اتقالي مرة ان اللي بيرفض الحق بيكون في ضلال واللي أنا مقتنعة بيه كويس جداً ان الضلال ده ابتلاء من ربنا .. بالنسبالي انا مؤمنة وهفضل مؤمنة دايماً ان الحق في الأحق منو وإن الصح في الأصح منو واللي يقول حاجة غير كدا هوا اللي في ضلال وضلال كبير جداً كمان .. كنت دايماً لما يحصل خلاف بيني وبين ماما بتيجي تقولي خدوهم بالصوت ليغلبوكو .. الجملة دي مع الوقت ولما كبرت عرفت معناها كويس جدا .. عرفت إن الناس اللي بتشكر فنفسها علطول واللي شايفة نفسها صح علطول واللي بتتفاخر بالعلم اللي عندها واللي المفروض يكون ده رزق وفضل من ربنا عليهم واللي بتمجد فنفسها قدام اللي رايح واللي جاي بقو بالنسبالي أكتر صنف من الناس مستحيل أكون باقية عليهم فحياتي حتى لو كانو أقربهم ليا ..
أنا وحدة ليا غلطات كتير جداً وليا زلات كتير بس لو هنيجي للحق مستحيل يجي يوم وأجي على نفسي فيه فحاجة أنا رافضاها أو مش مقتنعة بيها مش محتاجة سند من حد ولا محتاجة ظهر ورايا أهلي علموني والحياة علمتني والغربة علمتني إزاي أشيل نفسي كويس ، علمتني إزاي أمشي في الطريق اللي أنا شايفاه صح من غير ماتردد حتى لو الدنيا كلها ماشية بالعكس ، علمتني إزاي أمشي واثقة من نفسي مش خايفة لا من نظرة حد ولا من كلام حد ولا من سوء تفاهم من حد طالما أنا مغلطتش ، علمتني إن النصيب من ربنا وربنا عارف وكاتبلي الخير فمستحيل كلام أي حد عني أو عن شرفي يأثر لا على حاضري ولا مستقبلي ، علمتني إزاي أخد حقي كويس ، علمتني إزاي أختار الوقت المناسب اللي أرد فيه والوقت المناسب اللي يبقى من حقي أتكلم ، وعلمتني مخفش ..
مخفش لما أقول حاجة متأكدة إني صح ومليون فلمية فيها على زعل حد أو على خسارة حد أو أو أو ، علمتني كمان مخفش إني أتصرف بشخصيتي وبطبيعتي وبطبعي أنا .. رافضة تماماً مبدأ المسايرة وإني أرضي اللي قدامي على حساب رضايا ونفسي خصوصاً إذا كنت شايفاه غلط ، ورافضة تماما مبدأ إني أسكت على حجات مينسكتش عليها عشان خاطر العشرة أو المكانة أو الحجات اللي الكل عارفها ، واللي رافضاه أكتر إن حد يجي على حد عزيز عليا أو غالي عليا .. بالنسبالي مبكنش باقية على حد أو متمسكة بحد إلا وتكون ثقتي فيه كبيرة جدا للدرجة اللي تخليني مسمعش للدنيا كلها لو ذمت فيه وأكون متأكدة إنو صح .. بستحقر الناس اللي بتحاول توصل لمبتغاها وهدفها أياً كان إيه هوا بالتوقيع بين اتنين أو بتشويه سمعة حد حتى لو بكلمة بسيطة ، بستحقر جداً الناس اللي لما يوقعو أكون على قد ما أقدر جنبهم وفي الآخر ألاقيهم بتكلمو فضهري .. مش زعلانة من أي حد إنكسرت ثقتو فيا او اتهزت بسبب حاجة سمعها عني لأني متأكدة إنو ميعرفنيش كويس بس بالنسبة لحد إتكلم عني فضهري نتقابل يوم الحساب بقا لأني مش مسامحة مش هقول هدعي عليكو فكل صلاة والهري ده لأن الحق اللي أنا مقتنعة بيه إن ربنا مطلع على كل حاجة وحتى لو أنا مطلبتش حقي وسبتو ربنا مش هيسيبو .. ويقيني كلو بإني صح جاي من ثقتي فربنا وثقتي فحبو ليا إنو سخرلي الدنيا كلها وكتبلي إني أقرب بعد ما كنت على بعد أميال عشان أشوف وشوشكو الحقيقة .. مكتوبلي فقدري إن يكون إسمي يسرا من التيسير وواثقة إني مهما غلطت أو قصرت فحياتي سواء فحق نفسي أو فحق ربنا أو أهلي أو حتى صحابي ومعارفي إني مطلعتش من حياة حد وسبت ورايا بصمة وحشة ومتأكدة إني خسارة فأي حد جبرني إني أقطع علاقتي بيه بعد ما كنت بديلو قيمة بس الظاهر مجتش على مقاسو وهفضل كدا علطول .. هفضل دايماً أسمع كلام اللي بيتكلمو فضهري وأضحك عليه وعليهم لأنهم إدوني قيمة كبيرة جداً خلتهم شاغلين بالهم بيا طول الوقت وبيدورو ورايا .
