الحياة غريبة جداً ، كل حاجة بقت غريبة ، مشاعرك ناحية الناس او مشاعرهم ناحيتك ، نظرتك للي حواليك او نظرتهم ليك ، عايز ايه ، متضايق من ايه ، تعبان ولا مش تعبان ، مبسوط ولا مش مبسوط ، مين بيحبك ومين العكس ، مين مهتم ومين لا ، مين عايزك ومين بيجاملك ، مفيش أي حاجة بقت واضحة أو مفهومة كل حاجة بدأت تبقى متعقدة أو يمكن كانت من زمان متعقدة بس كنا بنتجاهلها بس كل ما بنكبر كل ما اللي بنحسو بيبقى اعمق ووجعو اكبر وكل ما بنكبر بنفهم أكتر وكل ما بنكبر بنضعف من جوانا أكتر وبنبقى مش متحملين كلمة من أي حد ...
مشاعر كتيرة جداً بتيجي وبتوجعنا او بتاخد جزء كبير من تفكيرنا ومن طاقتنا .. كل اللي قادرين نعملو ان احنا نسكت عشان مش عارفين نعبر او نشتكي او حتى نعترض مش لاننا مش قادرين بس لاننا مش عارفين ولاننا مكسورين وحاسين بخذلان كبير من جوانا مانعنا ان احنا نتكلم ..
من المشاعر الكتيرة دي شعور انك تتجبر تختلط مع ناس مش زيك خالص أو خلينا نقول عكسك تماما سواء فقيمك او عاداتك او روتينك او حتى اسلوبك او اسلوب حياتك وعيشتك او مبادئك .. كل حاجة مختلفة .. ممكن الاختلاف ده يكوّن تجاذب ما بينكو وممكن على النقيض تماما يكوّن تنافر وكبير جدا ..
الاوحش بقا لما تلاقي شخص مختلف عنهم وتحس ان الشخص ده شبهك وتقرب منو وتحبو وتتبسط بيه اوي ، وتتبسط انك لقيت حد مختلف عن المحيط اللي انتا فيه ، شخص مستقل بنفسو وبأفكارو مش مجرد ما بينخرط مع حد بيبقى زيو ، شخص ليه شخصيتو المستقله ، ليه افكارو الخاصه ، ليه مبادءو وقيمو اللي بتخليه حتى لو الدنيا كلها ماشيه شمال هوا يمشي يمين وميتاثرش بحد عشان واثق من نفسو وعارف انو هوا اكبر من انو يتساق ورا الأغلبية ، فتقول بس خلاص كفايه يكون واحد مختلف .. وفي الاخر ! تلاقيه زيهم مش اكتر ...
وقتها قفلتك من الدنيا باللي فيها هتكون حاجة قليله جدا مقابل كل اللي انتا حاسس بيه ..
بنفضل نقوي نفسنا بنفسنا بس شعور ان احنا ملناش حد بيفضل مسيطر علينا ، شعور ان مفيش حد باقي علينا بيفضل مسيطر علينا برضو ، شعور ان انتا عايز تبعد عن اي حاجة وعن كل حد بيبقى هوا كل اللي شاغل بالك وتفكيرك .. وفي الآخر بتلاقي نفسك لوحدك .. ولو حاولت او حتى خطرت على بالك فكرة انك تغير اللي حواليك تبقى غبي او تتغير وتبقى زيهم تبقى غبي او حتى تمثل انك زيهم ومأيدهم بس عشان تكسب حبهم ويكون في حد حواليك ومتكنش لوحدك تبقى غبي برضو ..
الوحدة حاجة وحشة جداً وإحساس انك غريب واحساس انك لوحدك وكل المشاعر دي كلها صعبه وكلها مؤذية وكلها بتوجع أوي رغم اننا ساعات كتير بنلاقي ان وحدتنا بتكون مريحانا اوي... بس حقيقة ! الأذى الأكبر لنفسنا ان احنا نرجع نتأمل ان احنا نلاقي حد مختلف ونطلع من الـ Comfort Zone بتاعتنا فنندم ونرجع تاني ونقفل على نفسنا اكتر ونعيش فدوامة مليانة ياريت...
