احس وجهي كب نار.. اديه تتحرك واشتغل بس ممركزة.. كمل جكارته ورجع .. مأمون :اكدر اشوف امج؟ -اي.. مشيت خطوات وهو ورايه.. دخلته ع امي وطلعت.. امشي وافكر شلون ويه هاي المصيبه.. هسه يروح يحجي ويفضحني.. اني شلون منا عايزه هم وقهر.. صحت لحنان تشوف الاكل .. اطفي لو لا.. طفته ورجعت تسولف.. ماتشبع ولا تمل.. قبل وقت الغده اجه فلاح .. سلم عليه وراح فات يشوف امي.. صار وقت الغده ورجعو مأمون وفلاح يم الزلم .. صبينا الهم والنا.. وكلت امي .. نوب اكلت الي لكمة.. شويه وكالت امي اريد اروح للحمام.. كامت ع حيلها كوه.. وصلت الحمام واني وراهه امشي اخاف عليهه.. اسمعها ذبت الي اكلته.. ردت اموت عليها.. مايبقى اكل ابطنها ابد.. شلون راح تعيش ياربي.. صار الظهر وبعدهم يمنه.. نوب ام فلاح اجت بس تسولف ماحجت ويه امي بسالفه الطبيب ابد.. اجه فيصل كعد يمنا.. سولف هوايه.. وشوي شوي دخل بموضوع الطبيب.. حجه هوايه واني هم وحنان ومرت عمي.. كلنا حجينه وكوه قنعناهه تروح.. بس شرطت انه هاي اخر مره تروح.. دخلتهه حمام وسحبتهه.. جسمهه باقي جلد وعظم تخوف.. امرر ايدي ع جسمهه وبداخلي اكول يمه شوكت صار بيج هيج وليش ماحسيت عليج.. لا تذكرت.. امي ضعفت من قبل لا تموت كوثر.. بس مو لهدرجة هاي.. كانت من تشوف ابويه يديره ع الاخبار ويبقى صافن بالمذيعات لو مرات يطلع قناة غنوة ويشوف الي يتراكصن تضوج.. فكان كل ظنا اني وكوثر انها تضعف حتى تصير مثلهن.. واخذناهه هيج ونتشاقه بينه عليهم.. ومادريت بيهه ولا اشتكت ابد.. شكد شايله بكلبج يمه.. وشكد انوجعتي ومحد دره بيج.. اليف الها ع كيفي وهي كاعده ع طابوريه.. الحمام ظلمه وسنطه بس صوت المي ينزل بالطشت.. صبت دموعي واني بظهرهه.. مااريدهه تشوفني.. هي سكته متحجي.. كملت الها ولبستهه وطلعنا.. بسرعه مشطت شعرهه لان هو كصير كلش ومشذب ممتساوي .. ام فلاح طول مااني امشط بأمي تنتقد وتحجي.. مانطيها مجال تلهيني عن امي. لبستها وسويت نفسي مااسمع نصايحهه الفاشله.. كملنا واجه فيصل ووياه مأمون .. من شفتهم سوه رجف كلبي.. خاصه باوعلي بنظره صفح.. فيصل:ها جاهزين؟ -اي.. فيصل:شو ممبدله؟ منو يجي وياهه؟ ترى اني مااكدر وحدي! -ها. يعني اجي؟ فيصل عاط:اي يله شمنتظره! رحت غيرت ملابسي لان تنكعن ولبست فوكهن رداء.. لفيت شالي شلون ماكان.. امي هم جهزت.. حنان اختفت بغرفتهه وبقت مرت عمي هي بالبيت.. طلعنا اني وفيصل.. خليناهه بالسياره قبل لا نحرك مأمون صاح:اوكف اوكف.. خل اجي وياكم خاف تحتاجون شي.. فيصل:يله مو صار ساعه اكلك تعال! مأمون :يله اجيت.. صعد ليكدام يم فيصل.. بقو يسولفون هو وياه ع صديقهم وعنده سياره وبيهه طلابه وناس تتطلب ناس ومحلات ويوو.. كلشي مافهمت من سوالفهم.. امي شويه اشوف حالها احسن.. كاعده ع حيلها وتتفرج من الجامه.. ولحظات تركز بسوالفهم بس متحجي.. اتوقعها تسوي هيج حتى متخوف فيصل عليهه.. وصلنا للطبيب.. فيصل يريد يغير الطبيب بس مأمون قنعه.. اخذنا رقم وفيصل توسط يم ابو الباصات حتى ندخل من وقت لان امي شوي حالتها ماتسمح.. دخلنا ع الطبيب .. يمكن اخترع من شافنا اربع نفرات.. رجع انطاه التحاليل وقراهن ووضح النا الحاله.. الورم وحجمه ووين صاير.. كان صاير كبير تقريبا كد برتقاله وسط.. وصفه النا بيده.. وكان قريب ع البنكرياس.. اسمعه ودموعي تصب .. طلب نسوي سونار جديد مادري شنو سما.. وكتب ورقه كال تمرولي للمستشفى نسوي فحوصات كامله حتى اذا نكدر نشيل الورم.. واذا تأكد هو خبيث يبدي بالكيمياوي.. شنو الخيبه الي صارت بداخلي.. وشنو الوجع وشنو القهر.. لو ابقى احجي سنين ميكفي.. لازمه ايدهه ونمشي سوه ودموعي ماوكفت.. كل الي يشوفني بالشارع يبقى صافن عليه.. لحد مادنكت راسي خاف احد يشوفني.. سوينا السونار ورجعه فيصل اله وبقه هو ويا يحجي شويه وطلع.. كتب علاجات الها ع اساس تخفف لعبان نفس وتكدر تاكل.. راح فيصل يجيبهن واحنا رحنا للسياره.. مأمون :كافي اسيل عيونج راحت! سكتت محاجيته.. مالي خلك وروحي طالعه من الدنيا.. ياريت صدك تطلع روحي واخلص.. نوب بقيت افكر شلون راح نقنع امي تروح للمسشتفى.. وهي شارطه علينا هاي اخر روحه الها.. من رجع فيصل.. شفت اليأس والخيبه بعيونه.. يمكن اله شوي وتنزل دمعته.. حتى من صعد ماحجه شي.. مشينا مسافه وبس صوت الشفط مالتي بالسياره ودموع تصب.. امي نامت شويه واحسها فقدت.. كل شوي اترقب نفسهه.. اخاف ينكطع وماادري بيهه.. وصلنا البيت دنيا ليل.. هوسه وسيارات يم بيتنا.. كعدت امي ونزلنا.. من دخلنا كلها استقبلت امي.. ام سلام وبناتهه وجناينها وام فلاح ومرت فلاح ورواء.. البيت يغص ويبلع بشر.. اخذو امي للغرفه.. اني متحملت اكثر.. لازم اختفي منهم.. لازم اكعد وحدي واحاول اقتنع بالي يصير.. رحت للحمام.. قفلته وكعدت.. اصرخ والصرخه متكفي اطلع البداخلي.. يمه .. شحلاتها من اصيحج.. من ترحين المن اصيح.. بلا شعور مني كمت اضرب ع رجليه ودكيت ع وجهي.. فقدت كلش.. بعد مابيه اتماسك اكثر..
