تائهه بين اوراق الماضي

بارت 92

تائهة بين اروقة الماضي 

البارت 92
جان الكل موجود ضاري ضرغام وخوالي حسن
وراضي ومؤيد وخالتي رحاب
وبيبي خاجية كاعدة: خير يمة راضي شنو صاير شي
راضي: يمة عم البنات هيام وريام داز علينا ناس
ويكول راح اجي واخذ بنات اخوي
لان انا ما كان عندي علم بوفاة امهم وبنات اخوي يرجعن يعيشن عندي
كان كلام خالي مثل الصاعقة وكعت على راسي الي جنت خايفة منه صار معقولة وصله خبر وفاة امي لعمو احمد
صرت اباوع على الوجوه
والتقت عيوني بعيون ضرغام الي جان هو بالمقابل يراقب ردة فعلي
الحجية خاجية: يمة راضي گول بنات اختنا يبقون عدنا واحنا ان شاء الله ما نقصر وياهمً
راضي: حجية لا توصين حريص كلت للرجال هذا الكلام وزدت عليه
وكلتله البنات عايشات عدنا بخير ومرتاحات واذا گلبه ما مرتاح من يمنا يجي يشوفهن ويطمن عليهن وهو يسألهن بنفسه
بس الرجال كال خوية عمهن كال راح اجي اخذهن و انتظرمنك الرد يعني مبين ما بي مجال
يتنازل عن بنات اخوه
الحجية خاجية : زين يمة راضي اعرض عليه فلوس
حسن : شبيج يمة شنو مو عيب هذا الحجي ترة البنات يعتبرهن مثل بناته قابل يساوم عليهن وين كاعدين التفت علينا خالو حسن سالني
حسن: بوية هيام عمجن شلونة وياكم من جنتو عايشين يمهم بالموصل
عقدت حواجبي شنو يقصد بالموصل
اهوووو خوالي حسبالهم احنا بعدنا عايشين بالموصل هاي شلون فاتتني لعد امي شنو ماحاجيتلهم عن سفرتنا لبغداد واحنا ببغداد عايشين يمكن حتى هذا الرجال صديقهم الي بالبصرة مكايله ابوية من انتقل لبغداد زيادة بالامان اهووو يالله هسة هذا مو موضوعنا
هيام: هااا لا عمو احمد كلش حباب وزين ويانة وما يوم
سمعنا كلام جارح بالعكس بوفاة بابا هو الي وكف النا
التفت على الحجية خاجية: هاج يالله يعني تكلج عمي خوش رجال بأي حق نطالب بالبنات
الحجية خاجية والحزن بين على ملامحها
: شلون يمة يرحن من بين ايدية جا يمة راضي انت مو كلتلي هناء امنتهن عندك
راضي دنك: اي يمة هي كالت امانة وانا ما راح اقصر وياهن بس الاصول تكول الاولية للعمام مو النا
عرفت من خلال كلام خوالي انهم ما بيدهم شي يسونه علمود يعارضون عمي احمد من يجي ياخذنا
حسيت على ايد ريمة لزمت ايدي التفتت عليها
وحجت بصوت ناصي
ريام: هيام شنو يعني راح نرجع هناك لبغداد يم نبراس
هيام : اشششش نصي صوتج لا يسمعونج
راضي: خالو هيام بس سؤال انتو تردون تعيشون وية عمكم
جان السؤال صعب والاجابة اصعب اذا كلت اريد ابقى هنا وما اتمنى ارجع لنبراس واعرف شنو راح يكون
النتيجة من يجي نبراس وعمو احمد ويطالبون بينا
وبساعتها خوالي راح يرفضونهم وتصير مشاكل لا الها ولا الها اخر   واخاف نبراس يسويلهم شي لان هذا الثاني ما احزر تصرفاتة شنو  هو بس بابا توفى وبوجود امي متنمر علينا مو هسة عرفبأمي توفت ولا بعد مركزة يخوله كلشي يسوي اخاف يأذي خوالي او واحد من اولادهم
صحيت من تفكيري على صوت ضرغام الخشن
ضرغام: هياااام متجاوبين على سؤال ابوي
باوعت عليه كان يحجي وياي ويحرك برجله
وهاي الحركة دلت على توتره عكس ما يعكسه شكله الجامد
دنكت : اي خالو ماكو فرق ان شاء الله عندكم او عند عمو نفس الشي ما انكر اني وريمة
عشنا عندكم احلى ايام وانتو ما قصرتو ويانة بس هم عمو احمد ادري بي يحبنا وما راح يقصر ويانة فانتو شنو تقررون احنا ننفذ
حسيت بحزن خالو راضي علينا
راضي: والله لو علية ما افرط بيجن لو على كص ركبتي واتمنى بس اشوف اشارة من عمج ما تقنعني كبل ارفض جيته ويحلم يشوف ظفركم
بس اني سألت صديقي عن عمكم كال عمكم خوش رجال فما اكدر اعارض
ضرغام : اي حتى لو عمهم هو رجال فقير منين له يعيشهن هسة هو خلي يبتلي بالعنده وبعدين يجي وهي
خالة هناء الله يرحمها مو كالت خليهن امانة عندك لان عمهن فقير وما يكدر على عيشتهن
راضي: بوية ضرغام اكو ناس عرضهم عزيز عليهم لو يعرفون يكصون من لحمهم  ويعيشون ولا ينطون بعرضهم
كمت من مكاني وشفت ريمة كامت وياي
دنكت ولزمتني العبرة وكوة كدرت احجي
هيام: خالو انتو شنو تفصلون احنا نلبس
القرار الاول والاخير بيدك وبيد عمو احمد
انا اخليكم براحتكم بس خالو لا تخاف علينا
ولاتظل تحس بالذنب بتجاهنا
يالله عن اذنكم اني اترخص منكم
طلعت ورحت ركض على غرفة ميس جانت موجودة تحجي بالنقال شافتني سدته
ميس: شبيكم بنات صاير شي
كوة لازمة نفسي ما اريد انهار كدامها
كلش احتاجيت اكون لوحدي بغرفة تخصني ولو لداقائق والدموع راح تنزل وتفضحني ما كدرت ابقى اكثر رحت ركضت بسرعة وصعدت فوك وبوجهي رحت فتحت باب السطح وصرت اشهك موجوعة
ربي ساعدنا شنو الحل ما اعرف شسوي
اخاف اكللهم على نبراس وخوالي يتأذون
وهمة كلش كافي الي صار بيهم  من ورة راس امي من مشاكل
ابوها اتنازل عن الشيخة
اهلها انتقلو من منطقتهم اختها انفسخت خطوبتها
من وراهة ونكسرت قسمتها
ولحد ذاك اليوم مصيبة شكدها وشكبرها تخص الشرف بين خالو مؤيد ووواحد بالسوك
يعني خوالي ما ناقصين بناتها  يجن يكملن عليهم