ضحية الثقة

الجزء 12

انا شفتك انت ضايقتني شديد .. وعشان ما تقول الزولة دي مغرورة وشايفة روحها وماعايزة تديني فرصة .. ولانك زول روحك طويلة وما بتستسلم بسهولة انا كان عندي حلين يا اما اطفش واخلي ليك الشركة يا اما اطفشك بالقصة دي .. لانك ابيت تطفش بالطرق الطفشوها بيها التانين ..
الفاتح قال ليها طيب خلاص خلصتي ممكن اتكلم ؟
قالت ليهو اتفضل .. قال ليها اولا .. قولي الحمد لله قدر اخف من قدر . انتي هسي احسن من ناس كتيرين .. شفتيهم في مستشفى الذرة .. فقدو الامل في الحياة ..
يعني انتي في نعمة كونك تكتشفي انو ما اصابك المرض .. اتخيلي لو اصابك فعلا .. وكان في جزء حساس من جسمك .. كنتي بتكوني عايشة لي هسي؟ وقاعدة تتكلمي مع الفاتح؟
انتي في نعمة كبيرة .. بعدين انا بيني وبين نفسي. بقول ليك احسن حاجة . انك مااتهمتي الدكتور محمد باي تهمة.. لانو اي تهمة بغير دليل ربنا بسألك منها يوم القيامة .. كل الدلايل الانتي حكيتيها لي دلايل ظنية .. مافيها شي مؤكد .. ممكن يكون عندك تمزق في الاربطة .. ويكون كان عندك بداية ورم .. والدكتور محمد ازالو ..
يمكن يمكن يمكن .. انتي مادام ما متأكدة من الحصل شنو ..احسن شي انك تخلي الامور على الله .. اعتبري انو الدكتور شكا في التحليل واحتاط ليك .. احسني الظن .. في حاجات كتيرة ..
بس فعلا المفروض كان تتأكدي من التشخيص .. وكان تسمعي كلام ابوك .. وكان وكان .. لكن طبعا .. القدر وقت يبقى نافذ .. كل الظروف بتخدم في صالحه .. احمدي الله على نعمة الشفاء والعافية ..
..بس ياوفاء انا الكلام الحكيتيهو ده كلو .. ماشغال بيهو .. انا عايزك وبس .. وفاء نططت عيونا وبقت تعاين ليهو ..
وقالت ليهو انت يا الفاتح واعي بتقول في شنو؟
قال ليها اسمعي انتي.. خليك انسانة واعية.. وماتبقى زولة متشائمة .. الحياة قدامك .. الحمد لله ربنا كتب ليك حياة ..
بعد ما فكرت في الموت.. المفروض تعيشي حياتك بي كل سعادة .. وتنسى خلاص ..
الجزء الفقدتيهو من جسمك ده.. بأثر على حياتك بي شنو؟ بمنعك الانجاب مثلا".؟؟ بمعك تعيشي حياتك زي باقي الحريم ؟؟
قالت ليهو ابدا .. ما مؤثر في اي شي .. وحتي الدكتور اخر مرة قال لي .. انتي طبيعية مية في المية .. تعيشي وتشتغلي وتتزوجي وتنجبي بدون اي خوف ..
الفاتح قال ليها طيب .. في شنو ؟؟ ليه تعتبري انو راجلك مات .. اعتبري انو ربنا ماخلق ليك ثدي شمال .. وعشتي حياتك زي اما انتي في شنو؟ المشكلة وين؟ قالت ليهو انت هسي متأكد انو ماعندك مانع في الموضوع؟ قال ليها اطلاقا"
قالت ليهو طيب اهلك امك ابوك ح تكلمهم ولا ح تدس عليهم؟ قال ليها ده موضوع مقدور عليهو .. انا مادام عايزك يبقى مافي زول بقدر يعارضني .. الحاجة الفي راسي بنفذا بشتى السبل والوسايل
قالت ليهو ح تنفذو غصبا عنهم ؟ قاليها ابدا بالتراضي ..
وانتي عارفاني الحاجة لو اصريت عليها بعملا ..
قالت ليهو والله يا الفاتح احييك على ثقتك في نفسك وشخصيتك الجميلة لكن في حاجة انا عايزة اقولا ليك ياريت تقدر تفهمني .. انا صارحتك باي حاجة .. انت ما الانسان الانا عايزاهو .. يعني ماحاسة تجاهك بي شعور .. يعني ما ح اقدر اسعدك.. وانت ما ح تسعدني .. والله انت نعم الانسان ماشايفة عليك اي حاجة غير الخير .. لكن القلب له مايهوى .. ماحاسة بي ميل قلبي ناحيتك .. ودي حاجة مافي يد الانسان ..
الفاتح الكلام ده اثر فيهو اكتر من القصة الطويلة ديك كلها .. بس ابا يستسلم ..قال ليها لكن انتي لسع مااتعرفتي علي كويس احتمال لو عرفتيني اي حاجة جواك تتغير .. انتي بس ادي نفسك فرصة ..
قالت ليهو ما اظن يا الفاتح ما اظن .. ممكن ادي نفسي فرصة مافي مشكلة لكن انت ماتعيش على الامل ده ..
قال ليها طيب بتردي لي متين لو نعم ولالا .. ؟؟
قالت ليهو يوم الاتنين .. ان شاء الله ..
يلا قوماك الوقت اتاخر نحن نمشي .. ويهديك خالدة قلقت وبقت تمشي وتجي زي الواقعة منها حاجة ..
الفاتح بقى كل يوم يلاقيها يقول ليها اتذكري انو في زول في الدنيا دي مستعد يموت عشانك .. وهي تعاين ليهو تتبسم .. وتمشي
والحكاية دي بكرر فيها كل يوم لافتر ولامل .. لغاية يوم الاتنين موعد النتيجة ..
الحصل انويوم الاتنين ردت ليهو قالت ليهو .. اسمعني كويس يا الفاتح .. اصلك ماتقول انو موقفي ده عندو علاقة بالموضوع الحكيتو ليك .. لكن والله كل يوم وانا بزداد اصرار على راي الاول ..انوالموضوع ده ماينفع.. مابقدر ماقادرة يا الفاتح .. خلينا اخوان احسن .. قال ليها ماح اقدر اغير الجواك .. وانتي نعم الاخت ..
ورجعت الامور زي الاول .. وفاء شغالة في شغلها والفاتح شغال في شغله ومافي زول عنده علاقة بالتاني غير علاقة الخوة والزمالة . طبعا انا ماعرفت هل فعلا وفاء ماعندها مشاعر عاطفية تجاه الفاتح ؟ ولا انها ماقبلانة نظرة الشفقة من اي انسان .. وخايفة من ردة العواقب اذا تم الزواج بناء على الشفقة ..
المهم العلم عند الله.. لكن هي قالت ليهو ماعندو علاقة بي الموضوع الحكتو ليهو .
مرت الايام والفاتح انشغل بي حياتو . وشغله ..ووفاء حياتها عادية . ومرت الشهور .. وكان القدر عندو فهم تاني وربنا عندو تسطير للامور بي طريقة اخرى تعال شوف الاحوال عاملة كيف ..
في يوم من الايام قالت ليهو يا الفاتح انا عايزاك ..
بكرة تعال بدري شوية .. وفعلا قبل الشمش تشرق الفاتح كان جم عمك ياسين .وقال ليهو وفاء قالت عندها معاي موضوع ..
انتظرها وهي ذاتها جات بدري ..
قعدت معاهو وعمك ياسين مشى يجيب ليهم الشاي ولسع ناس الشركة ماوصلو الواطة بدري شديد ..
قالت ليهو بتتذكر قذافي ؟ الحكيت ليك بيهو الكتب لي الورقة الب الانجليزي ورديت ليهو بي كلمة NO.. قال ليها نعم متذكره القلتي ليهو شايفاك زي اخوي ..
قالت ليهو الزول ده طبعا كان في الدوحة .. الفترة الفاتت دي كلها.. وجا من هناك عايز يتزوج وماعندو اي واحدة في راسه غيري انا .. ولاقى خالدة اختي .. وقال ليها كلمي لي وفاء انا عايزها على كتاب الله وسنة رسوله .. ولو وفاء ماعايزاني انا برجع بدون زواج ..
خالدة قالت ليهو معليش والله يا قذافي.. وفاء ظروفها الصحية اختلفت من زمان ..
قال ليها عارف عنها كل صغيرة وكبيرة .. انتي ناسية انو خالك صحبي ؟ انا عايز وفاء .. لو بقت مشولولة وماشة في كرسي .. كلميها لي انا عايزها هي وبس .. وصراحة يا الفاتح انا طيلة فترة مرضي.. مافقدت زي ما فقدت قذافي .. بس هسي انا ماعارفة اتصرف كيف ..انت اخوي واقرب لي زول في الشركة دي . وريني ..
انا صراحة الزول ده عايزة اقبل بيهو وخايفة .. صراحة حاسة اني بسعد معاهو وبسعد معاي .. وخايفة اقبل بيهو ..يقوم يقول رفضتني لمن كانت كويسة .. وقبلت بي لمن بقت عيانة .. قول لي يا الفاتح اعمل شنو؟
الفاتح قال ليها خلاص ..انتي كلمي خالدة وخليهو يلاقيك . وختي ليهو الموضوع على بلاطة .. قولي ليهو انا فعلا ماعندي مانع لكن عايزة اسألك سؤال.. انت ليه رجعت لي بعد انا رفضتك .. وكتبت ليك NO قبل سنوات ..
شوفيهو بقول ليك شنو؟ على اساس اجابتو انتي بتقدري تقرري قالت ليهو وانا اعرف كيف اجابتو حقيقية ولا مجاملة .؟
الفاتح قال ليها انتي مالك ومال الجواهو . عليك بالظاهر ..عشان لو حصلت اي ردة فعل.. تذكريهو السؤال ده.. انتي موش خايفة من كدا؟
باختصار حصلت الجلسة دي بين قذافي وبين ووفاء ..
وقذافي قبل ما وفاء تسأله شعر بالسؤال في عيونا . بس هي فأجاته قالت ليهو انا عايزة اسألك سؤال .. قال ليها سؤالك ده خليهو بعدين ..هسي انا طالب موافقتك وبس .. واوعك تحرجيني .. زي ما احرجتيني قبل كدا .. المرة دي بقعد ببكي ليك في الارض ..
قالت ليهو ابدا والله مابحرجك .. بس انت جاوبني وريحني .. قال ليها اسألي . بعد وافقتي ..
قالت ليهو ليه رجعت لي بعد رفضتك .. طلع ليها ورقة مكتوب فوقها السؤال بالانجليزي واجابتها الكتبتها قبل سنة سنوات ...
وقال ليها انا اصلا ماقبلت بي رفضك الزمان .. لكن ماكنت جاهز لي ارتباط .. وسافرت قلت لو انتظرتيني .. مابخليك .. ولو جيت لقيتك اتزوجتي تبقى قسمتي كدا .. وهسي جيت لقيتك .. في انتظاري ..والمرة دي مابسيبك ..
قالت ليهو .. وانا ماممكن ارفضك للمرة التانية ..لاني ندمت على المرة الاولى اصلا ..
قدر الله وماشاء الله فعل .. انو وفاء كانت من نصيب قذافي ..
وده واحد من الرجال البختلفو عن مصطفى .. ديل ناس المعادن الاصيلة .. انا ذاتي من زمان من بقول ليها كنتي وين؟ واتاخرتي مالك؟
عرفتي راجل ود رجال يستاهلها .. مازي الناقص داك الخذلها في اخر المشوار ..
الخلاصة ياجماعة وفاء اتزوجت شهر 2 سنة 2012
بس لغاية اللحظة دي ما انجبت. ربنا يقسم ليها من فضله اطفال تقر بها عينها .. وعايشة مع قذافي حياة مستقرة جدا .. اصلا الزول ده كان بعشقها من هي طفلة ..
ولسع هي مواصلة في الشركة مع ناس صابر بس مسكت القسم بتاع بحري .. وقذافي بسافر وبجي ..
والفاتح اترقا في الوظيفة وبقى من الموظفين الكبار . ويد صابر اليمين . صديق للاسرة .. وعندو اعمال خاصة كدا بقوم بيها .. بمشاركة اصدقاءه .. لكن وضعو كويس شديد ..
وهسي اليومين ديل شايفو عندو لياقة كدا جميلة كدا مع البت الاسمها خالدة اخت وفاء الاصغر منها .. وهي كل ما تشوفو تقعد تتبسم وتتخجل ..
لكن مامعروف المصير يكون شنو؟ ربنا يكتب ليهم الخير ..
انتهت قصتي معكم .. تحت شعار .. افحصي فحصأ مبكرا" - خذي فكرة عن المرض واعراضه - تأكدي من الفحوصات بعدة طرق قبل الشروع في العلاج - (هي الحياة مالعبة) ..اخيرا" ادعموا مرضى السرطان .. فانكم لاتعلمون ماذا يشعرون به..
تحياتي لكم
ونسأل الله ان يقينا واياكم .. شرور الامراض والمحن وان يكتب لمرضانا ومرضى المسلمين الشفاء .. وان يرحم موتانا ..
واسأل الله ان يحفظ هذه العيون التي تجول على حروفي من دموع الالم والندامة ..
لكم مني وافر التحايا والاجلال ..
اخوكم طارق اللبيب
بحري نوفمبر 2016