بعد انتهاء الحفل ومغادرة جميع الأشخاص والكل عاد الى بيته سجاد احتفله بنصره الثالث مع موظفيه كالعادة منير اخ زوجه سجاد يشير الى سجاد لتكلم على انفراد فيدخلون الى المكتب ويغلق الباب
منير : سجاد سولفلي شنو الموضوع
سجاد : ياموضوع ؟
منير : موضوع الشراكة وذوله الناس منين تعرفهم والبنيه صاحبة الشركة ليش طلعت تبجي
سجاد : شي ماضي ومااحبه اذكره خلينه بالحاضر افضل
منير : سجاد احجي اريد اعرف شنو الي ديصير لان بديت اخاف منك
سجاد : لا لاتخاف مني اني مااذي احبابي
منير : اي معناها اني راح احجي كل الصار للملك وهي تتفاهم وياك لان مثل ماانته عندك حصه بهاي الشركة اني وياها هم عدنه حصه بيها ولازم نعرف شديصير
سجاد : ديربالك يوصل الحجي للملك والا...
منير يقترب منه ليقف بوجهه قائلا : والا شنو
سجاد : منير انته مثل اخويه الكبير ومستمد قوتي منك لتحاول تخرب علاقتنه بشغلات من ماضي حياتي
منير : اوك بس ديربالك سبب ضرر لختي وابعدها عن اللعابك القذره
سجاد : اوزن كلامك منير ترى انته واختك عايشين بفضلي اني الي وصلت الشركة لهاي الحالة من التطور ولو باقية عليك كان من زمان فلستها وفاتح جنبر جكاير وعلج تبيع
منير : ماشاءالله استاذ سجاد بديت تعير شي حلو انته فتحت على روحك باب مراح ينسد ابد
سجاد : شراح اسوي يعني
منير : راح اشوف بعينك شراح اسوي
يخرج منير من الشركة وسجاد يجلس في كرسيه حائرا متأففا
( بيت ازل )
احمد يتحدث مع ازل قائلا : جان عندج علم بي
ازل : لا بالأساس المفروض اني اسالك هذا السؤال مو انته واشلون كدر يطب بيناتكم ويدخل لعد جنت اسوون اناه وبابا الله يرحمه
احمد : ابوج جان شاك اكو واحد بظهره يدعمه وحنه متوقعين راح يظهر بيوم الاعلان بس ماجنت متوقع هو حبيبج السابق
ازل : لا تكول حبيبي السابق افتهمت ديربالك
احمد ( متعصبا) : لعد ليش طلعتي من القاعة تبجين ها ليش اكيد حنيتي ورجعتلج ايام الحب والذكريات
ازل : احمد كافي الى هنا وبس بديت تحجي حجي ماله طعم تلفت اعصابي ومتحملت وبجيت وطلعت لاشك بيه ديربالك كلشي ولا الشك شي ماضي من حياتي وانتهى وكلمن مشى بدربه مثل ماانته عندك ماضي اني هم عندي ماضي الى هنا وخلص
أحمد : ويمكن هو الي قتل والدج مو بعيده يعني
ازل : لا مستحيل سجاد ايسوي هيج شي لان اعرفه شنو
احمد : شفتي مو كتلج رجعلج الحنين اله
ازل : اهووووو يعني انته راح اتحاسبني على كل كلمه اكوله بحقه يابشر اني عشت ويا اربع سنوات واعرفه شنو واعرف بيمن يفكر وضهوره بيوم الاعلان جان ليفلت النظر وحتى انته حضرت جنابك زوجي المبجل تتعارك وياي علموده ويصير مشاكل بينه وهو هذا الي يريده فااحنه ليش نطي نقطة ضعف يخلي يهاجمنه هو سوا كل هذا حتى بس ينتقم ويوصلي بس مراح اخليه يحصل مراده وهسه اشوف
( بيت سجاد )
يدخل سجاد الى البيت تتلقاه ابنته قائله : بابا حبيبي
ليحضنها ويقبلها ويحملها ، زوجته جالسه متجهمه الوجه تنظر اليه ( متجهمه = مطنكره )
سجاد ينظر اليها قائلا : اليوم الجو مغيم خير ان شاء الله
زوجته : ماما رهف روحي لغرفتج العبي
رهف : خليني وي بابا شويه
زوجته : عندي موضوع وي بابا ارد احجي ويا مال كبار
رهف : اوووف شوكت اكبر
سجاد يبتسم ويقبلها قائلا : يالله بابا روحي لغرفتج اشويه واجي العب وياج
تذهب ابنته الى غرفتها يجلس في مقابل زوجته قائلا : اي شنو الموضوع
زوجته : منو ازل هاي ؟
سجاد : ابنيه جانت ويايه بالجامعة ودرسنه بنفس الكليه وتخرجنه بنفس السنه
زوجته : بس هيج
سجاد : لوين تردين توصلين بالظبط
زوجته : هو اني لو انته لوين تريد توصل داخل شراكة وي حبيبتك السابقة لازم حنيت لايامك وياها
سجاد ( متعصبا ) : ملك الزمي لسانج وعرفي اشلون تحجين شي ماضي بالنسبة اليه وانتهى واني ماافتح دفاتر قديمه ولا ادور بالماضي عندي زوجه وبنت وحامد الله وشاكره والافكار الي بالج مستحيلة اصير افتهمتي
زوجته : حلو خوش حجي لحد الان ليش دخلت شركة وياهم بدون ميدرون
سجاد : حتى اوسع نفوذنه واسم الشركة تكبر وكلما صاروا شركائنه هواي كلما زاد الربح وهاي كل المسئله
زوجته : لا مو كلها وجوابك بي نقص ماكتلي ليش دخلت بدون علمهم واستخدمت شخص غيرك
سجاد : لان لو دروا بيه اني مراح يقبلون عرض الشراكة لان مثل ماتعرفين عدي ماضي وياهم والا اني مااسببلهم اي ضرر
زوجته : وحجيك بالاعلان وازل الي طلعت تبجي من القاعه شتفسره هذا
سجاد : عادي ذكرت جزء من حياتي ومعاناتي وهلي رساله وصلتها للحاضرين
زوجته : قصدك للازل مو الحاضرين
سجاد : انتي شلزكتي بازل ازل ازل كافي كتلج الي بالج مستحيل يصير
زوجته : اني الي بالي مو ترجع علاقتكم سوا اني الي بالي راح تنتقم على الي سوو بيك هذا حجيك كله مامقتنعه بي لان اناي رجلي واعرفك بشنو تفكر ومن باجر انزل وياك واداوم بشركة
سجاد : نزلي عيني نزلي واني اكعد بالبيت واله اكلج اروح اعرض خدماتي على حضانه مال اطفال وارضعهم من يبجون اني شنو وجودي لعد اخوج شنو وجوده
زوجته ( تنهض من مكانها قائله ) : شكو بيها روح رضع الشغل مو عيب واني الي حصه بالشركه مثل ما الك انته ولا تنسه اهلي الي لموك من الشارع وصرت هسه صاحب املاك بفضلهم
سجاد ينهض من مكانه ويضرب زوجته كف ( راشدي)
زوجته : تضربني سجاد
سجاد : واكص لسانج كلشي ولا دوسين على كرامتي بفضلي هسه انتوا عايشين بهذا العز ولو ما اني جان هسه انتوا مالكم اي وجود بالمجتمع الراقي بفضلي اني الي وصلتكم واني الي تعبت واشتغلت واكدر هسه اشتري حصصكم انتي واخوج واشمركم بشارع هذا الحجي خلي ترجيه باذنج وكليله لخوج هم هذا الكلام وممنوع توصلين لشركه افتهمتي
يغادر البيت غاضبا
(بيت ازل )
ازل تتحدث مع فاديه قائله : معقولة سجاد هو الي قتل بابا ؟
فاديه : سجاد ميكدر ياذي نمله انوب يقتل بشر لا مستحيل وبعدين ابوج مو عند اعداء هواي اكيد واحد منهم ومنو خله عاي الفكرة بعقلج
ازل : احمد هو الي كال
فاديه : من الغيره كال هيج لتفكرين بشي سلبي باجر روحيله لسجاد انهي الشراكة واشتري راحه بالج
( قبل يومين )
سجاد يتحدث مع فاديه قائلا : هسه بدت مهمتج الجديده
فاديه : وهي ؟
سجاد : ترحين للازل وضلين يمها بالبيت مثل ضلها لان بيوم الي اضهر كدامها وكدام زوجها راح زوجها يكلها هو الي قتل ابوج ويخلي هاي الفكره براسها لذلك انتي منعيها وكليلي بالاحداث اول باول شنو الي يصير بالبيت
فاديه : يعني جاسوسة تريدني
سجاد : ليش مو مساعده حتى مننكشف ونبعد الشبهات عنه
فاديه : حاضر
( الحاضر )
ازل تدخل الى شركة سجاد تقوم بفتح باب مكتبه الخاص دون ان تاخذ اذن من السكرتيره شذى
شذى : ست لحظه ميصير ادخلين بدون موعد
سجاد ينهض من كرسيه قائلا : اتركيه خلص واطلعي وسدي الباب ، تفضلي ست ازل
ازل : اسمع اني مجاي اكعد واشرب كهوه وياك الاتفاق من هسه اعتبره ملغي
سجاد : اوك ليش متعصبه لعد بس لازم ادفعين ثلاثه مليون دولار لان قيمه فسخ العقد هذا شرطه عندج ادفعي ماعندج راح تستمر الشراكة
ازل : انته شغيرك هيج ها
سجاد : يعني الواحد ميتغير للافضل لشوكت الشخص يبقى بمكانه يراوح لازم يجي يوم ويطور من نفسه واني طورت نفسي خاف تغارين مني
ازل : لا والله مو اغار منك بس اكول خطيه تعب واشتغل حتى بس يريد يوصلني ويتقرب مني وهاي مسرحيتك كلها سويتها علمودي
سجاد : لا غلطانه بس الي عدها نقص بنفسها تكول هيك حجي وانتي محشومه من النقص , وهذا شيك عربون بعشره مليون دينار تنطون رواتب الموظفين خطيه اصحاب عوائل
تمسك ازل الشيك تمزقه وترميه بوجه سجاد قائله : خلي على روحك راح نلتقي من جديد ، سلام
سجاد : واني منتظر لقاءنه
بعد خروجها من المكتب سجاد يقوم برد فعل برمي المزهريه على الارض متعصبا من كلامها ورده فعلها
( في السجن )
احمد زوج ازل يزور احد الأشخاص في السجن قائلا : بعدك على شغلك لو بطلت
الشخص : الشغل شغل منبطله لمن الله ياخذ هلروح كول منو الشخص الي تريد يقابل ربه
احمد يخرج صوره سجاد من جيبه قائلا : هذا
الشخص : ماشاءالله متغير عن قبل ست سنوات
احمد : هذا شغلك الي ماكملته وبقه ناقص
الشخص : كتلك تريد اخلص عليه بس انته رفضت يعني الذنب مو ذنبي
احمد : شفته اختفى وابتعد عن الناس الي احبهم وبتالي خسر والدته اتلقى اقوه صدمه بحياته
الشخص : هلمره هم تريده بانفجار لو اغتيال لو عبوه
احمد : اغتيال اريد جسمه مطرز برصاص اطرز بحيث يصرفون عليه خيوط بكد الدنيا
الشخص : يعني بهذا كلامك داس على طرفك
احمد : مو اي طرف ، طرف المفروض يبقى بعيد عنه من زمان
الشخص : هاي العملية تكلفك هواي
احمد : حدد السعر واني موافق
الشخص : مليونين دينار واريدهن بحسابي بالمصرف وبوكت مااشوف الحساب انضاف راح ابدي العمليه
احمد : هاي هي متفقين
نهاية البارت السادس
