعود واني بمرور الزمن هم احاول مشت الايام عادي وهو ماكو وامه وخواته ماكو ابد ولا وحده بيهن سالت ابد تاكدت ها هيه اني مفروصه عليهم والولد همينه الظاهر اني ملزكيني عليهم، واكو شي ناقص مداعرفه شنو، وحتى بابا ظليت اريد اساله ومستحيه وابلع ريكي عاد افتهم عليه بابا المهم شرحلي ، واللي فهمت منه انو بابا وصديقه اتفقو يقوون علاقاتهم يزوجونا لبعض وهو كان يريد يزوج ابنه بنت عائله وماكو احسن من بابا ليناسبه ومن جهه بابا يكول ردت اضمن انج بظل عائله ورجال يخاف عليج ويحميج والاعمار بيد الله كلت يلا اني حياتي سكوت بسكوت فما بقت على هاي  مشيتها كالعاده واني سويتها عناد مخابرت وهو الظاهر مو يمه الحجي الى بعد مده بالعطله خابر كال نجي كتله اي اهلا وسهلا تفضلو كال حتى نتفق موضوع الزواج ونحدد موعد ونشوف شنو احتياجات وشلون نرتب كتله اي تفضلو انته وخاله والبنات كال لا امي متحب تتدخل بهاي الشغلات ومبيها حيل ظليت صافنه كتله لعدشلون منو يتكفل بهالشي غير امك كال معليج ندبرها المهم انتي رتبي امورج والباقي احنا نرتبه ظليت تايهة ماعرف شسوي ذولي يدورون شكليات واني وحدي لا خالة لا عمة لا كرايب وين انطي وجهي وشسوي ياسمين صح طابة وطالعة بس مو مال تساعدني بهيج شغلات ، مبقى حل عندي غير هالة  وقتهاجانت راجعه اربيل  لان سكنت هناك واستقرت بعد ما راحت عاشت بالاردن تقريب سنتين لظرف خاص خابرتها كالت اني اجي يم اهلي وامر عليج نرتب كلشي وجان دوامها بعدة بغداد ماشيه باجراء النقل مالتها المهم من وصلت وشافت كلشي ممتغير  ظلت تفر باديها لكتني مثل مو عافتني اول مره وكالت شنو هالخطوبه لا طابين لا طالعين لا مسولفين شنو هالعالم شبيهم ، عفنا الحجي والتهينة بالترتيبات وبدينا من اول نحظر ونعدل وكامت هي تكمل كلشي وصارت تركض هنا وهنا وكملت كلشي احتاج لحد ما وصلنا لبدله العرس ،  اشو هذا ماعرف شلون يحجي وختمها جان يكول احنا نجيب بدلة العرس لا تتصرفون من مكانكم.
بذاك الوقت كلها تأجر والله جوايه كلت حيجيبون شي مهلهل، اشو اجوي هو واخته الجبيره والله جايبين بدلة العرس ووياها بدلة هيج وردي على بنفسجي علمود الحنة ، كعدو شويه وراحو وكال ارجع اني بس اوصل مي ،اتعجبت بيهن ضحكت جانت فد شي حلو وراقي فعلا كلت بداخلي استغفر الله شلت غيبتهم اني .
من رجع كال هاي هديه من عمتي بالكويت وياها فلوس اني مشفت الفلوس ولا سالت ظليت مكيفه بالبدلات رحت لبستهن اشوف. قياسهم وبابا وهالة وهو كاعدين هو مو يمه ولا ابد عبالك مسوي فضل حيتزوجني وحجيت هالشي لهالة  كالت حبيبتي انتي بكلشي اعلى منة ابوج وامج امة ربة بيت وهمه يا دوب رواتبهم وبيتهم العايشين بية ومعدهم اللي ابوج عنده وخير الله فلا تدوخين، سكتت بس كلت جوايه بس مو هذا الانسان اللي تمنيت جنت اكول كل وحده عدها  هواي احلام تحب تحققها عالاقل يتحقق واحد بس حظي اني ولا واحد اتحقق ،  كعدت وياه شويه كلت خلي احاول من جديد لربما يفيد ويحس لو يشوفني  كتله غوث من شوكت عندك رقمي كال من انخطبنا كتله لعد لويش متخابر ولا تسال اجاني الجواب ركع بوجهي جان يكول ولويش اخابر اذا معندي شي ؟ ظليت صافنة  عليه فشلت وريكي نشف جوابة لو كافخني ولا كايل هالحجاية اتخيلت شنو الحياة وياة من هسة ، عفته وكمت ورا شويه لكيته رايح كلت خلص يطبه طوب اني ما رخص روحي اذا هو مجبور فاني مغصوبه واكثر.
قضيت الفتره البعدها كله بس ويه هالة وبين السوك وبابا وبابا يبين نفسه فرحان بس احسة مو على بعضه . .

......واجت الغرفه اخيرا .. وطبعا ورا ما دورنا وانشلع كلبنا توصلنا لقرار صديق بابا يعرف واحد اسمة عطا النجار وجان وقتها موديل الغرف التركي توه مكتسح السوق،. فجابو كل الملحقات بس الكنتور سوو تشكيل بالبيت وعلى قياس الحايط الفارغ سووه 8 بوب وملحق فوقي فد شي يجنن كال بابا هاي هديتكم وهو الله يرحمة قرر  ينتقل للملحق بالبيت بيت صغير  مثل المشتمل بين المطبخ والممر صاير  يصير بيت مستقل وكال افتح باب منه عالغرفه وانتو اخذو راحتكم .... اخذني للتسجيل العقاري وسجل حصتة من البيت كلة صار باسمي واساسا نص البيت لامي واني اللي اورثها حتى خوالي تنازلو بحصصهم من الورث لان يحقلهم ياخذون باملاك امي لان معدها ولد بس اني لكن ما وافقو   كالو لا الج هذا ومنريدشي فبابا كال اخوانج الهم ذاك البيت وانتي هاي حقج ما ريد تتبهدلين.
اجه غوث بعد هذا كله عالجاهز جايب كتبه واغراضة وملابسة واني مستغربه سكوت بابا على هيج تصرف لويش هيج بايعني مدافهم المهم اباوع الاغراض هواية ظليت صافنه متوقعت الولد عدهم هلكد غراض اجيت اساعده هاي الوضع الطبيعي المفروض لان اني زوجته اشو هذا عاط بية لتلزمين هاي لتلعبين لذيج ولا تمدين ايدج صدك كرهتة بذيج اللحظة عبالك زعطوطة لو مشايفه شمرت اللي بيدي وعفته ونزلت ابد مناقشت شويه ونزل ورايه جان يكلي وبدون مقدمات اخذيها قاعده حاجه اذا ما اكول حركيها رجاء لا تتبرعين وتمدين ايدج وتحركيها هزيت راسي كتله بعد احسن توفر عليه وانته الجنيت على روحك بس حط بالك ماحب الهوسه وترا هاي غرفتي اني المعروف الغرفه للعروس وومنوع تشمر غراض على والله لحديلزمها فمن هسا. ممنوع بهدلة بالغرفه ومكاني لا تتعدى عليه وماحب احديفوت بحذائه احنا متعودين الحذاء ينذب برا لان نصلي والبيت دوم نظيف ظل مبتسم ووافق على هالشي فاني من ورا خشمي كتله همزين اكو شي متوافقين بيه ظل يباوعلي اني دشرب جاي جان يكول ماكو متضيفيني باوعت بلا نفس كتله انعديت من اهلك كوب مي محد جابلنا عموما ذاك الجاي صب واشرب محد لازمك ابتسم وحاول يغير السالفه معرف شيسوي حاول يفتح مواضيع اني صدك فصلت اسمع من يحجي بس ما افهم عليه بالي مو يمه ابد ااجه عاد بابا وراحو كعدو سوا اني ورا هالموقف حسيت بعدم ارتياح مو طبيعي وهوايه مؤشرات كالت سما انهزمي بطلي بس مادري اني غبيه مدري جبانه ظليت ساكته اتملكني بهالموقف حقد مو طبيعي وراها صار المغرب وهو كاعد عاد بابا كال بنتي سوي عشا واخذي زوجج صعدو فوك يريد يكمل غراضه ظليت اتلفت اريداشوف ويين زوجي هو افتهم وابتسم ضحكت اني كتله اي بابا مو اني دافعه المهر وديستحي مني يكلك حتى تكلي عفته وصعدت وهو اجه ورايه وظل وجهه يضحك دخلنا فات هو للغرفه كتله يلا اني انزل جوا اذا شفت روحك تريد شي صيحلي لزم الباب وسده ولزمني من ايدي عبالي ديكلي نكعد لو شي هذا ماعرف شبيه الغرفة بعدها مو كلش مرتبه بس الفراش عالسرير والباقي كلشي بعلبته صدمني بسالفه يكلي سما اشو انتي مو مثل اختج انصدمت كتله وانته وين شايف اختي كلهن باربيل منو شايف  انته هو  عبالك مثل المتخدر وزل لسانه جان يكول لا شفتهن من بعيد وغير القصه اني مركزت وصدكت مهلكد حطيت بالي المهم نفدت بجلدي والحمد لله ما صار شي ورا شي ساعه نزل بس نكول عبالك مبوخ ماادري شبيه بس اني سمعت صوت موبيل وديحجي بعصبيه بس مفهمت شكو وهو يمشي ما وكف كال اني رايح عود بعدين اجي وطلع زين والعشا كال لا مو تغدينا متاخر بالعافيه انتو وطلع حتى مسلم على بابا صعدت من فضول كلت اشوف شسوا لكيت كلشي بوضعه ولا ماد ايده الظاهر جان بس كاعد عفت كلشي ورا يومين اتذكر ثلاثا والمغروض الجمعه عرسنا خابرته كتله غراضك كلها بعدها مطشره شنسوي جان يكول حدز مها تجي ترتب انا معندي مجال لان حاخذ اجازه ومشغول اوك باي وسديتة قبل ليحجي هو مشت الامور والخميس حنتنا.........

          والبقية تأتي.....