ضحية الثقة

الجزء 04

لمن طلع الفاتح مشى على قسم شغلو .. وفاء اتحسست شديد من الاحراج الاحرجته لي الفاتح .. لي درجة انها خنقتها عبرة .. لكن بتحاول تكون عادية.. سلمى لاحظت ليها .. وقبيل كانت راخية اضانها لي كلام الفاتح .. قالت ليها ياوفاء.. والله حيرتيني.. انتي انسانة غريبة شديد .. اي زول يجيك بي صدر رحب تصديهو .. هسي عليك الله زي الفاتح ده بقابلوهو كدا؟ .. وجاهة وطيبة وبراءة يخسي عليك .. قالت ليها والله ياسلمى غصبا" عني .. انتي قايلة هسي هاين علي البعمل فيهو ده؟ .. سلمى قالت ليها غايتو مابسألك .. غصبأ عنك كيف يعني ؟ قالت ليها عليك الله ياسلمى ركزي.. نحن ورانا شغل قدر سبب راسنا .. ارح ارح خليني من المواضيع الجانبية ..
يعني الوجعة الحست بيها وفاء .. الفاتح ماحسا بيها ابدا .. بالعكس جواهو اصرار غريب .. انو يلقى طريق يدخل ليها بيهو .. وطبعا" ده مرضو.. انو الحاجة الصعبة دي.. ياها ذاتها البعملها برنامج .. لامن يجيب خبرها .
وفاء حاسة بي انو الفاتح خلاص زعل.. زي الباقين .. وتاني مابجيها .. ولابتكلم معاها .. وقنعت منو خلاص .. لانها اي زول تردمو .. تاني مابجي حايم بي عندها .. مع انهم بحترموها.. وبتعاملو معاها كويس.. بس شايفنها زولة مفترية ومعقدة وشنو وشنو كدا ..
في اخر اليوم .. عمك ياسين جاء لي قسم الحسابات .. جاب شاي لي مصعب .. اظنو طلبو .. عم ياسين قال لي الفاتح .. يا الفاتح داير حاجة؟.. اجيب ليك شاي .. قال ليهو اي والله ياعم ياسين .. عايزك تجيب شاي وتوديهو لي سلمى وفاء على حسابي .. قال ليهو وفاء بتشرب قهوة .... مابتشرب شاي .. بشيل ليها قهوة ..
لمن عمك ياسين مشى .. شال الشاي والقهوة وداهم .. سألته وفاء .. قالت ليهو الله يا عمي ياسين منو القال ليك انا عايزة قهوة ؟..انت دايما" ياعم ياسين بتحس بي .. والله من قبيل عايزة اطلع اشرب قهوة واجي.. لكن ضغط الشغل .. ماقدرت اتحرك من مكاني .. قال ليها دي من الفاتح .. ليك انتي ولي سلمى ..
قالت ليهو اسمع يا عمي ياسين .. انا القهوة ماعايزاها ادي سلمى الشاي.. واشرب القهوة انت .. انا بشرب بعدين ..
عم ياسين قال ليها طلبتك بي الله ما ترديها .. الزول ده زول طيب.. وقلبو ابيض.. والله ماعندو قصد انا بعرفو.. ماصح ترفضيها .. العرب مابردو العزيمة .. قالت ليهو عشان خاطرك ياعم ياسين .. وسلمى تعاين .. وتهز في راسها ..
الفاتح كان مشغول جدا .. ومركز تركيز شديد في الشغل .. وحساباته دقيقة لي درجة مبالغ فيها .. وبالو طويل مع الناس بي طريقة لامن مملة .. والزول البكورك ويهيج مابشتغل بيهو .. وبقى مشهور بالحكاية دي ..
ياخي يوم جاهو تلفون من صابر .. قال ليهو ياالفاتح في واحد تاجر اسمو عمربابكر.. من ناس ام درمان بتعامل معانا من زمان.. بس المرة الفاتت ادانا شيك راجع .. وسببت لينا مشاكل .. لو جاك بي شيك ماتقبله منه .. ولو قال ليك انا عايز اقابل المدير.. قول ليهو حتى لو المدير قبل ليك الشيك.. انا مابستلمه.. لانها دي مسؤليتي ..
الفاتح قال ليهو جدا" يا استاذ صابر ..
اها يازول كم يوم جاء عمربابكر . وجاب دفارو ورفع بضاعتو من الشركة ..
وجاء لي قسم الحسابات يسدد الفواتير .. وشايل شيكو جاهز .. الفاتح مسك منه الشيك لقاهو بي اسم عمر بابكر لاول مرة يشوفو .. قال ليهو معليش مابستلم شيك .. كاش بس ياعمي ..
قال ليهو ياولد انت اظنك جديد هنا .. انا بتعامل مع الناس ديل بي عمرك .. قال ليهو ولو .. بس انا شيك مابستلمو منك .. قال ليهو اجيب ليك كاش من وين يعني؟؟ ارسل البنك هسي اجيب ليك قروشك في شوال ولاشنو؟
قال ليهو والله يكون احسن.. لانو الشيك ده مستحيل اقبلو منك .. قال ليهو ياخي عليك الله ما تفور دمي .. امسك الشيك ده .. قال ليهو معليش .. لو ماعندك كاش نزل لينا البضاعة في مخزنها ..
الحاج ده هاج وجاط وكورك .. وقال ليهو انت واحد اهبل وثقيل .. وماعندك دم .. انت جايبنك من وين؟؟ عامل خلقتك متل الواقعة فوقك حيطة .. الفاتح قعد يضحك قال ليهو حلوة الحيطة دي .. بس مابستلم منك الشيك.. انا اسف شديد .. والحاج مصر .. ومنفعل والفاتح باااااااارد ومصر.. ومستمتع بالحكاية دي ..
والناس واقفين وبجوطوا .. ياجماعة نحن ورانا شغل .. الفاتح قال ليهم الصبر ياجماعة .. عمكم ده قدامكم ..
قام عمك قال ليهو انا بمشي للمدير.. واجيب ليك منو ورقة هسي .. عشان تعرف انا منو..
قال ليهو لوجاني المدير براهو مابستلم الشيك .. الا يشيل الشيك هو ويدفع لينا كاش .. اها في النقاش ده ..والراجل صوتو ملا الحتة .. وفاء طلعت بره .. لقت الراجل هايج وبنبذ .. والفاتح ساكت بتبسم.. وبحاول يفوت في العملاء التانين .. جات قالت ليهو في شنو يا الفاتح؟ قال ليها الراجل عايز يدفع بالشيك .. وانا قلت ليهو الا كاش .. قالت ليهو لكن عمي عمر ده عميل معروف .. ماتتشدد معاهو .. قال ليها انا ماباخد منه الشيك .. قالت ليهو طيب على مسؤوليتي انا .. قال ليها لالا ابدا..
الا تستلمي الشيك ..وتدفعي لي كاش هسي .. غير كدا مستحيل .. وبتكلم كانو بتونس.. يعني بارد برود ماطبيعي .. وفاء قالت ليهو والله لكن بالغت يا الفاتح ..شنو يعني التعقيد ده ..كدا ماكويس في سمعة الشركة .. قال ليها .. والله فعلا التعقيد ماكويس في سمعة الشركة.. بس الشيك ده انا مستحيل اقبلو ..
عمك طوالي مشى للمدير .. في الطابق الفوق ..
هنا وفاء قالت ليهو يا الفاتح.. الراجل قدر ابوك يعني ده شنو البتعمل فيهو ده؟ .. قال ليها بس انا مامن حقي اتصرف تصرف اكون مسؤول عنه .. والاموال اموال ناس .. لو القروش حقتي معليش .. قالت ليهو مافي ثقة يعني؟؟ ؟؟ قال ليها الثقة ؟؟ ياما ضيعت الثقة ناس .. وفاء لما سمعت الكلمة دي .. زي الفي زول طقاها كف .. اتخلعت وعيونا اتملت دموع .. ورجعت مكانها .. بكت لمن حيلا اتهدا .. وسلمى تسأل فيها وهي مابية ترد ..
اها الراجل جا من فوق.. شايل ورقة من صابر .. مكتوب عليها (من طرفي ارجو التسهيل) .. وماضي اسمو ..
الفاتح شال الورقة كدا.. قراها وطبقها وختاها في جيبو .. وقال ليهو ياعمي عمر .. انا برضو مابقبل الشيك .. الا تجيب لي شيك بي اسم استاذ صابر .. او تجيب لي منه كاش .. الورقة دي مابتنفع .. وصابر ما مفروض يتدخل في شغلي .. لو سمحت نزل لينا البضاعة في المخزن ..
والله عمك ده شتم ليك الفاتح ده جنس شتايم .. ومسح بيهو الواطة .. ماخلا ليهو كلمة شينة ماقالا ليهو .. والفاتح بس يتبسم .. ويهز في راسو ومدنقر .. الناس كلهم مستغربين من عدم ردة فعلو .. لغاية م الناس قعدو يتكلمو مع عمك .. ياراجل انت زول كبير احترم نفسك .. في ناس هنا .. والزول البتشتم فيهو ده بي سكاته اهانك لو ماعارف .. والنقاش بقى مع باقي الناس ..والفاتح شغال ولا هماهو ..وعمر بابكر تاني ابا يرجع للمدير .. مشى نزل البضاعة.. وقال ليهم والله تاني الشركة دي لو بقت اخر شركة في العالم مابجيها ..
صابر نادى الفاتح.. وكان بضحك ميت بالضحك.. قال ليهو انا متابع وشايف اي حاجة يا الفاتح ..
ياخي انت والله اصلي لي درجة.. ياخي انا اتكيفت منك .. اها الورقة الرسلتها ليك عملت فيها شنو؟ .. الفاتح قال ليهو اكلتها ..
قال ليهو ان شاء الله البتاكلو ينفعك ..
في نهاية اليوم ده.. والموظفين بدوا يتسللو تباعا" .. الفاتح كان عندو شغل واصر انو يخلص منو حتى يمشي .. وفضل في الشركة تقريبا خمسة موظفين.. بالاضافة لي عمك ياسين ..
وسلمى هناك في قسم الكمبيوتر واقفة منتظرة وفاء تخلص
ومستعجله .. بتقول ليها ياخي ماتقومي يا وفاء .. بكرة نحن بنجي اصلها الدنيا طايرة؟ ..
الفاتح قام مشى لي وفاء .. قال ليها ياوفا.. والله انا اسف لي كلامي القبيل .. لكن والله غصبا عني.. انا بنفذ في في مايمليهو علي ضميري .. وانا في مكان بتاع امانات وقروش ناس.. ماعندي حق التصرف في حاجة.. بعدين تعمل لي مسأالات ..
وانا اي شيك مابستلمه .. البستلمو الشيكات ناس مصعب وحسن ود الدويم .. والليلة انا ماسك التحصيل ..
بعدين معرفتي بالناس ماكتيرة .. ماممكن اقبل لي شيك من زول لاول مرة اشوفو .. وطبعا" ماقال ليها صابر قال لي كيت كيت ..
وفاء قالت ليهو .. معليش يا الفاتح.. انا عاذراك والله.. معاك حق مامشكلة .. بس هسي انا مستعجلة عايزة اخلص.. وسلوم يهديك .. عاين ليها واقفة لي كيف.
الفاتح قال لي جدا بمشي .. بس انا عندي معاك كلام ما انتهى.. بلاقيك تاني .. قالت ليهو خير خير .. ودنقرت راجعة على الكيبورت ..
وهو طلع كدا وعاين لي سلمى واقفة جنب الباب.. قال ليها سلمى تعالي دقيقة عليك الله ..
جات وراهو .. قال ليها الزولة دي ماعارفها بتتعامل معاي كدا ليه؟ انا والله عندي ليها احترام .. وماعندي اي قصد ..
سلمى قالت ليهو والله عارفاك انا يا الفاتح .. لكن هي معقدة .. ماتزعل منها .. والله قلبها ابيض ..
قال ليها عليك الله ياسلمى.. اول مرة اطلب منك خدمة ...بتخذليني ؟ قالت ليهو ابدا والله.. اطلب ان شاء الله اقدر ..
قال ليها بس اديني رقم وفاء .. قالت ليهو والله انا حسيت بيك يا الفاتح.. و نفسي وفاء تتفهمك.. وتفتح ليك قلبها .. بس مابقدر اديك تلفونها.. بعدين تقوم تعمل لي مشكلة ..
قال ليها والله ما بتعرف انك انتي اديتيني رقمها.. سرك في بير بس تكوني قدمتي لي خدمة ..
قالت ليهو اقول ليك حاجة ؟ تلفونات الموظفين كلها عند الاستقبال .. انت امشي شيل رقمها من الدفتر ..ولا في زول بحس بيك .. قال ليها اي والله.. دي فاتت علي كيف ؟ خلاص جدا الله يديك العافية ماقصرتي .. قام مشى على طربيزة الاستقبال وفتح دفتر الاحوال .. ونقل رقم وفاء .. وحفظه في تلفونو ..
المهم البنات الاتنين طلعن.. والفاتح طلع بعديهم بي ربع ساعة تقريبا.. ومافي وراهو غير عمك ياسين ..
في الشارع وهو ماشي علي البيت رسل ليها رسالة .. كتب فيها ..
وفاء كيفك انا الفاتح .. ان شاء الله وصلتي بالسلامة .. بالمناسبة . انا والله ماعندي قصد غير اني عايز اعبر ليك عن اعجابي بي شخصيتك .. وبقول ليك ربنا يوفقك ويرعاك ..
ورسل الرسالة ..
ماجاهو رد وانتظر وانتظر .. لمن وصل البيت واستحم واكل ونسى الرسالة ذاتها ..
خت التلفون في الشاحن وداير ياخد ليهو نومة .. سمع ليك تيت تيت .. صوت رسالة وصلت .. قام زي المجنون جرى على التلفون .. عشان يشوف .. لقى رسالة جديدة من وفاء ..
فيها: (شكرا" لاعجابك.. ولايهمك مافي مشكلة .. تسلم) .
..
تاني رسل ليها رسالة قال ليها .. انا عايز اقول ليك كلام كتير.. لكن انتي ما مدياني فرصة . ياريت القى لي معاك فرصة اقول كل الجواي وخلاص ..
ردت ليهو سريع المرة دي .. قالت ليهو يا الفاتح الله يخليك.. انا والله ماعندي استعداد لي كلامات زي دي .. الله يديك العافية اخوي .. خلينا كدا احسن ..

يتبع.....