خبايا الروح

الجزء الثالث

#خبايا الروح❣❣❣
الجزء الثالث.........

اشتــااگ
لأسمك وانكسر
واصفن واگولن تــگضي
حظي وعرفت سوالفه
ومابيه اعاند حظي
حاولت اكرهك بس صعب
اني الله باليني بگلب
لا يكره ولا ينسه....
رائد:امي وسماح مستغربين ليش
موصلت لبيت ابوية واليوم زفة سرمد
امي ظلت تحجي علية ع اخوك وما اخوك
متحملت داطلع دخل عمي خلدون وراه
سماح جانت ابيت ابوية بس امي
مكدرت تروح لان مريضة،،،
خلدون:عمي كوم لاتسوي بلبلة العالم
تسأل عنك ليش محاضر،،
رائد:محجيت بس انكساري واضح بعيوني
خلدون:كوم بوية كوم وان شاءالله الله
يبرد كلبك ويبعثلك بنت الحلال الي تنسيك
رائد:امي وسماح صفنن ممفتهمات عمي
حجالهم مختصر امي تخبلت وظلت تبجي
وتندب حظي متحملت حجيهة طلعت
من البيت ياهو الي يسأل اكلهم اليوم
نازل والحجية كلش مريضة،،رحت من
لاجارة سلمت ع سرمد وتقربت من المرة
الي المفروض تنزف الي مشيت بأتجاهة
واني روحي تحترك واني اشوف حبيبة
كلبي الي انتضرتهة يوم يوم وربيتهة
ع ايدي تروح لغيري والطامة الكبرى
اخوية يعني لازم نتشاوف،،،
رائد:مبروك عليج خوية ان شاءالله منه
المال ومنج العيال،،،،
سرمد:تسلم خوية رائد يوم الالك وازفك بيدي
رائد:مكدرت اسوي شي لزمت سرمد
فوت خوية،،وخلي مرتك تسمي وتدخل
برجلهة اليمنى ان شاءالله عتبة خير
عليج خوية،،،
خلدون:متحملت اشوفه لرائد بهيج وضع،،
صحت عليه،كدام الحاضرين ابني روح للوالدة
لتروح تتخربط احنة موجودين ان شاءالله،،
رائد:درت وجهي ورحت للبيت صارت بوجهي
امي،،
ام رائد:يمة وليدي شنو السالفة شجابك
ع مرة اخوك،،
رائد:تهسترت بدون وعي،،لاتكولين
مرة اخوك مرتي هاي مرتي فاهمة
المفروض اليوم اني ازفهة لغرفتي
مو لغرفة ذاك العار فهميني يوم
شلون راح اكدر اعيش وهي بصفي
بس بحضن غيري شلون،،انهاريت
وكعدت بالكاع وخليت راسي بين رجلي
وظليت ابجي بدون وعي،،،
شمس:الدمعة منشفت من عيني وفكري
كله برائد صح حرام وهسة اني ع ذمة
غيره بس مو بيدي خايفة علية وما
اريده يفكر بيوم ان اني تخليت عنه
نزل سرمد واجة يفتحلي الباب واني
كلشي ما داشوف لان الكبوس مال
البدلة نازل ع وجهي،،سمعت صوته
وروحي خدرت من الالم ريتني ميتة
ولا صايرة بهيج موقف زين شلون
اجة وبصفته منووو،،،
تقدم مني وباركلي وكلمة الخوية التطلع
منه تذبحني الف مرة بالثانية لان نبرة
صوته تحجي غير شي،،تعبر عن انكساره
وخذلانه اكيد هسة هو اباله اني خنته
وطعنته بظهره،،تمنيت اخذ ايده واحجيله
كلشي الصار اتمنى نروح لمكان محد
بيه بس اني و وهو الهلاهل والهوسة
قطعت عليه افكاري ودخلت للبيت
بس نسوان شالوا الكبوس عني وتخبلن
النسوان اسمع وحدة تكول للي يمهة،،
شوفي البخت شلون حلوة وصغيرة
هو هذا العار وين يستاهل هيج وحدة
اللخ اتجاوبهة،،اي والله حجيج صدك
النوب شوفي شلون دمعتهة بعينهة،،
ولج بس لا مسويلهة شي ومجبور ياخذهة
اني سمعت ذاك اليوم مسوية طلابة
وصارت كعدة ورة جم يوم كالوا سرمد
عقد زهاي شوفة عينج ورة10ايام ازوج،،
شمس:اني اسمع واشبع قهر والنوب
كلهة بجفة وخوفي منه الليلة بجفه
جني امه،،،
ام سرمد:شوفي حبيبتي من هسة
نتفاهم تمشين عدل وية سرمد احسنلج
ترى هذا المدلل مالتي وصغير اخوته
فديري بالج تعكرين عليه ليلته ماشي
وصيري حبابة،،،
شمس:طيحان الحظ مبين من اول ليلة
صبرني ياربي شلون راح تكضي ما ادري
ظلوا هوسة وركص والديجي خواته وامه
ممصدكات كالبين الدنيا وخواته نفس
صنف امه شايلات الخشم ومغرورات
وكال اخونة وحجة اخونة،،،وراها انتبهت
يتبسبسن ع مرة مو كلش جبيرة بس
مبين تعبانة صحيا دخلت وكامت وحدة
من البنات شابة ركضت عليهة،،،
سماح:ماما ليش اجيتي انتي مو مريضة،،
ام رائد:لا ميصير يمة جيت بس ابارك
للعروس وسرمد وارجع،،،
شمس:اني كاعدة وعيني عليهم بس
بغير عالم،،محسيت غير ع صوت المرة،،
ام رائد:طبيت للبيت صارت كبالي البنية
ما شاءالله حلوة بس الحزن الي ع وجهة
واضح تقدمت ع ام سرمد باركتلهة وظلت
سماح وياية تقدمت من البنية باركتلهة
بس بالهة اصلا مو وية احد تفتر عيونهة
بين الناس وبس الدموع تنزل بس العجيبة
محد منتبه عليهة لزمت كتفهة،،
ليش بنتي هاي الدموع المفروض الليلة
ليلتج شوفي العالم شلون متونسة،،
شمس:مكدرت احجي شمعرفني منو هاي
اخاف تطلع خالته عمته،،جاوبته،،
لا عادي ماكو شي،،،
ام رائد:شسمج،،،
شمس:شمس،،
ام رائد:شموسة حلو اسمج ان شاءالله
ايامج كلهة نور ودفو ع اسمج،،
شمس:كلتهة بحسرة،،ان شاءالله،،
ام رائد:اني ام رائد...
شمس:بعدهة ممكملة اني باوعت عليهة
بصدمة اااام رائد،،
ام رائد:اني اصير مرت ابوه لسرمد
بيتي بصف بيتكم حايط ع الحايط،،،
شمس:ظليت محتارة يعني معقولة سرمد
يصير اخو رائد،،شلون لا لاااا مستحيل
بس اااي ااي ماكو غير تفسير سرمد
بيوم الي تعرضلي ذكر اسم رائد واليوم
اجة رائد،،راسي صدع والم كلش قوي
لزمت راسي وكمت ابجي،،
ام رائد:اسم الله يمة شبيج،،،
شمس:متحملت الالم وشبه الي اغمى علية
حسيت النسوان كلهة التمت ع راسي
الي تكول انحسدت والي تكول خايفة
اوووو اشكال حجي بس ام رائد جانت لازمة
ايدي وتعرف السبب الحقيقي لتعبي
تقربت يم اذني،،
ام رائد:هاي هي بنتي انسي صارت
عندج غير حياة واتمنى متأثرين ع رائد
وخلي ينسى،،،
شمس:هالكلمات جانت مثل السم تنزل
علية بس هو هذا الصح لازم ابتعد عنه
نهائيا حتى لاننجرف للحرام،،وراها شوية
صحصحت بس بعده الالم،،
خالة سرمد:يلة بنتي كومي نصعدج فوك
عين الي ماصلت ع النبي كومي ارتاحي
شوية،،،
ام سرمد:لا خية خليهة عيب منا العالم هسة
تصعد،،،
خالة سرمد:سعاد البنية تخربطت ليصير
بيهة شي،،،
ام سرمد:يلة،،يلة،،سرمد هم اجة يلة
خل نزفهم،،،
شمس:بس سمعت هاي الحجاية رجفت
رجف كو طبيعي،،
خالة سرمد:لج سعاد هاي البنية مو طبيعية
بس ترجف ليصير بيهة شي،،،
سعاد:خل تولي عيارة هسة بس تصير
جواه،،،
خالة سرمد:سعاد شلج بهالحجي البنية
مبين وضعهة لا تمثيل ولا شي،،،
شمس:ظلوا يتناقشون بالاخير ام سرمد
هي الي ربحت المناقشة صعدت للغرفة
وسمعت الاصوات تقترب من الغرفة
دخلت امه وخالته حجوا وياية ورة شوية
طلعوا ودخل هو متت بدمي من الخوف ابد
مرفعت راسي تقرب هو لزمني من جتفي
رجفت هم خوف وهم كره،،،
سرمد:كلش ارتاحيت من شفت موقف رائد
وكلت البنية حلوة وكلش عجبتني من
ذاك اليوم ظلت معشعشة بمخي وصيت
صاحبي يجيبلي مشروب وشربت قبل
لا اصعد خالتي كالت ترى خايفة كلش
وقبل شوية متخربطة سوت حماس
عندي دخلت للغرفة جانت طالعة تخبل
ازنودهة، صدرهة، جسمهة كله بارز
وبياضهة يخبل اول ملزمتهة رجفت رفعت
راسهة،،تدرين من يوم الي شفتج
وشميت عطرج كلت الا اخذهة،،،وتقربت من
ركبتهة وشميتهة ظلت مثل الصنم،،
انتي ليش مدتتجاوبين وياية،،،عطت بيهة
احجي لو رايدة رائد،،،
شمس:كلش خفت منه والشرارة مبينة
من عيونه شسوي شحجي بهيج موقف
والله ما ادري،،،ااااايي رائد ما اعرف،،
محسيت غير راشدي طفر الدم من حلكي،،
سرمد:ليش شبسرعة نسيتي رائد
حبيب الكلب اصلا اني كل هذا سويته
حتى احرك كلب رائد ولا اني وين والزواج
وين اني لو اريد بنية عندي كومة بس
زواجي منج جان اله غاية وهي حرك
كلب رائد باليوم الف مرة واخلي يشتهي
الموت مشتهة،،
شمس:كمت ابجي واني شنوو ذنبي،،
شسويتلك تدري بسببك اهلي تخلوا عني
كل ضنهم اني عندي شي وياك،،،
سرمد:تقربت عليهة وحجيت بمكر
واذا تركوج اهلج عندج اني سايسيني
وسمعي كلامي والي تريديه يجرالج
بديت اتقرب منهة وهي جامدة عبالك
جثة وبس دموع متحملت ضربتهة النوب
هجت بالزايد متحجي ولا تكول اخ بس
دموع ظليت اضرب بيهة وراها نمت فوكاها
واخذتهة بكل عنف وحسيت بيهة اتأذت
بس جنت مستمتع بأذيتهة حسيت رائد
هسة ديتعذب وياها فكمت ازيد عليهة
الى ان اغمى عليهة ظليت اضرب بيهة
ذبيت مي ماكو متكعد بعدين شفت دم هواية
نزلت ركض ع امي وكعدت خالتي وراها
كعد البيت كله خالتي تخبلت،،،
خالة سرمد:ولك هاي شنووو عزة العزاك
تعالي سعاد تعال يا زمال خل نغسللهة
وراها خفت عليهة الدم مديوكف سعاد
حضري ملابس خل ناخذهة للمستشفى،،
ظلت سعاد تجادل طلعت حجيت وية ابوه،،
ابو سرمد ابنك مدمر البنية ضاربهة وماخذهة
والبنية صار عدهة نزيف وفاقدة،،
ابو سرمد:صدك جذب دخلت ع سرمد
ضربته راشدي،،ولك هاي شنووو شارب
ايااا ادبسز سعاد حضري البنية اوديها
للمستشفى،،،رادت تجادل عطت بيهة
ولج شيوخ شكللهم اذا صار بيهة شي،،،
رائد:حسيت ع روحي الدنيا ليل ونايم
بالهول هاي شوكت نمت كمت لحيلي
داصعد لغرفتي سمعت هوسة وحجي نسوان
ابيت ابوية كفيت البردة ممبين شي بس
اضوية السيارات طلعت شفت اخوية
مرتضى،من الحايط خير مرتضى شصاير
مرتضى:اكوو غير هذا الدماغسز اخوك،،
رائد:كلبي وجعني بس لا شمس بيهة شي،،
خير شبيه،،
مرتضى:دتعال،،تعال،،،
رائد:طلعت من بيتنة لاكاني ابوية شايل
شمس ملفوفة بعباية والحجاب مذبوب ذب
خطية ابوية بالكوة مسيطر محسيت غير
عاط بيه الزمهة ابني حالة اضطرارية راح
توكع من ايدي،،،
رائد:شلتهة بحضني اباوع عليهة فاقدة
و وجهة ازرك مبين مضروبة خليتهة بالسيارة
داروح ابوية صاحني،،،
تعال رائد وياية يلة سعاد،،
خالة سرمد:اني جيت ابو سرمد سعاد
ظلت يم الشفية،،
رائد:مكدرت اسأل شبيه واصلا السالفة
مبينة،،وصلنة للمستشفى ركضت جبت
سدية خليت شمس عليهة ودخلتهة
للطوارئ وطلعت طبت خالة سرمد بس
جنت ابا الغرفة،،،
الدكتورة:خييير شبيهة هالعصفورة،،
خالة سرمد:عيني دكتورة هاي عروس
وفجاءة زوجهة كال تخربطت،،
الدكتورة:وشنووو هالاثار الي ابوجهة
ع العموم اني راح اسوي اللازم بس
لازم اكتب تقرير عن حالتهة،،الله يخليج
متكوليلي هذا بشر لو شنووو حسبي
الله شمسوي بالبنية،،
خالة سرمد:خير دكتورة،،،
الدكتورة:لازم انقلهة لغرفة العمليات
مجروحة جرح كبير وتحتاج خياط،،،
خالة سرمد:طلعت ابجي،،تلكاني رائد
والله فشلت كدام الدكتورة من اخوك،،
ابو سرمد:خير ام ماجد احجي،،
خالة سرمد:والله يا ابو سرمد البنية
كلش متأذية وراح تنقلهة للعمليات تحتاج
خياط وراح تكتب تقرير عن حالتهة ولمن
تصحى يكملون التقرير،،،
ابو سرمد:الله اليستر هذا العار راح
يسويلي مشاكل شكول لشيخهم لو وصله
خبر لو صار شي ع البنية،،،
رائد:كعدت واني كلبي ممرود ع شمس
عرفت خطة سرمد من كلي راح احرك كلبك
واموتك ع البطيئ،،عرفت ان انتقامه
مني راح ينفذه عن طريق شمس،،،
جتي الدكتورة ورحنة عليهة هي انهدت
بية عبالهة اني رجلهة ورة معرفت
تعذرت مني،،وطمنتنة عنهة وكالت هي
نايمة هسة شوية وتصحى،،
ظلينة برة كاعدين وخالة سرمد ظلت يمهة
صارت ب4:30الفجر طلعت خالة سرمد
وكالت شمس كعدت جتي الدكتورة
فحصتهة وسمعت رفضت تقدم بلاغ
ع سرمد لخاطر ابوية وراها انطتهة الدكتورة
عدة نصايح وعلاج وكتبتلهة خروج،،،
جاب ابوية كرسي متحرك وقدمه
مكدر يحركهة سندتهة خالة سرمد
والكرسي تحرك من جواها شمس
كتمت وجعها وعضت شفتهة حيل،،
خالة سرمد:سودة علية بنتي توجعتي
رائد يمة تعال حبيبي تعال بس اسند
الكرسي،،،
شمس:تسمرت بمكاني بس سمعت
اسم رائد رفعت راسي والدموع ترست
عيني ردت اركض لحضنه واضم روحي
بيه وابجي بحضنه لحد ما ارتاح،،
رائد:رفعت راسهة والدموع متجمعة ع
الرموش وكامت توكع وحدة ورة اللخ
بعيونهة كومة حجي متحملت اشوفهة
بهيج حالة،،كامت خالة سرمد كالت بس
تسأل الدكتورة ع شغلة،،،
كعدت كبالهة ومسحت دموعهة،،،،
يا ريتني متت ولا شفت هالدموع،،
شمس:متحملت لزمت ايده حضنتهة
بثنين ايدية وظليت اشهك بقوة،،
رائد:كافي ياروحي كافي مو حركتي
روحي،،،
شمس:احجي وابجي،،مو بيدي يا عمري
انت والله مو بيدي مداتحمل الي صار
مخنتك والله....
رائد:حطيت ايدي ع حلكهة اشششش
ياروحي انتي ادري بيج وعرفت الي
صار مجرد انتقام مني وبس وانتي
صرتي الوسيلة،،،،
شمس:دنكت راسي ومسحت وجهي
هاي هي رائد الصار صار بعد ماكو
رجعة منه،،،
رائد:يعني شنووووو،،
شمس:شنو شنووو اني ع ذمة اخوك هسة
واي شي يصير بينة حرام واني
ممستعدة اغضب رب العالمين،مجرد
التفكير بيك اكبر حرام،،راح احاول ابني
حياة جديدة وية سرمد وان شاءالله يتغير،،
رائد:كمت بغضب لج انتي شدتحجين واني
مفكرتي بيه شيصير من اشوفج وياه،،
هاااا لو من تنسد عليكم باب شنو ممكن
يصير بيه،،،احجي،،
شمس:هاي هي اتحمل وانساني بعد
منرهم سوة رائد انت فكر بيهة شلون
اخون اخوك وياك،،،
رائد:صح جان كلامهة بس جيب كلبي
الي يقنع،،،
شوفي هذا كلامج راح تندمين عليه هواية
تخافين تخونين اخوية وياية بس انتي
بالاصل اكبر خاينة لان خنتيني وية سرمد
ولاتتوقعين بيوم اسامحج ع هالكلام،،
عفتهة وطلعت صارت بوجهي خالة سرمد،،
هاااا ابني خما بيهة شي،،
رائد:ما ادري خالة شلون ادخل وحدي،،
شوية وطلعت خالة سرمد وياها شمس
ع الكرسي المتحرك حاولت اتجاهلهة
بس متحملت عيوني تخوني وتركض
لعدهة وهي ابد مو يمهة الظاهر
صدك نوت تنساني،،،
كلها سوده
الليل...... والخنگه... والمفارگ ولف..
ربي شنهي الصار بينه
وما يعرفونا العرف،،،،
شمس:بعد مرجعت من المستشفى
سرمد ابتعد عني صار ينام بغرفة ثانية
عمتي ابد متحجي وياية لان بسببي
عمي متعارك وية سرمد وطارده بنفس
الليلة وبالكوة عمي مرجعه للبيت
لهذا عمتي شدت وياية نسوان حمويني
وكحات ومينحملن بس وحدة بيهم اسمه
رفل كلش حبابة كل شوية تجيني
واداريني حتى حماية رجلهة علي حباب
مو مثل باقي اخوته،،خواته هم مثل امهن
حماي الجبير طلع من البيت جانت عنده
كاع وكمل بنائهة وحماية الوسطاني
عزل مشتمل ونزل درج ع الطرمة
يعني حتى طبتهم وطلعتهم وحد الحمدلله
ارتاحيت شوية صح تنزل يمنة بس
شوية احسن متدخل هواية بقينة
بس اني ورفل بالبيت وية عمتي
ورفل نتساعد بالبيت الغدة ع عمتي
متقبل احد يمد ايده ع الغده والعشة
اني ورفل صرنة صديقات ونسوان
حويني هواية ادخلن بينة بس ابد
متغيرنة وحدة ع الثانية وعلي حماية
هم علاقتي حلوة بيه يعني حياتي
وياهم شي ع شي الحمدلله ماشية
اما بالنسبة لسرمد ظل طول هالفترة
هاملني ماله دخل بيه ابد بس المصرف
يذبلياه بالغرفة ويطلع اني مدرت بال
هاي حياة بعد لازم اقوي
نفسي واتحملهة شلون ميكون،،،
وقررت اني اخطي اول خطوة وية سرمد
واحاول اكسبه مهما يكون هو زوجي ومالي
غيره بهالبيت
اما بالنسبة لرائد مشفته من اخر مرة
بالمستشفى بس مرات من اطلع
للحديقة او اغسل الطرمة اسمع صوته
يحجي وية وحده اسمهة سماح لو امه
وهاي مر ع زواجي3اشهر واسبوعين
ونفس الروتين اكعد ب9الصبح احضر
الريوك ويكعدون عمتي وراها رفل هي
وجهالهة عدهة 3ولد وبنية الولد مدراس
اول وثاني وثالث ابتدائي عبالك توم
والبنية عمرهة6اشهر اني كلش احب
الاطفال تعلقت كلش ابنت رفل اسمهة
ياسمين وهي تعلمت علية كمت اساعد
رفل بيهة اغسللهة اسويلهة ممة
وهيج شغلات خطية رفل ملتهية
وية الجهال مدارس وكذا،،،،المهم،،
ورة الريوك نبدي ع شغل البيت اني انظف
اي شي محددت الشغل وية رفل
خطية يلة تلحك خصوصا وكت المدارس
رفل التهت تغسل مواعين الريوك
كعدت مينة(ياسمين)،،،
رفل:شمس فدوة جيبيهة،،،
شمس:هلا هلا شنو هالصباح الحلو،،لج
لا تمطين جسمج هيج راح اكلج،،ظليت
ادغدغهة بعدين شلتهة طلعتلهة ملابس
غسلتلهة وبدلت حفاضتهة ومشطت
شعرهة سويتلهة كرون واكفات شعرهة
كصير بس سرح مي،،طلعتهة لامهة،،،
هاج استلمي خل اغسل الطرمة،،
رفل:بصوت ناصي عوفيهن روحي ارتاحي
اني اغسلهة بس خل اوكل مينة،،
شمس:لاحبي خلصي ع راحتج وراج
الفيلق واشرت ع الجهال وبعدين ابو
الفيلق غمزتلهة وطلعت للطرمة لبست حجاب
خياط يصير مثل حجاب الاميرة بس
جبير ينزل للصدر،،،البوري يصير
قريب من الباب والماطور يم الباب رحت
اشغل الماطور واجر الصوندة جانت
الباب شوية مفتوحة لمحت طوله يمة
رحت فدوة لطوله اوووووف ياعطرك
يرد روحي،،استغفرالله،،استغفرالله
ياربي كافي شنو هالتفكير،،،سمعته
يحجي وية وحدة،،،
رائد:يلة حبيبي كافي تتعززين علية
شو بلة امشي كدامي،،
سماح:رائد:فدوة ياعيني هسة عوفني
خليني ع راحتي،،،
رائد:اشششش امشي كدامي ولا كلمة
اريد اشوف شلون اليوم متاخذين
السوك كله،لج انتي كل هاي الدنيا
قليلة بحقج،،،
شمس:من سمعته هيج يحجي وياها
مبين يحبهة ويموت عليهة نزلت دموعي
حركت خدي حرك بكلبي الف صرخة
مكتومة،،الله يسعدك ويريح بالك يارئد
والله تستاهل السعادة،،،
سماح:اوووف امري لله،،ياااا اوكف،،اوكف،،
رائد:لج شكووو شبيج طفرتي،،،
سماح:عيب مرة سرمد واكفة وشافتنة
لازم اسلم عليهة،،،
رائد:بس جابت طاريهة شكد جنت
مقسي كلبي وظنيت ناسيهة بس سمعت
طاريهة راح كلشي تلاشى من بالي
الزعل والحقد كله تحول حب وهيام
واشتياق دست ع نفسي ما اندار واشوفهة
بس متحملت شفتهة وياريت منداريت
صايرة تخبل سمنانة لابسة دشداشة
طويلة وردي وحجاب طويل ابيض،،،،،
اووووف ياعافيتي شصار بينة وشلون
وصلنة لهيج ظروف،،،
شمس:توني اسد الباب بس جتي البنية،،
واستحيت افشلهة سلامهة وملكاها حلوو
احبهة لخاطره دامهة من طرف رائد،،
سماح:صباح الخير،،
شمس:استقبلتهة بأبتسامة وفتحت الباب
صباح النور تباوسنة،،،
سماح:شلونج اخبارج،،،
شمس:بخير الحمدلله،،بس معرفتج،،
سماح:اني اخت رجلج شبيج،،
شمس:ضحكت براحة يعني هاي
لازوجته ولاخطيبته،،،شلوون والله اني
اسفة ما اعرفج ولا شايفتج انتي من زوجة
عمي الثانية مو،،،
سماح:لا حبيبة امي المرة الاولى عمتج
الثانية،،،
شمس:حسيت بيهة ضاجت،،اااا العفو
والله ما ادري....
سماح:قاطعتهة عادي هي خالتي دومهة
تكول اني الاولى،،المهم باعي اني
مستعجلة داحضر لامهر مالتي
تجين موووو،،
شمس:اااا ما ادري محد كال،،،
سماح:اي هاي سوالف عمتج ال....
رائد:سماااااااح،،،
سماح:هاي هي سكتت معليج تعالي انتي
و فلة هم،،
شمس:ضحكت فلة منوووو،،،
سماح:اوووو لج انتي وين عايشة والله
انج صدك فطيرة مثل مكالت امي،،رفل
مرت علي،،،
شمس:هاااا ماشي شايفة كل الخير،،
سماح:واني امشي كتلهة ممقبولة تعالي
للبيت وباركيلي،،،
شمس:صار بعيوني تدللين سموحة،،،
وصعدت للسيارة ورائد جان منتجي ع السيارة
يدخن داس الجكارة برجله وحك راسه
عرفت يريد يحجي شي،،،اي
اعرفه واعرف كل تفصيل بيه،،،،
رائد:محتاجة شي خوية،،كلتهة واني
انزف من هالكلمة،،
شمس:اااممم لا سلامتك،،،صعد السيارة
وحرك بعدني اسد الباب محسيت
غير دفعة قوية ردت اوكع صار كبالي
سرمد،،،
ااالله يساعدك،،خير صاير شي،،،
سرمد:جنت راجع للبيت وشفت رائد
كبال بابنة ومدري شحجة تخبلت بس
لا وية شمس اليوم اذبحهة،،صدك نزلت
من السيارة جانت توهة الباب تنطبك
فتحت الباب وصدك طلعت شمس هي
تلكتني الله يساعدك ومن هالحجي،،
جاوبتهة بعصبية واني صاك ع سنوني
ذبي البيدج وكبل للغرفة،،،
شمس:ذبيت الصوندة وسديت البوري
بس كلش خايفة منه،،
ام سرمد:وين صاعدة وعايفة الطرمة،،
شمس:ااا خالة بس اشوف سرمد شرايد
صاحني،،
ام سرمد:ااااااممم دمشي امشي هو
ابني اشاف منج من اخذج لليوم،،،
شمس:صعدت مهتميت لكلامهة توني
فتحت الباب رأسا حصرني بالحايط
وخنكني،،،
سرمد:لج شعندج واكفة وية رائد بالباب
شمس:حاولت افلت ايده اختنكت كلش
سرمد:شمرتهة للكاع احجي لا هسة
طلقة براسج،،احجي واصك بسنوني
مردت احد يسمع،،
شمس:شمرني ع الكاع حسيت اعظامي
اتكسرت،،والله ماعندي شي ومجنت
واكفة وياه،،
سرمد:جريتهة من شعرهة لج كلبة
حيوانة اتجذبين علية شفتكم بعيني،،
شمس:الله يخليك راسي بس هدني
وافهمك،،والله مو وكفت وياه جنت داسد
الباب وجتني سماح اختك سلمت علية
وعزمتني ع المهر مالتهة وانت من جيت
جانت توهة صاعدة للسيارة والله وروح
امي،،،
سرمد:هديت شعرهة وشمرتهة،،لج
والله اذا حسيت اكو شي لو مسوية
شي من وراية لا اطيح حظج والله
افضحج واشمرج ع ابوج هو يصرف وياج،،،
شمس:عافني وطلع ظليت ابجي شلون
بلوة،،،النوب جسمي كلش وجعني
وراسي،،اهووو هسة بس انزل امه
تظل ادردم وتذب حجي طبيت للحمام
غسلت واخذت نفس لبست الحجاب
ونزلت شفته كاعد بالمطبخ يلعب وية مينة
بس شافتني جتي ركض شلتهة وفلة
ع كولة سماح غاسلة الطرمة ابدالي،،،
هاااا فلة نكيتي ع الطرمة وهاي غسلتيهة
رفل:لج شكووو شصاير عمتي ظلت
تحقق لان سمعنة صوت سرمد بس
اني ثولتهة علية،،،
شمس:يمعودة واصل وشايف رائد بالباب
وسماح يكلي شعندج واكفة وياه
اكله مو وياه،،اصلا اليوم يلة عرفتهم
هي البنية جتي وسلمت وكالت اني اخت
رجلج،،وصدك مهرهة باجر وكالت
انتي وفلة تعالوا انتظركم،،،
رفل:اي يمعودة اتجنبي اخوته ولد
خالة سمية،،
شمس:مرة الثانية،،اووو اقصد،،
رفل:تعالي اسولفلج،،خالة سمية تصير
مرة عمي الاولى خلفت رائد وسماح
عمي جان موهالكد وياها لان اخذهة
غصب تصير بنت عمه لان جان بوقتهة
رايد عمتي من خلفت رائد هجرهة
بس ابوه وعمامه مرضوا علية هو اشترط
يرجع هادي وياها بس ياخذ عمتي
وافق الكل بس شنو اجاها مرة لو مرتين
وراها رد هجرهة صارت عدهم سماح
صارت مشاكل هواية تعرفين احنة
اهلية والاخبار متنضم خالة ام رائد
كلش فقيرة ومن اهل الله ابد متأذي
وهي ربت علي رجلي اكثر من عمتي
جانت ممتفرغة اله لهذا تشوفينة اني
وعلي غير شي وياهم علي ميقبل ع
اهله حتى مرتضى حماية هم كلش
يحبهم ويحترمهم بس عمتي وكحة مكعدت
راحة حاربتهم حتى خلت عمي يترك
ولده وماله شغل بيهم لحد مكبر
رائد وشاف معاناة امه وراها خطية اخته
عمي جبرهة ع واحد وزوجهة اله
شافت ضيم منه ومن اهله ومطولت اصلا
شهور وتوفى رجلهة جان الله يرحمه
صاحب مشاكل وطلايب ناس تكول
موته حادث وناس تكول متقصدين،،،
المهم،،رجعت عاشت هنا بس شنوووو
راووها نجوم الظهر اشكال ذبوا
حجي عليهة حتى وكفت قسمتهة
ع فكر ونحس وتكرط زلم فمحد اتجرأ
يزوجهة عود تفكره،،الى ان اجة
اليوم الي انفجر رائد بالكل واخذ حصته
وحصة امه واخته من البيت وعزلوا،،،
شمس:شنوووو شصار،،،
رفل:شوفي بيومهة جنت يم اهلي توني جايبة
ابني محمد بيومهة رجعت للبيت
لكيت هوسة عمتي متعاركة وية خالة
ام رائد ولازمة سماح اموتتهة كتل هي
وبناتهة وخالة ام رائد تخربطت صعد
سكرهة علي ومرتضى تخبلوا من
سمعوا وبيومهة نزل رائد مجاز وشاف
وضعية امه واخته ملخيهة خطية وميته
قهر ماعدا الحجي ثار ع الكل وتعارك
وية عمي كله مالك دخل بينة من هاللحظة
وشال مسدسه وخلاه براس عمتي
لان وكفت بوجهة وغلطت عليه وع
امه واخته هي خافت مجانت متوقعة
منه هيج من ذاك اليوم وكلهة تحسبله
حساب وتخاف منه والحمدلله الله
فتحهة عليه واترقى وسوة شغل ومشاريع
يستثمر منهة وهسة ماشاءالله مرتاح
ومعيش اهله احسن عيشة،،،
شمس:لعد شعجب محد يوصل منهم
ولا احد هنا يوصل لذاك البيت،،،
رفل:لا الولد يروحون يسلمون عليهم
خصوصا من يلتحق رائد بس البنات لا
ع امهن حقودات حتى الجناين مالهم
دخل يتلوكن لعمتي مرتضى ميجبر
مرته يكول اهم شي ماكو مشاكل
بس اني لا عودني علي عليهم ودائما
يوصيني بيهم بس ما اروح بكثرة
لان بيوم الي اروحلهم عمتي تشد وياية
وعلي ميرضى عليهة فمرات بالبوكة
اروح وخطية المرة متحجي بالعكس
تكلي اني اعرفج حنينة وبت اوادم بس
ما احب تنضرين بسببي،،،
شمس:بداخلي اووووف يارائد شكد
شايف ضيم بحياتك وجيت اني كملت عليك،،
رفل:هييي وين شاردة،،كومي لتجي
عمتي وتسوي هوسة،،،
شمس:طلعت من غرفة رفل وسويت
روحي عود نازلة من غرفتي تلكيت
عمي سلمت عليه،،بداخلي والله ممبين عليك
هيج ظالم،،،،
ابو سرمد:هااا بوية اشووو صافنة،،
شمس:لا عمي هيج ماكو شي،،صدك
عمووو اريد منك طلب،،،
ابو سرمد:كولي بنتي،،
شمس:عموو شفت سماح اليوم وتعرفت
عليهة وعزمتني ع مهرهة الله يخليك
احجي وية سرمد اخاف ميخليني اروح
حسيت شرد بالتفكير ودمعة وكفت بعينه
عمووو،،،عمووو،،
ابو سرمد:هااا بنتي وياج،،وياج،،معليج
بيه خل يولي اني احجي وياه،،
شمس:داروح شفت يمسح بوجهة ياالله
ديبجي،،،ااا عموو شبيك،،
ابو سرمد:هااا لاهيج بوية بس
عيني حركتني،،،
شمس:عموو ولو مو من حقي احجي
هالشي بس تكدر تروح لبنتك وتحضر مهرهة
صدكني راح تفرح من اطيب خاطرهة
ابو سرمد:جريت حسرة،،يا بنتي صارت
هواية اشياء ما اظن ترجع تتصلح،،
شمس:كعدت يمه وجريت ايده وبستهة
عمو صدكني ماكو شي يوكف بين الاب
واطفاله وماكو شي ميتصلح صدكني
احجيلك عن تجربة جرب وشوف وما شاءالله
ولدك مبين بارين ويخافون الله،،،
ابو سرمد:شلون تعرفتي عليهم،،،
شمس:هااا ارتبكت اليوم عمو وحجيتله
من وكفت وية سماح،
عمو لاتخلي شي يوكف بينك
وبين اولادك ترى العمر يكضي
ومتحس بيه وراك حساب وكتاب
وكل نفس نامت بهضيمة وحسرة
بسببك تعاتبك امام رب العالمين شنو
اعذارك راح تكون امام الله سبحانه
،حسيت ارتاح
من حجة وصار عنده حافز طلع من الهول
وصاح ع عمتي من المطبخ ودخل
لغرفة النوم بعدني توني اكعد وسمعت
صوت عمتي على،،،
ام سرمد:ومن امتى عيني هذا الحجي
ابو سرمد:من هاللحظة يعجبج براحتج
ميعجبج الباب يوسع جمل ،،،
شمس:علت الاصوات وطلع عمي واني
ورفل وحدة تباوع بوجه اللخ،،
رفل:لج شموس هاي اول مرة عمي
يتصرف هيج وية عمتي،،،
شمس:ورة مطلع عمي خابر ع الولد
والبنات هم ورة ساعة الكل اتجمع
دز علينة وع عمتي،،،
دخلت للاستقبال شفت رائد واخته
وامه رحت سلمت عليهم وكعدت،،،،وعمتي
تباوعلي بكره،،،كلت هاي هي استلمي،،
ابو سرمد:اني اليوم لميتكم كلكلم حتى
نبدي كلنة صفحة جديدة اني تركت
مرتي و ولدي سنين ومحسيت بندم
بس صار موقف وطفلة وعتني وعرفتني
حجم خطئي،،كمت لام رائد بستهة من
راسهة كدام الكل،،اني اسف يا ام
رائد واعتذر منج كدام الكل واعتذر من
بنتي وابني واطلب السماح منكم اني
قصرت وقصرت هواية هم رضيت بالغلط
والظلم داخل بيتي وظلمت اقرب
الناس الي بس لهنا وبس،،،
شمس:ظل عمي يتعذر ويطلب السماح
من عائلته الثانية شفت الولد كلهم
كيفوا بس سرمد اكيد و البنات كلبن خلقتهن نسوان
حمويني اللواكة بدت ع اي عمو وعين
العقل نجتمع ع سفرة وناس اطب لناس
بس عمتي ساكته واحسه راح تكوم
تاكلنة اما سماح ورائد كاموا بوسوا
ابوهم،،
رائد:يابة اني ماعندي شي وية اي
واحد منكم ويباوع لسرمد،،ومن زمان
جنت اتمنى هالجو الحلووو بينة بس
يلة عفا الله عما سلف بس يا بوية
بشرط ومع احترامي الك،،
ام رائد:رااااائئد،،
رائد:لحظة يمة فدوة،،يابة الي بدر منك
حلوووو بس يابة امي محد يندك بيهة
لا هي ولا سماح بالنسبة الي شايلهن
من الالف للياء،،،
ابو سرمد:حتى بهاي الشغلة حقكم
مردود الحجية الهة مصرف جاري
شهريا الهة ولبيتهة وانت....
رائد:تسلم يابة متقصر من ناحيتي
لا تشيل همي الحمدلله مكتفي،،،
ابو سرمد:ومن رخصة الحجية اطلب
طلب و هي بكيفهة،،
ام رائد:ابو...
ابو سرمد:قاطعتهة عرفت راح تكول
ابو مثنى الي هو ابني الجبير من سعاد،،
رديتهة ابو رائد،،،شفت الصدمة بعيون
الكل،،،
ام رائد:انت تأمر يا ابو رائد مو تطلب،،
شمس:كلش فرحت بهاي الخطوة
اثبتت ان عمي انسان نظيف مجرد
الوساوس عمت عينه كام ع خالة ام رائد
باسهة براسه،،وكلهة تسمحيلي اقسم الاسبوع
بينكم هنا جانت هاي الحجاية
بالمسبة لعمتي القشة الي قسمت
ظهر البعير،،،
سعاد:بغضب ابو مثنى شجاي يصير
عمي:ابو رائد،،واندار لمثنى صح ابني
لو اني غلطان،،،
جاوبه مثنى بكل رضى وسعادة صح
يابة شعنده غير بعض بوية الله يجمع
لمتنة دوم،،،
شمس:سكتت عمتي مكدرت تحجي
شي بعد لان ولدهة رضوا بس حسيتهم
هي وسرمد راح ينقضون علية،،،
خلصت اللمة ع خير والولد جابوا
عشة من برة وصارت سفرة طويلة
وعريضة وعمي كال اليوم بايت يم خالتي
ام رائد شربنة جايات وتعللنة بس ابد
مصرت كبال رائد اكثر شي بالمطبخ
ياهو الي يكولي تعالي كعدي
شوية اتحجج بالمطبخ ،،،،
جنت واكفة ارتب المطبخ جنت كافة الدشداشة
بالداخليات صايرة للركبة ونازعة الحجاب
جنت رافعة شعري مخربط ونازلة خصل
جنت مندمجة بالشغل محسيت غير
صوت يحمحم وراية،جفلت داركض البس
الحجاب وازحلكت،،،
رائد:جنت كاعد وية الولد نسولف وسرمد
فلت ورة مكمل حجي ابوية بحجة جماعته
جوي علية،دك تليفوني وطلعت اجاوب
برة لان هوسة هنا ظليت امشي
واحجي بلا شعور شفت روحي اباب
المطبخ وكبالي شمس بس شنو هالمرة
لاحجاب ولاشي،،كافة الدشداشة والنوب
منكعة وصايرة تراري وشعرهة رافعته
ليفوك مخربط ونازلة خصل ناطيتهة
جمال وبرائة مندمجة بالشغل،،،
من اول احچايه اعله الزلف
خدرت هذيچ اعيونها ..
و مديت اديه وچلّبت
.بالمدري شيسمونها ..
گلتلها شــو چفّچ برد ؟!
گالتلي بيبان السجن. ترتاح من يقرونها ..
سرحت بيهة ورجعت لايام حبنة بعدين
صحيت ع نفسي وظليت استغفر،،طلعت
صوت احممم،،احمم،هي خطية جفلت
ودتركض للشال وتنزل بالدشداشة
ازحلكت و وكعت ركضت عليهة،،
الله،،الله،،شبيج خما تأذيتي،،شفت الدموع
متجمعة وبدت تنكط ع خدهة رفعت
كذلتهة ليش تبجين تأذيتي،،
شمس:كمت ابجي ااايي عظامي
تكسرت،،حسيته صار قريب مني وانفاسه
الحارة بوجهي،،
اذا خنكتك عبره ومالكيت دموع
تعال ادموعي ذني وطفي نيرانك
واذا فكرت ترجع والدرب عثرات
هاك اجدامي يغدن فدوه لجدامك
واذا غشك سراب ومالكيت الماي
ارجع للنهر . . لا تتبع . . اوهامك
مثل خلك الخشب وي قسوة البسمار
شما حاولت اشلعك يبقى نيشانك
ومثل طبع الجرح لو طاب بس موجود
اثر يبقى عليه مكتوب عنوانك
حزن يعقوب شايل كلبي من فركاك
يا يوسف شجاك وطال هجرانك
ارجع لو دمع هم عيني تترجاك
مثل رجوة يتيم اشتاك لاحضانك،،،،،،
صحيت من افكاري وذكرياتي ع صوته
يسألني تأذيتي شفت روحي بحضنه
ع السريع كمت
اااه ماكو شي تسلم خوية بس،،
رائد:صكيت ع اسناني اني مو اخوج،،
شمس:نزلت عيني وجاوبته لا اخوية انت
رائد:صحيت ع نفسي استغفر الله
فركت وجهي عفتهة وطلعت،،
شمس:جريت نفس من طلع ملحكت اكعد
وارتاح صارت بوجهي زينة مرت مثنى،،جفلت
زينة:خير شبيج جنج شايفة جني،،
شمس:استغفرالله،،حجيت واني افرك
جسمي ماكو شي بس تزحلكت وظهري
تأذة،،،جتي رفل لج شوو خاف صار
بيج شي،،،
شمس:لا ماكو يولي،،،
رفل:كومي،،كومي،،خل اخليلج دهن
ليروح يهيج عليج،،،
شمس:مكلت لا حتى اخلص
من زينة وباقي الشغل بعد الي صار
مالي خلك اوكف بالمطبخ صعدنة لغرفتي
وخلتلي موڤ ع ظهري وكالتلي نامي
شوية لاتتحركين،طلعت وطفت الضوة
واني مكلت لا رحت بسابع نومة محسيت
غير ع ركعة الباب والضوة اشتغل
فزيت سرمد كبالي وعيونه حمر مبين
شارب تعلمت عليه،،،
سرمد:انتي حاجية وية ابوية موووو
انت السبب ورة كل الي صار اليوم احجي
شمس:اااممم بس افهم،،رأسا كمز
علية،،،
سرمد:شأفهم هاااا شأفهم تريد تكابلي
وتكعدين مو وبدة يضرب ويغلط كتلني
ومخلة بية عظمة صاحية،،،وراها سحلني
من شعري للجرباية وشكك ملابسي
وهم اخذ كلشي غصب نفس اول ليلة
وراها لزم الحزام وكطعه علية،،،
فقدت من الالم بس اسمع صوت اخوه
ورفل تبجي وراها بعد محسيت،،،،
رفل:شمس،،شموسة،،حبيبتي،،،
شمس:فتحت عيني رفل وسماح فوك
راسي،،ضحكت بألم،،لج شعندج هنا
مو اليوم المهر مالتج،،،شفتهة تبجي
سماح:لج جيت عليكم انتي ورفل ورفل
حجتلي الصار البارحة،،،
شمس:عااادي،،ااخخ،،
رفل:ميخالف حبيبتي اتحملي،،،اندكت
الباب ادخل،،اا رائد تفضل عيني
رائد:تفضلي ام محمود هذي الكريمات
سويهن خبطة وخليهة ع جسمهة واثر
الكدمات،،
جنة كاعدين الصبح نتريك وجان ابوية
يمنة دنجيك كلشي لليوم علمود مهر
سماح دك تليفون ابوية وشفته
عصب وظل يغلط،،،خير يابة شصاير
ابو رائد:لك هذا اخوك راح يموتني راح
يخزيني بين الشيوخ،،،
ام رائد:خييير حجي،،،
ابو رائد:الادبسز البارحة راجع شارب
وكاتل مرته وهسة علي متخبل يكولي
احجي وياه البنية كلش متأذية والافندي
من البارحة طالع ومراجع للان،،،
رائد:وجعني كلبي ع شمس،،يابة خل
نشوف البنية،،حسيت ع ايد امي مدتهة
علية من جوة الميز وكعدتني،،،
ام رائد:اتوكل لبيتك حجي وشوف البنية
خطية وابنك ان شاءالله يجي يوم ويعقل،،،
رائد:طلع ابوية ردت اكوم صاحتني امي،،
ام رائد:مالك دخل بالبنية رائد الي
دتسوي حرام وعيب هاي تصير عرض
اخوك لاتصير عينك ضيكة ع عرضه،،
رائد:يمة انتي شدتحجين ليش اني شمسوي
ام رائد:ابني واعرفك مو الا تسوي
خليك بعيد ع البنية وهاااا نسيت اكلك
شفت بنت خالتك تبارك ما شاءالله
شلون صايرة جمال واخلاق وحجيت
البترحة وية ابوك وكيف،،،
رائد:شبيج يمة ومنو كلج اريد ازوج،،
ام رائد:بكل عصبية كتله وضربت ع الميز
مو بكيفك لهنا وبس انت مو جاهل وادور
سوالف مراهقين لاعبالك مشفتك البارحة
بالمطبخ لو من جنة كاعدين تبوك
النظرات بوك،،،وهي....
رائد:يمة لاتجيبين طاريهة البنية مزوجة
ومالهة دخل والله حتى شفتيهة البارحة
شلون كاعدة عادي ولا كأن تعرفني،،
ام رائد:خلص لعد توافق ع بنت خالتك
وخلص اني موحمل مشاكل اذا احد
دره لو اخوك تخبل وحجة شي
ثنينكم تنذبحون،،،
رائد:عفتهة وطلعت شلون بالله تحجي
عبالهة هي سهلة كبل انساها بس
والله ممسوي شي حرام لا افكر بيهة
بشهوة ولا اتخيلهة بفراشي كل هذا ماكو
بس منو يصدك رجال بعمري يفكر ببنية
شابة مثل تفكيري اني تفكيري
بشمسي غير،،احسهة بنتي اخاف عليهة
من الهوى كبل لا احط اللكمة افكر
بيهة اكلت لو لا وجنت اكثر المرات
قبل لا اتغدة او اتعشى او شي اخابرهة
اكلتي والي جانت تشتهي من تطلع
من دوامهة اجيبه الهة عمري مفكرت
الزم ايدهة ولافكرت بشي يخصهة
جنت مخليهة لمن تصير يمي وابيتي بالحلال
كل شوگي وعشگي الهة اعلن للكل
وهسة امي كل عقلهة الي يدور بينة
حرام وتفكير حرام،،ادري بيهة تحبني
وحبهة ابيض ونظيف وباعدتني عن تفكيرهة
لان متريد تنجرف للحرام غيرنة بشر
يحبون بعض لهالدرجة وبهالقرب
جان تصرفوا غير تصرف،،،،
بس بداخلنة خوف الله وغضبه علينة اكثر
واقوى من حبنة لذالك فضلنة ان نترك
الحب للماضي او بالنسبة الي احاول
بس فكرة ارتبط هسة ما اكدر شنو
ذنب البنية واني كلبي مو الي وما يوم
حسيته الي من وكعت بحب هالبنية،،
مريت من يمكم امس....
و ادموعي نزلت دافية....
حنيت لمسامر ولف...
ضحكاتةتسوة العافية.....
يمكن ترد ؟
لو ماترد ؟
هيَ المصيبة انة انتظر....
چن چمرة علة گلبي و غافية....
يتبببببببببببببع