عشيقي 🤩🤩⁦🇩🇿 كرونيك باللهجة الجزائري⁩⁦🇩🇿⁩

الجزء الثاني : إختفى

تبادلنا الارقام وديماريت  طريق كاملة وانا انخمم بينو وبينها كان يكفر عليها وقدامي قاللها الشمس عليك 😨 كان في قمة الغضب وقدامي قالي لالا اختي.... يارب هذا الراجل كيفاش مبني كيفاش يقدر يكون مقلق وفي نفس الوقت هادي
وصلت لباب الباطيما انا طالعة نلقا طاطا اسيا هههه جارتنا قديمة تسكن مقابلتني في الطابق الثاني ماما كانت تحبها بزاف وهي ثاني ديرلنا الرشتة كل ما كنا انجو لهاذ الدار حتى وانو ما كناش انجوها بزاف بحكم عندنا دار اخرى كبيرة غب في لابيار
اسيا :راكي عايشة وينك يابنتي مانيش انشوف فيك
انا: والله غير اهنا طاطا اسيا وش راكي
حكمت عليها القفة وجينا طالعين الدروج
انا:طاطا اسيا علاش ما تقوليليش كي تكوني رايحة تقضي ياك علابالك راني غير قاعدة
اسيا:مانيش موالفة نقضي الياس وسماح موالفين يجيوني ويقضولي(الياس وليدها وسماح مرتو) لما سماح عرس خوها ماحبيتش انديرونجيهم
انا: طاطا خسارة عليك عودي قوليلي ودخلت معاها حطيت القفة في الكوزينة وقلتها بقاي على خير طاطا
اسيا: تغديتي!!
انا: لالا مش حابة ناكل
اسيا: والله غير تتغدي معايا ولا انا ثاني ما نتغداش
انا :طاطا والله خابث قلبي وحد ضربلي الطونوبيل رهجني ههه في قلبي خليني انروح بلاك ضرك يعيطلي
اسيا :يعطيه غمة هههه
انا:حبيت انبدل sujet قلتلها شكون رح يتزوج في خاوة سماح
اسيا: حميد pilote ياك تعرفيه
انا: اه en fin رح يتزوج حميد و هناء
اسيا: هيا تروحي معايا
انا: طاطا من موت ماما خلاص انا ولعراس كاش ما بقالي نزها
اسيا: بوووووه علاش رح ترجعيها كي تحزني en plus
  ماماك عندها اكثر من عام ملي ماتت
انا: توحشتها 😭😭طاحتلي دمعة سخوووونة ورحت لداري دخلت la salle de bain وقعدت نبكي خرجت مباشرتا لتيلفون والو ما لقيت والا اتصال اووو لبست نشفت شعري رقدت نضت على 7 تاع لعشية انشوف التيليفون
ثاني والو يا ربي وهاذا كيفاش اندير انا مع هذا نستنى يعيط او نعيطلو وترد عليا الدبة انتاعو😒😒😒 حطيت التيليفون وقلت في قلبي اليوم السبت اكيد غدوة يعيطلي في النهار كي يروح للخدمة باين يخاف منها
كيما كان الحال صبح الاحد ستنيت ساعة وزوج ووالو جات 16:30 تاع لعشية انعيطلو نصيب تيليفونو مسكر وليت كل ساعة نعاود والو الاثنين كيف كيف
الثلاثاء صباح اول حاجة عيطتلو مزال مسكر محيت رقمو قلت الرخيس عطاني رقم غالط لبست وخرجت رحت للميكانيسيان خدملي الفار و رحت لطوليي ثاني خدمت la peinture المهم لعشية باش دخلت لدار اول ما دخلت طب طب الباب
انا :سماااح اهلين مرحبا وش راكي
سماح: بخير وانتي وش راكي يعطيك الصحة راكي طلي على ماما اسيا والله راني حاصلة مع عرس حميد جاونا لحباب  من كل بلاد راكي عارفة عرس ذكر الاول 💑 الفايدة جيت نعرض فيك هاكي l'invitation
انا: مرسييي سموحة اما اسمحيلي راكي عارفة مش حابة انروح لعراس
سماح:  خسارة عليك تفوتك زهوة مع نعيمة عبابسة وحسيبة عبد الرؤوف
انا :الله غالب اسمحيلي  سماح: اسمعي ما تجيش راهي ما تجيش اسيا انا و الياس ما نجوهاش  وانتي احصلي معاها ومع لسانها كي تضيعيلها عرس ههههه
انا :سماااح حرام عليك راحت وخلاتني باي باي ههههه
سكرت الباب قريتl'invitation حطيتها ودخلت لدوش ودائما لازم انشوف التيليفون كاش ما يدخل رقم جديد وااالو
في قلبي خسارة لوكان غير خليت رقمو انشوف بلاك حلو
والله ما علابالي علاش قعد في راسي هذا الراجل مش عارف علاش ما حبش يخرج من راسي انا خلاص
فاتو ليام وانا غير في الدار جاء السبت
نوض مفجوووعة من الباب يطب يطب
اسيا:صباح الخير وينك يا بنتي ثلاث ايام ما خرجتيش من دارك زعما راكي تاكلي راكي عايشة والله عبالي ماكيش اهنا حتى خرجت اليوم شفت الطونوبيل
انا: طاطا كي النوض ولا لالا علاه كيف كيف
اسيا :اليوم العرس وش بيك السيتي
انا: اه انسيت  طاطا ماعليش نديك طاطا وانا نا نروحش نوصل ونرجع
اسيا: وش راكي تقولي تروحي انروح ما تروحيش ما انروحش 😨😨
انا :علاه طاطا والله ما قادرة
اسيا: نوضي نوضي انتي لوكان انخليك 2020 مل تخرجيش من هاذ الدار راني رايحة للحمام هيا تروحي معايا وانروحو  للحفافة ولعشية تروحي بسيف عليك للعرس
انا:طاطا 😓😓😓😓😓
طاطا: خلاااااص ورحمة بريزة (ماما)ما ترديني
نضت وجدت حوائج الحمام و هبطنا لحمام ومنها قلتلها لازم انروحو لسيدي يحي نشري robe 👗 نلبسها في قلبي بلا جدها نشري robe لي كانت رح تشتريها الدبة وما جاتهاش هههههه ضحكت الضحكة الصفراء وصح شريتهاune  robe droite noir mini فيها عند الرقبة استراس كبير حجر شراوفسكي حر تشعل شعيل هههه على الاقل ما ضيعتش الوقت في التحواس شريتها ثاني sandales vert هكذا مع انا عينيا خضر وشعري اكحل متاكدة يجي شباب
رحنا للحفافة في لابيار هاايلة نعرفها درت شعري endulé  و و طاطا اسيا ثاني خدمت وماكيات انا قلتلها لالا انحب اندير وحدي ماكياج
وحنا لدار لبست جاتني la robe تهبل مكييت سااامبل درت غي كريون الاخضر في عينيا غسيل شويا الينار وrouge يهبل وخلاص
طبت طبت طاطا الباب
انا: واوووو طاطا تهبلي tu es magnifique
كانت لابسة بدرون ابيض دونتيل يهبل
اسيا: انتي لي راكي تهبلي اليوم يخطبوك
انا: ههههههه
اسيا: غير خلي فرصة للغاشي يابنتي العرس راهو mixte وصحاب حميد غير القيادة وعائلتهم غير الحطات