خبايا الروح

الجزء الرابع

#خبايا الروح❣❣❣❣
الجزء الرابع.....
الأعمى شما حفظ دربه
يضل بعازة الحيطان
وإني شما تمرني الناس
اضل بعازتك يفلان،،،
سرمد:مرت الايام طبيعية بيني وبين
شمس صرت اتجاهلهة بس من اشوف رائد
اتغير ويايهة بس هي تعرف سبب التغير
حتى رائد ظن ان حياتنة طبيعية نسى
سالفة ان اني انتقم منه،،،،
مرة جنة كلنة ملتمين ع الغدة ابيتهم جان اول
يوم نزوله كعدت شمس يمي وافلس لحم
كدامهة واخلي ايدي ع ظهرهة الي
يشوفنة يكول عشاگ بس الي غثني
ان رائد عادي مداير بال مو مثل مجنت
متوقع قربت راسي يمهة وهمست بأذنهة
ضحكي،،،
شمس:شنووووو،،
سرمد:عصرت خاصرتهة هي اختنكت
من الالم ضحكي،،،
شمس:من قوة الالم اختنكت وسرمد يفرك
ظهري ويبسبس وفتح شالي وبينت
ركبتي اني مبالي ليش هيج
سوة بس شفته عينه ع رائد تخبلت عفت
الاكل وكمت رحت للمطبخ غاصة بالبجية
معقولة هذا رجال ذرة غيرة ماعنده
يكشف جسمي كدام اخوه في سبيل
يقهره،،،
سرمد:شوية وكمت ورة شمس واني
مرتاح لان شفت رائد ياكل بس اعصابه
نار بده يكرط الخاشوكة ضحكت وكمت،،
شفتهة بالمطبخ،،،،
شمس:شكد متستحي اكو واحد يكشف
جسم زوجته بس في سبيل ينتقم لك
بابا افهم عاد محد مهتم بالثاني اني بالنسبة
زوجة اخوه فقط واني هم نفس الشي
افهم ياسرمد الى متى نظل هيج
شوكت تقتنع وهاي راح تصير اب
وانت هذا حالك و وضعك،،،
سرمد:مداكدر اقتنع ان انتي شايلة رائد
من فكرج وكلبج شلون اصدك من نصير
بفراش واحد شلون اقتنع ان بس اني
ابالج وتشوفيني سرمد مو رائد حضنت
وجهة شمس اني اذيتج صح وهواية
بس حاب ابدي وياج صفحة جديدة خصوصا
راح يجيني طفل منج لزمت بطنهة وحضنتهة،،،
شمس:مداصدك معقولة هذا سرمد
اي الحمدلله اقتنع يتغير ويتقبل حياتنة،،،
قطع علية افكاري،،،
سرمد:هااا وين صفنتي،،
شمس:وياك والله،،صدكني اني مثلك
اريد نبدي صفحة جديدة لخاطر طفلنة
الجاي اريد الطفل يعيش بوسط اب وام
متفاهمين يملكون الاحترام لبعض مو يكبر
ويشوف امه تنهان وتنضرب وابوه يرجع
شارب ميندل راسه من رجله،،،
سرمد:ساعديني وخليني اصدك ان انتي
بس الي،،
شمس:سرمد اني بس الك ليش متصدك
منو غيرك بحياتي شفت علية شي
ما اكذب صح جانت تجمعني علاقة برائد
بس مو مثل الي ابالك حبنه معبر حد
الكلام وبس وكلام عادي عن حياتي وحياته
مو شي مهم وجبير بس انت غير
انت امتلكتني كلي حتى جسدي صار
ملك الك وبس اتمنى تفهم هذا الشي،،،
بداخلي قهر وروح تحترك مجبور اكذب
ع سرمد بخصوص علاقتي برائد حتى
يترك رائد ويشيل من باله انتقام لان
مدام وصل لمرحلة يعرضني كدامه
يعني مستعد يسوي الاكبر بس تفاجئت
بكلامه،،،،
سرمد:هذا هو حبيبي الي تريده يجرالج
بديت اتقرب منهة وهي ارتبكت ونزلت
راسهة خليت ايد ورة ظهرهة ودفعتهة
علية وايدي الثانية حضنت راسهة
وقربت شفايفي ع شفايفهة حسيتهة
رخت بستهة وتعمقت ابوستي وصارت
لمساتي لجسمهة جريئة،،،،،،
انتبهت الخيال راح دفعتهة وباوعت بوجهة
ضحكت،،،من كل عقلج مندمجة والله
خوش جبتي الدور،،،
شمس:حسيت سرمد بعد عني فتحت
عيني بسبب الصدمة الي سمعتهة
شنووو سرمد شتقصد اي دور اي اندماج
كل ظني ممصدك ان ماعندي شي
وية رائد،،،سرمد والله ماعندي شي....
سرمد:ههههههههههههههاي ضحكتيني من
كل كلبي صدك انج وحدة فقيرة وفطيرة
بكلمتين تصدكين،،،
شمس:سرمد مدافهم شدتحجي،،،
سرمد:هيج،بابا روحي،،روحي،،
شمس:ظليت مستغربة شديصير ياربي
شنو قصده هسة جان حباب وانسان ثاني
شلون انكلب زين شنووو هسة تغير
راح يتغير لو شنووو اووووف ربي
اهدي لخاطر ابني مدري بنتي ماله ذنب،،،
طلعت من المطبخ داروح للهول اكو فسحة
صغيرة بصف المطبخ خالين بيهة الغسالة
اجاني منهة صوت جفلني،،،،
رائد:لهالدرجة رخيص عندج رائد،،،
ولهالدرجة مرخصة حبه،،كل الي عشتيه
وية رائد مجرد كلام مو شي مهم،،،لج
ليش،،لج والله لو ميتة ولا سامع منج هيج
ع الاقل تكون الج ذكرى حلوة ابداخلي
واعيش عمري اتمناج بغير دنيا،بس هسة
مع الاسف نزلتي من عيني للاخير
انتي وحدة حقيرة متستاهل دمعة،،،،
شمس:اباوع علية يحجي بقهر والدموع
متجمعة بعينه،،هسة عرفت كلشي
وعرفت قصد سرمد،،،،
سرمد استخدمني وسيلة لحتى يحرك
كلب رائد للمرة الالف بس ليش،،،
ليش هيج اباوع ارائد صدك كارهني ومتأثر
من الكلام الي سمعه مني،،،
رائد انت فاهم غلط،،،رأسا كمز كدامي
محسيت غير جرني وصعد الدرج
لاااا رائد فدوة بس افهمك رائد ليشوفنة
احد،،بس وين الحايط يصد ورائد مو يمه،،،
طببني بغرفة وفات وراية وقفل الباب
رائد فدوة شدسوي،،،
رائد:بأستحقار،،لاتخافين ما انزل لمستواج
وانكر العشرة بس اريد افهم ليش
سويتي كل هذا خليتيني احبج واتعلگ
بحبج اذاد كلبج محب مثل حبي
ليش وهمتيني وخليتيني ما انام الا
ودموعي مبللة مخدتي وادعي ربي
يجمعني بيج بغير دنيا خالتني احس
بندم وتأنيب ضمير بأن كل الي ديصير
بيج بسببي وانتي،،،اخخخخخخ كمت
اعض اصبعي حيل،،،
انتي عايشة ومرتاحة لا وهم منتظرة طفل
لج ليش فهميني ليش(بصياح)،،،
شمس:اهدأ رائد راح ننفضح،،،،
رائد:بس هذا الهامج ننفضح،،لج اني بسببج
مفضوح عيوني تفضحني بس تشوفج
انهاريت وظليت اصيح،،،،،
لج اني حبي وياج بس كلام لج الله
ينتقم منج ع وجع كلبي،،لج الله واكبر
عليج شكد حقيرة وخاينة للعشرة،،،
لج عشگتج عشگ مخبل لهاللحظة متغيبين
عن بالي ادعيلج بكل صلاة ان الله
يريحج ويسعدج حتى لو ع حساب كلبي
وروحي المحتركة،،،لج حسبي الله....
قاطعتني وخلت ايدهة ع حلكي،،،،
شمس:منظره للموت ما انسى يبجي
ويحجي بكل حركة هنا عرفت او بالاحرى
اتأكدت مستحيل يسامحني لان اني
كسرت كلبه،،ظل يدعي علية بالاخير
متحملت خليت ايدي ع حلكه،،،واحجي واشهك
اترجاك كافي اني حامل ودعائك يأذي
الطفل،،،،
رائد:تقدمت عليهة لج المفروض هذا
مني وعصرت بطنهة،لج اكرهج واكره
كلشي منج حتى هذا وعصرت بطنهة،،،
شمس:ااااه،،رائد وكعت ع ركبي هو هدني
وظل يفتر تشنجت بطني مدري وجع
كلشي معدت احس مستحيل هذا
رائد الي اعرفه،،،اترجاك افهمني والله
احبب....محسيت غير ضربة ع حلكي،،،
رائد:اشششش جذابة اكرهج،،اكرهج،،
انتي وكلشي بيج ومنج واشر ع بطنهة
طلعي يا خاينة ياحقيرة طلعي،،،
شمس:بالكوة مشيت بطني توجعني
وكابي وروحي،،،صاح عليه،،،
رائد:حجيت وياها واني مندار ع الشباك
وناطيهة ظهري،،،روحي من اليوم لامحللة
وموهبة بحبي،،والعنج الف مرة من
انام واكعد ع كل لحظة جذبتي بيه عليهة،،
روحي لحضنه وجدي النظرة واللمسة،،،
شمس:صصصددك مجبووورة،،،
رائد:انداريت مجبورة لج شفتج شلون
ذبتي بحضنه،،،اششششش كافي
طلعي،،طلعي،،دفعتهة وسديت الباب،،،
شمس:ظليت واكفة شسوي ياربي
بطني توجعني وحلكي وارم ودم
زين شكول ع وضعي وليش جنت فوك
صحيت ع صوت سرمد،،،
لك انت واحد متخاف الله،،
سرمد:هههههه لازم انقهر،،،
شمس:لك انت شنووو من بشر لك اني
مرتك،عرضك،،والله توقعت صدك تريد
نبدي صفحة جديدة ليش هيج،،،،
سرمد:اووووه بلا لغوة زايدة ونزلي كدامي
شمس:شلون انزل بهيج وضعية،،،انت
بلا احساس،،
سرمد:هسة اعلمج الاحساس شلون
يصير،،لزمتهة من شعرهة سحل ع الدرج
وضربتهة ع ظهرهة وخاصرتهة،،،
شمس:ظليت حاضنة بطني حتى لا
تصير الضربات ع الطفل،،،
ام سرمد:لك مخبل شبيك،،
ابو رائد:شنوووو السالفة،،
شمس:الكل ركض يجرني من ايده،،
عمي الله يخليك راح امووت بطني،،،ابني
ام سرمد:بصدمة،،ااااببنننج،،،
شمس:اي خالة اني حامل وسرمد يريد
يموت الطفل ابطني،،،ااااااااااه،،ربي
بطني عمووو راح امووووت،،،
ابو رائد:سماح بنتي كومي جبي عباية
شي خل اخذهة،،،
سرمد:محد اله دخل مرتي واني حر بيهة
اموتهة اطيح حظهة،،،
ابو رائد:انجب ادبسز،،لك طفلك الي
ابطنهة،،،
رائد:جنت امدد بفراشي وكاره الدنيا
سمعت صوت هوسة وعياط ركضت للباب
شفت سماح طالعة من غرفتهة،،،شكووو
ولج شصاير،،،
سماح:حجيت واني انزل الدرج،،يمعود
سرمد ملخ مرته وتخربطت،،،
رائد:انقبض كلبي ودرت وجهي طبيت
للغرفة داسد الباب،،و وكفت هااااا
يا كلبي الظاهر نسيت وعدك ان راح تنساها
ومتهتم بيهة من اليوم ظليت ثواني بين
كلبي وعقلي واكيد كلبي الي غلب
نزلت ركض شفتهة تتلوة بالكاع
وتعض بيدهة،،،
رائد:شصاير خير شبيهة شمس،،،
ام رائد:ماكو شي يمة هي ورجلهة،،،
رائد:عرفت حجي امي معناها لاتتدخل
وصدك اول مرة اوكف ع صفحة مجرد
اتفرج ع الي يصير شالتهة سماح لفتهة
بالعباية و فقدت شمس وكعت من ايدهة
وخطية سماح مسيطرت عليهة ركضت
بلا وعي شلتهة وعطت ع سرمد،،،
لك دماغسز كوم شيل مرتك ماعندك
غيرة،،،
سرمد:تقربت اخذتهة من ايده وضحكت
بوجه،،
رائد:اخذهة ابوية وسرمد ورفل وعلي
هم راحوا وياهم وخالتي سعاد ام سرمد،،
بقية اخوتي ترخصوا كلمن اخذ عائلته
وطلع ظلينة بس اني وامي وسماح
امي رادت تحجي،،،،
يمة لاتعبين نفسج ماكو داعي تحجين شي
مجرد بنية وكعت ولزمتهة وكبل صحت
لرجلهة،،الله يخليج شيلي الموضوع من
راسج عاد،،،
ام رائد:هاي هي يمة اني شريد قابل
غير مصلحتك،،،
سماح:شكو ماما شبيج وية رائد،،،
ام رائد:ماكو حبيبتي،،شلونه محمد وياج
خما اكوو مشاكل،،،
سماح:لا ماما الحمدلله كلشي تمام،،،
ام رائد:ان شاءالله دومكم،،