خلاص قصتنا وصلت النهاية وايي واحد فيهم مصيرو إتحدد بطريقة م كان متوقعها، ايي زول فيهم إنتهى بمواقف يمكن كان غصباً عنو..
نرجع ل هند اتصلت ل نبيل وقالت:
هند:مش كلمتك اني م عاوزة عقد هسي ؟
نبيل:والله ي هند انا م عارف امي جاياكم أصلاً
هند:نبيل إنت عارف الحاصل ووضع ملاذ كيف أخطط ل عقدي وصحبتي قلبها مكسور💔
نبيل:هند أنا فاهم ده كلو وأنا كمان صحبي مكسور والوضع م عاجبني
هند:هسي الحل شنو؟
نبيل:م عارف والأيام بتجري وخايف نبقى قدام الأمر الواقع
هند:خليها ع الله بس
*بعدها هند قفلت التلفون وبقت خاتة يدها في راسها ومهمومة ، ملاذ كانت بتصلي أول م إنتهت رفعت يدها للسما وبقت تدعي قريب النص ساعة وهند إنتبهت ليها وبدت تعاين فيها وفي لحظة بس ملاذ دموعا نزلت💔 هند جات عليها في المصلاية وقعدت جنبها..
هند :لوزتي ♥
ملاذ:هند ، انتي عارفة أول مرة أدعي ل زول كده من جوة قلبي أول مرة ألح في الدعاء بالطريقة دي
هند:ربنا يتقبل وأكيد سعادتك في مكان تااني
ملاذ:هند انا مش صحبتك وأختك وايي حاجة؟
هند:أكيد ودي عاوزة ليها سؤال
ملاذ:طيب بتوعديني ب شي، لو قلت ليك انو ح يبسطني جدا ويخليني انسى ايي شي
هند:أوعدك ي ملاذ مادام ح ينسيك همك
ملاذ:وافقي انتي ونبيل انكم تعقدو مع مؤمن🙂
هند(قامت من المصلاية ووقفت) :كيف يعني أوافق! مستحيل ي ملاذ
ملاذ:انتي وعدتيني ي هند
هند:بس ي ملاذ م بقدر والله م بقدر ولا ح اكون مبسوطة أصلا
ملاذ:هند انا معاك وح أخليك تكوني مبسوطة
هند:ياخ انا زاتو م جاهزة والجمعة فضل ليها تلاتة أيام
ملاذ:هند م تتعزري، لو م وافقتي والله م اتكلم معاك
*ملاذ أصرٌت إنها تصغط على هند عشان توافق ، وهند بإصرار ملاذ وافقت، واصلا اهلها من قبل موافقين أول م رقية سمعت إنو هند بتها إقتنعت طوالي إتصلت ل فاطمة أم نبيل وكلمتهاا
*في بيت نبيل...
فاطمة بتتكلم بالتلفون مع رقية ونبيل جنبها
فاطمة:خلاص تمام الله يديك العافية ي رب انا بعدين طواالي ح أجيب الحاجات وإنتو أعزمو ناسكم
*أول م فاطمة قفلت الخط الفرحة كان ظاهرة في عيونها ونبيل بعاين ليها متحير
نبيل:في شنو ي أمي؟
فاطمة:ماف شي، كلوو خير عقدك خلاص إتحدد وهند وافقت
نبيل:وافقت؟؟؟😳 كيف الكلام ده انا هسي كنت بتكلم معاها
فاطمة:رقية هسي كلمتني، أنا والله فرحانة ليك ي ولدي من جوة قلبي
*لميس جات طايرة
لميس:نبيييييل😍😍ح تبقى عريس🕺🏼
نبيل:يخوانا انا م فاهم شيلميس:تفهم شنو؟ يوم الجمعة ح تعقد ع الإنسانة البتحبهاا
*نبيل دخل أوضتو وهو مبسوط من الخبر إنو هند ح تبقى حقتو ب ورقة وقلم ، ح يقدر يقعد معاها في ايي مكان من غير م يخاف إنو زول يتكلم فيها، ح يقدر قدام ايي زول يتكلم ب كل اريحية عنها لانها ح تبقى حقتو ، بس عمرو م كان في بالو إنو ح يبقو ل بعض بالطريقة دي، كان نفسو يحس بالإحساس ده وهو معاها ومؤمن في نصهم ويحلمو بيهو زي م خططو بس القسمة كانت أقوى منهم *أهل مؤمن بهناك بدو في التجهيزات والعزومات، وأهل العروس وصلو ، مؤمن كان بيعمل فيها مبسوط قدام الناس بحاول يغطي وجعو وحزنو ، م كان نفسو يكون عقدو بالطريقة دي أو بالسرعة دي بس خلاص إتكتب ايي شي.. أم مؤمن جات داخلة عليو
أم مؤمن:والله ي ولدي م قادرة أوصف ليك فرحتي
مؤمن:أهم شي إنك مبسوطة ي أمي
أم مؤمن:والله فرحانة شديد م قادرة أوصف
*مؤمن لما شاف فرحة أمو كده م قدر يواجها بأيي حاجة وسكت
أم مؤمن:يلا عشان تشوف عروسك
مؤمن:العقد قررب خليها بشوفا يوم العقد
أم مؤمن:ي ود جلابية هي ؟ كيف يعني تشوفا يوم العقد
مؤمن:خلاص طيب بلاقيها
*مؤمن مشى عشان يشوف العروس "أيات" وقف عاين ليها سلم عليها وطلع ، أيات إستغربت جداً من تصرف مؤمن، وخصوصاً إنها جميييلة جدا لون وطول وقوام بس م لفتت إنتباهو
ولا علق عليها أصلا..
*الحاجة لما تكون طالعة من نفسك ، صدقني لو عملو ليك فيها السبعة وذمتها ح يبقى شعورك إتجاها ياهو نفسو وم ح يتغير 🙂💕
*خلاص العقد أيامو جات ، ناس هند بهناك كانو مبسوطين أمها وأبوها وأهلها كلهم ، خصوصاً إنو نبيل من أسرة كبيرة جدا ومعروفة ، هند برضو إحساسها نفس إحساس نبيل م كان عاوزة إنتمائهم ل بعض يكون بالطريقة دي💔
ملاذ:هند ي جمييللة ي سكرة🤤 طالعة قممر بعد بكرة خلاص ح تبقي أحلى من يعقدو عليها🤤💃🏻
هند:جميلة شنو ياخ والله حاسة نفسي كرور😂
ملاذ:ي بت والله عسلل
*البيت كان مليان ناس كتااار يخشو ويطلعو ، ملاذ وهند مشو بيت خالتا عشان لمة الناس والجوطة
هند أول م وصلت إستسلمت للنوم ، ملاذ بقت صاحية تفكر 💔 بس كمان م ح تقدر تقيف ضد قسمتها
*دايما ادعو وقولو"يارب النصيب الحلو من كل شئ"م ضروري بالعلاقات لكن في اي شي💕*خلاص جا اليوم القبل العقد يعني فضل يوم واحد وتنتهي قصص قديمة وتبدأ قصص جديدة ، ملاذ كانت بتضغط نفسها في الشغل شديد وم خلت خدمة الا وخدمتها ده كلو عشان م تحاول تفكر أو تشغل نفسها ب شئ *ناس مؤمن بهناك ااااخر غنا وااااخر رقيص وأم مؤمن م خلت قريب ولا بعيد م عزمتو
في عز الجوطة دي كلها نور جات ل مؤمن في البيت ، لقتو قاعد براو في غرفتو وماسك تلفونو وبسمع في غنية بس من غير سماعة .
نور:مؤمن🙂
مؤمن:نور؟😳 طبعا توقعتك نسيتيني خلاص وم ح تجي تحضري عقدي
نور:كنت عيانة والله وتلفوني بايظ
بعدين ي غبي كيف م أحضر عرسك
مؤمن:سلامتك ياخ ، شربتي حاجة ولا أجيب ليك؟.
نور:م عاوزة شي ، اها عروسنا كيف😉🤤
مؤمن:والله ولا متزكر ملامحها عاينت لي مسافة دقيقتين بس
نور:سمحة شديد يعني😂
مؤمن:يكون م عارف
نور:مؤمن، صحبي وأخوي المما دخلت الجامعة كنا مع بعض ، م حصل يوم شفتك منكسر كده أو زهجان بالطريقة دي، ي ريت لو بيدي أزح همك💔
مؤمن:بس ادعي م تجيني الحاجة الباقي هين
*خلاص التجهيزات كلها انتهت وجا الليل ، أخر ليل تتنتهي فيو أحلام كتيرة ،
هند ونبيل كانو بتكلمو،،
نبيل:م مصدق إنو بكرة ح نعقد ي هند ، م قادر أستوعب إنو قصتنا وصلت حتة زي دي بالسرعة دي
هند: ااخ ي نبيل ، مبسوطة وزعلانة ومتضايقة ، كمية من الأحاسيس ملخبطة جواي نبيل:ربك كريم ي هند ، يلا نومي م تساهري
هند:طيب تصبح ع خير
*جا الصباح ، صباح العقد
ملاذ كانت مع هند بتحاول تدس حزنها عشان هند م تحس وتضحك وعاملة مبسوطة بس قلبها كلو مع مؤمن
ونبيل كان مبسوط برضو، بس احساس الزعل جواهو
أما مؤمن عادي جدا لا احساس فرحة لا احساس حزن ، زي الما فاهم شي
الصباح مرّ بأسرع من سريع وجا وقت العقد💔
أم مؤمن لمت الناس كلهم ومشو الصالة وأهل نبيل بهناك برضو
نبيل لابس جلابية سوداء هو ومؤمن مطقمين مع بعض ، مؤمن لما شاف نبيل ضماهو عليو وقال :مبرووك ي ابو النبل مبروووك
نبيل(وهو بحاول يدس وجعو) : الله يباارك فيك يااخ مبروك ليك برضو بس بتبارك قبل العقد مالك😂
مؤمن:بعدين يمكن م ألم فيك
*بعدها الصالة إتملت لأنو مواعيد العقد قربت خلاص وملاذ جات وأهل هند الناس كلها كانت مبسوطة ومؤمن يحضن في خالاتو وعماتو وهو بضحك بس ماف زول شاف الوجع ورا ضحكتو دي غير ملاذ
خلاص المأذون جا وبدأ يعقد ل نبيل أول
التجاني جا وقعد مع المأذون وأبو هند بهناك ، لميس واقفة بعيد ومعاها خطيبها وأمها، ملاذ بتعاين من بعيد
خلاص المأذون عقد ل نبيل♥
نبيل خلاص بقى راجل هند بالشرع الناس إندمجت مع نبيل والزغاريد وأم نبيل جات حضنتو وهي بتبكي من الفرحة ، لميس أختو جات تحضنو قال ليها :أول م تبكي عشان المكياج بتاعك😂
لميس:مبرووووك ياخ😭مبرووك ليك بقيت راجل مراة قلت لي😂
*اثناء ما الناس مشغولين مع نبيل ، المأذون نادى ازهري أبو مؤمن وعمر أبو أيات.. وعقد ل مؤمن
مؤمن كان يدو في يد المأذون وقلبو مع ملاذ. أول م المأذون قال"بارك الله لهما" مؤمن كان سرحان م فاهم ايي شي ، بعدها طلع المأذون وتااني الزغاريت عمّت الصالة
أم مؤمن جات عليو وقعدت تبكي وتقول:فررحتني ي ولدي ربنا يسعدك ربنا يهنيك😭
مؤمن ببارك للناس وهو م فاهم شي
بعدها جات هند وأيات ، وأيي عروس قعدت مع عريسها
ملاذ مشت اول باركت ل نبيل وهند حضنت هند وبقت تبكي
ملاذ:ربنا يهنيك حبيبتي ربنا يسعدك😭😭😭♥
هند :الله يبارك فيك 😭😭 لووزتي ياخ
*ملاذ مشت تبارك ل مؤمن💔
أول ما ماشة في إتجاهو حست إنو خطواتها بقت تقيلة م قادرة تمشي بس قوٌت نفسها وحبست دموعها وقالت ليو:الف مبروك ربنا يسعدك
مؤمن عاين ليها وهو حاسي ب ياتو وجع الجملة دي إتقالت ورد ليها : الله يبارك فيك
ملاذ عاينت ل أيات: محظوظة ب مؤمن انتي ربنا يسعدك..
*هند ونبيل كانو بعاينو ل بعض وهم مبسوطين من اللحظة ال هم فيها بغض النظر عن الوضع العقدو فيو ، ملاذ بعدها قامت جرت هند وبقت ترقص وتهجج تحاول تنسى وجود مؤمن معاها.. نور جاات متأخرة بعد العقد ب ساعة مشت سلمت ع نبيل وجواها برضو موجوعة
نور:اسسسمررري🤤💃🏻 مبروووك ي عرريسناا ، الاسود عاامل شغل الجن
نبيل:نوووري♥ عقبااالك يااخ ح اتخرج عريس انا 😂💃🏻
نور :فرحة تخريج وفرحة عرس😭😂
*بعدها نور مشت تبارك ل مؤمن..
نور:مؤمممن يخ كبرنا وعاوزين نمسك بيت كماان ، وااي اخواني الاتنين عقدو في يوم وااحد😭
مؤمن:نوور ياخ عقباال افرح بيك ي حتة مني ياخ *متلازمة عشق الإسم م جا من فراغ، الحب لما يخش القلب ما بيكون بيدنا وغصباً عننا بنلقى إننا إتعلقنا بإنسان وبقى حياتنا كلها ، لما نحب بنحب ب كياننا كلو وبكل ما فينا من صدق وإيمان بنكون سلمنا قلبنا للطرف التاني ، بنتجاوز مشاكل كتيرة ونقاشات بس عشان نستمر ، بنثق في بعض عشان العلاقة تتوطد..
متلازمة عشق رواية بتورينا إنو م كل قصص الحب بتنتهي بالزواج وم كل قصة بتبدأ صح ، والزواج قسمة ونصيب
وم كل بداية حب حلوة بتنتهي النهاية الإحنا عاوزنها..
مؤمن وملاذ زيهم كتااار إنصدمو ب واقع النصيب المؤلم وواقع الفراق الجا ضد رغبتهم..
القصة م انتهت هنا ، القصة يمكن تكون ياداب بدت
هل ملاذ ح تنسى مؤمن وتبدا قصة حب جديدة ؟هل مؤمن ح يتعايش مع ايات ويقدر ينسى ملاذ ؟ نبيل وهند خلاص قصتهم ببقت شبه منتهية ، ونور الكاتمة حب نبيل جواها مفروض تقنع نفسها خلاص انو نبيل بقى م ليهاا..
خليت ليكم نهاية القصة دي ، لأنو ايي زول ح ينهيها حسب حالتو وحسب رأيو في الحب
بس الحب جميل والله جميل للإنسان البعرف يحافظ عليو ويصون القلب الحباو، الرواية دي كانت الفكرة منها انها توضح يعني شنو تحب انسان ويعني شنو نصيبك يكون مع غيرو، وإنو في ناس ربنا بكرمهم وتنتهي حكايتهم ب بيت صغير يلمهم ♥🚶🏻♀
#أنا نهاد كمال بتمنى لأي إتنين بحبو بعض ربنا يجمعهم ب حلالو ويبعد عنهم النصيب المعاكس..
#نهاد كمال كاتبة مبتدئة وروائية ، رأيكم بهمني جداً لو كان إيجابي أو سلبي أتمنى أيي زول مرت عليو الرواية دي وقراها يرسل لي رايو فيها..
ح أسعد بأرائكم ومتابعاتكم نتلاقى في الرواية الجاية🚶🏻♀💕
صفحتي في الفيس ل المتابعين Nihad Kamal تلقو كل نصوصي وكتاباتي
قناتي في التلغرام إسمها نهاديات
#حابة أشكر اولاً "محمد هاشم" مصمم غلاف رواياتي♥
بشكر صحباتي القدرو ينشرو الرواية لأكبرر عدد
شكر خاص ل "وعد حاتم " مرجعي في الكتابة..
