#صراع_الزمن

خامس

#صراع_الزمن
بقلمي : فردوس عبد اللطيف
الخامس
معن : تعرفيني رونق اني مشايفج
رونق : منو ميعرف حضرة الضابط والوالده كل يوم تجي تحجيلنا عنك وعن اخبارك
معن : الله بس لا حجت شي مو زين عني
رونق : اي حجت عنك دكول تعاند 😊
معن : اي وبعد ؟
رونق : ترى ماحجت عنك الا الخير بس ردت اشوف ردة فعلك
معن : تدرين امي حقها تنعجب بيج انت انسانه رقيقه وحلوه واي شخص يشوفج ينعجب بيج
رونق : حضرة الملازم اخجلتم تواضعنا
معن : شلون مكضيه وقتج الوالده كالت كملتي سادس وماداومتي كليه
رونق : بصراحه الوالد مايقبل اداوم ومكضيتهه اقرى قصص وشعر
معن : اي نوع قصص تقرين ؟
رونق : احب القصص البوليسيه وحل لغز الجريمه
   احب قصة دليله والزئبق احب قصص نجيب محفوظ
اتابع مسلسل الهارب
معن : الله عالذوق والرقي ....جمال وثقافه تجتمع مع الرقه
رونق : ممكن استأذنك حضرة الملازم لازم اروح اقدم للنسوان لان صوت الملايه توقف
معن : تفضلي انستي اذا تسمحيلي اتعرف عليج اكثر
ممكن اتصل عليج وباي وقت ؟
رونق : اني اتصل افضل لان ماعرف شوكت تصير فرصه
معن : انتضر مكالمتج انستي استأذن
******
السنه /١٩٧٨/الشهر /اكتوبر
فلاح : يمه حضري بطاقات اصدقائي الضباط اهم شي اريدهم يجون لعرسي ونفرح سويه وحضري غرفه الخطار يباتون بيهه وخلي الولد يرتبولهم نومتهم ويخدموهم اخاف انشغل عنهم انت تابعي هالموضوع
ام فلاح : كلللللللوش عريس وربعه يزفونه يابعد امك مابقى غير ثلاث ايام ونزفكم وعلى عناد صبيحه
فلاح : موتتني صبيحه كلما اروح لبيتهم مدلغمه عبالك كاتل ابوهه شوكت اجيب سهى لبيتنا واخلص من صبيحه
ام فلاح : تالي تتبجبج تريد بتها ودكولك جيب بنتي اشوفها
فلاح : الا احرمها من بتها واخليها بحسرة شوفتهه مثل ما اذتني كل هالسنين عبالك كاتل ابوهه
ام فلاح : يمه غياره من يوم الي تزوجت ابوك وهي تغار مني وتسببلي مشاكل وتضحك بوجهي واني عبالي مو هي الي تنقل الحجي بس بعد عكبيش
المهم اخذنا بتها لبايه كلبها تلكيها كاعده تبجي على فراك بتها
فلاح : قابل وين رايحه بتها ... كولهه سفرة حانروح بالباخره
اربعة اشهر هو شهر عسل وشغل
ام فلاح : اخاف مرتك ماتتحمل السفر بالباخره وخضة الباخره
فلاح : شنو مصعدهه عربانه بابا هاي باخره ترسو بالبحر
بس من تصير امواج عاليه شويه تخضخض
ام فلاح : ليش ماتعوفها هنا خليها يمنا وروح
فلاح : انت صدك تحجين افارك حبيبتي سوسو يمه الفتره طويله مو يوم ويومين
ام فلاح : حقك يمه هوايه اربع اشهر بس من تفاركنا مو هواي اخخ منكم هيج صارت المره عزيزه
فلاح : ها بدينا نقارن بين الچنه والام
انت الاصل انت امي انت اول حب بحياتي منج تعلمنا ومنج تربينا ياشمعة البيت
ام فلاح : اي قشمرني بوستك لراسي اخخ منك فلوحي ابوالحب والغرام
بعد ثلاثه ايام
فلاح : هلا بالشباب نورتونا اليوم
سمير : اليوم اول عصفور من جماعتنا يدخل القفص الذهبي
هههههههه هههههههه هههههههه
صفاء : اي ادخل برجليك حبيبي لا وفرحان ولابس قاط ومخلي فيونكه واخر شياكه واناقه
امجد : حاتبدي التحقيقات فلاح وين رايح فلاح منين جاي
رعد : وبعد اخذني عالدكتوره واليوم ضايجه طلعني
عقيل : الي يسمع حجيكم يكول مراح تتزوجون
اشو رعودي عاشق ولهان وسمير ها ولك وين وصلت ويه حبيبتك ام الفوز
اني متأكد كل واحد منكم حايفكر يتزوج ويكون اسره
بس نعترف فلاح سبقنا ونفذ واحنا كولنا وراه
سعد : تذكرون ايام العزوبيه والدراسه شكد حلوه جانت
صفاء : شبسرعه خلصت ياريت نجتمع مره ثانيه
فلاح : اكيد نجتمع بالمناسبات بعدين طالما التلفونات الارضيه دخلت لبيوتنا مراح نبتعد
سمير : ترى جعنا وين العشا
فلاح : هذا جابوه طول عمرك مستعجل سموري
سمير : غير نريد نسويلك زفه حلوه وهلاهل اذا مامتعشين منكدر نركص ونهوسلك
صفاء : ههههه هسه فلاح يكول زفوني ماريد العشا زفوني
امجد : ترى محضريلك هوسات حلوه
بعد العشا
زفة العريس كللللللللوش
هاي الرادهه وهاي التمناها بت الشيخ لابن الشيخ جبناها
كلللللللوووووش جبناها واجت ويانا حتى فراشها ويانا
فلاح : مبروووك عليج اني حبيبتي سوسو
سهى : واكفه ومدنكه وجهه مغطى بالكليل ولازمه الشمعه وايدهه ترجف
اخذ الشمعات وطفاهن ورفع الغطا عن وجهه
اشبيج خايفه ياعمري مو هذه ليله العمر مثل مايكولون
سهى : ها عفيه فلاح مو تاذيني ترى كولشي ماعرف
فلاح : ههههههه اكو واحد ياذي روحه انت روحي وعمري
لهنا وكافي نعوف العرسان ياخذون راحتهم لو عاجبكم  تبقون يمهم  خطيه نعوفهم وباجر الصبح نشوف شصار 😉
******
امجد : وينكم فراس انسام
فتحوا الجنط وكل واحد يعرف هديته
احمد : جبت وصيتي ؟
امجد : طبعا حبيبي جبتلك مسجل بعد ما جاي للوطن العربي كوله صناعه ألماني
ام امجد : يمه اصبلك اكل اخاف جوعان
امجد : تعبان اريد اسبح
تن تن جرس باب البيت
انسام :مجودي حبيبي اخوي العزيز الحمد لله ع سلامتك
وين هديتي ؟
ام امجد : شوف ام لسان روحي بدلي وخلي نتغدى وبعدين
انسام : هم صدك اني وحدي انثى بالبيت اكيد شغلات نسائيه كلهن الي
اخوي مجودي اريدك بشغله
امجد : تدلل نسوم كولي
انسام : باجر معزومه بحفله مهر صديقتي وماما ماقبلت اروح لان الحفله مختلطه
امجد : واني شسوي ؟
انسام : انت اخوي حبيبي تجي وياي ونلزم ايد بايد وندخل عليهم خلي يشوفون اخوي الضابط
امجد : وين بيتهم صديقتج ؟
انسام : بالاعظميه حديقتهم كبيره ومسوين الحفله بيها
امجد : اذا ماتعبان افكر اروح وياج
انسام : فدوه اخوي الحلو نام وارتاح اليوم وباجر المغرب نروح يعني عندك وقت طويل للراحه
امجد : بس خليني انام وارتاح وصوت المسجل لاتعلي
انسام : اصلا مراح افتحه لخاطر اخوي الحلووووو
*****
اليوم الثاني مساءا
امجد : نسوم اكويلي هذا القميص اريد البسه ويه قاطي الكحلي
انسام : الله شكد حلو موديل جديد وبي تطريز بالياخه مبين من الخارج هسه صديقاتي يتخبلن عليك
امجد : لج اني احلي الملابس مو الملابس تحليني
انسام : صدك مجودي انت حلو وهيبه اكيد اليوم البنات حايتلوكلولي حتى اخطبلك  وحده منهن
امجد : ههههه قلبي ماخفق لسه ماشفت الي حركت مشاعري
شلونه الفستان الي جبته الج
انسام : اوووف يجنن موديل جديد وغريب وألوانه تجنن
تريكواز وبي ورد برتقالي شلون منسقين الموديل وجاي على جسمي من لبسته حسيت اني مختلفه
في الحفله
انسام : مساء الخير اشلونج سجى اقدملج اخوي امجد
سجى : اهلا وسهلا تفضلو صديقتج بعدهه بالصالون هسه تجي تشرفت بمعرفتك استاذ امجد
استريحو هنا
***
امجد : امجد : لج نسوم منو سجى ؟
انسام : سجى اخت العروس طالبه بالسادس اعدادي
امجد : بعدهه صغيره عبالي اكبر
انسام : هي خشنه تبين اكبر من عمرهه هسه تشوف اختها سراب العروسه اكبر منهه بس ناعمه الي يشوفهن عباله سجى اكبر مع ان الحقيقه العكس
جتي العروس خل اروح اسلم عليها
....
انسام : اليوم انت نجم الحفله البنات تخبلن عليك كلهن سألوني
اخوج متزوج مرتبط خطبيني لاخوج
امجد : هههههه اكولج هي مرتبطه مخطوبه ؟
انسام : منو بيهن تقصد
امجد : اقصد سجى
انسام : لا مخطوبه ولا مرتبطه كومه خطابه يجوهه بس متقبل دكول اريد اكمل
امجد : اي شكو بيهه خل تكمل
انسام : شوف ذيج ام الوردي بالكليه ويانا عدهه سياره وماتتحاجه اشو دا تباوعلك وتبتسم واليوم تتلوكلي
امجد : ماتفيدني هيج وحده
******
في البيت
انسام : شنو رايك بالحفله مجودي وصديقاتي شفتهن اشو اجن سلمن عليك وانت اندمجت وياهن
امجد : جاملتهم شي طبيعي بس مو بغير قصد ترى احنا مختلطين بهوايه نسوان والاختلاط والمجاملة عدنا شي طبيعي هاي بس بالمجتمعات المغلقة يصير تحسس
انسام : وسجى عجبتك ؟
امجد : مو دكولين تريد تكمل بعدين هالسنه سادس خليها تدرس خطيه
انسام : يبين ماعجبتك كولش
امجد : بعده الكلب ماتحرك هههه
باجر عندي سفره للبصره حضريلي شنطه ملابسي
انسام : يدلل اخوي الكابتن
امجد : حروح اسبح اريد شنطتي جاهزه لان حاطلع من الصبح ماريد اكعدكم
انسام : دقايق وكولشي يجهز
*****
امجد : هلو رعودي شخبارك بعدك ماخطبت بنت خالك
رعد : بعدني !!!!!! خلي تفض المشاكل ويه محسن
امجد : ان شاء الله تتزوجون وتصير سوالف
رعد : وانت ماخطبت ماحبيت بعدك طير الطاير يوميه موكر على عش
امجد : لك بابا شعندي خليني مرتاح من وجع الراس
هسه خلي نروح للدائره عندي اوراق تحتاج موافقات
رعد : خل نروح للاداره
امجد : صباح الخير
رعد : اشلونكم بنات شخباركم اقدملكم كابتن امجد
تفضل امجد اشبيك متبسمر ؟ الووو امجد
امجد : نعم كابتن
رعد : اقدملك الاخت هديل والاخت جميله
امجد : اهلا وسهلا
عندي مستحقات ماليه
جميله : هديل شوفي الكابتن اول شي جيبي اضبارته
هديل : تفضل استريح انطيني اسمك بالكامل واني اروح اجيبها
امجد : اخاف تتعبين اني اروح
هديل : لا ميصير لازم اني اخذهه باليد
*****
رعد : هاي اشبيك مجودي شو مو على بعضك انت تعرفها هديل اشو من شفتهه تخربطت أحوالك
امجد : تعال نكعد على شط العرب بالكازينو واحجيلك
رعد : هاي كعدنا احجي خويه احجي منين تعرف هديل
امجد : اذا اكولك حاتصدكني
رعد : دحجي ياخوي مو البنيه اعرفها مودبه وعاقله شنو السالفه
امجد : اني شايفهه بالحلم وكانها حبيبتي كانت لابسه ابيض
واني وياها كاعدين بحديقه حلوه والاشجار محمله ثمر
وهي دكولي اني ابقى وياك فتره بس غصبا علي راح اعوفك
مو بايدي
رعد : وانت شكتلهه ؟
لزمت ايدهه وبستها كتلهه ما اسمحلج تعوفيني
بعدين طارت وبقت ايد هه لازمهه وما اقبل اعوفها
رعد : زين شوكت هذا الحلم ؟
امجد : قبل يومين كنت راجع من حفله مهر صديقه اختي وعجبتني اخت العروس بس اشو بعدين ترددت
ومن نمت حلمت هذا الحلم سبحان الله
زين اشلون شفتها البنيه نفسها
واكو شي لاحظته
من احجي وياها كاني اعرفها من زمان عبالك مو اول مره احجي وياها
رعد : اشوفك ذبيت ميانه وياها وهي هم
امجد : اكول رعودي اريدك تسألي أصدقائك الي وياها بالدائره وبمنطقتهم تسال على اهلهه
رعد : كأني اشتم ريحه مشروع زواج ؟
امجد : تقريبا البنيه دخلت بعقلي وبكلبي بس بقى اسأل عليهم
رعد : انت شكد باقي بالبصره ؟
امجد : حابقى اسبوع
رعد : خوش لعد خلي نسال اثنينا واسمع بنفسك
كل الي اعرفه عن البنيه تعيين جديد خريجه اعداديه
هي اكبر اخواتها وتساعد اهلهه بالمعيشة بس بقت نسأل على اخلاقها
امجد : هسه وديني يم عقيل خل نشوف شسوى ويه البنيه الي يريد يخطبها
رعد : بابا هذا عصبي ويوميه مكسر اغراض بيتهم اذا تسال عليه البنيه ماعتقد توافق تتزوجه
امجد : خطيه ليش هيج تحجي بلكي من يتزوج يبطل عصبيه
رعد : ههههه بلكي المره تعقله
ام رعد : يمه رعد جيه صاحبك خير علينا
خالك وافق دزلي خبر وكال تعالوا فطم موافقه واحنا موافقين
رعد : صدك يمه خل ابوس راسج يا احلى ام بالدنيا واروح أبشر مجودي
مجودي صدك رجلك خضره علينا انت لاتسافر ابقى يمي
امجد : شكو شصاير اشو الكاع مشايلتك
رعد : خالي خابر موافقين وكال تعالو نتفق عالشكليات للزواج
امجد :الف مبروك خويه شكد تعذبتوا بس النهايه الحمد لله لصالحكم
رعد : معود موتني محسن لو اني غريب مينطيها خالي
امجد : شوكت ترحون ؟
رعد : انت ويانا بعد يوم الجمعه
امجد : لا خوي اني الخميس اسافر تعرف اهلي ماشبعت منهم بقيت يمهم كم يوم واجيت
رعد : هم حقك بس بالعرس تجي وكلكم تجون ما اقبل اي اعذار
امجد : انت رتبها بوقت كولنا موجودين ومحد بينا مسافر
رعد : هم هيج
خلي نروح على عقيل العصبي
*****
عقيل : هلا والله هاي منو جاي مجودي
شوكت جيت حبيبي اشلونك ؟ هذا الناقص رعودي ابد ميجي
رعد : على اساس انت مكطع طريق بيتنا
عقيل : ولكم باركولي خطبت
امجد : الف مبروووك منين خطبت ؟
عقيل : موظفه بالشركه وبعد سته اشهر نتزوج
رعد : عاد تعزمنا لو تسوي سكاتي ؟
عقيل : ليش يابه بايك بوكه اكيد راح اعزمكم كولكم والي مايجي لعرسي ماروح لعرسه
امجد : كولنا نجي احنا تعاهدنا نكون اخوه بكل الظروف الحلوه والمره وراح نبقى اخوه
******
رعد : مجودي شفت بعينك وسمعت باذانك هديل سمعتها طيبه واهلهه ناس خيرين شوكت تجيب اهلك تخطبها
امجد : قبل ما اجيب اهلي لازم اعرف رائيها أجيبهم من بغداد للبصره وتالي تطلع مرتبطه لو ترفضني
رعد : هاي سهله راح اكلف ست جميله تحجي وياها وتشوف رايها
امجد : ماشي انتظر منك الخبر
رعد : باجر اني اروح للدائره واحجي ويه جميله
*******
رعد : ست جميله تذكرين كابتن امجد الي اجه وياي قبل يومين ؟
جميله : اي تذكرته غير الي ساكن بغداد ؟
رعد : اي هو .... بصراحه يريد يخطب زميلتج هديل عجبته
من يوم الي شافها ويريد ياخذ رايها لان تعرفين اهله ببغداد
وجيتهم صعبه وتالي ترفض
شوفي رايها واهلهه ينطوهه لبغداد
وباجر اجي اشوف شجاوبتج
جميله : تدلل كابتن بصراحه البنيه حبابه وتستاهل كل خير وبعدهه جديده وحلوه ومبينه خام واهلهه محتاجين !!!!!
لهذا ماكملت كليه وتعينت حتى تساعد ابوهه لان اخواتها بعدهم صغار وهي تصرف بالبيت
رعد : ترى كابتن امجد ولد مثقف ويعتبر عريس لقطه على كوله المصريين وهيج فرص ماتجي مرتين بالنسبه الهه
هذه فرصه والولد اعرفه من ست سنوات خلق واخلاق
جميله : احجي وياها اليوم وباجر اردلك خبر
يتبع
****بقلمي فردوس عبد اللطيف*****