وجعتي

١٢

محمود وقف على حيلو وقال لي انتي بت عمتو؟؟
عشان كدا كنتي عايزه تشلبيهو من شهد صح؟
قمتا قلتا ليهو (بحده)محمود خليني اتم ليك اقعد..
قام قعد،،قلتا ليهو شهد لو طلعت حامل منو م ح يطلقا لانو اول شي ح تكون ام ولدو ولو طلقا ح تأثر على نفسيه الطفل ويبقى مشتت بين امو وابو،،وغير كدا الطفل دا ح يذكرو بي اسعد وح يتمسّك بيهو قوي،،وم ح يهمو رأي زول وحتى ولو شهد بتكرهو ولا هو بكره شهد،،
محمود قال لي طيب سؤال  كاميرات المراقبة دي الختاها منو؟ لانو واضح انو مهند م كان عارف بيها ولا مها عارفه ،،لانو لو عارفه كانت عملت حسابها م تنكشف،،
قلتا ليهو اصلا البيت دا ورثه،،اداهو جد مهند ليهو،،وجدو كان ضابط وكان عندو حرصين ف البوابه وعندو خدم،،
ف قبل كدا واحد من الخدم سرق منو 3 مليار وهو م عرف دا ياتو واحد فيهم لانو ماف دليل وماف شاهد على السرقه،،وبالقروش الاتسرقت دي خسر حاجات كتيره،،عشان كدا جاب كاميرات مراقبة عشان يراقبهم،،ولمن مهند استلم البيت كان معظم الكاميرات مافيشه لانو مهند قال م عايز خدم ولا اي زول ف البيت غير مرتو وولدو،،
ف الكاميرات اتشالت بس م كلها،،ومهند كان قايل انو كلها اتشالت،،لكن ف بعضهم قاعدات لاهسى،،وعشان حظ مها الزفت عملت جريمتها محل الكاميرا الفضلت وانكشف المستور،،
محمود قال لي طيب انتي جبيل  قلتي لي شهد دي رميتوها ف الجحيم دا لي؟؟ كان قصدك شنو؟؟ وانتي لي كنتي بتحاولي تتقربي من مهند ممكن تشرحي لي؟،،
قمتا اخدت نفس عمييق..قلتا ليهو طيب اسمع..

شهد دي زماااان لمن كنا ف الثانوي كان حبت ليها واحد،،وكان على م اتذكر اسمو هيثم،،حبتو شديييد،،بس هو كان بلعب بيها،،ولمن شهد اكتشفت الحاجه دي كنا ف اخر سنه ف الجامعه وكمان جاها  انهيار عصبي،،تتذكر زمان يوم ضربت ليك وقلت ليك شهد وقعت واحنا ف المستشفى؟ولمن سالتني مالا قلتا ليك اتذكرت خالها المات وجاها انهيار عصبي،،قمتا صدقتني طوالي لانو كانت متعلقه بي خالها شديد،،
بس هي كانت بتعاني ف الصدمه الدخلتها بسبب هيثم وعذاب الحب دا ،،اكتشفت انو الزول الوحيد االحبتو طلع بلعب بيها،،ولمن خرجوها حالتها النفسيه كانت كعبه وانتو كلكم كنتو قايلين انها اتذكرت خالها ،،

ومع مرور الأيام شهد بقت تنسى،،لحد م ف يوم جيتها وقلتا ليها بهزار،،هيثم دا جننا والله ناوي يقتلك لينا ولا شنو؟ قامت قالت لي هيثم منو؟ قلتا ليها كان حبيب القلب،، هسى بقى هيثم منو؟،،قالت لي م بعرف لي زول بالاسم دا ولا انا حصل دخلتا ف علاقه ولا غيرو،،قمتا ضحكتا وقلتا ليها م تكابري ي شهد،،قالت لي بكل برود م بكابر بس دي الحقيقه..
انا م حصل دخلتا ف علاقه ولا بعرف لي زول اسمو هيثم،،
ومن اليوم داك اي زول يسأل شهد حصل ارتبطي بتقول ليهو لا،،ولمن سالتها لي بتكذب قالت لي الارتباط دا ف فهمي انو انا اكون مرتبطه بي رااااجل فعلا م شبه راجل،،ولو حصلت بينا ظروف وافترقنا  يظل زي م هو راجل،،كدا انا ممكن اقول للناس انا ارتبطا بس ماف نصيب☺💔،اما لمن يكون بلعب بي تفتكري ح احسبو مع الرجال؟،،عشان كدا انا اصلا كنت بحب ف الفاضي و علاقتي معاهو مبنيه ف الفاضي ،،وفاضي مع فاضي م بديني شي عشان كدا انا معتبره روحي من الاساس م حبيت،،بس انا م حارق روحي الا انا مرتبطه بيهو من كنا ف تالت ثانوي لحد اخر سنه لي ف الجامعه وي داب اكتشفتا الحقيقه بس الله كريم☺💔قمتا سكتا خليتها..