#صراع_الزمن

خامس عشر

#صراع_الزمن
خامس عشر
بقلمي :فردوس عبد اللطيف
فائزه : صعدت بالتكسي ووراهم لحد ماتوقفوا يم مطعم
وكف سيارته بالفرع ونزلوا
اوكف اخوي بس دقيقه
خليتهم يدخلون
هذا المطعم على طول نجي اني وسمير نتغدى
صعدوا الدرج لان العوائل فوك بقيت اراقبهم نزلت من التكسي اريد اخطوا خطواتي لكن رجلي ثكيله
بس لازم اروح أفاجئهم
ليش عبالهم غبيه ويضحكون علي
صعدت الدرج دورت بين الناس
ماخذهه لاخر مكان ومدنك لازم ايدهه ويقنع بيهه يظهر
هي معصبه ودا تتكلم بعصبيه
هو ظهره علي بس هي شافتني
اصفر وجهه جرت ايدهه من بين ايده وكفت على حيلهه
متكدر تتكلم بس فتحت حلكها
اقتربت منهم
التفت سمير يريد يشوف منو الي خلاها بحاله ذهول
من شافني
سمير : فائزه شجابج ؟
فائزه : موقف صعب اوصفه الكم لو الدنيا كولهه خادعتني ولا ذولي الاثنين اقرب شخصين لكلبي
اختنكت مكدرت احجي كلمه واي كلمه بهيج موقف ماتشفي غليلي ولا تبرد كلبي
اشرت براسي ودموعي تنزل بدون ما اكدر اوكفها
نظرة عيوني وحركه راسي بينت الهم اني كشفتكم
الكلام توقف بذيج اللحظه
الزمن انقلب علي وغير حياتي وطموحي وتفكيري
تقرب مني سمير
فائزه فائزه اسمعيني
ماسمعت الكلام الباقي احس وشه با ذاناتي
ركضت عالسريع وطلعت من المطعم وهو نزل وراي
اخذت تكسي وصعدت كتله اطلع
مالحك علي بقى واكف يباوع علي بحاله ذهول
دموعي تجري جسمي كوله يرجف وين اروح لبيتي ؟
اجمع ملابسي واروح لبيت اهلي
دخلت للبيت
كل مكان بي يذكرني بلحظه عشق وحب عشناها سويه
باوعت على مكان كعدتنا بالصاله هنا هو يكعد مكانه المفضل ويكولي تعالي كعدي يمي ويمد ايده ويخلي راسي على صدره
كعدت عالقنفه بجيت وبجيت وبجيت
شكو دموع كانت بداخلي نزلت واني اشهك
كمت وكفت خل اروح اجمع ملابسي قبل مايجي
دخلت لغرفتي وتذكرت كل لحظاتنا فرحنا وحزنا
ايام وسنين عشره سنين بيها ذكريات اغلبها لحظات سعاده
هيج ايمان كنت احجيلج أسراري وتالي اخذتي حبيبي ونور عيني
شكد حقيره شكد انانيه شكد غياره
الله ينتقم منج وياخذلي حقي مثل ما اخذتي رجلي
فتحت الكنتور ولملمت ملابسي ماعرف شخذت اجيب واخلي بالشنطه واني بحاله مزريه
*****
سمير : ايمان امشي اوصلج لبيتكم
ايمان : يعني ماتغديني ؟
سمير : ياغدا مو تسممنا خل اروح اشوفها لاتسوي بروحها شي انصدمت احنا قتلناها بطعنه سكين من الخلف
ايمان : سمير اني مو عالاكل بس انت اعصابك تعبانه وداترجف اخاف عليك لاتتهور وتضربها
ابقى حبيبي اهدأ وهي هم اكيد حاتبجي وراها تهدأ
خل نفكر اثنينا بحل
بس انت اسمعني كولهه احنا مخطوبين حتى تكون امام الامر الواقع
سمير : ايمان دا اكولج كومي خل نروح وبالطريق افكر شكولهه لايصير بيهه شي
ايمان : وانت بس خايف عليها واني مافكرت بي
سمير : اهووو غيرة النسوان بعدنا مابدينا
****
سمير : رجعت للبيت هدوء بس اكو صوت بالغرفه هاي فائزه تبجي
فوز حبيبتي وينج
رِن جرس الباب اخوهه شجابه هسه
وليد : وينج فائزه ؟
سمير : هاي اشبيك وليد خل نتفاهم
وليد : ابوي دزني على اختي واذا عندك حجي تعال لبيت ابوهه
سمير : عفيه فائزه بس سمعيني
***
ماتكلمت فائزه ولا كلمه واخذت شنطة ملابسهه وطلعت مع اخوهه
****
سمير : هسه شسوي خل اتصل بإيمان تفكر وياي
وينج امونه فائزه عافت البيت وراحت لاهلهه
ايمان : عادي حبيبي تعصب وتالي ترجعلك لاتخاف هي ماتتخلى عنك
بس انتظر تهدأ عوفها اليوم وباجر روحلهم
****
سمير : بقيت بالبيت وحدي افتر بكل مكان ماعرف اعيش بدونها تركت فراغ
اني شسويت !!!!!
بس هذا حقي ميصير ابقى طول عمري بدون اطفال
هاي هي باجر اروحلهه تكون هدأت وافهمها
اليوم الثاني
ايمان : الو سمير ترى مرتك ماداومت اليوم
سمير : العصر اروحلهم واحجي وياهم
ايمان : اي فض الموضوع اني هم جايني عريس واهلي دا يضغطون علي اوافق
******
في بيت اهل فائزه
ابو فائزه : تفضل سمير اكعد هنا كبالي
خليني احجي وبعدين انطيك  مجال تتكلم
اني من وثقت بيك وانطيتك بنتي ردتك تحافظ عليها وتحميها من غدر الناس والدنيا
لان شفتك متمسك بيها وانت ابن أصول وماتقبل العيبه
اليوم بنتي شافتك بوضع مو لائق ومع اعز صديقه عدهه
اريدك تحجي وتدافع عن نفسك
سمير : عمي والله العظيم فائزه اعز انسانه بالدنيا هي الهوى الي اتنفسه بس انت تعرف عمي العمر يركض والطبيبه
اكدت ماكو امل ولو واحد بالميه ان فائزه تحبل
ولو منطيني امل بصيص امل ولو شي بسيط
مستعد انتضر سنه وسنتين
بس ماكو فايده لا علاج ولا عمليه
اصدقائي الي تزوجوا وياي كل واحد عنده طفلين وثلاثه
واني انتضر
الكل نصحوني اتزوج ويصير عندي ابن يحمل اسمي
واني متمسك بفائزه والي تريده يصير
شتطلب اني حاضر
واخترت صديقتها الي تحبها كلت حتى يكونن صديقات
ابو فائزه : مامعترضين ومن حقك يصير عندك طفل
ليش مصارحتها ليش التافيت من ظهرهه ورحت على صديقتها
سمير : لا لا عمي كل الي صار صدفه
واني كنت اريد اصارحهه من البارحه بس شفتها مسويه كيكه عيد ميلاد زواجنا ماكدرت اقهرهه
ابو فائزه : وليد صيح اختك
جتي فائزه مدنكه ومتباوع على سمير
ابو فائزه :كعدي بابا هنا
انت كنت تسمعين كلام زوجج شنو رايج ؟
فائزه : يطلكني
سمير : فائزه حبيبتي اني متمسك بيج وماكدر اتخلى عنج حتى لو تزوجت تبقين انت الاصل
فائزه : بابا كلمه وحده ماعندي غيرهه الطلاق واي كلام ماعندي مع الي خانوني
ومن باجر راح انتقل لروضه اخرى وماريد اشوف اي واحد منهم ...
طلعت من الغرفه
ابو فائزه : ابني هذه رغبتها وانت هم شوف دربك وتزوج وخلف اطفال يحملون اسمك
اليوم فائزه مثل الطير المذبوح
منكدر نقنعها تغير. رايها وياريت قبل ماتتزوج تطلكها
****
سمير : طلعت من بيت عمي حزين
مع اني مقبل على حياة جديده وزوجه جديده
متفائل يتحقق حلمي ويصير عندي طفل يحمل اسمي
هذا قدري اخسر الي احبهه في سبيل احقق امنيه كل رجل متزوج
****
تزوج سمير من ايمان وغيرت كل اثاث البيت الي كانت مختارته فائزه وحذفت كل ذكريات فائزه
بنفس الوقت فائزه دزت على صورهه وخصوصياتها
سمير خضع للامر الواقع وبده ينتظر ايمان تحبل بطفل يحمل اسمه
فائزه بقت يم اهلهه وتداوم بروضه جديده وحاولت تمسح سمير من حياتها وذكرياتها
*****
: خمسة زوارق إيرانية تتعرض للهجوم والتدمير من قبل القوات البحرية العراقية في الخليج العربي.
رعد : فاطمه شوكت تجيبين وافرح بشوفه ابني ؟
فاطمه : مابقى شي يجوز إجازتك القادمه تشوف ولي العهد
رعد : الاخبار بالتلفزيون مو مريحه
مراح يفوتوهه خمس زوارق تتدمر بالخليج اكيد الرد حايكون عنيف واحنا ناكلهه
فاطمه : حبيبي ابقى يمي هالفتره لحد ما أولد
رعد : هههههه حقج عيني مو اني اداوم بيت ابوي
لج ذولي جيش واحنا بحرب ومتبلغين لما نسمع اخبار انذار
لو هجوم واجب علينا الالتحاق فورا
والبطرانه تريدني اجيبهه
باجر التحق وربج يستر
فاطمه : خايفه عليك عمري انت لاتعوفني وتروح
رعد : لج هو بكيفي !!!هو لو بايدي جان ما اشترك بالحرب اصلا بس احنا مجبرين نفذ الاوامر
****
اليوم الثاني
رعد ودع امه وزوجته حبيبه كلبه فطم
والتحق بالوحده العسكريه
تحرك الفوج الى منطقه بالقرب من شط العرب
حفرنا المواضع وبقينا ننتظر الاوامر العليا لواجباتنا
مكان جديد منعرف المنطقه بس تحت قذائف العدو واغلب الهجومات تشترك بيها طيارات وقصف وزوارق بحريه ومشاة
الكل متوتر الكل متأهب منعرف باي لحظه تجينا قذيفة لو صاروخ يقضي على حياتنا
الوقت الثانيه عشر ليلا
تعبنا ونمنا
بسم الله الرحمن الرحيم
صحينا ع اصوات مدافع هاونات قاذفات طائرات
زوارق بحريه من كل الجوانب
الامر : وينكم شباب صعدوا بالزوارق بسرعه اخذوا اسلحتكم اريدكم تدمروهم وتحركون كل زوارقهم
رعد : صعدنا بالزوارق المنطقه جديده علينا منعرف اي منطقه تكون حدود مياهنا والوقت ليل وظلام دامس
بس هما كل فتره يشعلون مشاعل ضوئيه من خلالهه نشوف
الي كبالنا واحنا بدورنا منكدر نشعل اي اناره لان حايكشفون موقعنا
بس هما بالمشاعل يكدرون يشوفونا اذا صارت يمنا
كشفونا واشتغل الرمي
(الكلام من احد المقاتلين الي كان مع رعد )
جتي صواريخ علينا من اكثر من جهه تطشروا الجنود
الي شمر نفسه بالماي وكدر يسبح والي غرك والي رجع سباحه والي تآسر
تسجل رعد مفقود بهذه المعركه
وصل الخبر لام رعد وفاطمة
من القهر فقدت طفلها من الدك واللطم توفى الطفل ولدته بعمليه قيصريه بس ميت وتم دفنه
رجعت للبيت حزينه
ام رعد : ولج يمه شصار بينا وليدي راح وابنه اندفن
ولج فطم البيت تعزى خسرنا احباب الكلب
يمه اذا انت عايش ارجع وتعال
واذا متأسر كون تجي اخبارك يابعد كلبي
واذا ميت يبوووووو خل يجيبولي جنا زتك وليدي
خل ادفنك بكبر وازورك يمه
ولكم شنو مفقود !!!!
فاطمه : خالتي رعد مامات رعد بعده عايش
كلبي يكول عايش بكيفهم خل يسجلوا مفقود
بس بكلبي عايش
خيم الحزن في بيت ام رعد وزوجته فاطمه
ترقبوا البارت القادم
****بقلمي فردوس عبد اللطيف*****