خبايا الروح

الجزء السابع

#خبايا الروح❣❣❣
الجزء السابع.......
تعلّموا كيف تهدون النّور لمن حولكم
وإن كانت خفاياكم متعبة
فثواب العطاء يُخبئ لكم فرجاً من حيث لا تحتسبون "

شمس:حاليا عمري صار17وحامل بشهر
التاسع كاعدة بغرفتي القديمة ابيت ابوية
اي نعم رجعت لنفس السجن الي جنت
عايشة بيه لكن مو نفس الاسيرة جنت
فتاة رغم أسري أعيش وأنبض بالحياة
وأشع أمل وأنسج خيوط أحلامي الوردية،،
اي نعم النافذة شاهدة على كتاباتي
وأحلام المستقبل،،،لكنننننن شنووو
الي تغير،،،
قضيت سنة وحدة خارج جدران هاي الغرفة
هي سنة وحدة لكن أخذت مني عمري
كله وسلبت روحي وحلم عمري،،
عشت صح ناضلت صح،،لكن رجعت
مكسورة بكل معنى الكلمة أناجي
الفرح،،وينك يافرح ليش مفكرت ادك
بابي مرة،،وانتي يادنيا بيج حيل وبعد
تاخذين مني حيل،،
جنت كاعدة ع الجرباية وامددة احجي
وامسح ع بطني وكأنما طفلي وسندي
بحظني وأحاول استمد منه القوة،،،
رجعت راسي ع الجرباية واحاول اجر النفس
ورجعت بية الذكريات لذاك البيت،،،،
بيوم عقد رائد مكدرت ما احضر حضرت
الحفلة ابيت خالته رحت وية عيالي
جنت لابسة فستان مال حوامل حلوووو
طويل من يم الصدر ضيق وراهي ع بطني
وينسدل طوله براحة ع جسمي لونه
ماروني وبيه فيوكنة من ورة شعري
لاول مرة اعوفه ع طوله بس لبست طاك
ماروني وهم بيه فيونكة صفح
جنت طالعة كلش حلوة وخليت مكياج
طوخ وحمرة ماروني حبيت احس بروحي
وبجمالي ويمكن حتى انوثتي حسيت
بكم من الغرور يلامس قلبي ولاول
مرة من بعد علاقتي برائد احس بأنوثتي
صرت اتحرك وابين نفسي اكثر للعالم
حتى اثبت لنفسي ان شمس موجودة
والناس تشوفهة وتلمس عيونهم جمالهة
وكنت غافلة عن العيون الي تدور حوالية
لحد اللحظة الي التقت عيونه ما اعرف
شلون نسيت نفسي وظليت اكابر بالنظر
وكأن اكله ميهمني الكل حتى انت معدت
مهم،،صرت امشي واتجاهل نظراته
واضحك حتى اقرب الناس الي وهي
رفل حست بروحي المتحررة،،واني ظليت
اتمايل امام العيون الحائرة بأمرهة
واثبتت للكل ان محد مهم بحياتي لا سرمد
ولا زواجه ولا سفره تارة امشي وكأني
طايرة وتارة امشي واسند ظهري بأيد
والايد الثانية اخليهة ع بطني هاي الحركة
المعتادة لكل حامل،،لكن اكو شخص
تضايق من هاي الحركة وامرني
ان اغيرهة،،،لكن الي ثار جنونه ان مهتميت
وصرت اتمايل مثل الزهرة من يحب عليهة
الهوى،،،الى ان خلصت الحفلة ورجعت
لغرفتي وسبحت بكل راحة بس سبب
الراحة ممعروف محسيت بهيج حرية من
زمان وتمددت بفراشي الى ان صحيت ع
صوت صرخات هدت اركان البيت رأسا
لبست روب فوك دشداشة النوم وحجاب
ونزلت لكيت هوسة وعمتي تلطم وتملخ
بروحهة وحمويني وعمي يبجون ورائد
واكف ع صفحة،،ظليت صافنة شنو الي
ديصير،،،،رأسا عمتي جرتني،،
سعاد:ولج راح وليدي راح تعب عمري،،
ولك سمة فهد ابوك راح،،
شمس:ظليت مشتتة الافكار يعني شنو
فهد ابوك راح يعني اللطم والهوسة ع
سرمد يعني هسة سرمد مات لو شنووو،
حسيت ع عمي جرني هو ورفل ويكلهة
فهميهة بوية والله راح تتخبل بيوم
هالبنية ورفل جرتني وعزتني وبلغتني ان
سرمد توفى البنية الي ازوجهة باكتهة
وانهزمت وية صاحبهة وهو ظل يدور عليهة
الى ان الجيران مبلغين ع الشقة الي
ساكن بيهة ولكوا مقتول ولحد ممعروف
الي قتله،،،تركتني رفل واني واخيرا
نزلت دموعي صح اذاني لكن ابد متمنيته
يموت وخاصة ابني ملحك ع ابوه
زين اني جنت هنا صح بالاسم زوجته بس
ع الاقل عندي مكان وامن بيه ع ابني
وعيشته لكن هسة شنو الي راح يصير
مشفت احد للظهر جتني رفل جابتلي
ملابس سودة وحجاب وطلعت يم النسوان
عزوني واخذوا من خاطري اسمع النسوان
الي تكول خطية والي تكول ابنهة فكر
بعده ما اجة كرط ابوه واني تعبت كلش
نزل ضغطي وتخربطت عمي اجاني
ومنعني اطلع اظل بغرفتي وخطية
رفل ابد متركتني كل شوية تجي تطمن
علية وتجيبلي اكل وعصاير واني بغير
دنيا وبغير عالم كل فكري محصور شنو
الي راح يصير بعدين ثالث يوم يلة اجاني
ابوية صعدلي للغرفة هو وعمي شكد
جنت محتاجة ارمي روحي بحضنه واشكيله
لكن للاسف مجرد عزاني وكعد كأنما
غريب عني وبلغني ابوية ان لازم ارجع
وياه لان هسة لازم الزم عدة وهنا حمويني
ميصير حسيت عمي مراضي ع طلعتي
لكن ما باليد حيلة يعرف المجتمع وعاداته
والناس مراح تبطل حجي وراها ابوية
كلي تحضري واني نازل قبلج وعمي
هم نزل لميت غراضي وتوني انزل جتني
رفل زعمي وراها نطاني مبلغ كلش جبير
مقبلت اخذ شي لكن اصر وكلي
كل شهر مصرفج الشهري يوصل من
ارباح شغل سرمد،،سلمت عليهم وع عمتي
الي جانت فاقدة جنت لابسة بوشية
وعباية راس وجواريب وكفوف كله سواد
ورجعت لسجني القديم،،،
وصلت للبيت مرت ابوية نفس الاسلوب
ولاجن صارلي سنة غايبة،،صعدت
لغرفتي مرتبة ونظيفة كلت شعجب عايفيهة
وفوكاها اثاث جديد،،بس الي
عرفته بعدين ان عمي جاي هو ورفل
ومجددين اثاثهة ورفل خطية منظفتهة
ومشترية فراش جديد واشياء هواية
حتى ثلاجة صغيرة وتارسهة اشكال
فواكه وحلويات،،الله يحفظه
حمدت رب العالمين ان رزقني بهيج ناس،،
ظليت بغرفتي منزلت ظليت استرجع
ذكرياتي بهاي الغرفة هنا ضحكت وهنا
بجيت،،بهاي الزاوية ولدت اول مشاعر
حب لرائد وع هاي الكاع ولدت اول
اوجاع كلبي ومرارة الفراق،،رجعت
يا سجني لكن هالمرة جسد خاوي بلا
روح انسانة محطمة او بالاصح بقايا
انسانة خلص لازم ابدي من جديد لازم
ارسم حياة جديدة وامل جديد لخاطر فهد
لازم اكون الام والاب والاخ والاخت وكلشي
بحياته،،اندكت الباب دخل ابوية
وبدة يحجي عن الحياة والموت واني
بس صافنة محتاجة حضن وحنان ممحتاجة
اسمع كلام يا ناس ياعالم اريد ايد
اطبطب ع كتفي وتكلي لاتشيلين اني موجود
كلام،،كلام،،منو كلكم ما اعرف وما افتهم
مدري شكد حجى ابوية او اصلا هو شحجى
مددت ونمت مكعدت غير ثاني يوم ع صوت
التليفون شفتهة رفل سلمت وسئلت
عن صحتي وسولفت شوية وسدته
شفته ساعة11:30نزلت غسلت طبيت
للمطبخ شفت سارة وخالد ابن عمي
هو شافني رجعت ركض ليفوك يا ربي
غير يحجون يكولون شلون هيج،،ظليت
بالغرفة اكلت فاكهة وهم جعت اخر شي
صارت ب 6العصر ومحد ذكرني اوووووف
عرفت شنو المضموم مثل قبل واتعس،،
نزلت ع كيف شفت ابوية سلم علية
بابا اكلك عفية بلغ خالة بسمة ان اي
شخص يجي تبلغني اليوم نزلت وتفاجأت
بخالد كاعد وياهم بالمطبخ،،
ابو شمس:شلون يصير اني منبه عليهة
تبلغ الكل ان انتي بعدة ومحد يوصل
عافني وراح حجة وياها وظلت تتعارك وياه
وتكله بنتي جاية خطار اطردهة
عرفت ان سارة ازوجت خالد اووووف
ياسارة لو كايلتلي بوكته انج تريدين
خالد جان حجيت وياه وكتله ولا سويت
الي سويتي بوكتهة كعدت بالمطبخ اكل
طبت بسمة،،،
بسمة:شوفي لا عبالج فرتي راس ابوج
بكلمتين ترى تطيح حظج ام الزلم ولا
عبالج اكل ونوم خاتون حالج من حالي
انتي حامل اني عندي طفل يرضع
شمس:اي والله شلون نسيت كن طلعت
من بيت ابوية هي جانت حامل ورة
شوية اجة طفل يحبي ويصيح ماما،،
شالتهة بسمة وتبوس بيه وراه هم جتي
بنوتة حلوة تشبهة طبق الاصل كمت عليهة
بسمة عاطت معليج بيهم،،،
شمس:مهتميت بفرح ذولة اخوتي مووو
طب ابوية اي بابا اخوتج طلعوا توم
طلعت هاي اللوتية خاتلة وراه متبين
احنة عبالنة ابو راس جبير،،،هذا ادم
وهالحلوة جنة،،،شلتهم وابوس
بيهم اووووف شنو هالريحة الحلوة
مرت الايام وشدت بسمة وياية
تنظيف وشغل وكراب طلعت روحي،،،
بس كلهة بجفة ومن اذكر قرار عمتي
بعد مخلصت العدة بجفة،طبعا عمي
مشى الشهرية مالتي ومراجعتي للدكتورة
ماشية تجي علية رفل هي وعلي
هاي طبعا ورة مخلصت العدة،،،
جنت بيوم كاعدة العصرية دخل ابوية
للاستقبال وصوت مرة وياه شوية
صار حجي وهوسة وراها صنطة
ابوية اجاني وصدمني صدمة عمري ان
عمتي مطالبة بالطفل اول ميولد
هنا اسودت الدنيا بعيني يعني ابني بأي
حق ياخذوه مني شلون بيا دين بيا
عقيدة صايرة حاولت وية ابوية بس صدمتي
بالعرض الي فرضته عمتي اقوى
اما تاخذ فهد او واحد من حمويني يعقد
عليه،،ظليت بنارين شلون ياربي
وين صايرة هو اني بس جنت مجرد
جمة محملوني النوب اخذ زوج وحدة،،،
كلت يلة بعد شهرين لما اولد الف
حل منا لوكتهة
ذبيت حملي على الواحد الاحد،،،،