قتلت امي!!

البارت السادس

مرحبآ حبايبي سنـــه سعــــيــــــــده علـــيــكم. يـــارب وكل سنـــه وانــتو سالــميـــن وانشالله تحقق امانيكم يلي ماتحققت ب 2018 ربي يحفضـــكم  طبعآ البارحه منزلت بارت لان تعرفون هوسه وراس السنه واكيد كولكم انشغلتو والله جنت تعباانه كولش ومنزلت بارت بس راح اعوضكم ببارتين اليوم وتدلـلون 😉

قتلت امي  ....6....
.....

عفتها وطلعت للبيت الحيره تزداد يوم بعد يوم ليش
هاي الابنيه حياتها الغاز ..
وليش كلما اسألها ادكولي لتستعجل راح تعرف كلشي بالترتيب
وحسب كلامها هي ماذكرت عدها أخ والاضباره
مالتها عدها أخ وعايش بالخارج ....باجر الصبح اسألها
على اخوها ...
كعدت من الصبح ورحت ع المستشفى
ودخلت ع الدكتور المسؤول عن بحثي وراويته الاوراق الاوليه بخصوص البحث وطريقة
كتابته ...
الدكتور تفاجا من شافني مرتبه وموضح الحياة الاولى للقتله
وشنو الاسباب اللي تادي بيهم للقتل ...
انبهر من شغلي وطلب مني استمر على نفس النهج وشجعني
طرت من الفرح ورحت للسجن
واني متلهف اسمع باقي الحكايه ....

رحت على زنزاتها بسرعه حتى ما مريت ع العميد مدير السجن بس اريد اعرف باقي قصتها
واعرف باقي اللغز ....
قبل ما التف ع الممر صار بوجهي الشرطي احمد
كلي متلكيها تخربطت واخذوها لمستشفى السجن
استغربت البارحه جانت مابيها شي ...
الملفت للنظر حتى الشرطه صاروا يتسابقون حتى يعرفون
قصتها لان كانت غريبه ...عليهم ...
رحت على مستشفى السجن شفتها تريد تطلع
لكن كانت شكل ثاني متغيره شاحبه وكانه
كانت في حرب وخوف الليل كله ..
طلعنا سويه وكتلها اذا متكدرين عادي باجر نكمل
لكن هي رفضت وكالت من يكول اشوف باجر
كانت لازمه بطنها وتتلوه ...استغربت سألتها
ليش ...
كالت كلشي بوقته ...تريد نكمل لو هاي هي ...
ابتسمت ...
وكتلها ياريت بس اكو ....
=شنو ..
=هو سؤال محيرني ..
=اسال ...
=لحد هاللحظه مذكرتي اخوج ..
=..............بنهاية القصه اوعدك تعرف ليش مذكرته
=وعد ...
=وعد من امرأه ميته ...
=نكمل ......

الانحراف دائما تلكي موجود بالعوائل الفقيره الجاهله
سليمه كانت جاهله وضحية ابوها
اللي زوجها من ابن اخوه اعتقاد منه يكسب ثواب
ونسى انو هي بنيه والها تفكيرها الخاص
وضحية نفسها الي امرتها بالسوء
ومعرفت شلون تسيطر عليها ...
امي استمرت تضغط عليه وعلى اخواتي
وحتى علاج لابويه ماكو اكل ماكو
ابويه كان يتألم واني اتفرج
اسمع أنينه الهادئ يحاول يضمه حتى ما اسمع
لكن حبي اله فضحه كنت حاسه
رحتلها توسلت بيها
دنكت على رجلها بستها بجيت لكن رفضت
وعاندت وكالت والله لو احس بيج صادقه
جان عفتج بس انتي عصه عوجه متسمعين
الكلام وجنيتي على نفسج ...ليلان حكمت ...

اسبوعين بعدها ابويه اتخربط قررت اوافق
لان بعد مابيها مجال اخلي اكثر يتالم
وحتى اخلص من سوالفها
من سمع ابويه موافق بجه ولزم ايدي وشاورني
وكلي ولج بويه اني مأمن اخواتج يمج شلون تعوفيهن
كتله لا يابه ما اعوفهم كل يوم اجيهن ...
اجه العريس حتى اسمه ما اعرفه واخذني للمحكمه
وعقدنا وهناك عرفت اسمه لازم
شكله غريب اسود سمين شعره اعكش لابس
ساعه ومحبس ذهب رجعنا ع البيت امي
تباركتله شو هاي حظنته وبوسته وهو بوسهه
استغربت شنو السالفه وشنو الموضوع
ماكو هيج ميانه
طلعني صعدني بالسياره سمعته يكللها ام زينب الخميس
اريد من هاي الكعده الزينه انتي وام سماء
خفت منه ...
حرك السياره وابتعدت عن بيت اهلي ومدرستي وحلفت بعد
ما اجي لبيت اهلي الا جنازه مشيوله بتابوت ...

دخلت على بيتهم بي خمس نسوان ام عجوز وبناتها اربعه
كبار بالعمر وممزوجات شكولهن يخوفن شكول السحارات
البيت كبير عريض مأثث
نظيف ...ولا وحده سلمت ولا وحده هلهلت
وامه ...كالتله هااا ولك جبتها دا فوت جوه عندي حجي وياك
عافني وراح على امه واني واكفه وبيدي علاكه بيها ملابسي
ومنتظره يطلع من غرفة امه
نص ساعه طلع واخذني للغرفه .....

.....هنا سكتت ونزلت دموعها تركتها تبجي على راحتها
ولا تنفست كانت تبجي بمراره ....لحظات هدات وكملت كلامها ...
حياني وياه اقل مايقال عنها جحيم ...بعد يومين من العرس اكتشفت هو متعهد حفلات يجيب بنات راقصات
لو يجيبهن لليدفع فلوس
ومزوج ومطلك اثنين اقصد وحده شارده والثانيه مخلف منها
بنيه وتاهمها ويه واحد واهلها قاتليها وماخذين الابنيه يربوها
لان هو شمرها عليهم ....
..كان كل يوم يجون ناس شكل
هذا ابن عمنا ويدخل للغرفه
وهذا ابن خالنا ويدخل للغرفه
وهذا صديق العائله (ليلان حكمت )
وهذا من العشيره
وصواني المشروب والبيره تدخل للغرف
ولازم سكير يكبسل قمار كل رذيله يحملها هو
ذبوا عليه شغل البيت
من الصبح لليل حتى الخبز اكعد انظف واذا احجي
ينكلب البيت جهنم ..
يقفلن الحمام حتى ما اسبح ومن اشتكيله
ينزع الحزام يضربني بي ...
ومره اخته رادت تغسل واني جنت اغسل شعري بالمغسله
كالت وخري
كتلها هسه بعدني ما رافعه راسي جان تدفع راسي
بالمي مال المغسله وتخنكني ...
كوه خلصت روحي منها ....

لازم يطلع بالليل ميجي الا بالاربعه الصبح
سكران ويريد عشه او ريوك ولازم ابقه منتظرته
اذا اشتكيت يضرب لو يجيب بطل المشروب يفرغه كله
لو على راسي لو بحلكي ...
ضاكت كلش ونيني مايسمعي الا الله
ادعي ميصير عندي طفل ....ليل نهار لان ما اريده يطلع
مثل ابوه ...
سليمه ماسالت عليه ابد وكانه اني نعجه وسلموها للجزار

للقصه حديث اخر ....انتظرونا ...

تعليق +تصويت + متابعه