#صراع_الزمن

الحادي عشر

#صراع_الزمن
بقلمي : فردوس عبد اللطيف
الحادي عشر
١٩٨٠/٩/١٧
قرر مجلس قيادة الثوره إلغاء اتفاقية الجزائر الموقعة مع دوله ايران واعتبار سيادة شط العرب للدوله العراقية فقط
****
رعد : ياستار راح تصير حرب
صفاء : هيج تتوقع ؟
رعد : مبينه بس كول شكد حاتبقى وشنو الي راح يصير وهل احنا نشارك بهالحروب لو ننعفي
صفاء : مادام الحرب عالنهر معناها المعارك حاتبدي من النهر وراها تمتد للمدن تدري دوله ايران تحدنا من الشمال للجنوب من الجهه الشرقيه شلون حاتصير السيطره
رعد : احنا روسيا ويانا ودول الخليج كذلك حايدعمون العراق لكن اويلي على ولد الخايبه هما الي راح يرحون بيها
قابل اولاد المسؤلين حايشتركون بالحرب
صفاء : تدري القياده اختارت هالوقت لان الحكومه الايرانيه ظعيفه توهه تتشكل واعدموا كل جنرالات الشاه فاكيد نتيجه الحرب حاتكون لصالحنا
عقيل : اخوي كل حرب نتيجتها خساره سواء منتصر او خسران
اثنينهم يدفعون الثمن
صفاء : شباب اعتقد كولنا راح نشارك بالمعارك منو من عدنا راح ينجو ومنو راح يضيع
*****
بدت المناوشات مابين الدولتين
بدء القصف والتوتر والمدن الحدوديه تعرضت للقصف
فلاح : حبيبتي سهى لازم التحق بالجبهه حضري شنطتي
سهى : فدوه فلاح لاتروح اخاف تنقتل الاخبار تخوف معارك وشباب يجون شهداء
فلاح : هذا واجب هو الجندي اذا ميلتحق ينحبس اني ضابط
ونداء الوطن لازم التحق
بس الجبناء يبقون بالبيوت
سهى : مو انت داتحجي دكول جيشنا هو الي هجم ودخل على مدنهم واحتلوا المحمره وعبادان
فلاح : هذه حرب ويجوز خلال اسبوع تخلص شمدرينا
حبيبتي ماوصيج ديري بالج على حمودي وعلى امي
سهى : فدوه فلاح لاتحجي هيج ترى ماتحمل
ربي يرجعك بالسلامه
فلاح : حجيه ادعيلي وديري بالج على صحتج
ام فلاح : يمه مودع بالله وربي يحفظك من كل شر
فلاح : دموعج غاليه علي ام فلاح لاتبجين محتاج دعوتج
ام فلاح : واحنا هم محتاجيك يابعد امك
التحق فلاح بالوحده العسكريه بمنطقه السيبه مقابيل الحدود الايرانيه
فلاح : شلون مكظيها شباب
الجندي عباس : سيدي هالتشوفهم كبالنا ساعه تجينا صواريخ منهم وساعه نصعد بزوارق نهجم عليهم وتصير المعركه
بشط العرب وكلمن ويومه والي ميعرف يسبح يموت غركان
فلاح : روح سويلي جاي راسي صاير طبل
عباس : حاضر سيدي
اشتغل القصف والكل تركض
فلاح : هاي شبيكم  وين رايحين ؟
عباس : سيدي تعال بالخندق ترى القصف ميتواجه هاي صواريخ قريبه متعرف وين توكع تعال( بالموضع )
الموضع خندق او حفره كبيره وتغطى بأكياس الرمل
لحمايه المقاتلين من شظايا الصواريخ
لحد ما يسكتون .... هما يوميه يغدونا بجم قذيفة ومن يردون عليهم جماعتنا يسكتون
خوب بالليل يتسودنون
فلاح : زين اشلون عايشين انتو هنا
عباس : والله سيدي ماناكل حتى لا نحتاج نروح تواليت
والسباحه من ننزل للشط وره ما يقصفونه نسبح وعيونه عليهم لاتجينه تايهه
فلاح : الله الحافظ كلمن ويومه ترى محد يموت ناقص عمر
*****
رعد : فطم حضري ملابسي حبيبتي لازم التحق
فلاح التحق بالسيبه واني بالفاو عالزوارق البحريه
فاطمه : فدوه رعد دير بالك ع نفسك لخاطري
رعد : هو شعندي غيرج
خطيه معن حايتزوج وعزمنا واعتقد الولد كلهم بالواجب
فاطمه : جان انتظر تنتهي الحرب ويتزوج
رعد : منو يعرف شوكت تنتهي اسبوع اكثر شهر مانعرف
فاطمه : اشلون بي لما حاتروح شلون اعيش تعودت عليك
رعد : حضنتها حبيبتي كعدي اقري قران واندعيلي ربج يفرجها تخلص الحرب واخذج اسفرج مثل سفرة شهر العسل
فاطمه : الله احلى ايام ما انساها عيشتني بقمه السعاده
رعد : اوعدج بس تخلص الحرب اخذج سفره مدتها ست شهور وافرج بلدان العالم
فاطمه : حبيبي ربي لايحرمني منك
التحق رعد بالوحده العسكريه
المعارك بدايتها لان القوات الايرانيه ماكانت مستعده للحرب والمواجهه
في العراق بدء تجنيد مواليد والتحق جميع الشباب بخدمه الاحتياط وامتلئت مراكز التدريب بالجنود
الي تركوا عوائلهم وبيوتهم وإشغالهم
لان قرار مجلس قيادة الثوره ينص بإعدام من يتخاذل
ويفر من تلبيه خدمه الاحتياط
البلد في حاله انذار قصف جوي وبري وبحري
المدن الحدوديه كثرت بيها ثكنات العسكريه والسيارات التابعه للجيش والي تنقل العسكريين والمعدات
الي ولدهم بالجبهه عايشين بخوف ورعب لايجي ابنهم ملفوف بعلم العراق
*****^
معن : رورو زواجنا حايكون بسيط لان الناس مشغوله بالحرب واحنا لو ماحاجزين ومحددين الموعد جان اجلنا العرس لحد ماتخلص الحرب
ام معن : يمه شمدريك شوكت تخلص توكل على الله وتزوج
معن : زواجنا كان تقليدي سافرنا شهر عسل للشمال اسبوع
ورجعنا لحياتنا الطبيعية
لان الوضع مخيف وبدت تجي توابيت الشهداء والناس انصدمت وتذمرت ... بس محد يكدر يتكلم الكل تخاف
حتى بفاتحه الشهيد يجون مراقبين من الحزبيين لو الامن
حتى يسمعون الناس بهيج حاله شتحجي
مطلوب من عناصر الامن والاستخبارات تقديم تقارير يوميه
عن حديث الشارع
والناس كانت تخاف
بعد ما كثرت الشهداء
صدر قرار بتوزيع مكافأة نقديه وراتب شهري ودار سكن وسياره لعائله كل شهيد
هنا بدت الناس تنشغل باستلام ميزات الشهيد
الحكومه تورطت بهذه الحرب ومنعرف شوكت النهايه
الكل متأمل تنتهي الحرب خلال ايام او شهور
لكن الي حصل العكس استمرت الحرب ومرت سنه بكل قساوتها وماكو امل تنتهي
وبدء الوضع يسوء
********
امجد : حبيبتي هديل عندي سفره لإيطاليا اني وسعد ومعن
ليش ماتجين وياي
هديل : انت داتشوف الحمل متعبني وما اكدر اتحرك
بس اتحرك يصير عندي نزيف والطبيبه منعتني من الحركه
امجد : اوك حبيبتي حاسافر وكلبي وياج
هالمره سفرتنا هم خطره لان حانجيب حموله اسلحه هم اخاف عليج يجوز يرصدونا ويسوون عمليه فدائية
بس الحمد لله ننزل بالعقبه ميكدرون يوصلونا
هديل : اسم الله عليك عمري انت ليش تخوفني هالمره ترجع وتلكي ابنك بحضني
امجد : من هسه مشتاقله
هديل : نحن هنا بس حدد الاسم شسمي كول
امجد : اذا ولد سمي يوسف واذا بنيه سميها ايه
هديل : اكولك يكولون بلندن اكو جهاز يكشف الجنين بنت لو ولد صدك اكو هيج شي
امجد : اكيد اكو بس مايعلم بالأرحام الا الله
هديل : ياشنطه حاتاخذ وياك خل احضرهه
امجد : اوك اني اساعدج حبيبتي
ان شاء الله من ارجع ابدي ابني بقطعتنا بالعامريه
سويت خريطه كولش حلوه تعالي كعدي وشوفي
هنا باب المطبخ ومنا باب موزع للخطار والهول
جوه غرفتنا اني وياج والزعاطيط كلهم فوك سويت اربع غرف فوك
هديل : شدعوه اربعه ؟
امجد : شعبالج اريد خمس اطفال
هديل : يمه امجد مابي حيل شوف هذا اول طفل وشدايصير بي
امجد : لج اريدهم يركضون هنا بالبيت يلعبون ويهوسون
وبالحديقه اسويلهم ملعب كره قدم والولد اخليهم لواعيب
احنا ماعشنا طفولتنا ولا شبابنا كظيناها عسكريه وتدريبات
جهالي اريدهم يعيشون كل مرحله ويستمتعون بيها
******
سافروا الاصدقاء الى إيطاليا
سعد : حبيبتي يسرى اكو موضوع اريد اكولج بي
اني رتبت اموري وجبت كل مستمسكاتنا اريد اقدم على لجوء ونهرب اني وياج
يسرى : صدك تحجي سعد مو انت عسكري والدوله صرفت عليك وحاليا البلد يخوض حرب
اذا هربنا ومارجعنا ويه جماعتك بعد مراح نكدر نشوف اهلنا ولا بلدنا
ليش حبيبي شنو السبب
سعد : لاتتصورين اني خاين او جبان اريد اهرب من الحرب
لا بالعكس اني مستعد من ارجع اشترك وأحارب ويه زملائي
بس علمود منو نحارب ونضحي بارواحنا
شوفي هنا الناس عايشه حياتها محد اله علاقه بالثاني
واني من بعد امي كرهت العيشه بالعراق من يوم وفاتها قررت  اهاجر بس كنت انتضر الفرصه وهذه الفرصه الذهبيه لان انت وياي  احسن فرصه
يسرى : بس اني حامل اخاف نتبهذل والطفل يجي وماعرف اهتم بي
سعد : انت شداتحجين لج حياتي هنا كولشي سهل خو مو بالعراق الولاده صعبه لو الطفل يكمطوه ويربطوه عبالك مسجون
حبيبتي احنا اول خطوه نخطوها نطلع من إيطاليا
وبعدين نروح لندن  نطلب لجوء هناك ونخلص
من الحرب ومصايبها
يسرى : حبيبي الحرب مراح تطول كولهه شهر شهرين وتخلص
سعد : انت صدكتي .....!!!!!
هذه الحرب حاتطول سنين وراح تاخذ شباب البلد وماتخلص صدكيني هذه خطه مرسومه من يوم
العراق أمم النفط والدول العظمى استهدفته وراح تضعفه
سنه بعد سنه والمواطن يبقى بدوامه ومراح يستفاد لا من النفطات ولا من الزراعه
يسرى : سعد اني خايفه لا يرجعونا وننعدم
سعد : لاتخافين اني اتصلت بجماعه اقاربي حايساعدونا
بس قوي كلبج واريدج اليوم بالليل ترتبين اغراضنا
ناخذ شنطه صغيره حتى لا يحسون جماعتنا
لان حانطلع بالليل ب (١٢ ) بهالوقت يكونون نايمين
****
سعد : اتخذت قرار مصيرنا صح كانت خطوه جريئة بس لازم نخطوها ونهرب
اني احب العراق وأنتمي الى ارض هذا الوطن لكن توجه الحكومه نحو الهاويه ومراح يتقدم طالما زجوا الشباب بحرب هدفها إبراز عضلات لا اكثر
الساعه (١٢) ليلا
سعد : حبيبتي حضرتي كول أوراقنا المهمه وين شنطه الملابس
زين هذه خفيفه
خل نطلع
يسرى : خايفه سعودي
سعد : اني هم خايف بس دايما الخطوه الاولى صعبه
طلعنا من الفندق دفعت اجور السكن واتصلت بصديقي رتبلي طريقه السفر من إيطاليا
وصلنا لندن وقدمنا عاللجوء وبدأنا مرحله حياة جديده
*****
امجد : شباب ترى سعد ماكو مختفي رحت ريسبشن بالفندق
كالوا غادر قبل يومين
معن : وشلون حانرجع بدونه حايصير تحقيق ويانا
لازم ناخذ من الفندق اي شي يثبت وقت مغادرته لو نبلغ السفاره باختفائه هو وزوجته
امجد : ماعتقد بيهم شي موزين
اعتقد بعد مراح يرجعون للعراق حبيبي سعد هرب
معن : معقوله يتجرأ ويسويها ميخاف
امجد : مثل مجاي اكولك بس اكيد حايتحقق ويانا وخلينا نفس الكلمه ماتتغير
معن : وهذا الصح لان سعد مابلغ اي واحد من عدنا
امجد : مراد يحملنا مسؤليه هروبه
اريد انزل للسوك مرتي موصيتني على سوارات ذهب دكول الذهب الإيطالي حلو
معن : اجي وياك اني هم اشتري لمرتي
******
فلاح : صحيت على صوت انفجار
الله واكبر شنو هذا
عباس سيدي تعال للخندق بسرعه اليوم القصف كثيف اعتقد حايهجمون
هما قبل كل هجوم يقصفون كثيف
اخخخخخ اخخخ
فلاح : هذا منو تصوب ؟ ولك عباس اخلوا الجرحى
عباس :سيدي هجموا علينا ومدافعنا جاي تجاوبهم
فلاح : عتادكم كامل شباب من انطيكم الامر بالرمي
اقتربت زوارق العدو علينا والإعداد هائله كلهم شباب
جايين للموت
ابدا ارمي
حاضر سيدي
كانت ثلاث زوارق محمله بشباب مساكين زهقت ارواحهم
الي مات والي رمى نفسه بالنهر
الي كدر يسبح عبر والي غرك
تراجعوا بعد ما لاقوا مواجهه عنيفه من قواتنا كنا مستعدين
لهيج هجوم
اجتنا الاوامر لازم ننفذ عمليه بالليل
فلاح : اريد اثنين منكم متطوعين للموت اليوم نطلع جوله استطلاعيه هذا اوامر عليا جتنا
منو يسبح ويكدر يغوص تحت الماي
احمد وخليل سيدي احنا غواصين
فلاح : حضرو نفسكم بالليل بعد الساعه عشره نطلع واجب
*****
دقت الساعه العاشره
فلاح واحمد وخليل بزورق صغير وتوجهوا الى الجهه الايرانيه بعمق حدودهم
******
رعد : الفاو ارض ملحه والجو حار جدا المدينه تقع عالبحر
اهلهه هجروهه بسبب القصف الكثيف
بقت المدينه فارغه لا زراعه ولا بيوت عامره
اكثر الوحدات العسكريه اتخذت من البيوت مقرات للجنود
القصف ميعرف على منو توكع مجرد قصف عشوائي
بس هما يرصدون سيارة الي جايبه عتاد لو أرزاق (الاكل للجنود ) ويستهدفوها
واجبنا نطلع نرصد البواخر الايرانيه وننطي احداثيات وأماكن تواجدهم
طلعت اتمشى بالليل مخنوك كنت وحدي
اشتقت لفطم لاهلي باوعت عالقمر ودموعي نزلت
لشوكت نبقى بعيدين صح احنا اخترنا العسكريه بس الحرب
مدمره للبلدين اخذت شباب بعمر الزهور كانت احلامهم بسيطه وأمنياتهم يعيشون بسلام
سرمد : سيدي ليش كاعد وحدك ؟
رعد : تعال سرمد اكعد يمي
سرمد : شكرا سيدي
اني ليليه انام من وكت بس اشو الليله كلبي مقبوض ماعرف ليش احس نفسي مخنوك
رعد : انت متزوج ؟
سرمد : خاطب سيدي وزواجي بعد كم شهر بس خطيبتي تكمل امتحانات لانها طالبه بالسادس اعدادي
رعد : خوش من تريد تتزوج انطيك اجازه طويله
وين اهلك ؟
سرمد : سيدي اهلي بعقوبه
رعد : سهله بس كون
انفجار قذيفة بوووووووم بووووم
سرمد وينك سرمد
شباب وينكم
تعال سيدي بسرعه بالملجأ
رعد : سرمد ابني جاوبني
سرمد : اه اه ماكو فايده عوفني سيدي راح اموت روح للخندق لا تجيك الثانيه
بس اكو رساله بجيبي اريدك تدزهه لاهلي ورساله ثانيه لخطيبتي فدوه سيدي مو تنسى اني جنت اعرف راح اموت وكتبتلهم هذه الرسايل
رعد : لزم ايدي وخلاها على جيبه طلعت الرسالتين وعليهم شويه دم
نزلت ايده وكعت وسلم امره لله
سرمد سرمد لا تموت ولك شجابك يمي سديت عيونه لان بقت مفتوحه وزحفت للخندق ويه جماعتي وابجي بحاله هيستيريه فقدت ليش سرمد يموت ومثله الاف تروح على شنو ارض لو سيادة نهر لو استعراض عضلات
كنت مترب من عصف القذيفه واصبت بجروح بادي ورجلي
بس سرمد جته شضيه كبيره واستقرت برقبته
اليوم الثاني خلينا جثة سرمد بتابوت ولفيناها بالعلم
الكل تبجي عليه وانطيت الرسايل للمعتمد الي حايودي الشهيد
الله يرحمك سرمد
بالنسبه لجروحي كانت طفيفه انطوني اجازه مرضيه ومناك اراجع مستشفى العسكري بالبصره
*****
امجد : الووو هلو يوم طمنيني جابت هدوله
ام امجد : الحمد لله مبروك على ماجاك يا ابو يوسف
يمه ولد مثل الكمر يشبهك بس ظعيف
امجد : الحمد لله وهديل اشلونها ؟
ام امجد : الحمد لله زينه لاتخاف عليها اني مداريتها مثل بنتي
هديل : هلو حبيبي اشلونك ؟
امجد : حياتي الحمد لله ع سلامتج عمري اشتريتلج سوارات ذهب مثل ما طلبتي تدللين بعد توصيني شي
هديل : ترجعلنا بالسلامه
******
فلاح : شباب مستعدين ؟
احمد وخليل : نعم سيدي
فلاح : توجهنا بالليل بعمق الحدود الايرانيه جوله استطلاعيه
مطلوب نجيب معلومات عن اماكن تواجد بواخر وزوارق العدو
اخذنا المعلومات وبطريق الرجعه اجتنا قذيفة بالزورق
اني بلحظتها شمرت نفسي بالنهر
والرمي علينا غصت وسبحت بس اريد اوصل صح المسافه مو بعيده لكن بذيج اللحظات صارت شطولهه
والولد ماعرف وين صارو
الي حسيت بي الم بخشمي اعتقد انكسر عظم الخشم وشفت دم ينزل من انفي
من تتعرض للموت ويكون بينك وبين الموت شعره
تتصرف بدون اراده وبدون تفكير
بس تريد تنجو ولازم ماتلتفت ولا ترمش لان الموت يسبقك
ترقبوا البارت القادم ونخل نشوف احمد وخليل شصار بيهم
*****بقلمي فردوس عبد اللطيف *****