فتحت عيني حتى مالحكت اشوف منو اجاني راشدي.. وكعت للكاع.. رفعت راسي هذا فيصل.. فيصل:ادبسز وين موليه! كومي لا اطيح حظج هنا! مأمون من بعيد يصيح:فيصل اوكف! فيصل:المن جايه؟ والمن طلعتي من البيت هااا؟ كومي.. يله كومي.. جر ايدي جر.. كمت ويا وكام يسحول بيه.. شفت المسافه عن البيت كلش بعيده.. ماحسيت بيهه لمن مشيت.. صار مأمون بصف فيصل:شكو شصاير؟ فيصل:متشوفهه وين واصله؟ باوعلي مأمون .. وكانه يسألني(ردتي تشردين؟) خفت من نظرته..هزيتله راسي بتوسل لا.. فيصل:وين ردتي تولين هااا! خل يجي هيثم ويصير خير.. بس هو دواج! -رحت اشوف ذولاك الاطفال والله.. ! مادريت بنفسي شكد بعدت.. والله ماعندي شي.. اني مو كوثر ياناس اني مو كوثر.. دااحجي ومااحس اله الصفكه اجت ع حلكي..:لا تجيبين اسمها ! مأمون عاط:كافي! شبيكم متكلولي مخابيل! احس ملوحه صارت بحلكي.. وحراره نزلت عليه.. مسحت اجت ايدي متروسه دم.. 6 مأمون صوتها وهي تصيح ياناس اني مو كوثر يهز هز.. مااعرف شوكت مد ايده عليهه وضربهه.. بعدته عنها .. بقه يباوع الهه من بعيد وهو متخوصر ويهز براسه.. عبالك مسوي فد انجاز من ضربها.. دخلت للبيت واني وراهه.. احجي وياهه متحجي.. وكفت يم المغسله وكعدت تغسل .. المي ينزل احمر .. والدم موكف.. جبت منشفه.. لزمت ايدهه فريتهه عليه.. رفعت راسهه وخليته ع حلكها.. بقت رافعه راسهه وساكته.. -هسه يوكف الدم.. بعد دقايق وخرت المنشفه.. شفتهه مورمه.. عيونهه ذبلانه ووجهه تعبان.. اخ يل قهر.. نزلت شفتهه بيدي.. شفت اكو شك صاير بالداخل.. مضروبه شفتها من جوة ع الاسنان ومجروحه.. -هاي اكو جرح بسيط هنا.. شلت راسي.. لكيتهه عاكده حواجبهه وتباوعلي.. -ها؟ شبيج؟ دنكت وسكتت.. -احجي شبيج؟ اسيل:مابيه شي.. اريد انام.. -هسه؟ اسيل:اي.. اني اليوم اروح.. كم يوم وارجع.. حاولي لاتسوين شي وتحجين وتنرفزيهم.. خليج بحالج.. هزت راسهه.. دارت وجهه مني ودخلت الغرفه.. بلحظتها كرهت حتى نفسي.. مادري شنو الي صار.. شلون وليش وصلنا لهل حال.. بيت عمي حالتهم تقهر.. الام راحت ضحيه طيش بنتها.. الاب عازل نفسه كلش.. هيثم يطلع قهره باسيل.. فيصل منتقص من نفسه وهمين عزل روحه من الدنيا.. اما اسيل فهاي طامة كبرى.. شالت حمل غيرها وهي مالها ذنب.. اختنكت من بيتهم.. خليت وطلعت .. كبل لاهلي.. وصلت طالعه روحي.. صارت كبالي رواء.. اول مشفتهه اتذكرت كلام فيصل..باوعت الها حيل.. رواء:ها؟ عاش من شافك! -شلونج؟ رواء:زينه.. وانته؟ -تمام.. محتاجة شي؟ رواء:سلامتك.. -رواء.. ها؟ -اي شي يصير وياج كوليلي.. رواء:اي طبعا.. شعندي غيركم .. فركت شعرهه بيدي.. ضاجت من سويت الها هيج..بعدهه كامت تضحك.. رواء:وخررر.. خرب مو هسه مشطت! -يله رجعي مشطي..اكلج صدك شو امي ماكو؟ رواء:بالغرفه زعلانه عليك.. روح راضيهه.. -اهووو.. وتالي وياج يمه.. ديله خل اسبح واروح اشوفهه.. رواء:يله.. دخلت غرفتي.. تعبان مالي خلك.. من لاجارة اضحك واسولف.. حضرت ملابسي ودخلت اسبح.. مر الوقت بدون مااحس واني جوه المي.. بالي يم اسيل.. نوب اني من طلعت حتى مشفت فيصل وحجيت ويا.. خاف هذا يتخبل ويروح يحجي لهيثم.. اخ يا اسيل محد انكسر بكدج.. كملت وطلعت.. رحت لامي.. منين ماادير وجهي ادير مني.. -يمه.. شبيج حاجيني؟! امي:اي .. روح لبيت عمك .. بس هم سوالفهم تونس! -يمه هو منو يجي بغلاتج.. كلها هيج وعيونج.. امي:اي اضحك عليه اضحك! عبالك مااعرفك تقشمرني بحجايتين.. جبت راسي وخليته ع رجلها.. صفنت بعيونهه.. -يمه.. أنتِ عيوني .. خلت ايدهه ع كصتي.. سحبت شعري بيدهه:وانته هم عيوني .. بس لا تبعد عليه! اني احق بيك منهم.. -وهاي اني اجيت.. فتحت عيونهه حيل مثل ال تهدد:بس بعد لتروح وتبات! -الله كريم.. بقت تلعب بشعري وتسولفي ع اخواني.. نوب كالت:يمه شوكت افرح بيك؟ -ليش هسه أنتِ مفرحانه بيه؟ امي:هههههه نزول عليك! اقصد تزوج ماما.. -لا.. مااريد.. مو وقتهه .. امي:يمه الحي ابقى من الميت.. قابل شنسوي هذا امر الله.. واني اريد اشوف جهالك قبل لا اموت.. -يمه شجاج ع طاري الموت.. مو كافي الصار ابيت عمي؟! امي:هم رجعنا لبيت عمك.. دشوف روحك مستقبلك! حتى المجمع راح يخسر من وراك.. ابوك واخوتك مايلحكون علي وانت ظال بس بيت عمي وعمي! -ههههه ع كيفج بس لا تعصبين.. هسه اروح للمجمع واشوف.. امي:هسه شكلت ع موضوع الزواج؟ -كلت الج.. مو هسه.. امي:والله لاكيتلك ذيج المرة.. ماتتفوت .. مال وجمال واخلاق وثقافه.. كلهن بيهه.. وياخوفي تضيع من عدنا.. -ومنو هاي سعيده الحظ؟ امي:صديقه رواء.. يمه يمه لو تشوفهه.. -لا.. مااريد اشوفهه.. ولا تفتحين الموضوع بعد.. زواج مو هسه.. لمن يصفى مزاجي يله.. امي:اوووف منك.. يمه اخوك منتظرك تزوج وهو وراك! متكلي شوكت تفكنا عاد! -خل يتزوج قابل اني لازمه! امي:غير انت الكبير .. هو يكول ميصير اتزوج قبله.. وشوف انته شلون واكف بطريقه! يمه خطيه اخيك لخاطري وخاطره بس شوف البنيه وبعدين قرر .. -ياامي مااريد اتزوج.. لا تورطين البنيه ولاتحجين بيهه..
خل تشوف طريقها .. هسه متكليلي منين جبتي هل سالفه بالله! خليت وكمت من يمها.. لان صدك ضجت.. لحت عليه هوايه.. صاحت ورايه ازوجك ازوجك قابل وين تشرد.. رحت صبيت لنفسسي غدا..اكلت وطلعت للمجمع.. عدنا مجمع مال اجهزه كهربائيه وطابق اثاث منزلي.. بي اجهزه واغراض من كل الانواع والاشكال.. لازمينه اني واوس.. وفلاح مرات وره دوامه يجي بي.. ابويه همين يروح يكعد بي ويشوف الاجهزه واذا عدنه بضاعه هو يروح ويانه نجيبها .. وطبعا الوارد مال مجمع مقسمي بينا.. اكثر الوارد الي ول أوس.. لان متخرجين بس ممتعينين... اما فلاح .. متعين وعنده لوري مخلي بيهه سايق.. خاصه بس اله.. وصلت المجمع.. ابويه كاعد هناك.. سلم عليه من وره خشمه.. ورجع للبيت كال انت ابقى بعد.. ظليت افتر ... اصعد الطابق.. افتح الكناتير الي معروضه.. انزل جوه افتح ثلاجة.. لو اشغل بلازما.. مادري شلون خلص الوقت .. ساعات واني طاكه روحي.. كعدت ع كرسي وميز كبالي.. خليت العامل يجيبلي جاي.. فتحت اللاب واتصفح.. مااشوف بس هيثم وفيصل كبالي وجوهم مخطوفه ويتلفتون.. اول شي خطرلي انهم قتلو اسيل.. بس بعدين كلت اذا قتلوها شكو جايين.. هيثم:عمي وين؟ -بالبيت قبل شويه راح.. شكو؟ فيصل:كوم ويانه.. -شكو؟ احجولي! فيصل:بالسياره احجيلك ماكو وقت.. هيثم:يله نروح كبل مانرجع لعمي.. 5 يتبع..
