سلام قلبي

38

نور: افتريت بالبيت كلش نضيف بي هواي غرف كل غرفه حمام وتواليت وكلهن مفروشات بس مبين كلشي جديد طبيت لغرفه لفتت انتباهي لون اسود بيهة هواي وضلع من اضلاع الحايط جام غريب يطل على الحديقه من اتقربت اكثر هو باب بس جام يعني تشوفين منو بالحديقه ويشوفج فتحتهة حديقه واسعه رجعت طبيت لان الجو كلش بارد التفتت شفت مرر زغير بالزاويه طبيت باب بصف باب افتريت بالغرفه ماكو كنتور عبارة عن جربايه واسعه وقنفه واسعه طبيت للممر اول باب بيهة كنتور جبير ورفوف طالعه من الحايط منه بي كلهن ساعات وعطور ومحابس رجالي احزمه واحذيه فتحت الكنتور كله ملابس طلعت فتحت الباب الثاني حمام كلش جبير يجنن وداخله باب تواليت طلعت شفت باب كبالي هاي ما طلعت غرفه شسالفه فتحتهة سلايت غرفه بيهة سرير وردي وسرير ازرك كلش حلوات وملاعيب اشكال والوان

سلام: عجبتج

نور: فزيت سلام احس روحي بحلم وخايفه اكعد

سلام: لا مو بحلم وهذا البيت بيتنه نور خلينه نبدي بدايه حلوة اريد تخليني اجي ملهوف للبيت ما اريد شي من جسمج اريد روحج تداريني

نور: اني وياك هواي تعبنه بلكي نرتاح 

سلام: انشاء الله

نور: رحت طلعت ملابس من الجنطة طبيت سبحت وطلعت نشفت شعري وغسلت للجهال وسلام يبدللهم بسرعه لان الجو كلش بارد طبيت للمطبخ اسوي شي خفيف حتى نروح انام صفنت عالطباخ كله دكم هذا شلون بالله ما بي لا قنينه ولا عيون يجوز هذا موطباخ هيج حاطين الجدر عليه السنك ماكو مكان افتح المي هاي شلون

سلام: شبيج صافنه

نور: وين الطباخ منين ينفتح المي

سلام: حطي ايدج جواها هو يجي مثل الحمام شبيج والطباخ هذا منا ينفتح ومنا تتحكمين بحرارته

نور: متاكد هذا الطباخ شو  ما متصل بقنينه

سلام: حبي هذا متصل بهذا البوري مال الغاز كل شهر تجي فاتورة ويه المي والكهرباء

نور: صفنت بوجهة شلون تعرف كلشي انت جاي قبل

سلام: ابتسمت لج كل غرض بالبيت اني مشتري من اكبر شغله لازغر شغله هذا بيت الاحلام بيت نور وسلام

نور: درت وجهي عنه سويت فنكر وطماطه وخبز اكو بس خبزهم مو طيب ما اتقبلته

سلام: اني رايح انام شوفي غرفه الجهال بيهة باب خاصه مو من غرفتي يعني اخذي راحتج اي شي تحتاجين تعاي اني ما انام بسرعه

نور: اي امين ركض ورة سلام وملاك تكمز وتركص بجسمهة تريد تروح من راحوا ضلت تبجي غسلت المواعين قليلات يا ربي كون اقضي ايام سعيدة بهذا البيت اني تعبت ما اكول اني صح لا هواي غلطت بس اريد منك الغفران يا غفار الذنوب فتحت الموبايل اجاني اشعار من اليوتيوب باسم الكربلائي قصيدة روحي فتحته مستغربة طلعت قرايه اني صح اتبع السنه بس مالي دخل بحرب الطوائف حبيت اتبع بابا لان بنضري هو الصح وبابا مسالم يكول الله يتقبل صلاتنه من مسجد السنه ومن مسجد الشيعه المهم تكون نيتنه صافيه بس من فتحت القصيدة كلبي وجعني حتى اليقرة شكلة كلش يريح النضر وجهة نوراني مينكره من يقره تنزل دموعي بدون سبب ما اعرف عليمن يقرة اصلا وبي حجي ايراني بس خلصت انتبهت قديمه كلش ليش اجاني اشعار انتبهت اكو قناة متابعتها مشاركة الرابط اخذت ملاك لسلام لان ضلت ابه ما ابه حطيتهة بحضنه وامين حاط راسه على صدر سلام يسولف ويحجي وسلام يجاوب صفنات امين تعجب هو طفل ليش هالكد ينتبه لحجي سلام يعني كل عمرة سنتين ونص ردت اطلع سلام كلي تعاي نامي ويانه