القاضي و الشاهدة

12

ضليت متصنمة بمكاني فتح التليفون شاف نفسة محضور من جهات الاتصال ابتسم ابتسامت شر وگال
-اتحضريني مو ..
- اي احضرك انت شنو حسبالك اخاف منك .
- استغفر الله رغد نعلي الشيطان ما اريد امد ايدي عليج لا اتحاولين اتنرفزيني هذا الشي مو بمصلحتج .
- عادي اضربي علمود اكرهك .
- آنتي اشبيچ شنو الخبلچ؟!
- لا وتسألني .. يعني ما تعرف شنو بية مثلاً ..ماشي اذا ما تعرف اني اگولك اكو عروس بصباحيت عرسة ايعوفهة رجلهة وايروح ؟
لو اكو عروس ايسافر رجلهة وايعوفة حتة ما ينطيهة خبر قيصر انت جاي اتخليني اكتشف انو عقلي چان صَـَـَـَـَـَ(✓)ـِـًـِــِـًـِـح .
- اشحال ما آنتي بأذنج سمعتي جنان وهية تحجي وياي ومن رحت لبيت اهلهة عمتي گالت اليوم ارد اروح للبصرة اگدر اگول الهة لا .
- اكيد ما تگدر اتگول لجنان وامهة لا بس رغد طبهة طوب عسة ما اتموت اهم شي جنان واهلهة انت شنو من رجال لا وجاي ايزمخ علية اذا انت رجال روح افرض شخصيتك على مرتك ذيچ مو علية اصلاً ولا احد من اهلك يحترموك وسبب مرتك انت شنو مو بشر كرامتك فوگ كلشي بس علمود مصلحتك مسحت كرامتك بالگاع .
- مشكور رغد اذا  هذا ضنج بية فأني اعتذر منچ والله وياج .

عافني وطلع... خرب حضي اشحچاني اني ما ابطل من هل اللسان رگضت ورى لگيتة طالع ايريد ايأجر سيارة گلت لبو السيارة ميحتاج خوية تگدر اتروح حرك ابو السيارة.

- قيصر بس تعال نتفاهم جوة .
- رغد رجعي للبيت لا اسوينة فضايح .
- اذا ما تجي وياي الناس كلهة راح تحجي علية لان واگفة وية رجال بنص الشاعر .
-ما اجي ولي من وجهي .
- اذا ما تجي راح الحگك وين ما اتروح.
- رغد رجعي لا اسحلچ بالشارع للبيت والله لان دمي ضل ايفور .
- اسفة حبيبي والله من قهري هيج حجيت اكيد ما اقصد لخاطري تعال نتفاهم جوة الناس اتباوع علينة .
- روحي واني اجي وراج .
- وعد ؟
- دروحي لا اغير رايي .

رجعت للبيت ورة تقريباً عشر دقايق دخل قيصر حاط ادي بجيوبة وگال شنو اتريدين ارد اروح .
- على كيفك وياي قيصر ترة مو قصدي لا اتكبر القصة.
- شكبر يا رغد وانتي امسويتني مو رجال حرام عليچ آنتي والدنية علية والله ثم والله لو اكو حل واخلص من جنان واهلهة چان سويتة عسة ما اصير حافي بس ما اگدر ليش ما تفهمين ما اگدر همة دورولهم على نسيب محترم ولگوني اني بكل بساطة اتريديهم يتقبلون فكرة طلاگ بتهم ترة همة مو حباً بية او بتهم بس خاف واحد ايعيرهم وايگولهم ليش بتكم اطلگلت .. صارت خلافات وية جنان بعد ما ولدت بنتي زينب گتلهة( اسلوب تعاملج وية اهلي ما يطاق وخاصة وية ودع واذا ما اتعدين اسلوبچ راح نتخارب )
ابيومهة خافت وگالت لا انشالله تتحسن علاقتي وياهم ورة يومين اتغيرت جنان مية واثمانين درجة واسلوبهة صار وياي كلة نتر فضربتة بيومة اهلة جانو بعدهم بالبصرة فراحت زعلانة ودة علية ابوهة فسولفتلة على المشاكل كلهة وگتلة بنتك ضلت تتمادة علية بحجية .
اعرفين يار رغد شنو رد علية بيومهة ؟
- شنو ؟
- گلي (اذا اتمد ايدك على بنتي مرة ثانية اكسر اديك وابهثل حالك يا قيصر لا تنسة نفسك الي سواك هوة اني بس علمود بنتي واذا بيوم فكرت اتعوفهة موتك راح ايصر اقربلك فهمت يا قيصر )
يا رغد اتعرفين شعوري بذاك اليوم شنو والله والله رجعت للبيت ظليت ابجي من رجعت للبيت حسيت كرامتي راحت والحقيرة جنان استغلت هذا الموضوع ويوم عن يوم ازيد الكل يسأني ليش تتحملهة واتذل روحك الهة والاهلهة بكل بساطة يا رغد علمود اصعد بمساعدتهم ومن اصعد قسم بالله الة اطلع بيهم القضة والمضة .
- لا تقهر روحك ...
- رغد الحجي الي گلتي سامعة من اهلي كلهم ومن اصدقائي واسكت بس منچ ما اتحملة ولچ آنتي دنيتي كلهة تدرين اني من احجي وياچ او من اجي اهنا انسة كل همي بس آنتي راحتي بدنية رغد لا اصيرين آنتي والدنية علية .
- قيصر احلفلك برب العباد مراح اتشوف  بهل بيت غير الراحة وعمري مراح احاسبك لا على دخلة ولا على مشية ولا اكدر خاطر يوم .
- اعشگچ اني .
- واني هم احبك.. جوعان؟ .
- اي والله روح ارتاح وبدل هدومك على ما اسوي العشة ونگعد انسولف .