الجزء الاول ... كان يوم مميز.. غايبه من المدرسه.. عاجبني الجو كلش.. يوميه اروح للدوام واطير النومة الحلوة.. هل يوم بقيت بفراشي .. كعدت لل10.. مااعرف شعجب خلتني امي نايمه لهل وقت.. عدوها النوم المتأخر.. سواء سهر او كعدة.. كعدت فرحانة. ماكو دوام.. لسه اتمدد واطكطك بأديه بفراشي.. كمت صبحت ع امي.. كانت مشغولة .. تركض وتشتغل .. والمسعده مرت اخويه هيثم مخليه رجل ع رجل وتباوع ع مسلسل مصري.. شفتهه هيج.. عصبت.. امي كبيرة.. مو مال هيج شغل وركض.. وهاي مسفطه وكاعده.. الله اعلم شتسوي بأمي من نكون مموجودين اني واختي.. كملت ريوك وكمت اساعد امي.. امشي واذب حجي لحنان.. شلت العاب ابنهه وهوسته.. شمرتهن ع الدرج.. الي زادني غضب انها ممهتمه.. طلعت تلفونهه وكعدت تخابر.. حاولت الهي نفسي باي شي اتكفى الشر واسكت.. هيثم اذا عرف احد غاث مرته بعد هاي الالله يكتبها علينا.. رحت طلعت ملابسي مال مدرسة.. طبعا اكو غساله.. بس محد يستخدمها بس لاخواني ال2 وابويه.. اما اني وامي واختي بأدينا نغسل.. خليت الطشت وبديت اغسل ع كيف كيفي.. اصلا باجر جمعة.. لا امتحان لا شي.. ادندن ب ياطيبة. ياطيبة ياداوى العيانا.. اسمع عياط كلش قوي.. مصدكت اذني.. نعاد الصوت.. هاي امي دتصرخ.. رجليه كوه شالتني.. نشفت ايدي بثوبي ورحت اركض.. وصلت للمطبخ.. صفنت..عبالك مو حقيقي الي شفته! شلون وليش؟ اخويه هيثم شايل اختي كوثر.. شمرهه بالكاع.. صدرهه متروس دم.. وكعت من ايده جثه .. لا نفس ولا روح.. اريد اقرب واخاف.. مدداعرف شصاير؟! ابويه نار صاير.. رفسها ابطنها وراد يكطعها وهي منعرف اذا صدك ماتت لو بعدها! امي تصرخ ومكابلته وادك ع وجهه.. اخويه فيصل دخل للبيت.. مفجوع مرت هيثم هم تباوع بوجهي وعيونه تسأل شكو شبيهه كوثر ومنو سوه بيهه هيج.. كانت لابسه جبة لونها رصاصي.. اكو زروف من صدرها.. مااعرفت هاي مال شنو.. بس اشوف الدم نابع من هل مكان ومنتشر ع كل بطنها.. بقيت صافنه ومامنتبهه لليمي.. اريد افسر الي صار! مااشوف اله ابويه نزل ع امي دك ضرب.. شنو الي اجه بيده ضربهه بي.. شال الطاوة وركعهه ع راسهه اكثر من مره.. عبالك اني انشليت.. مااكدر اسوي شي.. ولا اكدر اصرخ.. اشوف حنان ادخلت وتريد تبعد ابويه عن امي.. استلمها هي الثانيه دك.. زين شكو.. شصاير.. ومااحس نفسي اله صرت بينهن.. والدك علينا صار بفلس.. ابويه يضرب ويكفر ويغلط.. -ولج تربيتج هاي! ولج صخمتي وجهي الله يصخم وجهج.. ماصرت اعرف منو الي ديضرب.. تكومنا بنصهم.. والضرب اكثر من ايد تنمد علينا.. اسمع ناس دخلت للبيت.. جرونا جر من بين اديهم.. شمرونه بغرفه امي وانقفل الباب علينا.. صوت وصياح بره! ابويه يسب ويغلط ونوب يرجع يكول غسلت عاري بيدي.. كابلت امي وكمت ادك ع وجهي.. -يمه احجي شكو! يمه شبيهه كوثر يمه من سوه بيهه هيج! اباوع لامي كل خرطة بخدها تعوف الدم ينبع.. ماتحجي بس تخرط بوجهه.. -وج يمه احجييييي! شصاير؟ شبيهه كوثر جاوبني! حنان تشهك وتبجي.. وجهه احمر من الضرب وشعرهه منفوش.. وكفت كبالي وعاطت:اختج الله اعلم شمسويه! الله لا يرضى عليج انتي وبناتج! الله لا يوفقجن.. اباوع لامي انتهت.. بس تملخ بروحها.. لزمتها من اديها اثنينهن.. -كافي اروحلج فدوة.. دفعتني.. ماتخيلت امي بهل قوة.. دفعتني وكعت للكاع.. تخبلت واله شوي انجنيت.. بس عياط وصراخ وهوسه برا مال زلم.. منظر كوثر مايروح من عيني.. شبيج ياكوثر.. الصبح رحتي شحلاتج.. لبستي وضحكتي .. كنت اباوعلهه مسويه نفسي نايمه.. اشوفهه هيج وارجع اغمض عيني فرحانه.. كعدت ع صفحة.. خليت راسي بين رجليه.. محد يجاوبني .. امي كطعت روحهه.. لا بقى شعر براسهه ولا وجه سالم.. حنان تروح وترجع داخل الغرفه وتدعي علينا احنا وامي.. اله شوي اكوم اكطعها.. انفتح الباب.. ودخلن جارات امي كومنها.. اني ع صفحة وبس اباوع ماعرفت شكو.. رحت ورا امي.. كعدنهه بالصاله.. لمن شعرهه وذبن الشيله عليهه.. وهي مستمره بس تريد تكطع روحهه.. بقيت اباوع وابجي.. وحده من الجارات كالت:الله يغفر الهه.. كافي ياام هيثم كافي.. تجاوبهه امي وادك ع وجهه:فضحتني.. يمه طينت راسي.. يمه منين هذا العمل بيج هيج.. منيييييين! اسمع اثنين يتهامسن.. مايدرن بيه اني وراهن.. تكلها:ادري ماحسو بيهه ماشافوهه ! نوب حامل 3 اشهر؟! ترد عليهه:والله حرامات ذيج الزلم هيج ينحط راسهم بالكاع من وره هيج وحده استغفر الله استغفر الله! كوثر حامل؟ منين؟ ولكم شنو الي ديصير! كوثر شلون تسويهه! وشلون عرفو بيهه حامل.. كرصت نفسي.. اريد اطلع بحلم.. مااريد السمعته يطلع صدك... بس لا .. هذا صار.. نسوان شي تبجي ويه امي وشي تتهامس.. اجو نسوان بيت عمي.. كابلن امي ودك لطم.. اشوفهن وازيد بجي ومااعرف شسوي.. حتى محد شايفني اصلا بنص هاي الهوسه.. خفت اتحرك خطوات.. خفت امشي شويه ويصير كبال عيني الدم مال كوثر.. اعرف هم اخذوهه لان مابقى واحد من الزلم بالبيت.. بس زلم غربة بالطرمه..
