عـﻣري الضائع

الجزء الثامن

..ليش اني هيج حضي مالحگ اتهنى بشي صعدت ورجعت نمت للضهر كعدت ،،نزلت للمطبخ فليحه كاعده

فليحه:هلا بالمسعده چا وين اختج

..بالمدرسه،،كمزت

فليحه:چا انتي وين جنتي

..هوه ياسر مقبل ياخذني للمدرسه ف رحت نمت،،راحت جابت السووط واجت

فليحه:اي مدلله نوم للضهاري شعندج خدامه الكو...د مالتجن انه

..فدوه اروحلج اخر مره،،ماتسمعني وتضرب بكل قوتها اصلا جسمي خدر وماعدت احس بالم

فليحه:نايمه لهسه وانه اشتغل طبخ ونفخ وترتيب وانتي نااايمه اعلمج يبت الفكور

..ماعيدها ونبي ،،ضربتني ع رجلي ضليت اكمز من الوجع ماسمع الا صوت من وراي

..يمممه

..فليحه صوفرت وضلت تمتمت

فليحه:ياسر يمه انه اعلمها زغيره بعدها

..ضل يباوع عليها بخزره شلعها من مكانها

..حوبه اليتيمه بركبتج والله يكول اما اليتيم ...وانتي كملي

..تركها واجه عليه كاعده مكرفصه نفسي شالني وجاي يصعد الدرج لاكتني ريان

ريان:عسسل شبيج

..ياسر نزلني،،ولاكأني احجي ويا ابد طلع كبل لغرفته سد الباب،،جاب عده الاسعافات الاوليه مرهم  وشاش وبلاستر

..لكيت بيت قريب علينه واشتريته

..كمزت عليك النبي،،جر رجلي ورفع الدشداشه شويه وبده يخلي دهن ع مكان الضرب

..اي عليه النبي،،لشوكت....لشوكت تنضربين وتسكتين لاتطاولين بس كولي لاحد يكدر يحميج دافعي لنفسج بينه انه وجدي وعمامج بوجه اي واحد ليش ضعيفه هيج مااستاهدج كبل هيج

..مو ضعيفه بس البنيه الي بدون ضهر تستند عليه غصب عنها تتحمل وتسكت ومايطلع منها صوت مسبه وغلط وضرب واهانه كلهن لازم تسكت عنهن،،رفع راسه عليه عيونه بيهن شفقه وحنيه

..منو كالج انتي بدون ضهر استندي عليه اعتبريني ابوج اخوج اي واحد ترديه

رد نزل راسه يلف الشاش

شگيت الصدريه اليوم لان ماريد بشر مخلوق يباوع لعرضي والا انه اريدج تلبسين وتفرحين بس يابنتي كلشي بحدوده البسي الترديه بس كون مايجذب النضر انتي حلوه والوادم يابويه مثل النحل عيونها اتصير ع الحلو ف حاولي شكد ماتكدرين تسترين روحج من عيون الكل،،يله بابا انتي سباعيه بطله ماريد دموع بعيونج خوش

..يحجي واني صافنه عليه شلون يقنعني ويحاول مايجبرني ع شي،،انشاء الله

..من باجر داومي نروح انه وياج نشتري غير صدريه اليوم خوش