#صراع_الزمن

رابع

#صراع_الزمن
بقلمي : فردوس عبد اللطيف
(الرابع)
في مطار بغداد    اجتمعوا الشباب وكل واحد منهم يحمل هم فراق الاهل والحبيبه ولكن نداء خدمه الوطن اكبر من اي حب لان كل مقاتل مستعد يفدي روحه من اجل حمايه تراب الوطن
معن : شباب هالسنه حاندرس اختصاص كل واحد منكم لازم يحدد شيريد اختصاص
اني اخترت هندسه كهرباء
فلاح : هندسه ميكانيك سفن بحريه
رعد : هندسه ميكانيك
امجد : هندسه ميكانيك سفن بحريه
سعد : هندسه كهرباء
صفاء : هندسه ميكانيك
سمير :هندسة كهرباء
عقيل : هندسه اتصالات
معن : كلكم محددين شتردون حلو
نداء الى المسافرين الدخول الى القاعه رقم ٦ للصعود الى الطائره
معن : الحمد لله على السلامه
الشباب : الله يسلمك
صفاء : اليوم اول يوم ماراح اكولكم شتعلمتوا طبخ من امهاتكم بس طمنوني راح ناكل اكل عراقي ولجميع المحافظات لو نسيتوا ؟
امجد : بالنسبه الي تعلمت اطبخ كم طبخه بس مو اليوم اوكلكم
اشبيك فلوحي ؟
فلاح : الدنيا طالعه من عيني عوفني رايح انام
رعد : عوفه خطيه حبيبته اعتقد حاتتزوج
فلاح : منو سهى ؟
رعد : اي امها ماتريد فلاح وتريد تزوجها
صفاء : عمي احنا بعدنا طلاب مو مال حب وزواج وبعدين البنات الي بعمرنا يدحكن يتزوجن ويخلفن واحنا مامتخرجين
خلونا هيج وعود من نتخرج نشوفلنا وحده اصغر من عدنا فد ٦سنوات تسمع الكلام ومطيعه
معن : فعلا ياولد مو وكت حب هسه انتبهوا لدروسكم هالسنه تخصص واكيد المواد حاتكون صعبه وتحتاج دراسه وتركيز
*****
بدت مرحله الدراسه وانشغلوا الشباب بدراستهم وكملت السنه
سنة ١٩٧٦
تخرج طلاب الكليه العسكريه وحان وقت العوده الى الوطن مع شهاده تخرج لكل طالب منهم
معن : امتياز كونه ذكي وبذل جهد بالدراسه والتفوق
اما الباقين مابين جيد ومقبول
******
ام معن : كلللووووش يمه وليدي تخرج وصار ضابط الا اسويلك مولود واعزم كل الكرايب وافتخر بيك يابعد امك
معن : يمه ضابط مهندس
ام معن : فدوه لكلبك اليوم اكبر فرحه فرحتها بحياتي
       بعد من اشوفك لابس ملابس العسكريه ومعلك النجمات يلالن على جتافك اريدك تاخذ صوره جبيره واعلكها هنا عالحايط وابقى اباوعلك وافتخر بيك وليدي
معن : كوله بفضل دعائج حبيبه
ام معن : يمه بعد بقى اخطبلك كول يابعد امك انت حاط عينك على وحده من بنات عمك بنات خالاتك
معن : بعدين امي خل اتعين واقبض الراتب وابدي ادور
ام معن : عندي الك وحده جمال وخلق واخلاق واصل وفصل كملت سادس اعدادي وبطلوهه رادت تكمل كليه ماقبل ابوهه كال كليه اختلاط وماريد بنتي تختلط بالزلم
بنت جوارينا
معن : منو تقصدين ؟
ام معن : رونق بنت ام احمد جارتنا وصديقتي ناس خيرين
معن : خل اتعين اول ولازم اشوفها يجوز ماتعجبني
ام معن : شوف يمه راح اخليها تجي تساعدني بيوم المولود وانت شوفها تعال ادخل بالمطبخ بحجه تريد شي وشوفها
معن : انت مستعجله على هالموضوع ليش ماعرف
ام معن : يمه اريد اشوف جهالك كبل ماموت
معن :عمرج طويل ياشمعه البيت
******
فلاح : يمه شخبار سهى ؟
ام فلاح : سمعت جاييهه خطابه واهلهه موافقين وامهه مقتنعه
وتعرف امها اذا كالت حجايه تمشي عالبيت
فلاح : يمه سهى بنت عمي وانهي عليهه ما اسمح لغريب ياخذهه مو هيج الاصول لو لا ؟
ام فلاح وشمتوا زي على هالزواجه ؟
فلاح : يمه احبها بس خلي يجي ابوي ونروح للشيخ وننهي عليها وخلي امها عود تنطيها
ام فلاح : مو تالي امهه تدعي عليك واخاف عليك
فلاح : شمسوي قابل ناهبهه اشو راح اخطبها حسب الاصول
واتزوجهه على سنه الله ورسوله وتجي معززه مكرمه
*****
ابو فلاح : هابويه حضره الملازم شو صوتك واصل لبره
فلاح : حجي الله يساعدك العفو بويه مايعلى صوتي بحضورك انت الخير والبركه
ابو فلاح : بويه احجي شنو الي مضوج خلكك ؟
فلاح : بابا سهى بنت عمي واريدهه
ابو فلاح : باجر ناخذ الشيخ ونروح نخطبها من عمك وخل اشوف منو يرفض
ام فلاح : حجي امها وصلتنا حجي دكول جاييهه خطابه وموافقين عالعريس
ابو فلاح : حجيه احنا نحجي بلسان الزلم معلينا بحجي النسوان
ام فلاح : مثل ما دكول حجي
******
في بيت اهل سهى
الشيخ : حجي احنا جايين نخطب بنتك سهى لابن عمها فلاح
وجبنا هالزلم وينا مشايه نقرى فاتحه الخطوبه
ابو سهى : ها ها مو مو
الشيخ : عندك شي دكوله لو نقرى الفاتحه
ابو سهى : شيخنا مو سهى جوهه خطابه وانطيناهم حجايه
الشيخ : ابو سهى اولا عاداتنا وتقاليدنا البنيه من تنخطب لازم عمامها يعرفون بالموضوع واذا وافقوا عود ذيج الساع تنطي كلمه مو هيج الاصول لو عندك غير حجي
ابو سهى : كلامك ع راسي بس الصراحه انه بعدني مانطيتهم الحجايه كلت اخذ رايك وراي عمامها بس جاي اسأل عالولد
الشيخ : ابن عمها اولى بيها من الغريب وفلاح زلمه معدل وتخرج وتعين مايتعيب
هسه روح ادخل اخذ راي البنيه حسب الشرع وتجي دكولنا
وراها نتصرف
****
ابو سهى : وينج بويه كملتي جايات
ام سهى : هسه كول شرايدين
ابو سهى : يكولون سهى محجوزه لابن عمها ...شنو رايج بابا انت موافقه على فلاح
سهى : اي بابا اني موافقه
ام سهى :مو بكيفج تاخذين ابن خديجه
ابو سهى : انت كعدي راحه ترى ابن عمها والي فهمته من كلام الشيخ اذا مانوافق فلاح ينهي عليها وياخذهه غصب
خلي البنيه تروح بفالهه لاتوكفين عثره بطريقهم
ام سهى : اني ماراضيه وانتو بعد كيفكم ولج سهى اذا تزوجتي مالي شغله بيج انت مو بنتي ولا اعرفج وحتى بعرسج ما احضر
سهى : ليش ماما اني بنتج الوحيده معقوله تتخلين عني بزواجي ليش يمه ؟
ام سهى : طبج مرض عساج ماتتهنين ويه فليح
ابو سهى رايح اكلهم موافقه
****
ابو سهى : شيخنا جيتكم على راسي وبنتي بنتك وابن عمها مانلكي احسن منه وليدي فلاح (كبع واخذ )بت عمك اخذهه بهدومهه
الشيخ : رحم الله والديه من قرى الفاتحه
الف مبروك ابني فلاح كوم حب ع راس ابوك وعمك
فلاح : حاضر شيخنا
*****
تمت خطوبه فلاح وسهى ا
العروسين سعداء والاهل والاصدقاء الكل فرحولهم الا ام سهى حزنت بس ماكدرت تتصرف او تعترض لان تدخل الشيخ وفلاح مايتعيب
فلاح  : اخيرا سوسو بعد شهر نتزوج وتجين لبيتنا وتصيرين ملكي اني ممصدك الا اشوفج نايمه بيتنا
سهى : حبيبي اني سعيده وصدك ممصدكه
تدري ماما دكول لو ادري جان زوجتج قبل مايتخرج بس انت عاندتي واثاري جنتي تنتضري
فلاح : فدوه لكلبج سوسو ربي ينطيني عمر واخليج اسعد انسانه بالدنيا بس محد ضامن عمره
سهى : لاتحجي هيج فلاح الله يحفظك حبيبي
فلاح : حبيبتي خل نطلع يوم الخميس اريد عربون قبل العرس فد بوسه احضنج من حقي اجيك
سهى : ههههه شنو اني بضاعه حاتشتريهه انت شكد بطران
اكولك تعال يمنا الخميس بالليل واسهر ويانا
فلاح : معوده كلما اجي امج مدلغمه بوجهي وابوج ينام وكلما نحجي يصحى ويكول ها شكلتوا
سهى : غير رجال جبير وصحته تعبانه خطيه ليش هيج تحجي على عمك
فلاح : عمي وتاج راسي بس اريد اختلي بيج
سهى : مابقى شي انت هوايه مستعجل
******
سمير : حبيبتي فائزه اني تعينت وانت هم تعينتي بس كم شهر
صبريلي واجي اخطبج
واكيد نحتاج فد سنه نرتب امورنا وراها نتزوج
فائزه : همزين تعينت بالروضه الي يم بيتنا كلهم اطفال يجننون فدوه لكلبهم
اتمنى تجي تشوفهم سمير فد حلوين من يجون للروضه
وجنطهم صغيره معلكه بظهرهم
الطفل عنده حب التملك معتز بشنطته وميقبل نفتحهه
مرات اريد اساعده اطلعله الاكل ميقبل
سمير : ههههه عباله تاخذين اكلهم
فائزه : اكيد هذا تفكيره
سمير : حبيبتي فائزه من يصير عدنا جهال اكيد حاتعرفين تربيهم لان دراستج وتخصصج (رياض الاطفال )
فائزه : اكيد حبيبي لان درسنا علم نفس ونعرف الطفل من خلال حركاته
سمير : الله خوش لعد انت المسؤله عنهم اني علي اطلعهم اونسهم من اجي بالاجازه
فائزه : اشلونك مرتاح بالعسكريه
سمير : يعني مخلينا قسم الهندسه الكهربائيه
اي عطل باي مكان يدزونا نصلحه هذا واجبنا
فائزه : شوكت تجي اجازه
سمير : كل شهر ننزل اسبوع صارلي عشرين يوم من التحقت
فائزه : حتى احسب لجيتك
اخوي اجه مع السلامه
سمير : الله وياج حبي
******
ام سعد : يمه سعد شدكول عالعروس الي جبتهه الك اجمل من فيان
سعد : يمه كلهن خاينات ويبيعن من يشوفن الفلوس
ام سعد : وانت شعايزك اشو ضابط هندسه كهرباء ودا تداوم
وراتبك خير من الله
سعد : يمه انطيني وكت ارتاح صدك فيان صار عدهه ولد شبسرعه نستني
ام سعد : يا يمه اذا تزوجت شتنتظر غير تخلف جهال
هذه سنه الحياة وليدي انت بس كول اي اشوفلك تاج راسها
سعد : ماشي امي على اجازتي الثانيه اتفقي ويه اهلهه اروح اشوفهه
ام سعد : كلللللللوش مبارك عرسك سعودي
******
فاطمه : الحمد لله على سلامتك رعودي شلونه دوامك مرتاح
رعد : الحمد لله فطومه شوكت اخطبج
فاطمه : بكيفك رعد بس لو اخلص من محسن
رعد : لو ما رتبتي واني اقسمت اخدم وطني جان قتلته وخلصتج منه هذا مصيبه ما أيس
فاطمه : ذبحني كل فتره اطرده ويجي يحرك ابوي
رعد : حبيبتي راح احجي ويه امي تجي على ابوج تحجي وياه واخته مايردلهه طلب
****
ام رعد : خويه ابو فطم بعد اختك ابني رعودي تخرج مهندس ميكانيك وتعين ودا يداوم بالبحريه ميكانيك سفن
ومكانه قريب علينا وينزل اسبوع ويبقى بشغله اسبوع
ورايد فطومه وحابب يناسبك
ابو فاطمه : اختي طلبج على عيني وراسي بس البنيه ابن عمها رايدهه وجم مره يجي يخطبها وفطومه ترفض
شلون حلها الاصول دكول لازم ناخذ راي عمامها واذا وافقوا اني هم ماعندي مانع وين الكي مثل رعد هو ابني
ولازم اخذ راي البنيه ويصير خير
ام رعد : خويه چا كول انلاصت محسن رايدهه اشلون راح يقبل عمها هم راح يعترض
ابو فاطمه : اختي هذا زواج خو مو غصب
ام رعد : خويه ماوصيك على وليدي رايد فطومه ويحبها من زمان ويكول ما آخذ غيرهه
******
ام عقيل : يمه اشلونك بالدوام ...مرتاح
عقيل : الحمد لله اهم شي تعينت باختصاصي اتصالات ضابط بحري ويه اصدقائي وبلغونا عدنا سفره اسبوع القادم
نبقى بالبحر تقريبا اربع اشهر
ام عقيل : يمه واذا تزوجت اشلون بمريتك تخليها تبقى تنتضرك اربع اشهر ؟
عقيل : ليش ابقيها اكدر اخذهه وياي واسفرها جوله حول العالم بس اريد عروس مابيهه دوار بحر
ام عقيل : شنو دوار بحر
عقيل : اكو ناس من تصعد بالباخره وتمشي بالبحر يصير عدهم غثيان ويدوخون لحد ما ترسو السفينه بالميناء
ام عقيل : واشلون تعرف مابيها دوار بحر
عقيل : اتشاقى وياج هو اني شفت موظفه بالنقل البحري
عجبتني وسألت عليها الحقيقه مدحوهه
بس اكو شغله
ام عقيل : شنو اشبيها البنيه خو مو جكمه
عقيل : يمه شسوي بالجكمه
بس البنيه سنيه واخاف اهلهه ماينطوهه
ام عقيل : يو شنسوي بيها مالكيت غير السنيه
عقيل : حظي غير كلبي من شفتها صار يكول طق طق طق
ام عقيل : اسم الله على كلبك يمه اخذهه وين اهلهه
عقيل : من ارجع خليها هسه دزيتلهه خبر وجاي تسأل علي
ام عقيل : واذا تسال وين تلكي مثلك ضابط ومهندس
عقيل : القرد بعين امه غزال
******
امجد : حجيه اسبوع القادم عندي سفره ويه الشباب بالباخره
راح اغيب عنكم اربعه اشهر افتر جوله كم دوله
ام امجد : تروح وترجع بالسلامه مجودي
فراس :اخذني وياك خويه اتمنى اشوف العالم الخارجي
امجد : وين اخليك بالجنطه لو اشغلك بحار روح سويلي قائمه بطلباتك ترى انسى
احمد : واني الي حق اكتب طلباتي
امجد كلكم تدللون كل واحد منكم يكتبلي طلباته وانت ست الكل شتردين اجيبلج
ام امجد : ترجعلي سالم احلى هديه
انسام : اني طلباتي خاصه حبيبي اخوي ملابس الكليه
عليك اريد اكون اكشخ طالبه بفضل اخوي
امجد : شكم انسام عندي هي وحده تدللين حبيبه اخوج
انسام : ربي لايحرمني منك اخوي الحنين ابو كلب الطيب
*****
بيت معن
ام معن : وينك معوني البنيه لابسه فستان وردي روح شوفها
معن : ذيج ام شعر الطويل
ام معن : مو كتلك حلوه
معن : مساء الخير
رونق : مساء النور حضرة الضابط
ترقبوا البارت القادم
*****فردوس عبد اللطيف ****