احياناً بتكون كل راحتنا بس في اننا نرفع ايدينا وندعي !
فكرة انو احنا مهما غلطنا ربنا بيسامحنا ، فكرة انو احنا مهما قصرنا ربنا دايما هيزيدنا من عطاؤو ، فكرة انو احنا مهما عملنا ربنا دايماً هيسمعنا ، مهما عرفنا ناس ، ومهما حبينا ناس ، ومهما ارتحنا مع ناس ، مش هنلاقي الراحة اللي فعلاً بندور عليها إلا فعلاقتنا مع ربنا ، ان انتا تدعي بكل حاجة نفسك فيها وعارف ومتأكد انك لو احسنت النية بجد وأيقنت إنو ربنا يقدر يساعدك وانو يقدر يغير حالك ووضعك ١٨٠ درجة ! هيساعدك ويفرح قلبك بأكتر من اللي طلبتو ..
الفكرة كلها إنو ربنا عايزنا نلجألو
عايزنا لما نضعف نتقوى بيه ..
لما نقع نسند عليه ..
لما نحتاج حد نرجعلو ..
لما نحتار في حاجة نستخيرو ..
لما نعوز حاجة نطلبها منو ..
لما يفيض بينا نشكيلو ..
لما نفرح نشكرو ..
ولما نزعل نحكيلو ..
لما نهرب من حاجة نلجألو ..
ربنا عايزنا نكون قريبين منو مش أكتر ..
عايزنا نحبو زي ما هوا بيحبنا ..
ويهمنا رضاه عنا زي ما بيهمنا رضا اللي بنحبهم عنا ..
ويهمنا كلامو زي ما بتهمنا حروف الناس الغالية علينا ..
كلنا عارفين الكلام ده ولسا بنقصر ..
وبنتفاجأ انو مجرد ما تحصل حاجة او مجرد ما نحتاج حد ربنا بكون هوا ملجأنا واحنا مش حاسين .. علطول بنلاقي نفسنا بنقول يارب يارب كذا ويارب مش كذا ..
الدعاء بيدينا أمل الأمل ده مبيجيش من فراغ ..
بيجي لما تكون متيقن انو ربنا بكلمة واحدة يقدر يغير حياتك ، يقدر يديك اللي نفسك فيه ، يقدر ياخد منك أي حاجة كمان ، بس هو عايز يشوف إذا هتقدر تصبر ولا لا ، هتتحمل ولا لا ، فهتتحمل وهتصبر لو فعلاً كنت متيقن من قدرة ربنا وحكمتو ..
تحملت وصبرت وكل يوم عن يوم ثقتك بربنا بتزيد ربنا هيديك ..
كنا دايماً بنقول ولسا بنقول إنو اللي قسموا لينا ربنا هو الخير ..
لو خسرنا فرصة كبيرة كانت بتعنيلنا كتير ..
لو خسرنا حد بنحبو وبنعزو اوي ..
لو حصلنا حاجة مكناش متوقعين إنها ممكن تحصل وحصلت وكسرتنا ..
لو بعد عنا شخص مكناش عايزينو نبعد ..
هنحس بغصة ، هنتضايق ، هنزعل وممكن تنزل دموعنا بس برضو هنقول في الآخر " خيرة "
بس مش معنى انو ده الخير انو خلاص اسيب الحياة تمشي وكل حاجة ربنا كاتبها خير وميكونش عندي طموح لأي حاجة ، ولا عايز أوصل لأي حاجة ..
لأن ربنا موصناش بالدعاء كدا وبس ..
الدعاء موجود عشان ربنا عايز يسمع صوتنا واحنا بندعيه ..
قادر انو يخلي الخير والأحسن في الحاجة اللي انتا عايزها وقادر يكتبلك الخير فحاجة تانية وقادر يأخرلك الخير عشان حاجة تالتة .. بس النقطة المشتركة بين دا كلو انو بالدعاء ! ربنا يقدر يغير قدرك اللي كاتبهولك فحاجة انتا عايزها ويكتبلك فيها الخير .. بالدعاء ! ربنا ممكن لو كاتبلك رزق يضاعفهولك بس لأنك لجأتلو .. ليه ؟ لأن ربنا بعد الأسماء التسعة والتسعين اللي عرفتنا ربنا ايه ! هوا ألطف حد بعبادو.
