سر حياتي

الفصل الثاني

ماشال عيونه من عليها من أول مانزلت من السيارة .. لاحظ تنفسها المضطرب مع أنها بتحاول وبتجاهد لتسيطر عليه وتهدي حالها .. أنتبه على رجفة رجليها وهي بتسلم على سته .. دعى ربه ان هالمراسيم تخلص بسرعه منشان تدخل وترتاح ويمكن تاكل شي .. خاف عليها كتير .. شكل وجهها مابيطمن .... بقي يراقبها وماشال عينه من عليها أبدا .. حتى لما سته حكت معه كانت عيونه مركزه على سما الى بتضم أمها بطريقه حزت بفسه خاصه انه بيعرف مين سبب ألمها .. جزء صغير من الثانيه التفت فيه لسته منشان يرد عليها .. بس بسرعه رجع التفت لسما وهو بسمع أمها بتقول .. بسم الله عليك يا بنتي شو صايرلك !؟ .. نضال الحق ............... لحقها قبل ماتوقع على الأرض وشالها بين أيداه وهو بيقول بقلق .. أمي .. غرفة فاضيه ........... شاورت له أمه لجهة اليسار وهي بتقول .. مافي حدا بالغرفة الشتويه .. يالله نضال بسرعه .......... التفت نضال بغضب وعصبيه على مجموعه نسوان قالو بعد مازغردو .. لا تخاف ياعريس .. هاي لأنها عروس ومو متعوده ..... نظرة نضال كتمت ضحكتهم وخلتهم يهربوا من وجهه قبل مايرتكب فيهم جريمه ... بسرعه مشي فيها لجوا الغرفه وحطها على أكبر كنبه فيها ... اضطر يبعد منشان أم سما تحل محله وتحاول تصحي بنتها وتربت على وجهها وهي تنده أسمها بقلق .. سما .. حبيبة ماما .. سما .. شبك يا أمي ! .. بسم الله عليك ............... دخلت نور أخت نضال الغرفه وهي بتركض وبأيده قنينة عطر .. خالة جربي هدا ............ بخت أم سما على ايدها وقربتها من أنف بنتها وهي بتقول .. سما .. فتحي عيونك حبيبتي .......... قربت منها أم نضال وهي بتقول .. خلينا نرفع لها رجليها .. يمكن ضغطها نازل ............. التفتت على نضال وسألته .. أكلت شى من مبارح !؟ ................. هز راسه بلأ وهو عاقد أيداه أمام صدره وبقلق بيراقب أمه وسته وحماته بيحاولو يصحوها ............... خبطت أم سما على صدرها وهي بتقول بقلق والدموع بدأت تتجمع بعيونها .. ياويل قلبي عليك يابنتي .. شو صايرلك !؟ سما حبيبتي اصحي ............. هدتها أم نضال وهي بتقول .. لا تقلقي أم حسام الظاهر من قلة الأكل والأرهاق .. زيدي شوي العطر وان شاء الله بتصحى ...... بهاللحظه تدخل نضال .. ماعاد فيه يوقف يتفرج أكتر من هيك .. قال وهي بيبعدهم وبيحط أيداه تحتها .. رح أخدها للمستشفي ................ حاولت أمه تمنعه .. لحظه نضال .. لشو المستشفي !! .. شوي وبتصحي ................. التفت على أمه وهو بيقول .. مالك شايفه وجهها كيف صاير! .... رجع دخل أيداه تحتها وهو بيلوم حاله بقلبه .. نضال .. شو عملت !؟ ........... باللحظه الى رفعها فيها تحركت عيونها وبدأت تنفتح على مهل وهي بتهمس .. نضال .................... نبرة صوتها ونظرة عيونها اضطروه يرجعها على الكنبه لأن ايداه ماعادت تقدر تحملها زياده .... بعد لحماته وأمه وهو بيمسح وجهه وشعره بتوتر وبيحمد ربه انها صحيت ..............

*******

فتح باب شقته ودخل .. بسرعه بعد ماسكر الباب وقبل ماتبرد عضلاته رمي حاله على الأرض وبدأ يرفع ثقله على أيداه ليقوي عضلاته زياده .. ربع ساعه مرت قبل مايبدأ بتمارين أرخاء العضلات .. مشى للمطبخ وتناول قنينة مي بارده من البراد شرب منها شوي قبل مايشلح قميصه وينشف عرقه فيه وهوبطريقه للحمام لياخد دوش ... طلع لابس ترنج رياضي و بينشف شعره بالمنشفه وبمشي بخطوات متكاسله للمطبخ .. الحمام الساخن ريحه كتير بعد جدول التمارين المرهقه الجابره فيها المدرب ... فتح الفريزر وطالع وجبة من وجبات المكرويف المجمده .. حطها بالمكرويف .. ضغط 7 دقائق ومشي لخزانة الفيتمينات .. طالع مسحوق البروتين وحط معلقتين بالخلاط قبل مايحط معهم موزتين وشويت حليب ..... مع تصفيرة المكرويف كان خليط البروتين تبعه جازه .. حط كلشي بصينيه وتوجه للبرندا .. صحيح الجو لسى بارد بس هالشى مابيهمه .. بيحب ياكل وهو بيتفرج على الناس على الأقل بيحس حاله مو عايش لحاله وبيقتل شئ من الوحده .. بطريقه تناول جواله لحتى يتأكد من الرسائل .. خاب أمله لما ماشاف رساله من أمه .. رمى الجوال على الكنبه قبل مايفتح البرندا ويطلع .. أخد نفس عميق بعد ما حط الصينيه على الطاوله الصغيره الى بالبرندا .. تناول الوجبه وشوكته وتوجه للدربزون .. ابتسم وهو بيشوف الشمس بتغيب .. أخد نفس تاني وهو بيقول لحاله .. مع ان الحاره متواضعه بس نظيفه ومرتبه ..................... انتفض كله ووقّع الوجبه تبعته من البرندا للشارع أول ماسمع شهقه كسرت السحر الى كان عايشه ....... ألتفت لورا بغضب يدور مصدر الشهقه والصوت الى تجرأ واقتحم عليه خلوته وخرب وجبته الى كان بيستناها بفارغ الصبر .... ألتفت بعصبيه لجهة اليمين وهو بيسمع الصوت مره تانيه .. شو هدا الى بتاكله !! مو على الحسبه أنت رياضي ولازم تاكل شى صحي منشان تحافظ على لياقتك !! ................ زم شفايفه بغضب مكتوم وشد على قبضته وهو بيشوف نفس الصبيه واقفه على بعد أقل من متر منه .. قال لحاله وهو بيحاول يتمالك غضبه .. أنا شو الي بلاني بهيك وحده ................... سندت حالها على حيط الخشب القصير الى بيفصل بينهم وقالت .. طبعا ساكت لأن ماعندك جواب ......................... من بين أسنانه قال .. تصرفك خلاني أخسر عشاي ............. نزلت شيرى من على الكرسى الى كانت طالعه فوقه منشان تسقي الزرع المعلقه بالمكرميات فى برندتها وقربت من الدربزون وصارت تطلع لتحت .. بعدها التفتت له وهي بتقول .. لا تقلق ماوقعت على راس حدا .. لازم تشكرني أني خلصتك من هيك سموم ................ رح يموت من برودها .. يعني لو كانت شاب كان هلأ موتها ضرب لحتى تعرف تلزم حدودها معه .. مين هي لحتى تدّخل بطريقة أكله !! ... من بين أسنانه قال .. أنسه شيباز ................ قاطعته وهي بتطلع فوق الكرسى مره تانيه لتكمل سقى الزرعات .. شيري ...................... أخد نفس بطيئ منشان ماينفجر وبعدها قال .. الى هو .. لو سمحتي .. مابحب حدا يعطي رأيه بحياتي .. تذكري هالشى المره الجاي ..................... وترك البرندا ودخل بسرعه ............ بعصبيه توجه للفريزر وطالع وجبه تانيه .. رماها بالمكرويف قبل مايتوجه لغرفة الجلوس ويشغل التلفزيون على الأخبار .... قبل مايخلص وقت المكرويف بدقيقه دق جرس الباب ...... بنزق قام ليشوف مين عالباب .... أول مافتح الباب قالت بسرعه .. مساء الخير ................. وقف مستغرب من جرئتها .. بعد الى قاله بالبرندا والى كان تصريح صريح منه انها تتركه بحاله بيشوفها واقفه قدامه هلأ بعد أقل من 10 دقائق ...... قالت لما حست انه مارح يرد على تحيتها .. تفضل ..... ومدت ايدها بالصينيه الى شايلتها ...... ماتحرك من مكانه ولا رفع أيده لياخد منها الصينيه .. رفع حاجبه وهو بيسأل .. شو هدا ؟ ..................... أمممم .. سميه تعويض اذا بدك .... ورجعت مدت أيدها بالصينيه ...... بس مالك ماأخدها منها وسأل .. عن شو؟ ...................... تنهدت بتعب وهي بتقول .. عن العشا الى وقع منك ...... رجعت مدت له الصينيه .......... بس مالك مسك الباب وقال قبل مايسكره .. مافي داعي .................. بسرعه حطت رجلها عند الباب منشان مايسكره وهي بتقول .. لحظه لحظه .............. عقد حواجبه وهو بيطلع فيها بأستغراب .................... ميلت راسها وهي بتقول بتوسل .. بترجاك مالك لا تاكل هالشى الى كنت رح تاكله .. اصلا لا طعم ولا ريحه ولا حتى فائده .. انت بس جرب الى جبتلك أياه والله مارح تندم .. لو سمحت لا تكسر بخاطري .... رفت بعيونها وهي بتضيف .. يعني منشان ماأحس بالذنب لأني وقعت لك عشاك ..................... بنظرات جامده ومن غير مايتأثر بتوسلاتها ولا نظراتها قال .. مافي داعي جهزت غيره .... ورجع يحاول يسكر الباب .. بس شيري مايأست ورجعت حطت رجلها وهي بتقول .. طيب موتعويض .. عدها شي تاني .. يعني معقول اذا شي نهار حدا سكب لك شي من الجيران ترده ! وبعدين سدقني رح تحبو .. فيه نسبة بروتين عاليه بتفيد عضلاتك والتارت عملته بالفواكه الطازجه بتساعد جهازك الهضمي وبتنشطك ................... وقف مالك ..
ريحة الأكل بتشهي ومغريه وهو صار له زمان عن أكل البيت بس كمان مابده يعطيها وجه زياده من غير شى مو خلصان منها ................... بدلع قالت .. بلييييييز ................... بسرعه تناول الصينيه بأيد وحده وهو بيقول .. شكرا .. وسكر الباب بالأيد التانيه ....... أبتسمت شيري وهي بتلف ظهرها للباب وبتقول .. يسسس .. واحد شيري ................... شو عملتي هالمره شهيناز !؟ ................. زيزي ....... ركضت شيري وحضنت أختها وهي بتقول .. اشتقتلك كتير .. صار لي فتره بتصل فيك ومابتردي !! ................ بتعب ردت عليها نازك .. أول شي طعميني وبعدين بنحكي .................. ضحكت شيري وهي بتشيل شنتت الكمبيوتر من على كتف أختها وبتمسكها من أيدها وبتمشي معها لبيتها وهي بتعد لها الأصناف الجاهزه عنها ............ بعد العشا ناولت شيري أختها فنجان شاي بالأعشاب وهي بتقول .. رح يساعدك تهضمي الأكل الى أكلتيه ................ أخدته منها نازك وهي بتقول .. كان لزيز كتير .. أنا مالي فهمانه ليش مابفتحي بزنس كيترنج لكلشي .. ليش بس مصره تتخصصي بالكيك !! ................. ابتسمت شيري بوجه أختها وهي بتقول .. الطبخ هوايه بالنسبه لي اما الحلويات والكيك بشكل خاص بحسها فن .. سدقيني يازيزي لما بيخلص معي قالب الكيك وبشوف وجه الزبون كيف فرحان فيه بحس حالي متل فنانه عظيمه أنجزت عمل اسطوري رائع .. خاصه ان التحدي هون ان حلوياتي كلها صحيه شو ماكانت بتكون صحيه ومعموله من مواد طازجه وطبيعيه .............. فكت زيزي بكلة شعرها منشان تريحه شوي ورفعت رجليها على الطاوله الصغيره الى قدامها وهي بتقول .. مالي عرفانه ليش بابا مو متقبل موهبتك ومصر يدخلك بالبزنز معنا !! .... ابتسمت وهي بتكمل .. يعني ضروري كل العيله تكون رمادي !! خلي واحد فينا يكون أحمر .. أصفر .. أخضر ................ مسكت شيري السلسال الى برقبتها وهي بتهمس .. او أسود ................ تنهدت زيزي وهي بتقول .. شيري لا تزعلي من بابا .. والله بحبك كتير بس ................ زمت شيري تمها بأبتسامه صغيره وهي بتقول لأختها .. بس خالفت خطته المستقبليه لي ...................... شيري انت بتعرف ان بابا مابيحب حدا يخالفه بشي .. وبعدين ياستي لا تزعلي .. لساتك المفضله عنده والمحببه لقلبه ................. ضحكت شيري وهي بتقول .. بدينا بالحسد !! .................. ضحكت زيزي .. المشكله مابيطلع بأيدي .. تنهدت وهي بتضيف .. أنا مابيطلع بأيدي أعمل متلك شيري .. مشتهيه ارسم مستقبلي لحالي بس .. ماتعودت اخطط لنفسي او اخالف الأوامر .. دائما كنت البنت المطيعه الى بتهز راسها بحاضر دائما .. بابا الى قرر بأي مدرسه أدخل وأي جامعه أكمل حتى زوج المستقبل هو الى اختاره ............... حطت شيري أيدها على أيد أختها وهي بتقول بتعاطف .. أنت مو مرتاحه مع سالم !؟ ..................... هزت زيزي راسها وهي بتقول .. بالعكس .. سالم أنسان ممتاز .. بس أنا الى مالي عرفانه أتعامل معه .. بتمني خطوبتنا تتم لأن عندي أمل ان حياتي تتغير معه ....................... حاولت شيري تغير المود وهي بتقول .. والله بزعل اذا ما عملتي طلبية العرس من عندي .................. ضحكت زيزي وهي بتضيف .. أنت خلي بابا يحدد الموعد أول وبعدها من عيوني ..... أطلعت زيزي بساعتها وهي بتقول .. يالله لازم امشي قبل ما يتأخر الوقت زياده ..................... خليك شوي كمان والله اشتقتلك كتير ومتسليه معك ..................... وقفت زيزي وهي بتضب شعرها مره تانيه وبتقول .. ماشاء الله .. عندك جيران بياخدو العقل تسلي معهم .. الا قولي لي مين الى كنت واقفه معه من شوي !؟ ......................
مالك !؟ .. هدا جاري الجديد أنتقل من أسبوعين بس ........................... حركت زيزي حواجبها وهي بتقول بشاعريه .. ياحظك بهيك جار .. شو بطل كمال أجسام الأخ !! ................ ضحكت شيري وهي بتقول .. قربتي .. ملاكم محترف ..................... ضحكت زيزي .. هلأ اطمنت عليك كتير .. طيب شو وضعه .. يعني أعزب ولا متزوج او مرتبط !؟ ...................... رفعت شيري أكتافها وهي بتقول .. مابعرف !؟ ................. ديقت زيزي عيونها فيها .. معقول !! صار له أسبوعين ومابتعرفي قصة حياته .. مو مسدقه !! ....................... والله .. أصلا بالزور لحتى تحكي معه كلمتين .. مابيضحك وجه أبدا .. ودائما مبوزم .. والله خايفه اسأله سؤال مايعجبه يقوم يناولني شي بوكس .................. ضحكت زيزي وهي بتمشي بأتجاه الباب .. عادي بالأول بيكونو هيك بس بعدين الكل يقع تحت تأثير سحرك ...... التفتت لأختها وهي بتضيف .. آآه نسيت .. حضري حالك بكرا ماما وبابا جاين لعندك زياره تفتيشيه .. أنا قلت أخبرك منشان تجهزي حالك .. وبليز شيري ألبسي شي يعجب بابا .. ما تخليه يرجع قلقان وزعلان منك ........... هزت شيري راسها وهي بتقول .. خلص أمرك ................... حضنو بعض ومشيت زيزي بعد ماوصت شيري زياده .....

*********

مسكت سته أيده وهي بتهمس .. شو نضال متل ماوصيتك يا أبني ؟ ............... بطرف عينه اطلع على سما الى دارت وجهها لتخبي حمرة خدودها .... رجع لسته وقال .. أن شاء الله ................ شدت سته على أيده زياده وهي بتقول .. البنت معوده على العز والدلال .. عروستك ناعمه ولطيفه تذكر هالشي ........ تأفف جواته وهو بيقول لحاله .. وبعدين مع هالعلقه !! مابقي حدا ما حكى معي ووصاني !! .. حاول يبتسم لسته وهو بيقول .. خلص فهمت ...................... بعتاب كملت سته .. لا ترد على الى صفقو و صفرو لك .. والله اسود وجهنا قدام الجماعه اليوم .. أمها انقطعت رعبه عليها ................ بنفاذ صبر قال .. خلص فهمت .. يالله عن أذنكم ... وحط أيده على ظهر سما ليحثها على المشي بسرعه .. ماسدق أمتى رح يخلص هالغدا ... مابقي حدا بالعيله الا حكى معه .. من سته وأبوه .. الى ولاد عمامه واخواله الى شالوه على الأكتاف وحيوه .. وبالأخر اجى أبوها يوصيه عليها لأنها حبيبة قلبه ونوارة بيته ..... مسح وجهه بتعب وهو بيفتح لها باب السياره .. لف لمكانه وسألها أول مادخل .. لسى تعبانه ؟ ............... بعدت غرتها ورا أذنها وهي بتهز راسها بلأ .............. تنهد قبل مايحط المفتاح بالسياره ويشغلها .. لام نفسه .. وبتسألها يانضال !! بالله عليك شو الى خطر ببالك وتقول لها هالكلام مبارح !؟ عمرك ماكنت قاسى خاصه مع الجنس اللطيف !؟ ..شفت شو صار فيها !؟ ... كأنك بتحملها ذنب ضعفك ! .. ضعفك أمام أمك .. وأمام جمالها ...... آآه يا أمي ... لو تعرفي شو عملتي فيني ! ............ بطرف عينه أطلع عليها بنظره خاطفه قبل مايرجع يركز بالسواقه .. أو بأفكاره ... قالت بحبك نضال !! كيف هيك حبتني !؟ حاولت تكون فترة خطوبتنا جافه وناشفه منشان ماتتعلق فيني .. أنا كرهت حالي بهديك الفتره !! .. تعقدت الأمور زياده .. لازم ألاقي لها حل سريع .. لازم ..........

أول مادخل فك جرافته وقال وهو بيمشي لغرفة النوم .. داخل أخد دوش .............. وقف مكانه لما سمعها بتقول .. من هاي الى بتحبها ؟ وليش تزوجتني وفي وحده تانيه بحياتك !؟ ............. بهدوء ألتفت عليها .. فاجئته بسؤالها .. بشكلها .. الأصرار كان واضح بملامحها رغم الدموع الى بتلمع بعيونها ............