#صراع_الزمن

العاشر

#صراع_الزمن
بقلمي : فردوس عبد اللطيف
       : العاشر
خلود : اخ يايمه كسرتي ظهري منو عندي من بعدج
سعد : كافي خلود العزا خلص بجيتي مافيه الكفايه عيونج ذبلت كافي حبيبتي انت ماقصرتي وياها وهي تعذبت هواي
يوميه موديها للمشفى لازم ترتاح وهذا يومها
خلود : عفيه سعد ماكدر اشوف فراشها ملابسها أغراضها بالغرفه تذكرني بيها

سعد : تعالي يسرى وياي لغرفه ماما
دخلت لغرفة امي باوعت على السرير اشوف صورتها نايمه ومبتسمه
دنكت وخليت راسي عالسرير وابجي بصوت عالي
اخخخخ يا يمه فراكج اذاني
اخ يمه عذبتي كلبي
يسرى : لزمته من ايده فدوه سعودي تعال وياي بره خل نطلع بالحديقه
سعد : خليني فدوه اشتم ريحتهه
يسرى :اني وام شهد حانلم الاغراض ونوزعهم للفقراء ثواب للمرحومه
سعد : جيبيلي كرسي بالحديقه مابي اوكف وخل خلود تجي يمي وانت روحي لمي الاغراض اشكرج يسرى

يسرى : تدلل سعد اني داخله
خلود : خلي نكعد هنا نشتم هوا ومانشوف يجمعون اغراض ماما
اكولك هاي سياره وكفت بالباب روح شوف منو
سعد : فتحت الباب واشوف فيان توكف سيارتها
انت شتردين مني ؟
فيان : سعد حبيبي البقيه بحياتك اجيت اعزيك بوالدتك
سعد : لج مو خطيبتي هنا هسه اذا تسألني شكولهه
فيان : كولهه صديقه خليني ادخل اشبيك سعد
هلو خلود البقيه بحياتج كلبي وياكم عمري بس جنت مسافره
والبارحه جيت من السفر
خلود : اهلا فيان اروح اجيبلج كهوه من رخصتكم
فيان : خطيه شصاير بيهه خلود ضعفانه
انت هم سعودي حبيبي لا تنقهر هذا يومهه وهي خطيه مريضه
سعد : فيان لا تتقربين يمي ترى خطيبتي جوه بالبيت واذا تشوفج لازكه بي حاتشك
فيان : حقها تغار عليك بس اني هم حقي احبك ومشتاقتلك
سعد : هذا الموضوع انتهى من ناحيتي
فيان : كذاب من عيونك بعدك تحبني بس خطبت علمود تنساني
يسرى : من شافت خلود دخلت
راحت للحديقه تشوف سعد اخاف محتاج شي
وسمعت الكلام الي دار بين سعد وفيان
بقت واكفه بمكانها وبس دموعها تجري
خلود : يسرى اشبيج ليش واكفه هنا وليش تبجين
يسرى : منو هذه ؟
خلود : منو تقصدين ؟
يسرى : اشرت بايدي منو هذه الي كاعده يم سعد حبيبته مو كولي احجي ارجوج خلود
خلود : تعالي حبيبتي يسرى
ترى مو وكتها الزعل رجاءا انتظريني كعدي هنا خل اوديلهه الكهوه وارجعلج
يسرى : كعدت عالقنفه بالهول لان رجلي ماتشيلني حسيت بيهن ضعيفات وشعرت بدوخه خليت راسي عالقنفه
غفيت ماحسيت بالدنيا
خلود : سعد ترى يسرى سمعت حجيكم ودا تبجي بالصاله
فيان : اترخص وأسفه اذا سببتلكم مشكله
سعد : خلود وصليها للباب
فيان : اخر الاحزان مع السلامه سعد
دخل سعد وما التفت عليها ولا جاوبها
سعد : حبيبتي يسرى يسوره كعدي شنو نمتي
يسرى : ماعرف نمت مدري غمى علي
بس سمعت صوت سعد يصحيني ويضرب بخفه على خدي
نعم نعم ها ها
سعد : حبيبتي ترى ماعندي شي وياها هذه صديقه
ومتزوجه وعدهه اطفال
جتي تعزيني مكدرت اطردهه
يسرى : تبجي وتشهك
انت كتلي كنت احب وحده بس مكتلي هلكد حلوه ولا كتلي بعدهه تحبك وتركض وراك ليش هيج فاجئتني
سعد : حبيبتي يسوره هذا ماضي وقبل ما اشوفج واعرفج
وانتهى من زمان واني اليوم حزين ومحتاجج تقويني مو اشوفج تبجين ودموعج زرفت كلبي
يسرى : سعد اني احبك ومن حقي اغار عليك
وماريدك تخفي علي شي صح مو من حقي احاسبك عالماضي لكن الحاضر الي ومن حقي
شوف حبيبي صح انت كولشي بحياتي بس مع هذا اني اطلب منك طلب
سعد : أمريني
يسرى : اذا فد يوم فكرت تخوني عوفني قبل ماتسويها
لان ماعرف شنو حاتكون رده فعلي كولشي توقع مني
سعد : ليش اخونج وانت دخلتي بكلبي وصرتي كل حياتي
صدكيني ماكو غيرج بهالكلب (ضرب على مكان القلب )
يسرى : لزمت ايده لان حسيته صار عصبي ويضرب بقوه على كلبه
خليت راسي على صدره وحضنته
شعرت بالامان والدفو
احبك سعد واموت عليك حبيبي
سعد : انت الامان والدفو اني محتاجج ياعمري لاتتخلين عني
*****
خلدون : شوف سعد وصية امك نفذهه لازم تتزوج
انت ويسرى ميصير تبقون بعيدين عن بعض وهاي الحربايه فيان دا تحاول تفرقكم
سعد : صار اخوي اني حاتزوج بس بدون اي مراسيم
اخذهه ونسافر لان عندي سفره بعد اسبوعين نروح لندن وكم دوله بالباخره راح اكولهه تحضر نفسها
خلدون : عين العقل سافرو تونسوا وعيشو حياتكم واستمتعوا بشبابكم اني متاكد اذا تزوجتو حاتخف حاله الحزن الي انت بيها حاليا ....
مبروك مقدما اخوي العزيز ربي يسعدكم ويرزقكم بأطفال حلوين مثلكم
بعد مرور اسبوعين سافروا يسرى وسعد بالباخره وشهر العسل من اجمل ايامهم
فيان : بعد ماسمعت بخبر زواج سعد انصدمت وشعرت بالغيره كظيت ليالي سهرانه للصبح جفاني النوم
اشرب مهدئات حتى تغمض عيني لكن العاشق اناني بطبعه
واني اعشق سعد بجنون ومستحيل اخلي يبتعد عني
فكرت بطريقه ارجعه الي
ماعندي غير هذا الحل
اعمله سحر ويرجع لحظني ويعوف زوجته
اي ماعندي غير هالطريق
حادكولون علي حقيره ونذله
كولشي احجو بس سعد حبيبي وما اكدر أنساه عايش وياي بكل لحظه بكل تفاصيل حياتي
هذه معركه ولازم أفوز بحبيبي بالنهايه
راجعت احد السحاريبن ودفعتله مبلغ من المال وعملي سحر تفريق عن زوجته ويرجع الي
******
رحاب : اني راجعت طبيبه نسائيه وكالت ماعندج اي سبب يمنع الحمل وكتبتلك هذه التحاليل
عقيل : انت مخبله لو دكتورتج مخرفه شنو تحاليل شنو قصدج الخلل بي وانت صاغ سليم
وهسه شتردين اروح احلل حتى دكتورتج تنطيني علاج
وديني عليها خلي تفحصني وتشوف نشاطي خل تجربني 😀
رحاب : هسه انت ليش معصب خل نتفاهم بهدوء
عقيل : لج قندره عليج وعلى دكتورتج
طررررراخ طرررررراخ كفخ كفخ
رحاب : يبوي موتتني اني ماريد الجهال بس امك خبصتني
يوميه دكولي ماكو شي بالطريق
منين اجيبه غير من عندك
عقيل : ولج لسانج طول ولايفيد بيج الضرب ولا الاهانه
طرررررراخ طرررراخ
رحاب : فدوه عقيل ملخت شعري فدوه راح اموت بين ايديك
وره ماشبعتي ضرب ومزق ورقه التحليل الي كتبتها اله الطبيبه طلع من البيت
وين اروح امي وابوي متوفين واخوتي متزوجين وكلمن مكابل مرته ويباوع لحلكهه وين انطي وجهي
حتى اختي اذا اروحلهه ماتحمل ابقى جم ساعه لان كاعده بيت عيالهه ومسويهه خدامه تخدم الكل ومحد راحمها
ربي ماعندي غيرك اني يتيمه الطف بحالي وحنن كلبه
زوجي احبه وأريده بس تعبني
كل مره يفقد اعصابه ويضربني ضرب مال انتقام
******
ام صفاء : صفاوي اكعد حبيبي  يادوب تلحك
ترتب نفسك تروح للحلاق وتجيب القاط من اللوندري
فدوه لكلبك اليوم العقد مال صفاوي حبيب كلبي
اليوم اركص ركص الكاع للكاع
صفاء : يوم الله يخليج لاتعبين نفسك تالي تتخربطبن
عفيه مابي حيل هبطه
ام صفاء : ولك تريدني اكعد واتفرج هلا هلا
اليوم اذب لحم واردح ردح تحلفت بالمعلمات الي ماتركص
انطيها عقوبه
اليوم اركصهن كلهن ولو بايدي اجيب ديجي للمدرسه واخلي المدرسه كلهم يركصون وافرح الكل
يمه اليوم فرحتي ماتنوصف
لركصلك بعرسك ياصفاوي
واغنيلك بعرسك ياصفاوي
صفاء : صارت مغنيه ام صفاوي خل اكوم اتحضر لا اشوف الجوارين كلهن بغرفتي يركصن
ام صفاء : طبعا صديقاتي من الجوارين هم متحلفه بيهن
صفاء : اكولج ليش ماسويتي تعميم وإعلان بالتلفزيون خل الشعب العراقي يحضر لعرس صفاوي
ام صفاء : ولك جبتلك فرقه ام علي اغلى دكاكات بالبصره
الا اخليهم حتى انت يركصوك
صفاء : يوم عفيه لاتحرجيني ترى اخجل
***
صفاء : حافوت اسبح حضريلي ريوك
ام صفاء : ريوكك حاضر بس البيض ماقليته انتضرك تكعد وتكمل حمامك
اعرف بيك ماتحبه بارد
ام صفاء : كللللللللوش كللللللللللوش
مبارك عرسك يالهيبه مبارك عرسك صفاوي
*****
منى : عفيه منال تعالي شوفي هذا الكتلوك بي خوش تسريحات خل نختار تسريحه مميزه ومختلفه
ماريد اسوي شغله تقليديه والكل مسويهه
منال : ماما اليوم بنتج تريد تختلف عن الباقين
ام منى :هي طول عمرها تحب تكون مميزه ومختلفه
حتى فستان المهر راحت جابته من بغداد من شارع النهر
وكالت اريد موديله مموجود بالبصره
منال : وانت تشجعيها هذا يعتبر تكبر
ام منى : لا بنتي هذه طبيعه بشريه
واختج طالعه علي اني لما كنت بعمرهه واشتري فستان واشوف وحده لابسه مثله
اتنرفز وبعد ما البسه
لازم المرأة تكون مميزه ومختلفه عن الأخريات وماتقلد
وماتلتزم بالموده تلبس الي يخليها انيقه
تلبس الي يليق بلون بشرتها وجسمها والي يبرز أنوثتها
منال : اشو اني ما اهتم لهيج امور
ام منى : انت اهتماماتج بغير مجال تحبين ترتبين البيت واشوفج دايما تغيرين بترتيب الاثاث
وهذه ميزه عندج تختلفين بيهه عن باقي البنات الي بعمرج
واهتمامهم باللبس والمكياج
منال : اني احب المكياج الخفيف والبساطة
بس احب يكون بيتي مملكه مختلفه عن باقي البيوت
والحديقه وكعدتها ولمتنا بيها
ام منى : شي اكيد من ترتبيلنا الكراسي بالحديقه والتلفزيون
وتجيبين العشا والفواكه والركي
تخلقين جو عائلي ممتع وهذه اخذتيها من ابوج
لان هو يحب اللمه وبما انو هو خريج زراعه ومهتم وياج بالحديقه ومسويلج واهس
خليتوهه جنه وكلمن يجي ويشوف حديقتنا يستمتع بالكعده
منال : تدرين ماما كل شتل زرعته احبه ويوميه اتفقدهم عبالك جهالي كل ورده تطلع وتفتح افرح بيها وهذه ثمره تعبي ...
مرات احجي ويه الورد اكيد يسمعوني
منى : اهووووو رحنا بعالم الزهور والحدايق
عمي تعالي شوفي التسريحات لو اكولج خل نروح للصالون وهناك نختار التسريحه
ام منى : خل اصيح بابا يوديكم
*****
في الحفله
ام صفاء : كللللللوش كلللللوش
فدوه لكلبج مناوي شنو هالجمال والترتيب
خيتي ام منى حديقتكم مسويهه تخبل اخاف الضيوف يزعبلون الترتيب
ام منى : منو يكدر يخربط ومنال موجوده خو ماتزعلون اذا صاحت على طفل يخرب بالزرع
ترى هي تعتبر الزرع مثل جهالهه ومتقبل احد يلمسه
ام صفاء : خيه جوي الدكاكات وين نكعدهن
منال : هنا خالتي اني مرتبه كعدتهن
ام صفاء : خوش مكان وهنا الركص
منال : اي خالتي هوهنا يركصن
الحفله كانت ممتعه والفرقه ركصت الكل بس ماتخلو من بعض المنغصات
منال : عيني امهات رجاءا لزمو اطفالكم مو ملتهيات بالركص والسوالف وعايفين جهالكم يعبثون بالحديقه
ترى ميصير هيج
كل وحده تلزم ابنهه
ام منى : ماما منال لايزعلن ترى ميصير ترزليهن
منال : وزعلتهم احنا تعبانين بالحديقه وذني كاعدات يتمضحكن وعايفات جهالهم يخربون الزرع كطعوا الورد
اكثر الشتلات تعبانين  عليها
ماما هذا الزرع هم بي روح ويشعر مثلنا ميصير يدوسون عليه .....ذولي مو جهال
المفروض الي عدهه هيج طفل لو تبقي بالبيت لو تلزمه وتحترم نفسها
ام منى : كافي سكتي زعلن وجاي يسلمون ع ام العريس
حايطلعون
منال : تخلف خل يزعلون المهم حديقتي وزرعاتي
ام صفاء : شفت ابني هاي اخت مرتك فشلتني كدام خطاري
صفاء : ميخالف يوم هي هم خطيه مرتبه حديقتهم وتعبانه بيهه وراوتني شمسوين
ام صفاء : عود اني فرحانه بالكعده الحلوه تالي فشلتني
صفاء : يوم اني مو علمود اخت خطيبتي بس كتلج صديقاتج مقصرات المفروض يلزمن جهالهم
ام صفاء : ماضل شي عالعرس
تالي تتزوج وتخلص من اهلهه
صفاء : يوم ترى اهلهه حبابين بس حاجتهم عزيزه
هسه عود بعرسي خل يجن صديقاتج ويزعبلون بالبيت وانت لا تحجين
ام صفاء : هم صدك
اني بالمدرسه عندي كم زرعه اتخبل اذا اشوف لاعبين بيهه لو لازميها
صفاء : ها شكلنا
تدرين هسه اغلب العوائل من يسوون حفله عرس يكتبون بالبطاقة يرجى عدم جلب الاطفال
او الاطفال مكانهم المنزل
ام صفاء : اي وهوايه زعلوا ومراحو لهالحفلات
هسه كولي وين نسوي حفله عرسك
صفاء : عندي صديقي بالنفط وعدني يحجزلي قاعه نادي النفط
القاعه حلوه ومكيفه ومرتبه هو عضو بالهيئة الإدارية
ام صفاء : وشكد يحجزوهه
صفاء : مو هواي يمكن ١٥٠ دينار
ام صفاء : زين لعد حدد الموعد واحجز القاعه
صفاء : بقى راي العروس خل نتفق ونحدد الموعد
ام صفاء : هم حقك اتفقو وبلغوني واريد منك فد ميه بطاقه
*******
سمير : واخيرا تحقق حلمنا فوزه وصرتي مرتي
فائزه : تدري سموري جتي فتره ايست وتوقعت مراح نتزوج
سمير : حبي اريد تحددين النسل
اول طفلين تجيبيهم نخليهم يتعاركون يلعبون وره كم سنه ترتاحين هم فد طفلين
فائزه : الله كريم حبيبي مادام احنا سويه وسعداء ان شاء الله تتحقق كل احلامنا
مرت الايام والاشهر والسنين وفائزه ماحملت
فائزه : فدوه امونه راح اتخبل كم دكتوره راجعت ينطوني علاجات وماكو حمل
وسمير اشوف عيونه تدمع من يشوف اطفال ويحضن بجهال اخوه كلبي خلص تعبت
ايمان : انت شبيدج هذا امر الله اهم شي سمير يحبج بجنون يعشقج واني احسدج على هيج رجال وين تلكين هيج رجل مخلص ويحبج
فائزه : أيست اخاف يمشي العمر وميصير عدنا اطفال
خايفه امونه لا سمير يتزوج علي
اهله دا يلحون عليه يكلوله تزوج
أصدقائه يكلوله حتى لو تحب زوجتك من حقك يصير عندك طفل يحمل اسمك تزوج وخليهن اثنينهن بذمتك
ايمان : وهو شنو رايه ؟
فائزه : هو كولشي يجي يحجيلي ميضم  عني حجايه
اووووف ياربي بعد ماتحقق حلمنا وصرنا لبعض ننحرم من الضنا ننحرم من نعمه الاطفال
*****
سمير : زوجتي فائزه اعشقها بجنون احبها
ماعتقد يجي اليوم الي افكر اتخلى عنها لكن العمر يركض
وهي مجاي تحبل واني من حقي يصير عندي طفل
شسوي لا اكدر اتخلى عنها ولا اكدر ابقى هيج والناس واهلي
تعبوني بأسئلتهم وكل واحد يحجيله حجايه تكطع كلبي
وتخليني افكر بطفل يحمل اسمي
*****
رعد : الحمد لله ع سلامتج فطم
اتفقت ويه عمي نتزوج ونسافر شهر عسل لا حفله ولا دوخه
لان تعبنا من المفاجآت
فاطمه : بكيفك حبيبي وين حانسافر
رعد : كم دوله بالباخره كل ميناء نبقى بي حسب حموله الباخره ننزل بالمدن ونفتر
خومابيج دوار بحر وتدوخيني
فاطمه : لا لا اهم شي نسافر ونغير جو الكآبه أدي تسببه محسن
رعد : لاتذكريني باسمه حرامات ما قتلته
فاطمه : اي وتنحبس وابقى انتظرك عشرين سنه
رعد : الدوله استلمت باخره جديده اسمها ابن خلدون
باخره ضخمه خاصه لتدريس طلاب الكليه البحريه
وبيها مخازن لخزن  البضاعه
بيها مستوصف بسيط ودكتور ومضمد
مسبح واني حاكون مساعد الكابتن
خصصولي جناح خاص حايكون مملكتنا خلال شهر العسل
تم زواج رعد وفاطمة بحفله صغيره بحضور الاقارب المقربين فقط وسافروا للخارج بالباخره
الرحله ممتعه لان الباخره جديده وكبيره بيها قاعات لاقامه الحفلات
بهالمرحله كدرت فاطمه تسترجع ثقتها بنفسها وتحسنت حالتها الصحيه
ترقبوا البارت القادم
حاندخل سنه ١٩٨٠
ودخول البلد بالحرب العراقيه الايرانيه وين حايكولون ابطال قصتنا راح يشتركون بالحرب ؟؟؟؟؟
****بقلمي فردوس عبد اللطيف ****