تائهه بين اوراق الماضي

بارت 38

تائهة بين اروقة الماضي 

البارت 38
ام هيام : انتو تعرفون بية اني يتيمة وما عندي اهل
هيام: اي ماما صحيح
ام هيام تجر حسرة الم : بس الحقيقة الي متعرفوها
اني عندي اهل واهلي ناس معروفين واجاويد
من اهل البصرة
فتحت عيوني مصدومة من كلام امي
كملت: وعندكم خوال وخالات وبيبية هناك واولادهم وبناتهم كلهم عايشيين بالبصرة
باوعت عليها متعجبة من كلامها : زين انتي ليش ما ذكرتيهم النة من قبل وليش  ما عندج تواصل وياهم وشلون متحلمة متشوفيهم كل هاي المدة
ام هيام : صبري علية  اني راح احجيلكم قصتي اني وابوكم وية اهلي
وانتو راح تعرفون ليش هذا الانقطاع وية اهلي
وكعدت ماما تحجيلنا عن قصتها
(((((((((()))))))))) 23

: اني جنت اصغر اخواني وخواتي والمدللة عند اهلي
وجانو ما يرفضولي طلب شنو اريد يجيبونة الي لو جان لبن العصفور الا شي واحد ما حققوه الي وهو رغبتي بالزواج من ابوكم
اهلي ناس اغنياء والله رازقهم من وسعه
وعندهم خير من الله واملاك
بس اهلي بيهم عيب واحد ما يزوجون بناتهم لغريب
يكولون حلالنا ما يطلع للغريب والقريب اولى بي
ومنو هذا القريب غير ابن عمي
الي ما اشتهي بعيشة الله خصوصاً كلبي حب وهوى
اركان من اول يوم التقت عيونة بعيون بعض
جان اركان يشتغل محاسب بالميناء عند ابوي الحجي
وجان ينزل يروح لاهلة بالموصل كل خميس وجمعة
وجانو اهلة ناس على كد حالهم بس كلش طيبين وحبابين بس تعال تقنع منو يا راس يابس من جدكم والا خوالكم المهم اتقدملي ابوكم وطلب ايدي من ابوي الحجي وطبعاً اهلي  رفضو طلبه وخبروه ان بتهم
محجوزة لابن عمها
ظليت الطم وابجي واصيح اريدة
بوقتها امي جانت تهد وتنثني علية وتسكتني وتكلي لا يسمعوج اخوتج ويذبحونج
بس اني جنت فاقدة من كثر ماجنت احب اركان وهو هم يحبني
وسمعت بي جايب شيوخ معروفين من اهل البصرة وداخل لديوان ابوي الحجي وحاجي وية ابوي وكلة
اذا جان خوفكم على حلالكم فانا هنا وكدام العرب والشيوخ راح اوقعلكم وابصملكم حلالها متنازل عنه
اريدها بس بطرك عبايتها
بس مع الاسف ابوي واخوتي رفضو واتذكر بيومها صارت عركة زلم وانطرد اركان من الديوان
ورة هاي السالفة باسبوع خطبني ابن عمي لان الموضوع صار ما ينسكت عليه وحتى يسكتون حجي الناس
فستعجلوا  بخطوبتي  من ابن عمي
عاد اني هنا اجيت اتخبل واستنجدت بأم سامر الخبازة جانت مرة جبيرة تجي تشتغل عدنا وتخبزلنا
انطيتها ورقة وكتلها توديها لاركان بالسوك
وامنتها وذممتها  ما تطلع سري وتفضحني كدام احد لوما شما يصير وفعلاً وفت هاي المرة الجليلة بكلمتها وصلت رسالتي لاركان
وجان مضمونها
(( اركان اهلي راح يزوجوني لابن عمي واني اذا ما اصير الك اكتل روحي وانتحر ولا واحد غيرك يلمسني فهمني شنو اسوي ))
وبساعتها كتبلي رسالة ورد الجواب بيد خالة ام سامر
( شوفي هناء ماكو غير حل واحد  اخذج ونسافر لعند اهلي للموصل وهناك اتزوجج ومحد يكدر يوصلنا
ويسويلج شي فحضري نفسج الباجر من غبشة الصبح واتفقي وية ام سامر تجيبج يم بيت ابو مرتضى اني هناك راح انتظرج ))
وفعلاً لميت كم قطعة ملابس الي  واخذت جنسيتي
واتفقت وية ام سامر جانت متعودة تجي من الفجر لبيت ابوي الحجي تخبزلهم للريوك  اجتي اخذتني ووصلتني على نفس المكان المتفق عليه
اتذكر بساعتها اركان لزم ايدي
وباوع بعيوني وحجة : اوعدج ما راح اخليج تتندمين على زواجج مني
وبعدها سافرنا للموصل لعند اهلة وجانو اهلة ناس حيل طيبين الي يعرفونة عني اني يتيمة من اهل البصرة وما عندي احد هناك بس عمكم احمد يعرف بسالفتي
واتزوجنا وكعدنا ببيت اهله وكان فعلا عند كلمتة  ووفة بوعده وياي وما خلاني احس بالندم من اتزوجتة وبعدين حصل شغل ببغداد
هو واحمد وانتقلو هنا جنت حامل بريام اختج وانتي كنتي صغيرة 
هيام: زين انتي طول هاي الفترة محاولتي تتواصلين وية واحد من اهلج لحتى تعرفين اخبارهم شنو سوو من بعدج او شلون امورهم صحتهم واحوالهم
مامعقولة كدرتي تتحملين متعرفين اخبار امج وابوج من بعدج
ام هيام بحسرة: شنو تتوقعين ما خليت شي ما سويتة لحتى اوصل لوحدة من خواتي او لواحد من اخواني لكن ماكو محد كان يقبل يتواصل وياي
بس ابوكم كان عندة اصدقاء بالبصرة يعرفون اهلي
وعرف عن طريقهم انو اهلي شاعو بين البيوت والاقارب والعشيرة هناء ماتت ودفنوها بالنجف وحتى عندها قبر هناك بأسمها
يعني اني هسة حاليا اعتبر متوفية
من سمعت بخبر وفاة ابوي الحجي  اتحطمت  من بعده لان جان ابوي يحبني هواي
بس من شردت واتزوجت اركان صرت بنظر الجميع
مذنبة وبنية عاق
اباوع لامي جانت تحجي والدمعة تلالي بعيونها
كسرت خاطري صعبة الشخص يعيش محروم من اهلة
وناسة وهمة على قيد الحياة
حالة امي مثل المجرم المنفي لغير بلد غصب عنه هي ما اجرمت كان كل ذنبها هي حبت شخص رادها على حب الله وكدام الناس لكن قسوة ابوها واخوتها وقوانينهم اجبروها ان تسلك هذا الطريق
المحرم عليها وهو الهروب والزواج من وراهم
وبما انهم ناس متشددين فالمسامحة والمغفر شي نادر الوجود عندهم
سمعت صوت هامس يبجي التفتت شفتها ريام
باوعت لامي
: زين انتي هسة ليش فتحتي هذا الموضوع
ام هيام : هو هنا الغاية  شوفي ماما هيومة
انتي تدرين بيا اني ما دايمة الكم
ريام تبجي : لا ماما اسم الله عليج طولت العمر الج
كسرت خاطري ريام متدري بموضوع مرض امي
ام هيام : لا ماما الموت حق والانسان ما يدري شوكت يومه لذلك اني جنت افكر بيجن من بعدي شلون راح تعيشن ووية منو باوعت لبيت عمكم احمد  رجال تعبان
وعندة كومة لحم بركبتة وضيفي عليهم نبراس الي جاي يحوم فوك راسج حتى يتزوجج فما بالج من يشوفج وحيدة ومالج سند ولا اهل
هنا بهاي الكلمات قضت امي على اخر ذرة تماسك
بگلبي مكدرت استحمل اكثر انهاريت بالبجي
بدون وعي شمرت نفسي بحضنها وكأنما اريد استمد منها القوة بس مع الاسف كانت محاولة عقيمة ان تطلب
القوة من شخص شارف على الانتهاء اشكد شعور صعب من تشوف معاناة الاشخاص الي تحبهم كدام عينك وانت مو كادر تسويلهم شي لحتى تزيل عنهم ولو شيء بسيط من الالم
اخذتنا اني وريام لحظنها وشمتنا
ام هيام: لا هيام ما اريد اشوفج ضعيفة اني حجيت حتى تتهيئون للحياة الجديدة الي اريدكم تعيشونها
مسحت دموعي وركزت وية كلام امي
ام هيام: سمعوني زين اني اتصلت على خالكم راضي اخوي الجبير
كدرت احصل رقمه من صديق اركان الي ساكن بالبصرة هو نفسة الي جان يوصل لاركان اخبار اهلي
صحيح من اتصلت على اخوي راضي  وعرف بية اني هناء اختة
انفعل وظل يصيح علية وانكرني وكلي ماعندي اخت اسمها هناء بس  غير وحدة واتوفت من زمان
(((((((())))))
هناء بتوسل : خوية اني بعازتك الزمن احوجني الكم
راضي بصوت خشن غاضب وكأن اخته هيجت الجرح المدفون صارلة سنين
: ولج هناء انتي شكد صلفة ووكحة والج عين جاية تعلنين وجودج يمنا ولج انتي دمج مهدور وكلنا حالفين دين قسم بس نشوفج نذبحج
هناء: خوية ما يحتاج الله اخذ حوبت قهركم مني واني هسة مريضة بمرض خبيث مامنة شفاء وزوجي اركان اتوفى
من سمع بية مريضة ومحتاجتهم شوية حسيت بصوته شوية لان وبدة يتجاوب وياي
راضي وحافز الفطرة بين الاخوة : كولي شمحتاجة
اخذج لدكتور اسفرج للخارج تتعالجين اي شي بس كولي انتي وين هسة وانا جايج
هناء : لا خوية ما يحتاج اني ايامي صارت معدودة بس كل الي اريدة منك  اامنك على امانة
راضي مقهور من اختة وعليها وعلى حالهة اي اخ ما راح يسكت من يشوف اختة بعازة وتعبانة
: آمري وان شاء الله تلكيني موجود
هناء: خوية عندي ثنين بنات شابات ما طلعت من الدنيا
غير بس بهذني الثنين وخايفة عليهن من جور الدنيا ومن بعد عيني وين ينطن وجهن واهل ابوهم حالتهم فقيرة كوة مدبرين عيشتهم كل الي اريدة منك تاخذهن تحت جناحك بحمايتك واكون ممنونة الك وهذا فضل ما راح انساه الك
راضي: هذا هو بس كولي انتي وين بالموصل وانا اجيج واجيبج انتي وبناتج للبصرة
هناء: لا ما يحتاج اني راح اجيب البنات واجيكم
راضي: بس هناء لحظة ترة كل اهلنا والعشير والناس تدري بيج ميتة فمن راح تجين راح تهزين سمعتنا من جديد انتي تعاي هلة بيج بس ما اكدر اعلن عن وجودج
انتي وبناتج يعني تجين يمي بالسر
هناء: ادري بيك انت هسة جاي تدوس على اعصابك
وكرامتك وراح تقبل تستقبلني اني وبناتي عندك وانعم الله عليك اني ما رايدة شي غير بس اموت يم اهلي
سمعتة جر نفس عميق
راضي: كولي شوكت ناوية تجين حتى احضرلج بيت واجهزة الج ولبناتج
هناء: ان شاء الله بنهاية هذا الاسبوع
راضي: يالله ان شاء الله انا انتظركم وهذا رقمج مو ؟
هناء: اي رقمي