ضحية الثقة

الجزء 08

طبعا زي ماحكيت ليك .. انا نقطة ضعفي الشغل .. لمن المهندس قال لي كدا .. طوالي انتفضت.. وقلت ليهو كويس انا جاية .. خالتي قالت لي يابت .. قولي بسم الله كيف تمشي بي حالتك دي .. ناس الشركة براهم لو شافوك بي حالتك دي.. ح يعذروك .. قلت ليها لالا بقدر الحمد لله الالم خف .. لكن برضو بقوم علي من فترة لي فترة ..ما ممكن يهدأ ساعتين ورا بعض .. المهم . مشيت الشركة.. ووصلت بي اخر نفس.. تعب وخمول وارهاق.. اصلو ماتتصورو .. لكن محتملة الحكاية دي ..
والمهندسين الفي الشركة.. شايفو الحالة العلي .. قالو لي خلاص امشي .. واخدت اجازة مرضية .. ومشيت البيت بدري .. طبعا امي لمن شافتني اتخلعت .. ايوة انا امبارح قلت ليها تعبانة .. عندي وجع يدي .. لكن ماكانت متصورة الحكاية قدر ده .. امي انزعحت من حالتي .. واترميت على السرير بي اخر نفس .. وبقيت بتألم من يدي وكتفي .. وصدري من قدام .. ضهري من وراء.. كلو الم مع بعض.. متزامن مع بعض.. مزامنة سخيفة ..
لمن جاء المساء.. الالم شد علي شديد.. نفس المواعيد الشد علي فيها امبارح .. امي قالت لي لازم نمشي الدكتور .. ورسلت لي امجاد .. جابوها لي جنب الباب .. وطلعنا بس ماعارفين نمشي لياتو دكتور .. ولاعارفين ده شنو.. وكنا بنتكلم ونتسأءل . بتاع الامجاد قال لينا في مستوصف فتحوهو جديد في الشارع الفلاني ..
والناس بشكرو فيهو وفي الدكاترة الفيهو .. شغلو كلو جديد وحديث .. ودكاترتو مستويات عالية .. قلنا ليهو خلاص ودينا ليهو .. مشينا دخلنا المستوصف .. وفعلا كان تحفة من الجمال .. والاستقبال ذاتو حكاية .. المهم سألنا البت القاعدة في الاستقبال.. وحكيت ليها .. وقلت ليها ماعارفين نقابل ياتو دكتور .. قالت لينا في جراح هنا اسمو محمد ..
زول ماشاء الله .. هو براهو بوريك تمشي لياتو حتة.. ويصنف ليك حالتك .. يهودا جاي ماشي علينا .. وقعدت تنادي فيهو يا دكتور محمد يادكتور محمد .. جاء ماشي علينا .. زول قيافة ونضيف.. ووشو صباح خير.. اول ما تشوفو كدا تطمئن ليهو ماشاء الله ..
قالت ليهو حاصل حاصل .. قال ليها خلاص اعملي ليها اجراءاتها.. وخليها تدخل لي ..عملت لي اجراءاتي .. اللهيا دفع الرسوم.. وكتبتني في دفتر . وعملت لي كرت وانا بعاين .. قالت ليهو هاك خشي لي الدكتور .. شلت الورقة دخلت للدكتور.. معاي امي .. وبدأ يسأل فيني الاسئلة الروتينة .. بتحسي بشنو؟
قلت ليهو بحس بي الم هنا وهنا .. قال لي طيب من متين وريتو ..
قال لي في حاجة ضربتك في الثدي الشمال ده؟ قلت ليهو ابدا ..
قال لي حاسة فيهو بي اي ورم ؟
قلت ليهو ابدا بس الم يادكتور في كل المنطقة ..
قال حصل جاك كيس دهني في الثدي؟ قلت ليهو ابدا ..
قال لي هاكي امشي اعملي لي الصور دي.. والفحوصات دي .. وتعالي .. وانا ح اكتب ليك رقم دكتور اسعد.. اخصائي الأشعة زول ممتاز.. وانا بثق في شلو شديد ..بكرة مشيت عملتا صور تلاتة تقريبا .. وفحوصات كاملة للبول والدم وهلم جرا يومنا داك كلو راح في الفحوصات ..
ورجعنا لي دكتور محمد .. عشان يشوف النتايج .. شلناها وديناها ليهو .. قال لي لازم هسي نشيل عينة من الثدي . بي عملية بسيطة وبنج موضعي ..
انا متأكدة انو ما ح يلقى حاجة.. لانو ماعندي الاعراض الانا بعرفها .. ولا عندي ورم.. ولا اي شي .. قلت ليهو عينة لشنو يادكتور ؟ مافي ورم ..
قال لي عندك خراج دافن بي جوة ..بعدين في اورام بتكون خفية .. عشان نطمن ما اكتر .. المهم انا لاني تعبانة .. ولاني وثقت فيهو وفي كلامو .. سلمتو نفسي بكل طمأنينة ..
وعمل العملية بي بنج موضعي واخد العينة .. وطلعنا قال تابعو معاي .. كان الموضوع عادي .. وما اديناهو حجم كبير .. لاني كتير بسمع عملية الخراج او الكيس الدهني دي حاجة عادية .. عملية بالبنج الموضعي .. وعمل لي عملية فعلا بسيطة وشال عينة ..
المهم عملنا العملية .. ومشينا البيت.. في البيت بدأ الجرح مكان العملية دي ينزف لغاية بكرة .. واتصلت علي الدكتور .. قال لينا في عيادة اسنان.. في الحتة الفلانية .. حقة دكتور فلان تعالو لي فيها .. انا موجود هناك ..لانو المستشفى الشغال فيهو بعيد مننا شوية ..
مشينا ليهو عشان يغير للجرح.. وقال ده موضوع بسيط .. ومافيهو مشكلة بس غيرو كل يوم .. وبدأت رحلتي مع النزيف النازل من ثدي .. والغيار اليومي .. وحكاية ماتتصورها .. لمدة شهر .. انا بعاني من الجرح والنزيف .. شهر كامل والله يا الفاتح .. وانا ماعارفة الدكتور بعمل في شنو في مدة الشهر ده .. اتضح لي في النهاية انو الزول ده في الشهر كان بعمل في شنو؟ اصبر احكي ليك ..
بعد كملت شهر بالضبط اتصل علي .. قال لي جيبي الاوراق العندك وتعالي لي في المستوصف .. المغرب ضربت حجزت .. ومشينا ليهو انا وامي .. لقيناهو شايل فايل في يدو.. وشكلو متوتر وخايف من شنو ماعارفة . سلمنا عليهو وقعدنا .. وبدأ يتكلم معانا نظام دردشة كدا .. نظام تهدئة للنفسيات ولاشنو ماعارفة .. المهم شال ورقي وقعد يقلب فيهو .. وقال لي امشي عليك الله نادي لي دكتور محمود .. قلت ليهو دكتور محمود مابعرفو انا يادكتور .. قال لي اسألي منه بت الاستقبال .. اتاريهو داير يوزعني .. عشان يقول لامي كلام .. انا طلعت لي بت الاستقبال.. وسألتها من دكتور محمود .. قالت منو البسأل منو؟
قلت ليها عايزو دكتور محمد .. قالت لي دكتور محمود الليلة ماشغال.. .. ومحمد عارف الكلام ده .. ارجعي ليهو قولي ليهو قالو الليلة ماشغال ..
انا اصلا قبل اطلع كنت شاكة انو عايز يوزعني ..المهم جيت راجعة بسرعه ..لقيتو هو خاتي يديهو في وشو .. وشكلو مهموم ومغموم .. وامي تبكي..!! انا في اللحظة ماحسيت بأي دهشه .. قلت ليهو خير ان شاء الله في شنو؟؟
قال لي مافي حاجه ...في اللحظه دي امي زاد بكاها ..
قعدت في الكرسي.. وقلت ليهو اسمعني يادكتور ..ايا كان الحاصل ..ارجوك كون امين .. وصادق معاي.. وريني في شنو ..لحدي اللحظه دي ماكان عندي اي توقع للحاصل .. قال لي خلاص بعد تمشي البيت ..امك ح توريك .. وضروري بكره تتصلي علي ..
قلت ليهو لا انت الدكتور.. وانت اللي ح توريني .. الحاصل شنو؟.. بعدين انا زوله كبيره ..ايا كان اللي ح تقولو لي .. اكيد ح استوعبو .. سكت شويه ...والله في سكتتو دي ..انا ما كنت حاسه بي اي شي ..يعني لا دهشه ولا خوف ..
كنت زي زول شالو منو كل الاحاسيس ..وخلوهو جسد بدون روح ...رفع راسو كدا وقال لي : انا كنت شاكي في حاجة .. بس للاسف طلعت النتيجه زي ما توقعت ..
ورم خبيث في الثدي.. ولابد من استئصاله.. نستاصل الثدي الشمال بالكامل ..و بي اسرع وقت ..
قبل ما المرض ينتشر في جسمك .. ويصعب علينا تاني التحكم فيهو .. ومفروض تقرري بسرعه .. لانو اي تأخير ما في مصلحتك ...يعني في اقل من اسبوع ..
انا والله سمعت الخبر .. وكأني ما سمعت حاجه.. فقدت حتي النطق ...اللجمتني الدهشه .. حسيت بي انو كل حواسي فصلت كهربا .. واضني صنن .. وعيوني ضلمن .. وحسيت بي الغرفة دي لافة بي زي لعبة الاكواب الراقصة القدامك دي ..
وحسيت بي طمام .. ورجلي مافي .. وبديت اجمع في قوتي.. عشان مايغمى علي ..
قلت ليهو طيب.. ممكن العمليه تتعمل متين؟ .. قال بعد بكرة.. بس اذا قررتي لازم بكره من الصباح تجيني في المستشفي.. عشان في بعض التحضيرات .. قلت خلاص انا قررت اعمل العمليه بعد بكره .. وامي دي بقت ما طبيعية .. ماقدرت تتكلم ولاكلمة ..بقت زي التايهة كدا .. وطلعنا من الدكتور .. وركبنا وساكتين وانا حاسة بي احساس قدر ما اتكلم ما بقدر اوصفو ليك .. بي الجد حاسة بانو احاسيسي مفقودة . وكاني فاقدة الذاكرة.. وماعارفة انا وين؟ وبحاول اجمع عشان اشوف انا واعية ولا في غيبوبة.. او في حلم اوشي زي ده .. زمان كنت بحلم احلام مخيفة.. لمن اصحى من النوم .. والقاهو حلم بفرح ..
اتمنيت اليوم داك اكون انا بحلم .. عشان اصحى من الكابوس ده .. لكن للاسف كانت حقيقة ماكان حلم ..
ولله المسافة لي بيتنا دي.. انا شفتها زي الزول الماشي عشرة سنوات . في مشاهد لي كابوس لاليهو اول ولا اخر ..
وصلنا البيت.. اول ما فتحولينا الباب.. ودخلنا انا وقعت جمب الباب .. واغمي علي وتاني ماحسيت بي حاجة .. صحيت لقيت نفسي في السرير واخواني وامي وابوي حولي وببكو زي القدامهم جنازة .. انا انفجرت بي نوبة بكاء.. ما أقدر اوصفها ليك ..وقمت دخلت منهم في غرفتي.. وقفلتها علي .وقعدو يدقدقو لي في الباب.. قلت ليهم انا عايز اكون براي ..قعدت بكيت بكيت .. بكا ماحصل بكيت زيو في حياتي .. واستعدت شريط حياتي الماضية .ومستقبل حياتي ..وامنياتي واحلامي .. ومصطفى . والاسرة الكنت متمنياها وبحلم بيها .. (ما اضعفك يا انسان) .. مافي زول ممكن يعرف قيمة الدنيا شنو .. الا يضوق احساسي في اليوم ده .. بكيت من الساعة 10 ونص لغاية الساعة 2 صباحا .. واخواني وابوي وامي قاعدين قدام باب غرفتي في الارض .. اتشجعت ومسحت دموعي.. وحاولت اشد حيلي شوية .. وقمت فتحت الباب وطلعت ليهم برة .. قلت ليهو انا كويسة .. وعايزة انوم .. امشو نومو لانو بكرة عندنا اجراءات .. في اللحظة حاولو يتكلمو معاي في قرار العملية .. وانو ما نعملها هنا .. ابوي قال لي انا بحجز ليك في اقرب رحلة للقاهرة ونمشي .. نعمل العملية هناك .. بس انا اصريت وقلت ليهو .. الدكتور ماجاب حاجة من عندو .. مادام انو الموضوع المفروض نستعجل ليهو .. ابوي قال لي نحن ممكن نصل القاهرة قبل الاسبوع .. قلت يا ابوي اجراءات السفر للعلاج .. فيها تعقيد اكتر .. وتجهيز الاوراق للموضوع ده بياخد وكت .. انا ماعايزة اجازف .. مادام انو انا في خطر احسن اعمل العملية وخلاص .. ابوي حاول يتناقش معاي انو مانستعجل .. لانو الفحوصات كانت احادية ومستعجلة .. بس انا اقنعته بي كلام الدكتور .. في النهاية ابوي اقتنع على مضض .. انا كنت في حالة نفسية سئية .. وماكان عندي قدرة للنقاش في المواضيع .. قلت ليهو يا ابوي انا ح اعمل العملية وخلاص .. اقنعتهم ومشو نامو.. والحقيقة اعتقد انو مافي زول منهم نام.. لانو كان واضح على وشوشهم الصباح التعب والسهر وما في اثر لي نوم .. الصباح ده لمن طلع انا كنت حاسة بي انو الشمس غريبة .. والدنيا غريبة وبقيت اعاين للسماء .. كأني اول مرة اشوفو في حياتي .. وبقيت بعاين للحاجات الحولي .. واعاين لي يديني واقلب فيهم كدا .. زي الكأني بودع في روحي .. عمري ماحسيت احساس زي .. وان شاء الله مافي زول مسلم يحسو .. الليلة نحن ماشين نعمل التجهيزات لعملية استصال ثدي الشمال .. كل حياتي عايشة وانا ماحصل ودعت جزء من جسمي .. وقطعة من روحي .. اتحسستو كدا بيدي.. ودموعي ديل كبن زي موية الشاي .. في وشي .. اول طلب طلبتو من امي وابوي.. انو مافي زول يعرف الحاجة دي .. الا خيلاني وخالاتي .. لانهم هم البهمهم وبهموني.. ومنعتهم يكلمو حبوبتي.. لانها عيانة وبتحبني لدرجة الجنون.. لو سمعت بي حاجة زي دي احتمال تموت .. الساعة 8 صباحا" كنا في المستشفى ..

يتبع.....