رجعتلها.. بيهه نفس مغمضه عينها.. مدري فاقده مدري نايمه.. رحت اركض لغرفه حنان دكيت الباب بسرعه.. حنان:خير.. شجايبتلي من مصيبه ؟ -فدوة امي راح تموت.. خابري هيثم خل يجي ياخذهه.. حنان:وين ياخذهه؟ كلمن ويومه.. كل شي مابيهه.. وحتى اذا ماتت .. قابل هي صغيره؟ لو تريد تاخذ من عمري بعد؟ كل جسمي رجف.. رجليه ترعش كوه مسيطره وواكفه احس ع غفله راح تنطوي رجلي واوكع... صرخت واني ارعش:امي دتموت.. حنان خلي نفسج بمكاني.. حنان:هسه ادك.. اخذت التلفون مالتهه من جوة الغرفه.. اجت للصاله واتصلت..فتحت مايك جاوبهه.. هيثم:ها حنان.. حنان:اكلك امك يمكن راح تموت.. وهاي اسيل خبصتني تريدك تجي تاخذ امك للمستشفى.. هيثم:كل شي مابيهه.. هسه تكوم ترجع جنها حصان هي وبناتهه.. يله عندي شغل.. لا تعطليني.. حنان:الله وياك.. الي سمعته خله شعر راسي يوكف.. ياناس هاي امي! يكول مابيهه شي وهي صايره جلد وعظم! حنان:هاا؟ سمعتي بعد! اني مالي علاقه مو هم نوب تكولين من وراج؟! -فيصل وين؟! فدوة خابري خل يجي! حنان:مااخابر هم يروح يفشلني! عفتها ورحت لامي.. اباوعلها.. شبيدي عليج.. ليش هيج صار بيج..وشذنبج أنتِ.. اوف يمه اوف.. كلت اجرب اروح لابويه.. بلكي الله ويرحم حالها ناخذهه لطبيب.. رحتله.. سلمت علي وسألني عن حالي.. اول مافتحت موضوع امي كب بوجهي وطردني.. صارت حسرة بكلبي كد هظيمتي وكسرة امي.. ارتكيت ع الحايط.. حيلي راح مني.. والدنيا ظلمت بوجهي.. كعدت بالكاع.. شبعت بجي ع امي.. امي تموت كدامي ومااكدر اسوي شي.. اصعب احساس.. مااكدر اقدم شي.. ولا اكو ناس توكفلي بشدتي.. بقيت ابجي برا.. مامنتبهه منو يمي ومنو اجه.. مااشوف اله فيصل جر ايدي وكفني ع حيلي.. كان عصبي بس من شافني ابجي بدل نظرته وكال:شبيج ولج؟ شكو؟! تجمعن كلهن بيه.. اريد اشكي واحجي واطلع كل شي بداخلي.. كمت اشهك واصيح امي امي.. فيصل:ولج شبيها؟! شوكت اجيتي؟ امي شبيها؟! اريد انطق مااكدر.. غصيت بالحجي.. بس اصيح امي امي.. عاط بيه حيل:ولج احجي وجع! -امييي.. امي دتموت فيصل.. امي مادري شبيهه.. جريته من ايده ودخلنا جوه.. -تعال شوفها.. امي راح تموت.. امي حتى وصتني وصية.. امي تدري بنفسها تريد تموت! فقدت ماادري بنفسي.. احجي بدون وعي وصلنا غرفه امي.. فيصل:شبيها؟ تخبلتي؟! نايمه ومابيها شي؟!!! -لالالا.. امي تريد تموت شوفها.. تعال قرب! شوف وجهه! اخذها للطبيب ! قرب منها.. باوع عليها وخله ايده ع راسهه.. كانت نايمه وذابه نفسها.. شويه وعت من لزمها فيصل.. باوعتله بتعب.. ضحكت ورجعت غمضت .. عبالك فاقده.. -فدوة اخذها! شوفها! ظلت يباوع بحيره.. نوب كال:يله حضريها.. راح اشغل السياره .. أنتِ هم تعالي وياهه.! طلعت فيصل.. كعدت امي كوه .. لبستها.. واني همين.. وطلعنا.. كوة لازمتها بيدي.. لا تحجي ولا تمشي ع طولهه.. وخفيفه مثل الريشه صايره.. وصلنا ع الطبيب متأخرين.. صارت دنيا مغرب.. وزين ولكينا طبيب.. دخلناهه.. بده يسألها الطبيب..شبيج حجية شنو الي يوجعج احجيلي! ظلت ساكته.. عاد مره ثانيه.. لزمت بطنهه ودنكت... فحصهه.. من ضغط بطنها صرخت اااخ.. سألها كم سوال.. عن ادرارها.. عن هواي شغلات.. وراها كبل كعد بمكانه وكتب ورقه لفيصل.. كله اخذها للمختبر وسونار.. اخذناهه ورحنا.. سوينا التحليل والسونار.. دنيا ظلمت ع ماطلعت النتيجة.. خفت.. اشوف الناس شي تركض وراجعه لبيوتها وشي عزلت محلاتهه واهل البسطات ماكو.. وبس احنا امنا بيدنا منتهيه.. رحنا بسرعه للعيادة علمود نلحك ع الطبيب.. صادفنه ستوه طالع من البنايه.. رفض يشوف التحاليل وكال باجر اني موجود جيبوها اشوفها.. توسل بي فيصل.. واني كل مااريد احجي كبل فيصل يكلي أنتِ اسكتي! عيوني غوركت وكوه لزمت نفسي.. تالي قبل يشوفهن.. دخل جوه .. ساحة الانتظار مال مرضى كانت فارغه.. كعدنا امي وكعدت بصفها.. قره التحاليل.. باوع لفيصل.. كله:وين جنتو عنها؟! امك عدها ورم.. وكبير هم! حسيت جسمي كله كز.. وعبالك جلدي انكمش.. فيصل:شنو؟ ورميش؟ ووين؟ كله:اي .. مبين بالسونار اكو ورم وكبير.. باجر جيبهه نتأكد اكثر .. ونشوف شلون نكدر نعالجها.. فيصل ضحك:كول غيرها دكتور! امي مابيهه شي قبل يومين تمشي وتشتغل عادي! كله:هذا امر الله.. مابيدنا شي وهاي التحاليل هيج تكول مو اني.. فيصل:دكتور منكدر نلحكه؟ انطه التحاليل لفيصل وبده يستعد يطلع:الله كريم.. باجر مرلي للعياده واشرحلك حالتها اكثر.. وشلون نكدر نعالجهه.. سلم ع فيصل ودار وجهه وراح.. عبالك مداحس بشي.. بس كلبي احسه مفجوع.. هي نايمه ع كتفي.. ومتدري بشي. اباوعلها واباوع لفيصل متعجبه.. طكت عيوني مكدرت اتحمل.. فيصل دنك راسه وكال يله خل نرجع.. سندناهه ورحنا ع السياره.. تسألني تكلي وين احنا .. وحجايتها تجر بيها جر.. مااكدر ارد واجاوبهه.. صار بيه غضب وحركه .. كل منج ياكوثر.. مرضتي امي ودمرتيني .. وبعد شدمرين بينا ماادري.. الله لايرحمج.. وعساج بنار جهنم حتى تضوكين اللوعات المرينا بيها من وراج.. اتمناج كدامي.. املخ بيدي ..املخ شعرج
واشلع من لحمج واذب.. وهم مايرتاح كلبي .. شايله عليها كد حسرتي وعذابي.. كد وجعه امي المحد عرفها .. يتبع...
