حلقة سمك

🙈 الفصل الثالث 🙈

الفصل الثالث :

في غرفة صغيرة بأثاث بسيط يشوبه القدم صدح صوت الهاتف الصغير فتململ طاهر في فراشه قبل أن يجذبه من أعلى وسادته ويرى المتصل، تنهد وفرك عينيه بوخم الا يزال الوقت مبكرًا قليلًا على مكالمة شقيقته الكبري المتوقعة .. فكر بضيق قبل ان يجيب:
-صباح الخير يا دليله !
-صباح الفل على سيد الرجالة ، عامل ايه واد يا طاهر ؟
ضحك وهو يعتدل في فرشته وتثاءت وهو يجيب :
-الحمدلله سيد الرجالة الواد طاهر كويس وانتي وعيالك؟
-بخير طول ما انت بخير يا حبيبي اللمض، ايه مش ناوي تيجي شويه البنات عايزين خالهم.
فرك طاهر وجهه في محاولة للاستفاقة بشكل كامل وقال ممازحًا:
-عايزين خالو ولا طمعانين في خالو !
علت ضحكة شقيقته لتقول :
-طمعانين طبعًا ومستنينك تشور وتجوز زي ماعملت مع امهم واخواتك الاتنين ولا هي سايبه يا طاهر بيه!
ضحك بخفه ليقول:
-المهم انتي عامله ايه مع جوزك واخواتك عاملين ايه ؟
-كلنا تمام وبخير ومش ناقصنا غير فرحتنا بيك !
ارتفع حاجبه ليقول متسائلا:
-تفرحوا بيا ، اشمعمى ؟
-الله انت مش عايز تتجوز واحدة تهننك وتدلعك ، مش أحسن ماترجع مبلول وعريان بعد نص الليل !
غلب على حديثها التهكم وانهت جملتها الاخيرة بعتاب.
فحرك طاهر رأسه وهو يبتسم بغيط من تلك الجارة الثرثارة المزعجة ليجيب بهدوء:
-حبيت انزل البحر شويه بعد تعب الشغل، ايه المشكله ولا انا بنت المفروض اتحاسب ؟
جاءت الاجابة سريعة من شقيقته :
-وانا اقدر يا حبيبي انا بس خايفة عليك والصراحة انا والبنات شايفين ان اولى الفلوس اللي هتتقبض من الجمعية دي تتجوز بيها وبلاش المحل دلوقتي !
-بصي يا دليله لو فاكرين اني عشان قبلت الفلوس بتاعت الجمعية دي اني همشي ورا كلامكم تبقوا غلطانين ثم ان المحل هيقدرني ارجع الفلوس دي تاني ليكم !
-يوة اخس عليك يا طاهر ، فلوس ايه ياواد اللي ترجعها دي ولا حاجه من شحطتك علينا انا واخواتك لحد ما شورتنا وجوزتنا واحده واحده رغم انك اصغرنا ، الفلوس دي ولا حاجه يا طاهر وانا واخواتك لما عملنا الجمعية دي عملناها من اللي فاض منا يعني مش مأثره فينا في حاجه وده حقك علينا لو حسبت اللي غرمته علينا هتعرف ان الفلوس دي نقطه ف بحر ، احنا بنقولك كده مش بنتحكم فيك لا سمح الله احنا خايفين عليك يا واد وانت قمر وفيك الطمع كده.
قفز من فراشه بنشاط فقد انعشته كلماتها الصادقة وأسعدت قلبه ثم قال بنبرة ساخرة ومراوغة:
-ايوة صح لازم تفرحوا بيا وتستوني زي ما كنتوا بتعملوا فيا زمان يا ولوود ال .. ولا بلاش الله يرحمهم !
خرجت ضحكة دليله الرنانه وهي تمازحه بمكر:
-لا لا اخس عليك ده انت قلبك اسود مكنوش توكتين وشويه مانكير بنحطهملك وانت نونو وبعدين ما انت بقيت شحط اهوه وبتطلعه على قفانا واحنا ساكتين !
هز طاهر رأسه بابتسامه صادقة لينهي المكالمة بقوله :
-شوية مجانين كنت عايش معاهم ، ربنا يعين جوازكم عليكم ، يلا يا ستي اتفضلي روحي شوفي عيالك وسبيني اشوف اكل عيشي !