الثامن + مأمون .... طلعنا من بيت عمي ورا الصلاة.. ماكنت ناوي اروح.. بس فيصل اصر .. وتذكرت اسيل.. مكدرت اعوفهه.. ماحد الها .. كلمن ملتهي بنفسه.. اخوانهه ومرت اخوهه.. وحتى اذا خليت رواء تجيهه.. اعرفهه انفه ما تسوي شي.. فكلت اروح وياهم.. احنا الولد وحد كلم سيارته ونسوان وحد.. سيارة كبيره..بس بالي يم اسيل اعرفهه مخبله.. واخر فترة هي شبه مجنونه.. لحد ماوصلنا دورتها بين الموجودين.. شفتها طلعت من نص النسوان.. تبجي وتمشي بسرعه متعرف وين تروح.. مقبره كبيره وهواي افرع وتضيع.. فيصل من شافهه راح عليهه مادري شنو حجه وياهه.. ووصه النسوان كلهم الزموهه ترى منا ونرجع.. لزمتها امي.. ومشينا قبلهن.. بس صوت اسيل وحده هو الي يوصلني.. تمشي وتصيح ولج يمه وينج .. اريد التفت مااكدر اشوفها .. صوتها كافي يملخ الكلب.. وصلنا ع قبر امها.. هجمت مثل الملهوفه.. حاضنه الكبر وتصرخ يمه طلعتي صدك ميته.. ليش عفتيني.. ويامن اكعد اني بعد.. يمه وحشه عليج ارجعي وياي.. النسوان يمهه يلزموهه ومكدرولهه.. ماخلت لا لطم لا تراب ماذبته ع نفسهه.. اخوانهه هم يبجون محد اله خلكها.. وصيت سماء بنت عمي تلزمها توخرها .. ماخلتهه.. كانت تبجي وتتحرك بقهر.. يحجون وياهه يردون محد كدر الها.. مااتحملت منظرها بودي اطفر اجرها من نصهم واطلعها من المقبره.. حاجيت فيصل ع صفحة وكلت اله استعجل نطلع منا اختك راح تموت نفسها.. هز راسه ورجع الها.. جرها جر كومهه.. بعدين كامت تصرخ دليني كوثر وينها خل اتفل ع كبرها دليني وينهاااا.. ماجاوبهه. مره ومرتين تعيد.. لحد ماانفجر بيهه كلها مو هنا دافنيها امشي.. مااقتنعت.. تمشي وتتلفت ادور اسم كوثر.. وهي فعلا مادفنوها هنا.. كانت اطراف المقبره كلش.. ومحد يعرف وين.. حتى ماخلو شاهد.. هيثم الوحيد الي يعرف وين مكانها بالضبط.. راد يصعدها بسياره النسوان.. كلت اله اكو مجال يمنا . سيارتنه فارغه خل تجي.. كنت جاي بسيارتي.. ومابيهه بس اني وفيصل ..والبقيه بسياره فلاح وسلام.. امي من سمعت اسيل راح تجي ويانه اصرت هي هم تجي.. كالت تعبت من كعده تكسر هناك.. خلاهه ليوره.. وكعد يمهه يهدي بيهه وهو خطيه هم متأثر مثلها.. مشيت بسرعه ردت بس اطلع من المقبره.. لان اسيل انتهت اله شوي.. اباوع الها بين لحظه والثانيه عيونهه تصب.. امي تسولف وبالي مو يمهه.. لان سوالفهه ابد مو وقتهه.. كملنا طريقنا حتى مازرنا.. وفيصل طلب هل شي.. وامي اكلت راسي ماخليتني ازور وحرمتني.. كلت الها:يوم اني كايلج تجين ويانه.. امي:لا اسفين عيني .. نزل امك هنا اذا تريد! فيصل:ماصار شي.. ارجع مأمون ميصير هيج.. مأمون :وين ارجع متشوف الازدحام.. ساعه منطلع.. يمه الله يخليج كافي.. شوفي البنيه انتهت وهسه يله سكتت دكافي! امي:اخ اخ.. شحجي وشكول.. اباوع لاسيل خلت راسهه ع كتف فيصل.. بين الطريق وبين اباوعلهه لكيتهه نايمه.. خلاهه فيصل ع رجله وغطاهه.. رموشهه متلازكه من كد الدموع وخشمها وجهه احمر من كد مادكت.. نص الطريق امي رادت تنزل.. ونزلنا.. غسلت وجبنا مي عصاير وحلويات.. واسيل ع نفس النومة..وفيصل بقى يمهه.. ومشينا مسافه وهم كالت امي اريد اكل ..هاي الحلويات تسلت الروح.. وهم وكفت يم مطعم جبت الها اكل واجيت.. كملت اكل وكالت اريد جاي... كلت :راح نوصل مابقى شي.. بلبيت اشربي.. امي:ها.. هيج .. خوش .. اني الربيت والتعبت والسهرت.. جاي ماتجيبلي.. سكتت منها. لان واضح الها مزاج تتعارك.. واحنا مو بوقت يسمح.. ظلت زعلانه لحد ماوصلنا.. وصلتها ع بيتنا وكملت طريقي ويه فيصل واسيل.. كعدت لازمه راسهه.. وكوه تفتح عينهه.. فيصل:ها؟ شبيج؟ اسيل:راسي.. راسي راح ينفجر.. فيصل:راح نوصل .. مشيت اسرع .. وصلنا ع بيتهم كان فارغ.. بس عمي كاعد بالاستقبال مالته وحده لان ماقبل يروح ويانه.. نزل فيصل وبقى ساند اسيل لحد مادخلنا جوه.. جاب براسيتول وانطانيا.. كال راح اسوي اكل ع السريع الها.. وبعدين تشربه دخلتهه للغرفه.. كوه شايله نفسهه.. خليتهه ع سرير.. نزعت جواريبها. لابسه مثل مال عجايز.. ونزعت عبايتهه وشال والحجاب الي لابسته مادري شكم طبقه.. خليت بس الحجاب الي جوه.. يصير نص.. ياعيني عليج.. كبرتي وانتي بعدج طفله.. كبرج الهم والحزن.. رجعت لزمت راسهه... -راسي موتني.. لزمت راسهه.. فركته باصابعي.. من يم كصتها والجوانب.. غمضت عينها وارتخت.. سمعت صوت فيصل جاي.. بعدت ايدي عنها ووخرت ع صفحة.. مهما يكون عيب كدام اخوهه.. فيصل:اسيل.. هاج هاي اللفه اكليها.. -ماريد.. فيصل:اكليها حتى انطيج براسيتول ويرتاح راسج.. كعدت ع حيلها.. اكلت شويه وعافت.. انطيناهه الحبايه وطلعنا.. فيصل:اول مره احس نفسي راح اخسرها.. ماتخيلتهه هيج.. -يول اختك هاي.. شلون ماتهتم بيهه.. رحنا يم عمي.. فيصل عافنه وراح يسبح.. اني هم تعبت وردت ادخل حمام.. رحت لبيتنا اخذ حمام واغير ملابسي.. اول مادخلت لاكتني امي.. امي:هاا! لو باقي هناك مو احسن! انت ابني او ابنهم؟ كمت مااعرفك والله! البارحة يمهم اول البارحة وكبلها..
