•• الحلقة الخامسة ••
#انقلاب…
روايات هدوشة…
بدت لجين تمشي هيا و رجاء و مرت عمها "ام رجاء" للمحلات و يرفع فيهم رمزي لن جي يوم الاحد و كملت لجين كللل شي ناقص…
قررو خوال لجين انهم يديرو العرس عندهم في صبراته بحكم ان العريس منهم و بدو يجوهم عرب لجين من طرابلس يباتو و نصبو الخيمة من يوم الاتنين لانها زحمت عليهم هلباا…
جي يوم التلاتاء (يوم الحمام) ناضت لجين لقت بناويت عمها و عماتها كلهم يستنو فاها امتا تنوض ، كلهم جنبها فرحت مع انها مضايقة علي طوول ضمّت راما "بنت عمتها" وبدت تبكي هيا وياها…
راما: خلاص يا قلبي اني جنبك لاخر يوم مش رح نسييبك ابدا والله 😭
لجين: ااااااه راما …يا حليلي قاعدة مش مستوعبة و ربيييي 😭
خشت عليهم رجاء و ايداها في نصها: شني يا ماما انتي و ياها حني في فرح مش في عزي هيا هيا ، وقت عالحمام وانتو دراما عالصبح 😑
البنات ضحكو…
لجين و راما: 🥺🥺
رفعت لجين الردي البودري و كل شي و مشت ركبت مع رجاء لانها تسوق و عندها سيارة و ركبت معاها راما بس في الكرسي التالاني ماخلت واحد يمشي مع العروسة في نفس السيارة هالراما 😂😂 …
ومشو سيارة وحدة و باص اجره خال لجين الصغير "طبعن اسمه خليفة" على خاطر البنات و دارو جو مش عاادي في الطريق دربوكة و غني و هياجة ، الكل فرحان الااا لجين لي عرسها وكأن مش عرسها كأنها جنازتها …
وصلو للحمام كملو شغلهم و روحو ، وصلو للحوش نزلت لجين وكانت طالعة فالبودري تجنن و هيا بيضة و قصيرة و معبية شوية طالع علاها خيال ، دخلت اللخيمة و البنات وراها يغنو و يدربكو قالبين الدنيا…
ريم (بنت عم لجين و اخت رجاء): لبس البودري محلاه كل بنية تتمناه 👏👏…
مودة (بنت خال لجين): لبس البودري و الحنة ربي ما يحرمنا منه 👏👏…
قصت عليهم راما: لجين راهي غاليا…كيف ذهب ايطاليا 😌👏👏…
وجت ام لجين (سوسن) سلمت علي بنتها بالاحضان و الدموع تنزل و صايرة فيها حاالة…
سوسن: ربي يتمملك علي الخير بنيتي 😭
لجين: سامحيني يما كان قصرت معاك 😭
الناس تأثرو من ام لجين لانها بنيتها الوحيدة ومن ناحية بوها … 💔
مشي اليووم كله علي خير …في الليل راقدة لجين جمبها راما و يهدرزو و راما تحكي ل لجين كيف لابسة هديكا و شن دارت هديكا و شفتي فلانة و شن قالت … تقطع غير فعباد ربي 😂………لن قصت عليهم رسالة من رمزي … لي لجين…
أنت تقرأ
روايـة إنقـلاب
Mystery / Thrillerأوّل رواياتي ، واللي كانت بداية مشواري الكتابي في الـ2019 💜.
