حين يعبث القدر

البارت " 11 "

#رواية_حين_يعبث_القدر
البارت الحادي عشر " البارت 11 "

#أربيل
بعد مرور شهر ...

جاي افتر بالسوگ واختار ملابس واحتياجات نسائية لـ ليان واشتريتلها عطور وكولشي ممكن تحتاجة الانثى لان اعرف ليان خجولة وتستحي تطلب شي وخاله سهاد مو دائماً تجينا حتى تكوللها شنو محتاجه وساره نبهتني ع هلشي  ، جاي امشي وشفت اچفوف نازكات اخذتلها مجموعه ملونه لان لاحضتها حيل تخجل من منظر ايدها، فبلكي هذني يخففن عنها هلشي و يحسنن نفسيتها ،
رجعت للبيت وانطيتها الغراض تشكرتني وهيه خجلانه : ليان انتي صرتي جزء من عائلتنا حالج حال ساره مابيناتنا تشكرات واعتذارات اؤكي؟ ، هزتلي راسها وابتسمت ، عفتها ودخلت للمطبخ حطيت الاكل الي جبته وياي من بره وجبت مي ورجعت تمددت ع القنفه لگيت ساره گاعدة تنفش بالعلاليگ : الله شهالذوق شوفي شوفي ليون هذا يخبل، اباوعلها مبتسمه بخجل وساره اطلع بالملابس والغراض تعرض بيهن واني صافن بملامحها خجلها ابتسامتها هاي الانسانه يوم عن يوم اتعلق بيها اكثر ، ماحس غير ساره رافعة حمالة الصدر تگلب بيها وتتفحصها گبالي : 38 هاي شلون عرفت قياسها؟ ،اباوع لـ ليان گامت ادخن خجل والخدود طماطه واختي ميت احساسها ، شلت المخده وشمرتها بوجه ساره وعفتهم وگمت للغرفة،
شويه واتصل عليه صديقي كنت منتظر اتصاله، مكلفه بموضوع اوراق ليان علمود الجنسيه وجواز سفر حتى نطلع تتعالج بره، : ها بشر ، : تحب اجيك لو تجيني وتستلمهن، : كفوو، وگفتك مانساها ، : ابو سيروان انت الغالي صدك جذب عيوني الك وگفاتك وياي موشويه، : يحفظك الله حبيبي مسافة الطريق واكون يمك ، سديته ورحت للحمام ، بيه طبع من اسبح مااخذ ملابس اطلع بالبرنص وبالغرفة ابدل ، طلعت من الحمام دخلت غرفتي لبست البنطرون وجاي اختار قميص، اندگت الباب، : تفضل، انفتحت ودخلت ليان التفتت إلها اجت عينها بعيني نصت راسها : ئ ساره حطت الاكل تكول تجي تتغده ، : لا لا اكلو الف عافية اني حطلع عندي شغل ، دارت تريد تروح : ليان، التفتتلي، : نعم، رفعت القمصان بإيدي : الاسود لو الازرگ ، : الازرگ ، وطلعت ، ليان الي اعرفها لوكانت بمكانها كانت اختارت الاسود، ع كولن الازرك نلبس الازرگ، لبست ساعتي ، رشيت عطري وطلعت .

#بغداد

رجعت للبيت اشتم ريحة طبخ، دخلت وبوجهي ع المطبخ شفتها واگفه تطبخ ، اشگد اشتاقيت للاكل من ايدها، حطيت جنطة العمل ع ميز الطعام وتقربت عليها حضنتها من وره وراسي برگبتها ، : حبيبي اليوم يطبخ ، : ههه الله يساعدك، اي قابل نعوفكم ع اكل المطاعم وتتعودون ، : يعمي روحي ماتهوه غير طبخ ايدج جعل محد يطبخلي غيرج، اخذت ايدها بوستها سحبتها واندارتلي : ربي يعلي مقدارك ابو كنان، : هاي شنو مال ابو كنان انوب لاعيني هم مشاركني بيج وهم تصيحيلي بأسمه، ضربت بخفه ع صدري بجفها وهيه تضحك : جمااال بدت الغيره ، : شلون ماغار موبيدي اغار عليچ حتى من الهوه ، تقربت عليها اريد ابوسها سحبت نفسها تدلع : جوجو ، : ياروح جوجو ، جانت لازمة طرف سترتي مقربتني عليها ومرتجيه ع الكاونتر واديه محاوطات خصرها ،شالت اديها ابتعدت وعدلت وگفتها وحمحمت ، عقدت حاجبي ، :احممم، اتأشرلي بحواجبها، : شنو؟ ، اشرتلي وراي التفتت اشوف كنان ماد راسه من الباب يباوعلنا مطلع بس عيونه حسباله اذا طلع عيونه راسه ميبين ، ابتعدت عن رفيف، هذا الولد عيونه زايغه عليمن طالع هيج مادري ، جليت صوتي : احم كناااان اني كم مره گتلك هاي التصرفات مو حلوة لاتسويها ، طفر يركض للغرفه صحت وراه : اسبوع ماكو بلي ستيشن عقااب، وگف، : لااااا ماعيدها ماعيدها ، : اي غصبن ماعليك ماتعيدها ، يباوع لأمه يستنجد بيها دارت وجها وطفت الطباخ، عبس نصه راسه واندار يريد يروح ،  : يمك، وگف بمكانه ، : مانسيت شي؟ ، اندار، : اسف ، گالها وركض لغرفته وسد الباب ، ؤؤؤف يهالولد اذا مايشيب راسي ع ايده مايرتاح ، : بعده جاهل مايفتهم يكبر ويتغير ، يله روح بدل علما اصب الاكل . هزيت راسي : استعجلي تره ميت جوع ، عفتها تحضر و دخلت للغرفه لگيتها مغيره بيها ومرتبتها ، اممم الظاهر اليوم افراج من بعد المناحه الجانت معيشتنا بيها، دخلت للحمام سبحت وبدلت وطلعت لكيتها صابه الاكل وگاعده هيه وامير ينتظروني ، بوست اموري ، : لعد كنان وين؟ ، : ميقبل يجي ياكل ، عوفه من يجوع ياكل ، : لا موحچي هذا، روح بابا اموري صيح اخوك خل يجي ياكل، راح يركض يدك الباب : كنش كنش ( كنش دلع كنان بالبيت) كنش افتح الباب بابا يكول تعال اكل، : رووح منا ماريد ، عافه ورجع ، : (امير عنده لدغه بالراء) بابا مايغيد يكول غوح ماغيد (*مايريد يگول روح ماريد) ، زفرت الهوه وگمت، : ويزعل فوگاها، رحتله للغرفه دكيت الباب صاح : مااارييييد ، فتحتها ودخلت للغرفه، : ليش متجي تتغده؟ ، نصه راسه، :ماشتهي، اخذت نفس ورحت گعدت يمه حطيت ايدي ع چتفه باوعلي ، : بابا تره من اعصب عليك مو معناها مااحبك بس حتى انبهك ع غلطك مايصير تتنصت ع خصوصيات الغير بالذات الكبار لان اكو امور ميصير تعرفوها هسه اله تكبرون ، بوز شفايفه : بس المطبخ مابي خصوصية بي الثلاجة، المي والاكل ، يعدد ع اصابيعه، بعدين اني مو زغير ،اني طالب ثاني ابتدائي، اباوعله شلون يحچي مصدگ روحة ثاني ابتدائي هههه والله مايستهان بيك ابن ابوك، : تلميذ مو طالب ، ويله نگوم ناكل تره طلعت الجوعه من خشمي، : يعني اكو بلي ستيشن ، : لااا العقاب عقاب ، يله گوم، : ليييش موگلنا ماعيدها، : اي من بعد العقاب ماتعيدها، يله، اخذت ايده وطلعنه وگعدنا ع لمة وحده ماحب اشوف لمتنا ناقصها نفر احس بلياهم اللگمه ماتنبلع بالريگ  .