حين يعبث القدر

البارت 8

#رواية_حين_يعبث_القدر
( #البارت_الثامن " 8 " )

..

#بعد مرور شهرين

گعدت الصبح واني مقرر من اليوم ارجع للشركه هملت شغلي هواي وجمال وحده ميگدر يسيطر ع الوضع بالذات بعد خسائر المشروع الشركة هواي تراجعت .

گعدت كالعادة اسوي الريوگ ناكل اني وريحانة رغم الوالده تصر اگعد وياهم و تحاول تهتم بأحتياجاتنا بس اني ارفض اريد كلشي يبقه ع طريقتها ماريد احد غيرها يلمس شي بالبيت ماريد الاشياء تعاتبني ، انظف البيت مرة بالاسبوع تنظيف شامل مثل ماچانت تسوي ، احب اسوي الشغلات الچانت تسويها احسها وياي ، ضحكتها وهيه تشتغل تذمرها من اخرب شي هيه مسويته تعصيبها هدوئها ، مشيتها وحركة ايدها من تحچي وتشتغل تتحرك هواي ، ؤؤؤؤف ياحنين بلياچ شيخلصه العمر ،
گمت ع السريع غسلت اماعين الريوگ باوعت للساعه 7:35 ص ، اخذت ريحانه غسلتلها وجهزتها و وديتها يم الوالده علما اسبح واتجهز ، كملت عالساعه 8:16 ص ، اخذت ريحانة وديتها للحضانه وطلعت للشركة وصلت متأخر بسبب الازدحام ، وگفت ع باب الشركه غمضت عيني اخذت نفس : محمد انت گدها، دخلت الشركة ، الموضفين انتبهو لوجودي گامو يسلمون واني سلمت بشكل سريع ماريد احد يفتح شي عن الموضوع ، صعدت وصار بوجهي مكتبها اخذت نفس وتقدمت وگفت ع بابه فتحتها دخلت تلمست المكتب گعدت ع كرسيها احتضنت يداته بكفوفي قوي وذكرياتها بهالمكان تحاوطني تنهدت وگمت طلعت من المكتب رحت ع مكتب جمال شافني گام وهو يهلي سالمني : ايي هذا محمد الاعرفة مايترك الدنيا تعبر من فوگه، ابتسمتله مجاملة وگعدنا نحچي بالشغل شي اقل الساعة واجه اتصال لجمال تغير وجهه : ماشي جاي جاي، سد الاتصال وباوعلي، گتله : شكو من منو الاتصال؟ ، جمع الاوراق البيده بحركه سريعه : الضابط، لگو مفتعل الحريق من شي اقل من 24 ساعة تم القبض عليه ، وگفت يااابه لو الزمه غير افصخ لحمه عن عظمه احس اعروقي بانت ودمي يغلي يغلي، نزلنا بسرعه اجيت اصعد سيارتي وگفني جمال گال اصعد وياي ، ما اعترضت بس اريد اوصل المركز ، السياره تمشي بسرعة واني اصيح عليه إسرع احس بديت افقد اعصابي ، وصلنا المركز دخلنه شافنه الضابط استقبلنا ، وبده يشرحلنه كيف توصلوا للمجرم ..

: بقينا نبحث وندقق بكل المعلومات الي وصلتنا و عن كل ابلاغات المفقودين ومن خلال احدى عوائل المفقودين گدرنا نعرف هوية الچثه الاخيره تعود للمقاول الي متعامله ويا شركتكم وهذا المقاول عنده شريك وهذا الي اتأكدنا منه من خلال استاذ جمال وحسب كلام اهل المفقود الضحية ع طلعته للعمل من الصبح وبعد مارجع لأهله، اما اهل الشريك بعد ماتوصلنالهم بالمعلومات الي اخذناهن من حضرتكم رجع بذاك اليوم للبيت وكان بحالة مريبة ونوع من الفزع والتوتر حسب اقوال زوجتة وكانت رائحته مملوئه بالدخان وبعد ماسائلته زوجته عن سبب الدخان عصب بشكل مو منطقي وبعد يومين من الحادثه اختفه بعد ما اخذ المستمسكات وجواز السفر وطلع بحجة عمل ، وكان جدا حذر بتواصله ويه عائلته وحسب تعقبنه لمكالماته كان اكو مكالمة واحده بعد اسبوع من الحادثه وبعدها كانت الشريحة خارج نطاق التغطيه، بقينا مراقبين تحركات عائلته ومكالماتهم وبعد اسبوعين رجع اتواصل وياهم مرة ثانية وطبعا بالضغط ع اهله استدرجنا وحصلنه موقعه لكن للاسف حس بالموضوع وهرب لكن نصبناله كمين وگدرنا نصيده وحاليا هوه بيد ابو اسد يستجوبه ويعرف التفاصيل الباقية، : أريد اشوفه ، : حاليا ماتگدر تشوفه لازم يخلص التحقيق، باوعتله ونظرة ترجي بعيني باوعلي زفر الهوه : ممنوع تتصرف اي تصرف .. فقط تشوفه ، هزيت راسي بالموافقه ، گام واشرلي اجي ويا ، دخلنه الغرفة ، كان اكو رجل ضخم كلش وعضلاته بارزه لابس الزي العسكري لكن نازع الستره وباقي بالفانيله، اديه كولهن دم ،كان شايل المجرم من ياخته خانگه شافنه دخلنه رگعه بالگاع ضل يشاهگ، التفت علينه واشر للضابط عليه بحركة منو هذا؟ ، جاوبة الضابط : صاحب الشركه القائمة ع المشروع الي احترگ و زوجتة احد الضحايا ، صفن بوجهي جر نفس ونزع فانيلته مسح بيها ايده من الدم و گال : إعترف ،
باوعتله مدمه، ثقل نفسي والنار تلوب بيه اريد اگوم اگطعه بسنوني بس لو يتركونه الي، راح جره گومه وگعده ع الكرسي : يله احچي، باوع بوجوهنه بلع ريگ دنگ راسه وبقه ساكت ، ضربه المحقق : راح تحچي لو شلون وياك، هز راسه اي، : مـ مـا ماچنت قاصد احرگه : جره المحقق من زيجه يغلط ويسب : لك تلعب ويانه والسكين الي عليه بصماتك؟ والجثه المطعونه؟ تحچي لا ادفنك هنااا ، گام يبلعم : كان خلاف بينا ، كنت مديون لناس مايتفاهمون ، انطيتهم حصتي من فلوس المشروع بس ما اكتفوا ورادو ضعفين المبلغ واني ما املك هذا المبلغ مالگيت حل غير ابدل مواد بناء المشروع بمواد مضروبه حتى ابيع المواد واسدد بفلوسها الدين ومن اكتشف شريكي الموضوع هددني ارجع المواد او يفضحني ، ماگدرت اختار بين يفضحني وانسجن وبين ما اسدد الدين ويكتلوني ، وبذاك اليوم قررت ارشي بالفلوس، نتقاسم فلوس المواد واخلي يسكت ، اجه للمستودع من شاف المواد المضروبه بعدها تعارك وياي ، حاولت اقنعه بالفلوس بس هوه چان مصر ومن فهم مني اني صارف نص فلوس المواد البعتها ومامتراجع عن السويته هددني انه رايح يفضحني واني ارتعبت ماعرف شسوي عندي سكين محمول ع طول اشيله وياي مالگيت غير نفسي اطعنه ، طعنته وضليت اطعن بي لحد متأگدت انه مات ، حچه الضابط : والمرأة المطعونه؟ ، كورت ايدي وبانت اعصابي لزم ايدي جمال واحنه نستمع : بعد ماطعنته سمعت رنة تلفون تخبلت وضليت اتلفت حسيت بحركه حاولت اتقرب من مصدر الصوت انقطع بس شفت خيال وره صفات الخشب تقربت وبنفس السرعه ضربت السچين چانت مطيتني ظهرها صارت الضربه برگبتها گامت ترفس وماتت بمكانها بس جان اكو وياها بنيه ثانية شافتني انرعبت صاحت ركضت عليها شردت وختلت بين المواد ضليت ادور وين ختلت سمعت رنة الموبايل نفسها تبعت الصوت وشفتها حاشره روحها بين الكراتين سحلتها رگعتني بالموبايل ضربتها رفستني ورادت تشرد شلت لوح خشب وركعتها بي وگعت سحلتها بعدها مافاقده كلش زلغتني ركعتها بالگاع صار يمها الموبايل شمرتني بي ع وجهي گام ينزف خشمي ، شردت ، تلفتت مالگيتها ، گلت اكيد ختلت بين المواد ، شفت گاز نستعمله للآلات اخذته ودرته ع الجثه والخشب والمكان باوعت لگيت اكو جلكانات اشتميتها بانزين يحطونه العمال احتياط للسيارات فتحتهن ودرت منهن بالمكان تاكدت كلشي يحترك حتى تحترك هيه والمكان وكلشي يختفي ، شعلت النار وشبت بالمكان انتظرتها تطلع ماطلعت النار كامت تاكل كلشي خفت وطلعت اكيد ماتگدر تطلع بعد ، بعد هذا الكلام ماگدرت اسيطر ع اعصابي چفتت عليه ضرب ضرب وگعت سنونه ضليت اضرب بي اريد اموته بيدي گامو يجرون بيه وجمال يگلي : لاتلوث ايدك بي خلي القانون ياخذ مجراه ، بس اني انهاريت اتخيلها محوطه بالنار واني ماموجود اساعدها بقت تلوب بالنار لحد ما اكلتها النار صحت : عوفونيي اكتله عوفوووني اطلع نار گلبيي ، لزمني الضابط : افهمني هنا قانون ماتگدر تجاوزه مادامه بيد الامن ماتگدر تسويله شي غير تنتظر الحكم، جروني طلعوني واني اعصابي ترجف كعدت بمكتب الضابط جابولي مي، اخذت نفس احس ماكو هوه گمت بعد ماتحمل هذا المكان ، گام جمال يلزمني رفعت ايدي اشرتله ماكو داعي ، طلعت من المركز  وصلت السياره صعدت باوعت لايدي دم هذا الحقير النذل بيها لا ارادياً نزلت دموعي، كتالچ گبالي وكل الي گدرتله اضربه اضربه شطت وگمت اضرب بالسياره تلفت اعصابي رجعت راسي ع الكشن ، اللهيي اللهي اختبارك صعب، اللهي قوة لخاطر اليتيمة قويني وصبرني يارب قويني تراني اتعبت،  فتح جمال باب السياره وصعد باوعلي وبقه ساكت شغل السياره وطلعنه.

#اربيل

دخل الغرفة والابتسامة ع وجهه، شافها صافنه ومومنتبها، : ايي وهاي احلى شوربه لاحلى بنية بالدنيا ، حط الصينيه ع الماصه و گعد ع سريرها اخذ ايدها بين اديه : لاتخافين راح تذكرين كولشي الدكتور گال تحتاجين فترة راحه وتدريجياً راح تبدين تسترجعين الاحداث، حچت وبنبرتها أرتباك وخوف : شهر صار .. شهر ! و حتى اسمي ما اذكره، خايفه ، خايفه ابقه مجهولة الهوية ، خايفة انو طول عمري ماذكر منو اني ومنو اهلي وشلون جنت عايشه و ويه منو ، نزلت دمعتها وبسرعه مسحتها، اياد حيل خايفه ، ربت ع ايدها : لاتخافين شمايصير اني وياچ موجود وراح ابقه ابحث واساعدچ لحد مترجع ذاكرتج وهسه يله تاكلين علمود اطيبين ونروح للدكتور حتى يشخص حالة ايدج اذا تنفعها العملية ، :امممم ، اخذ كاسة الشوربه وشال منها بالخاشوگه : يله يله اكُليها من ايدي وگوليلي شنو رأيچ بيها تره ما اقبل بأقل من ممتاز متعلمها ع ايد شيف عالمي، ابتسمت بهدوئ اكلتها : عاشت ايدك ، ابتسملها : صحتين وعافية، ..... "

#يتبع ...... "

#روايات_الهام_الخفاجية 💌