#صراع_الزمن

سادس

#صراع_الزمن
بقلمي :فردوس عبد اللطيف
سادس
ام امجد : الحمد لله ع سلامتك يمه شلونهه سفرتك للبصره خو ماتعبت ؟
امجد : شتعب هو حياتي كولهه سفر متعود بس البصره حاره
ومايهه مالح
بس ناسهه طيبين والكعده ببساتين ابو الخصيب على شط العرب ترد الروح
ام امجد : يعجبني اروح اشوف البصره
امجد : اكيد راح اخذج
ام امجد : ها ولك تقشمرني ؟
امجد : دا احجي صدك اكو موضوع اريد احجي وياج بي
ام امجد : خير يمه شصاير
امجد : ان شاء الله خير
اني شفت بنيه موظفه وعجبتني
سألت عليها طلعت خلق واخلاق واريد اخطبها شدكولين يابعد روحي ؟
ام امجد : كلللللللوش يابعد امك هذا يوم الهنى افرح بعرسك مجودي
انسام : سمعت هلاهل منو تزوج ؟
امجد : تعالي حبيبتي نسوم اخوج الكابتن حايدخل القفص الذهبي والبنيه بصراويه
انسام : يعني عفت بنات بغداد ورحت عالبصره خو مو سمراء ؟......
امجد : ههههه انتو غير ماخذين نظره على اهل البصره عبالكم سمران لج بابا اهلها عوائل عريقه وبناتهم جميلات
والبنيه الي اخترتهه كمر يضوي تعرفين ذوق اخوج
وهما لحد الان ماكالو تعالو
ام امجد : ها يعني مو اكيد احتمال ميوافقون
امجد : انتضر الرد بس حبيت اخبرج لان رايج يهمني
ام امجد : حبيبي راي من رايك اذا البنيه عجبتك توكل على الله وربي يسعدكم هو اني اريد افرح بيك واشوف جهالك
انت ابني الجبير واول فرحه خاف اموت وما اشوف جهالك
هاي بوسه لراسج  ست الكل هو اني اريد افرحج
******
رعد : كول خالي شتأمرني ؟
ابو فاطمه : بويه فطم بنت خالك مو غريبه وانت شتجيب اشو الكم اثنينكم وباجر الناس دكول فطم زوجه رعد وينسون
بنت فلان
احنا دورنا نربي ونكبر والرجال يجي عالحاضربعدها دورنا ينتهي وتصير انت اهلهه
رعد : انت الخير والبركه خالي العزيز
خلي الوالده تتفق ويه ام فاطمه عالشكليات وطلباتكم واني حاضر
الشيخ : رحم الله والديه الي يقرى الفاتحه
بوس راس خالك وتشكر منه
كلللللللللوش كللللللللوش مباركين
******
رعد : صباح الخير ست جميله
جميله : اهلا بيك كابتن
هديل روحي جيبيلي أضابير وهاي قائمه الاسماء
هديل : هذولي عشره راح ادزهم بيد الفراش
جميله : اي لاتشيليهم انت دزيهم بيد ابو حسن
شتشرب كابتن جاي لو نسكافيه
رعد : ما اشرب شي مستعجل طمنيني ترى امجد اتصل بي ويريد جواب حجيتي ويه البنيه
جميله : اكيد حجيت وياها مثل ماكلفتني
والبنيه مقتنعه بامجد بس وضع اهلهه ما يسمح
ظروفهم الماديه صعبه وابوهه مريض واهلهه عايشين ع راتبهه
رعد : والحل ؟
جميله : اذا هو مستعجل اكيد صعب تعوف اهلهه وهما بهالضروف
واذا يقبل ينتظرهه سنه لحد ما اختهه تكمل السادس وتتعين
نجيبهه هنا بمكانهه
هو اني الي اقترحت عليها المقترح الثاني
انت شوفه شيكول واذا وافق ترى البنيه ليره ذهب وربك يحبه اذا صارت من نصيبه
رعد : قصدج يتقدملها ويبقون مخطوبين مده سنه وراها يتزوجون طيب واذا رسبت اختها ينتظر سنه ثانيه ؟
جميله : انت لاتعقدهه عود تتعين اختها بشهاده الثالث وتكمل مسائي ماكو شي صعب كولشي اله حل
رعد : ههههه ست جميله كل الحلول موجوده يمج
اترخص وراح اتصل بكابتن امجد واردلج جوابه باجر اتصل عليج هنا بتلفون الدائره خو مابيها احراج
جميله : ليش احراج احنا جاي نسعى للخير والكاتبه الله يصير
رعد : شكرا ست جميله انشاء الله نخدمج بيوم زواج عبودي ابنج
جميله : تسلم هو ابني بعده متوسطه وينه وين الزواج
رعد : ههههه ميخالف الصغير يكبر غمضي فتحي
******
رعد : شلونج فطم ترى اني مستعجل شوكت نتزوج
فاطمه : عفيه رعودي خلي الموضوع مفاجئ ماريد محسن يخرب علينا
رعد : ابوج ماكللهم ؟
فاطمه : لا بعده واني خايفه من محسن
ابوي يكول قبل العرس بكم يوم راح اعزمهم ومراح يكدر يسوي شي
رعد : شيريد يسوي هو انت حاتصيرين مرتي خل يولي
فاطمه : لاتستهين بي هذا خبيث
رعد : ماشي مراح نحجي خل نحضر امورنا شوكت نروح
نختار الغرفه ؟
فاطمه : مستعجل عالغرفه ؟
رعد :طبعا مستعجل واهم شي السرير اريده عريض وجبير حتى نلعب مصارعه
فاطمه : هاي شبيك رعودي ان شاء الله ناوي تلعب مصارعه من صدك ترى اني ضعيفه وانت خشن غير انفعص
رعد : لج انت روحي ...الا ادللج دلال مصاير
فاطمه : صدك بعد الهبطات من وره محسن جنت خايفه لا ابوي يعاند ويرفض زواجنا
رعد : واذا رفض غير اخطفج وننهزم
فاطمه : هلا هلا واجيب العار لاهلي
رعد : باعي حبي كولي لابوج خلي نمهر يوم الخميس وخليها سكته وره المهر عود نعلن خطوبتنا حتى ميكدر يعترض
فاطمه : يعني اذا نمهر ميكدر ينهي علي ؟
رعد : شكولج حتى اذا مهرنا يكدر ينهي بس شرعا لا طبعا تصيرين مرتي
فاطمه : يارب سترك
زين بالمهر هم اريد البسلك فستان واروح صالون واعزم صديقاتي
رعد : اي حبيبتي سوي الي يعجبج بس كون مايسمع غراب البين محسن
******
ام فلاح : هلا يمه الحمد لله على سلامتكم اشلونج يمه سهى ويه الحمل خو ماتعبتي
سهى : الله يسلمج خالتي والله تعبت منا عندي دوار البحر ومنا الحمل يعني ميبقى اكل بمعدتي
ام فلاح : خطيه شكد ضعفانه شصاير بيج مو كتلك خليها يمي تونسني الا تاخذهه شوف شمسوي ببت العالم
فلاح : يمه بالبحر مكضيتها نايمه وعدهه دوخه اشو من اكولهه باجر نوصل لميناء اي دوله اشو تصحى وتكعد وزن
اشلون دوار هذا دلال
سهى : هيجي فلاح عبالك اتصنع بعد ما أسافر وياك ابقى يم خالتي
فلاح : معقوله تعوفين فلوحي يسافر وحده ومن ننزل اي ميناء ونشوف الجميلات ماتغارين ؟
سهى : لزمتني من ايدي التوجعني
ام فلاح : يمه سهى ترى امج كلسع تخابرني تسأل عليكم خابريها طمنيها
سهى : حروح اخابرهه
*****
ام سهى : اشلونج ام فلاح وين بنيتي كلبي نار مشتاكه
ام فلاح : تفضلي خيه استريحي حصيحها الج
سهى : ماما حبيبتي مشتاكتلج
ام سهى : ولج يمه شصاير بيج ليش هيج فلاح شسويت ببنيتي يمه وين خدودج جنهن تفاح
خاف اكلهن فلاح وجوعج
ام فلاح : بدينا عاد ام سهى شنو فلاح جوعان وياكل خدودهه
احجي عدل انت كاعده بيتي وع فراشي
جان رديت عليج
سهى : ماما اني حامل وميبقى شي بمعدتي
فلاح :شلونج خالتي بنتج عدهه دوار بحر ومتكدر تاكل بسبب الحمل
ام سهى هسه اني شحجيت فوك مماخذ بنيتي ومرجعها جلد وعظم بعد معاجبكم كلامي
ام فلاح : اني رايحه اصلي من رخصتج
فلاح : اني هم رايح اسبح
سهى : ليش يمه هيج تحجين
ام سهى : هما لو عدهم أصول مجان يعوفوني ويرحون شوفي شلون ميقدرونج ويقدرون اهلج
سهى : هسه انت ليش تبجين اشو انت الي حجيتي حجايه ميصير تنكال شنو مجوعني
يمه فلاح مدللني اكثر من دلالي عندج ويحبني ولا يوم قهرني بحجايه
ام سهى : اي ربينا وكبرنا وتعبنا هسه صار فلوحي ابو الدلال ولج مصارلج جم شهر وياه خل نشوف تاليتهه
خل اروح لبيتي الظاهر هنا محد رايدني هذا جزاء  تربيتي يا بت بطني
سهى : يمه وين اوكفي خل انطيج هديتكم
ام سهى: مانريد منج شي
فلاح : ها سهى حبيبتي ليش تبجين ؟
سهى : مابي شي
فلاح : اكيد امج سوتلهه زعله
حضنتهه ....حبيبتي لاتبجين باجر اخذج يمهم ونوديلهم الهدايا وامج شما تحجي لاتهتمين لان بسرعه تبدل
سهى : تسلم حبيبي ربي عوضني بزوج مثقف ومتفهم
فلاح : ربي لا يحرمني منج
سهى : ولا يحرمني منك
ام فلاح : ها وين امج شو ماكو
فلاح : يمه سوتلها زعله وراحت لبيتهم
ام فلاح : بنتي حتى لو تزعلين ترى امج تدور مشاكل وتريد تغثنا هذا طبعها من تزوجت ابو فلاح لليوم
سهى : حسبيها علي خالتي هي كلبها طيب بس لسانها عام عليها ومخلي الناس تبتعد عنا
ام فلاح : الله يهديها بنتي امج تدور قيل وقال مو من اليوم هذا تاريخ
سهى : اني رايحه لغرفتي عذروني
ام فلاح : شوف مرتك ماعجبها حجينا ع امها
فلاح : المهم هي تعرف امها بس ماتنطي بيها
******
معن : الو
رونق : مرحبا
معن : هلا بهالصوت
رونق : اسفه مكدرت اخابرك البارحه لان اخوي ينتظر صديقه يخابره وتأخر
اني هم شفت الجو مو مال انتضر وراها اتصل بوقت متأخر
معن : بالعكس حبيبتي اني اتأخر بالليل متعود اسهر
وتحلى السهر ويه رورو
رونق : رورو صرت هذا اسم الدلع
معن : شعبالج كولشي اعرف عنج واهلج يدلعوج رورو
رونق : صحيح
احجيلي حضره الضابط على سفراتك ومغامراتك بالخارج
معن : هههههه حلوه هاي مال مغامراتك
رونق : صار بيها هههه لازم اكو وشنو رايك بالمرأة الروسيه ومنو افضل الاجنبيه ام العراقيه
وهل صادقت او حبيت وحده اجنبيه
معن : على كيفج بالاسئله ترى مالحك اجاوب
بعدين لازم احجيلج بالتفصيل شسوينا خلال اربع سنوات
وراها كم سفره سافرنا
وبعد هالمره هم عندي سفره
بس هالمره حاروح بدون قلب
رونق : سلامتك ليش
معن : راح اعوفه يمج
رونق : ههههه خرعتني عبالي بيك شي ....فد مرض بكلبك
هم تهربت من الجواب واني لازم ارجع التلفون بمكانه لاينتبه اخوي لو بابا وتصير مشكله .....
ويامن دا تحجين وماخذه التلفون بغرفتج
معن : رورو لازم نلتقي ميصير نكضيها بس تلفونات
رونق : كابتن انت تعرف والدي شكد شديد
هو كليه منعني اداوم انوب اطلع وياك
اني هم اتمنى اطلع وياك ونتمشى بفد حديقه ونسولف
لكن اهلي مو سهل أقنعهم بأي كذبه
معن : زين اذا لبسنا حلقات هم ممنوع نطلع ونطب
رونق : يجوز الا ويانا حارس من اخوتي خواتي
معن : ابوج مظلمها علينا
******
فائزه : هلو سمير هاي شجابك يم الروضه لايشوفنا احد
سمير : حبي مشتاقلج ومشتاق لشوفتج
فائزه : حبيبتي ايمان ابقي ويانا
ايمان زميلة فائزه بالروضه وصديقتها
خل نشوف سموري تاليتها وياه خو مانبقى بالشارع واكفين
سمير : تعالو سيارتي مخليها يم ذاك المحل
وين يعجبكم ترحون ؟
فائزه : اليوم خل نشوف امونه وين عاجبهه تروح
ايمان : اكولج خل نروح للمنصور اريد اشتري فستان
لحفله زواج بنت خالتي وانتو انتظروني بالسياره
سمير : خوش مقترح نبقى بالسياره وانت دوري براحتج
ايمان : انتضروني هنا مو تالي ادور عليكم
مع السلامه ايها العاشقان
سمير : ممكن امسك ايدج
فائزه : خاف يشوفنا احد سمير صير عاقل
سمير : بعد ماتحمل احبج واموت عليج
فائزه : حبيبي اني هم احبك واموت عليك
سمير : حجيت ويه اهلي وموافقين شنو الإجراءات
تردين ادز الوالده بالبدايه وبعدين الزلم
لان امي دكول هيج الاصول الزلم يجوكم بعد ماتتفق النسوان على كل التفاصيل
انت اليوم كلمي امج وحددو موعد حتى ادزلكم امي وخالتي
فائزه : اكولك اني استحي منهم خل سعاد
زين هي حا تحجي  وياهم ؟
سمير : هههه طبعا سعاد في المقدمه اكيد تريد تاخذ الصداره
شوكت راح تحجين ويه امج
فائزه : زين هسه دكولي منين عرفتي ؟
خل سعوده تجي للبيت ودكولهه لماما احسن على اساس اني ماعرف
سمير : اوك اليوم ادزلكم سعاد وباجر يجوكم النسوان
ماعتقد يحتاج تأخير وتسألون علينا لان تعرفونا
ايمان : تاخرت عليكم ايها العشاق ؟
فائزه : تدللين حبيبتي خلي نوصل ايمان واني انزل وياها لبيتهم ابقى يمها واتصل بماما اكولهه اني يم ايمان لحد ما انت توصل وره ساعه ارجع
سمير : اوك نوصل ايمان شعدنا
اهم شي امونه اشتريتي الفستان ؟
ايمان : طبعا اكيد اشتريت الفستان والعفو الحذاء والشنطه
وراح ألبسهم بحفلة المهر مالتكم استعجلوا ترى طولتوهه
فائزه : ههههه من نوصل لبيتكم راح احجيلج
ايمان : احمممممم لازم اكو اتفاقات من وراي
*******
سعاد : سلام عليكم اشلونج خالتي
ام فائزه : هلا يمه الحمد لله امج اشلونهه ؟
سعاد : امي تسلم عليج ودكول باجر نجيكم امي وخالتي واني طبعا العصر
ام فائزه : هلا وغلا تنورونا
سعاد : خالتي ما سألتيني شنو المناسبه
ام فائزه : ميحتاج مناسبه احنا اكثر من الاهل
سعاد : خالتي باجر جايينكم خطابه نريد ام الفوز لاخوي سمير
بعد انت بلغي ابوهه واحنا نجي بصوره رسميه وره مانتفق
يجون الزلم
هذا كلام الوالده والوالد
ام فائزه : يمه تعرفين كولشي بيد ابوهه واخوهه واني راح اكولهم ويصير خير ان شاء الله
وجيتكم على راسنا حتى لو بدون خطبه
سعاد : كلامج مايطمن خالتي شنو اكو احد حاجي عليها لو تعتقدين عمو يرفض
ام فائزه : يمه ماكولج يرفض احنا نتشرف بيكم بس الكلمه الاولى والاخيره لابوهه وهاي الاصول الي كل بيوتنا متبعتها
سعاد : كلامج ذهب خالاتي وربي يكتبلهم قسمه ونفرح بيهم
ام فائزه : يمه سمير شاب معدل وماعليه اي غبار بس تعرفين ابوهه هم لازم يسأل  عمامها كبل ما نحجي ونطيكم موافقتنا ......
سعاد : الله كريم خالتي اترخص اني
ام فائزه : وينج فائزه تعالي سلمي على سعاد
فائزه : (غمزتلهه )هلو سعوده من شوكت هنا ليش ماصحتيلي
سعاد : باجر نجيكم حبيبتي فوز هسه مستعجله
******
اليوم الثاني
بيت اهل فائزه
ام فائزه : بنتي انت بعدين دخلي وجيبي صينيه الببسي
قدميلهم وديري بالج مو ترجف ايدج اريدج مسيطره
فائزه : حاضر يوم والكيك خل فريده تجيبه
فريده : اني معلي انت العروس ولازم تقومين بواجب الضيافه
اخاف ادخل عليهم ويغيرون رايهم ويخطبوني
فائزه : الي يسمعج يكول سعاد حسني
بسيطه هم يجوج خطابه الا اكعد رجل ع رجل واخليج مثل الخدامه تخدمين خطابج
ام فائزه : صوتكم بنات اني رايحه افتحلهم الباب يبين هما رنو الجرس
فريده : لج اشبيج اصفريتي
فائزه : عفيه رتبي الصينيه ايدي دا ترجف
شوفي هدومي مرتبه وشعري عفيه خو ماتخربط
زين شوفي الحمره خفيفه لايكه
فريده : اوكفي خل اعدل شعرج خلي طوق ارتب
فائزه : حروح ارتب شعري وانت حضري الاغراض
فريده : وين مهزومه جبانه
*****
ام سمير : وين العروسه نريد نشوفها
ام فائزه : بعد البنات يستحن عبالك مشايفتكم
ام سمير : حجيتي ويه ابو فائزه بالموضوع الي جايين عليه ؟
ام فائزه : خيه حجيت وياه ووو
ابو فائزه كال لازم اشوف عمامها تعرفين هاي الاصول
وان شاء الله نردلكم خبر
فائزه : مساء الخير
ام سمير : صلوات على محمد وال محمد
منوره عروستنا
خاله سمير : صلوات على محمد وآل محمد خيه مثل ما كلتي
جنهه كمر حبيبتي ربي يكتبلج نصيب لسموري
واني محضره نفسي اريد اهلهل
ام فائزه : خليهه خيه من يصير نصيب
يتبع
++++++بقلمي فردوس عبد اللطيف ++++++