السابع و التفت الايد عليه وع بطني.. متت خوف ومااريد التفت اشوف منو.. كل ظني هاي روح كوثر هيج سوت بيه لانو احجي عليهه.. بقيت جامده بمكاني .. لااكدر ابجي ولا رجلي تحركت حتى راسي ثبت بمكانه.. سمعت صوت همس يم اذني.. مصدكت هذا صوت رجال.. لان كل ظني هاي روح كوثر ومقتنعه بهل شي.. مأمون :ليش طالعه؟ هم تردين تشردين؟! ذبيت نفس.. صح اخاف من مأمون بس مو مثل الروح مال الميت اخاف منه.. بعدت.. وحجيت ويا بغضب.. وانته شكو؟ مراقبني لو شنو؟ مأمون :اي غير بنت عمي واخاف عليج..! ادري بيج مخبله وع ساعه الساعه تشردين! -هي مره وحلفتلك مااسويهه بعد! ليش تظل تنگ ع راسي! مأمون :شبيج اعصابج! تره لمصلحتج والله! دنكت وسكتت.. تذكرت شلون كمشني من خصري وفززني.. رجعت باوعتله شفته مخلي ادي بجيابه ويباوع ع شجرة بعيده.. بعدين كال بصوت هادي :شلونها امج؟ -مادري.. داموت عليهه.. بس هي موزينه.. اي مو زينه! التفت الي.. :الله كريم.. كلمن ويومه اسيل لا تنقهرين.. -شلون ماانقهر واشوفها يوم عن يوم تروح من ايدي! ذب حسره وكال:اخ..شبيدي عليج يااسيل.. هم انظلمتي وياهم انتي.. درت وجهي .. لان حسيت ع لحظه راح انفجر ابجي.. منتظره احد يحاجيني وابجي .. بس مااريد اكون ضعيفه.. مأمون :تعالي كعدي.. ليل طويل وخلينا نسولف.. -لا.. امي وحدهه جوه ويجوز تكعد وتحتاجني.. مأمون :شوفيها وتعالي.. وبدربج سويلي جاي.. -صدك بالله؟ هسه هو وقت جاي؟ مأمون :اي يله اشتهيته هسه..ووياه جكاره اعدل راسي.. -راح اسويلك واروح لامي .. مأمون :لاارجعي.. اريد اسولف ضايج.. -استغفر الله اني بيا حال.. يله يله هسه اجي.. رحت شفت امي.. نايمه ووجهه باقي بس نكره مال عيونهه وخشم.. عفتهه ورحت للمطبخ.. سديت الباب الي رايح ع الصاله حتى لا يطلع صوت.. خدرت جاي .... خبال يمكن! اكو احد يشرب جاي بهل وقت.. كملته واخذت القوري كامل لان اعرفه استكان واحد ميكفي.. دورته ملكيته بنفس المكان.. عبالي راح نام.. كيفت كلت اي مالي خلك يسولف هسه.. درت وجهي داريد افوت سمعت طك اصبع .. شفته صاير ورا البيت.. تقريبا ورا جهه الحمام والصاله.. اخذت صينيتي ورحت.. اكو كان مثل الصبه عاليه ملزوكه بالحايط.. هاي اول مره اشوفهه لان اصلا مواصله هل مكان من انتقلنا ولهسه.. كعد عليهه.. خليت الصينيه بنص وكعدنا.. صبيت اله وقدمته.. ضحك وكال:اخوطه باصبعي حتى لا يطلع صوت ويزعجهم؟ -لا خوط ع كيف.. مو اله تسوي مثل استكان بابا يرن.. مأمون :ابوج كله ع بعضه يرن.. -ها شبيك ويا اليوم؟ مأمون :يغث بحجيه.. ويكسر خاطري من اريد اروح وميخليني.. -ها.. يعني هو يكلك ابقه هنا.. مأمون :اي.. ليش تردين اروح؟ لازم زاعج حضرتج وماادري.. -اووه والله الك خلك.. بس تريد تتعارك.. درت وجهي عنه... اباوع اشوف اضويه بعيده.. صوت سيارات بعيد.. نسمه هوى هبت خلت كل جسمي يكزبر.. رجفت.. وسرحت بعيد.. تخيلت نفسي بعيد عن هل مكان.. بنص المدينه.. بيت كبير وواسع ومأثث حلو.. اني الوحيده بي.. لا ام مريضه .. لا اخت مسوده وجوهنا.. لا اخوه يذلون بيه.. عندي خدم.. وهستوني داريد انام .. بفراش عالي وناعم .. غرفه واسعه وريحتها طيبه.. غمضت عيني واني داتخيل.. مأمون :هاا؟ وين وصلتي؟ -حتى بهاي لحكتني! متخلي واحد يرتاح شكد خبيث! مأمون :ههههه لازم تفكرين بي مو؟ باوعتله بغضب:وتالي؟ ترى انت تعرف ماعندي شي بس تريد تستفزني مو؟ مأمون :اي يمكن اقتنعت.. بس لا تعيديها! لان محد يصدكج بعد.. هزيت راسي بلا.. مدلي ايده وبيهه جكارته..:تردين؟ ماترددت.. كبل اخذتهه.. كنت انفخ وانفخ.. عبالي هيج تنشرب.. باوعلي وضحك ع كيف.. مأمون :ههههه لج مو نفخ! اخذي نفس بيهه.. طلع جكاره لخ ورثها وبده يشرب ويعلمني.. -والله لو يدري بابا.. مأمون :معليج اني موجود.. ابتسمت.. صدك اذا هو موجود عليش اشيل هم.. هو يحميني منهم.. خليت الجكاره.. وجريت نفس.. مادري شلون حسيت دخل لرئاتي.. اختنكت وردت اتقيء .. شمرت الجكاره .. احس وجهي راد يطك.. عيوني كامت تحركني ..النفس مالتي انكطع اله شويه.. لا اكدر اكح خاف احد يسمع صوتي برا وهنوب يعرفون مدخنه.. كبل طكيتها ركضه .. مااعرف وين بس اريد ابعد واكح واطلع الدخان الي صار بصدري.. اسمع خطوات مأمون ورايه.. بعدت عن البيت.. ذبيت نفس..كحيت وبنفس الوقت تقيأت.. احس الكاع كامت تفتر بيه.. مأمون :اسيل.. شبيج اسيل؟ اشرتله واني دايره وجهي اتقيء يروح.. اختفى صوته عني.. وبقيت بين اكح وبين احاول اتقيء اكثر لان كلش لعبت نفسي ومرتاحيت .. مشيت مسافه ..كعدت بالكاع.. بعد ماانتهيت بس كلبي ماوكف.. خليت اديه ع الكاع سندت نفسي ومددت رجليه كدامي.. اخذ نفس بس الهوى مكافيني.. مأمون :هاج مي.. اشربي.. اسيل.. شدتحسين؟ شربت المي.. شوي هديت.. بس احس الرئات مجرحه.. مأمون :ها؟ احسن؟ -اي.. مأمون :ولج شلون هيج صار بيج.. خوفيتني كلت راح تموت! لو ادري مانطيتج اياهه! -وانت متوازي تشرب هل سم! اخ يابه.. كوه داتنفس.. مأمون :لعد شكد بلعتي دخان! خبال هوه؟!
