شعور بيخنق لما تكون مش فاهم أي حاجة من اللي بيحصل حواليك ..
متكنش فاهم حد ومتكنش قادر تعبر عن نفسك صح وبالتالي مش لاقي اللي يفهمك لأن اللي انتا حاسس بيه حاجة أكبر بكتير من إنك توصفها ..
ممكن يكون عندك ناس قريبة منك بترتاح لما تحكيلها بس مهما حصل بتلاقي مفيش حد بيفهم شعورك بنفس العمق اللي إنتا حاسس بيه ، هيحاول يفهمك لو بيحبك ويحس بيك ، بس هيفهمك ؟ لا حتى لو كان مجرب شعورك قبل كدا ، ليه ؟ لأن الناس بتختلف ، فطريقة تفكيرها ، فطريقة تعاملها مع المشاكل أو مع الحجات اللي شاغلة بالها ، او حتى مع الناس اللي بتتعامل معاها ونظرتهم ليهم ..
بنلاقي انو احنا فجأة بنبقى كتومين جداً ومش لاقيين حد يفهمنا ، بنبدأ نعزل نفسنا عن الكل ، بنكتفي بنفسنا ، بنبدأ نشوف حجات كانت قريبة منا أوي مكناش شايفينها ، او يمكن شفناها وتجاهلناها عشان كنا حاطين فأولوياتنا حجات تانية غيرها ..
بنتحول لأشخاص في قمة الضعف من جوانا ، وأي جملة بتئذينا وأي كلمة بتجرحنا ، هل لأننا فعلاً ضعاف ؟ أبدا ً ! بس لأننا خلصنا طاقتنا كلها في الكتمان لغاية ما تعودنا عليه ، ورغم كدا بنرجع وبنقنع نفسنا إنو إحنا جبال مبتهزناش ريح ، وبنضحك مع الكل وبنهزر ، وبنيجي فآخر اليوم بنضعف لحالنا تاني ، بنقع لحالنا تاني ، وبنفكر فمليون فكرة تاني ، وبتنزل دموعنا تاني ، وهما مصدقين إنو احنا كويسين ومفيش حاجة تقدر تهزنا .
