الجزء الاول 🐸🐸🐸
قااااعد في البرندة وبتصفح الفيس واتبسم براي زي المجنون ، بعد شوية اسمع ليك الحاجة جات تصرخ فيني قووووم تقوم قيامتك بس راقد لي زي المرة الحامل ، قاعد 24 ساعة ماسك تلفونك دا لا عندك شغلة ولا مشغلة و تاكل اكل السوسة والعافية المدسوسة ، لا نافع في شغل ولا بتشتغل زي الرجال ولا بتساعد ابوك في مصاريف البيت ولا في شغل البيت ، طيب تعال غسل معانا العدة او قش الحوش علي الاقل نستفيد منك في حاجة وجنك اكل تاكلك الارضة ودمك بقري وما بتحس ، ياخ الرجال القدرك بي عيالهم ، قوم يلا تقوم طيارتك توديك اليمن .
دي الحاجة طبعا بداية الشهر بيكون معاها قروش ولا بتسألني ولا حاجة وانا بنوووم لحدي الساعة 10 وبقوم بلقى الاكل جاهز وباكل وبتشيك وبمشي بلف مع العطالة ، بس من يوم 15 يجي الحاجة بتفلس والقروش العندها بتكمل بعد داك بتقبل علي وتزفني زفة جد تخليني اشرد من البيت من الصباح امشي النادي وارجع بالليل وهم نايمين واخش البيت زي الحرامي .
يلا كان في معلم بناء بنشتغل معاهو يوميات واخر اليوم بمسك قروشي وبشتري ليهم حاجات وبجي عيني قوية ورافع راسي فوق نظام خلاص الزول مسؤول وجايب ليهم حاجات وكدا.
المهم الصباح بعد الحاجة سمعتني النغمة مشيت للمعلم في بيتو عشان يشوف لينا شغل ، قال لي ياخ انت ما بتجيني الا في ايام معينة ولمن اقوليك واصل واشتغل معاي عشان تتعلم الشغل وتبقى معلم بناء كبير ، بتقعد تتجدع لي وانا خريج جامعي والشغل دي ما شغلي بس الظروف جبرتني والشغل دا ما شبهي وتقعد تتجنن لي ، عليك الله امشي اختاني كدا ولا كدا وما تجيني تاني ولا عندي ليك اي شغل اتخارج من وشي يا خريج يا جامعي.
اها المعلم زاااتو نكرني حطب ورفض يشغلني معاهو ، لكن هو عندو حق لانو انا بشتغل معاهو لمن الحاجة تسمعني نغمة لكن مجرد ما الحاج يصرف ويديها القروش انا طوااالي بجلي الشغل وبقوليهو ما داير اشتغل اصلا الشغل دا لا شبهي ولا حاجة .
اهااا بعد المعلم طردني راسي جاط وافكاري اتلخبطت وما عرفت اقبل وين لانو الحاجة ما ح تخليني وكمان عندها مفراكة كبيرة بتاعت عصيدة قاعدة تجي تضرب بيها في سريري وتهددني بيها .
هسي الواحد يرجع البيت كيف ولا يمشي وين زاتو ما عارف…
…
#يتبـــــــــع…
