#رواية_حين_يعبث_القدر ( البارت الـ 5 )
مرت الايام والفرحة ماليه حياتنا ،
وبهاي الايام قرر محمد نعيش ابيت خاص بينه وطبعا لان بيت اهل محمد جبير كلش اقترح عمي نبني مشتمل بصف البيت بالحديقه حتى نبقى قريبين ع بعض وفعلا محمد بنه المشتمل وصار تقريباً شهر من انتقلنه بي،
دخلت الشهر السادس بحملي،
وحالياً كاعدة اكتب بدفتر مذكراتي اليوم عندي موعد ويه الدكتورة ،محمد طلع عنده شغل گال ساعة ويجي ياخذني للدكتوره وهم رفيف عازمتنا عدها اليوم فنمر عليها بعد مانطلع من الدكتوره، طبعاً هلفترة محمد حيل يلح عليه انو استريح من العمل بس اني ماقبلت كتله من يقرب شهري عود اخذ اجازه ماحب اترك شغلي ع النص وحيل متحمسه يكمل اول مشروع اليه وماضل شي راح يقرب ينتهي صح متعب الاشراف بس لذة العمل والانجاز شي ماينوصف بجماله .
سمعت صوت هورن هذا اكيد محمد اني مجهزه نفسي بس لبست حجابي ورشيت عطر خفيف لان صايرة ماتحمل العطور القويه تلعب نفسي، طبعاً غرفتي نفسها القديمة ابيت اهل محمد بس سوينالها باب ثانيه ودمجناها ويه المشتمل واكو بعد غرفتين نوم وحده فوك و وحده جوه ومطبخ وكلدور محمد كال حيجهز الغرفة الجوه النه لان بعد الولاده صعب اصعد وانزل نزلت الدرج شفته جاي يريد يصعدلي باوعلي ابتسم ضحكتله اخذ ايدي ع اخر بايتين ومشينه صعدت يمه بالصدر حط اغنية لكاظم الساهر ويغني وياها ويباوعلي مبتسم ،
" محروس من عين البشر
واولهم عيوني
باردة عيوني عليك
ياخوفي مني والحذر
من ناري وجنوني "
وكل شويه كارص خدي ويضحك يكولي لايگلج الحمل، هوه صدك سمنانه شويه وصاير عندي خدود ،
وصلنه الدكتوره كعدنا شويه بعدها دخلت لان حاجزه مسبقاً سوتلي سونار والجنين بخير و وضعه طبيعي الحمدلله، و سئلتها عن جنس الجنين لان الفضول ماكلني رغم محمد كال خلي مفاجئه النه بس اني ماتحمل هيج مفاجئات لازم اعرف شنو اجهز للبيبي
وطلع جايتنه بنوته مجرد التفكير انو حيكون عدنا كائن زغيروني بالبيت خاص بينه يخليني اطير حيل متحمسه شوكت اولد ريحانة حبنه وتصير بحياتنا وبين ادينه ، طلعت شفت محمد گاعد ينتظرني شافني ابتسمتله وبادلني الابتسامه كتله مبروك مثل ماتمنيت ريحانتنا الجاية بالطريق ضحك وكال عرفتج ماتصبرين إله تعرفين، ان شاءالله تولدين بالسلامه ،الف الحمدلله والشكر ، طلعنه وتوجهنه لبيت جمال ورفيف وع الطريق نزل محمد جاب حلويات ورجع، وصلنالهم واستقبلونه بهله ومرحب كالعادة وهذا كيان يُمه يُمه من سوالفه هيج كائن صدك للأكل يحب يلفت الانتباه ويحصل الاهتمام الكامل طبعاً رفيف ولدت وجابت ولد وسمو أمير اني اسمي ابو خدود گدما خدوده سايحه ههه وكيان يجر بخدوده ويكولي مثل خدودي واني اضحك واكله اي، طبعاً محمد وجمال كاعدين بالكلدور يسولفون بالشغل الرياجيل حتى بالبيت ماعدهم غير گال الشغل وحچه الشغل واحنه گعدنه بالمطبخ سوالف وضحك وشويه اخذان غيبه ونشتغل اني حضرت خفايف لان رفيف متقبل بس اني احب اساعد ماحب ابقه كاعده بس اباوع،
طبعا ريحة الدولمة خلتني اسيح كل شويه وسائلتها الدولمة ماستوت :هههه مسحي سبالج دقيقتين واطفيها ، بوزت : هه صدگت طبخها طيب تره لان جوعانه، ضحكت رفيف تدري بيه احب اكلها لان نفسها كلش طيبه بالاكل وهيه من نوع تتفنن بالطبخ ، شويه وصاحت لجمال اجه للمطبخ : ها حبيبي محتاجه شي،
ضربت ع جدر الدولمة بجف ايدها وكالتله : يله حبيبي حان وقت الرجال، ضحك واجه گلب جدر الدولمة بالصينيه ، حضرنه السفره وحطينه الحبشكلات وصبينة الاكل ويا محله لمتنه .
أنت تقرأ
حين يعبث القدر
Genel Kurgu( القصة عراقية وباللهجة العراقية) #روايات_ألهام_الخفاجية ... " "لطالما كانت الاحلام من حقنا لكن الواقع ؟! .. " اول رواية اقدمها باللهجة العراقية اتمنى تنال اعجابكم 💜
