ما بيدي

البارت -١-

#ما_بيدي

بقلم Nona Queen

معاكم الغراب زي مااتعودت اخواتي يقولو لي بنت شينه مابيختلفو فيها اتنيين ماعندي اي مقوم جمال واحد سبحان الله انا الوحيده الطلعت بين اخواتي الاربعه كده من وانا صغيره اتعودت على الكلام الجارح البقول لي كمون والبقول لي البومه 😖اخواتي كانو بستعرو مني لمن يجو صحباتهم كانو بينكروني عديل وبيقولو دي بت الشغاله امي الوحيده الكانت بتقيف معاي وبتحبني ودايما بتقولي انتي ستهم واحلا وحده فيهم انتي بتي الحنينه برغم شناتي وقباحتي المابتتقابل دي كانت روحي حلوه زوله طيبه ووناسه وظريفه القعده معاي مابتزهجو منها كبرت ودخلت الثانوي ولسه وكبرت معاي اوجاعي صحباتي كلهم كانو بحبو ويتحبو الا انا قاعده بس عشان احل مشاكلهم 😅ياخ مره اتنين ماشين بوراي والشارع فاضي وبدو يقولو كلام كعب شديد ونو لي على نيه كعبه انا قلبي وقف لمن عاينو لي في وشي واحد قال للتاني ارح ارح رزقنا قدام دي تبقى علينا سيئات في الفاضي ساي 😅دخلت الجامعه وكنت البنت الشاطره البيصاحبوها الاولاد بس للمصلحه😊كان نفسي زول يحبني زول يشوف قلبي واخلاقي مايحكم علي من بره بس 💔اخواتي كلهم عرسو حتى الاصغر مني وانا اتخرجت من الجامعه وبقيت لاشغل ولا مشغله حايمه بين بيوت اخواتي بس العايزه تلد بمشي اخدمها والجاينها نسابتها بمشي اقيف معاها والعيانه بمسك ليها بيتها كنت خدومه شديد وماطالبه منهم غير الكلمه الطيبه بس مجرد مامصلحتهم معاي تنتهي يرجعو للتجريح وكلمه بايره ثبتت علي من بدري ماحصل اتقدم لي عريس ولو بالغلط ساي😅وفي يوم مفترج كده جاني عريس ماصدقت وطرت من الفرح واخيرا زول حس بي اخيرا حافرح زي باقي البنات واجيب عيال امي فرحت لي من جوه قلبها وابوي قال الا يجي العريس ويشوفو العريس كان جايبو لي جارنا ده ود عمو، جارنا قال عجبتو اخلاقي وخفه دمي وماعايز يضيع العريس ده مني اها اتجهزت من الصباح شي بيض بالبن وشي زبادي والشعر مشيت كويتو عند جارتنا عواطف قلت اجتهد شويه في خلقتي دي كان اتسمح وابقى زي البنات المسا لمن جا ختيت مكياج بسيط ولبست فستان بسيط اخواتي اول ماشافوني قالو لي تعبانه في الفاضي من الصباح ياكي انتي زاتك 😩كسرو بخاطري بعد تعبي ده كلو بس يلا مامشكله كنت مركزه مع العريس الجاي اكتر منهم سمعنا صوت العربيه والرجال دخلو الصالون وانا بيجاي قلبي يدق زي الدلوكه قعدو مسافه ضيفوهم وجو علينا في البرنده انا جريت على الغرفه جري

يتبع