غدوة الصباح عطاني بابا الدراهم وقالي روحي باش تشري جهازك مع يماك
خرجت مع ماما وشريت شحال من حاجة بيجامات وملابس داخلية وحوايج دار وشريت فاليزات باش نحط فيهم الحوايج وروحنا وحسيت بلي علاقتي بوالديا بدات ترجع كيما كانت بصح خويا والو كي نكون في الدار يخرج حتان نرقد😞
رحت لشمبرتي دوشت وبديت نقيس في الحوايج ونشطح وزينو عيطلي قالي راه يشري في الأثاث للدار قالي حاب كلش على ذوقي😂،،
زدت غدوة خرجت وجبت حوايج للتصديرة وجبت مكياج بالأنواع زعمة عروس😑😂 وفالليل راجعت الدروس لي فاتوني وكل يوم أحلام تجيبلي الدروس لي زادوهم...
فاتو 15 يوم وكنت كل يوم نخرج ونشوف وش ناقصني ونجيبو وزينو كمل الأثاث تاع الفيلا،
واليوم هو نهار الحنة تاعي قلت نديرها غير بين لافامي وصحباتي في الدار،، لحقت لعشية لبست روبة بلونوي(ازرق غامق) مع طالون بلونوي ودرت شوي اكسسوارات خفاف وشعري طلقتو ودرت تاج ومكياج خفيف وقعدت نستنى في الزوار😂،
جاو خالاتي وبناتهم وجيرانا وعماتي وصحباتي دخلو كامل بالزغاريت وانا بصفتي حاطة روحي عايشة فاسطنبول حبيت ندير الاغنية ذيك تاع الحنة لي يديروها فتركيا😂 داروها وهبطت ودارولي الغطا الاحمر ذاك فوث راسي ورماو عليا الحلوى ودارو بيا وحناولي وغناولي وانا في عوض ما نبكي وليت نضحك كي المهبولة😂 كي كملنا تصورنا وبقينا نحكيو ونقصرو منبعد روحو وانا طلعت لشمبرتي بدلت حوايجي وحكيت لزينو واش درنا كامل وهو غير يسمع ويضحك وطاير بالفرحة😍
عرسي بعد غدوة فرحانة وخايفة أكيد😳 مع زينو واعر وعريض😂
.
وأكيد الحاجة لي تكون خايف منها تجي فدقيقة ايوااه اليوم عرسي😁😂
نوضتني ماما الصباح
فتيحة: نوضي يا العروسة تاعنا نوضي
شناز: وشمن عروسة ذي..
اااا اليوم عرسي
نضت نجري ديراكت للدوش دوشت وسشورت شعري ووصلني بابا لعند الحفافة رحت مع بنت خالتي وصحبتي وماما راحت للاصال مع خالاتي وعماتي باش يوجدو
وصلت للحفافة قتلها ديريلي بابيليز مش نحوس على حاجة كبيرة ولبست لاغوب بلونش شراهالي زينو كبيييرة😂 ودارتلي مكياج عرايس مش نشكر في روحي بصح جيت نهبل😂 جا بابا داني وخرجوني البنات بالزغاريت وصلت للدار لقيت ماما وجدتلي الغدا تغديت مع البنات وقعدنا نقصرو شوي هك جات ماما مع خالاتي وعماتي بويسك قريب الكورتاج قعدنا نحكيو ويوصيو فيا وش ندير والخرطي ذاك😂
حتى سمعنا صوت الطونوبيلات يصونيو في نفس الوقت عيطلي زينو
زينو: ألو مرتي اهبطي
شناز: درتلي وش قتلك؟
زينو: ياك قتلك نديرلك وش تحبي هيا اهبطي
شناز: عطيتو شرط واحد قتلو حابة نعقد قدام لابيسين بويسك لاصال فيها لابيسين وقتلو يقوللنا ذاك لي يعقد هل تقبلين وهل تقبل😂
هبطت ولافامي كامل يزغرتو وخرجت تحت جناح بابا لقيت زينو يستنى فيا جا سلم لبابا على يدو وسلملي على راسي ودخلني للطونوبيل لقيتو داير الغنية تاع "الدمعة طاحتلي كي شفتها لابسة blanc"😂 زينو يسوق وانا قاعدة قدامو
شناز: حسام وين راه
زينو: معارف ماشفتوء
شناز: لذي الدرجة قلبو كحل مايحضرش عرس ختو😥
زينو: عادي كلش يفوت ماتقلقيش روحك
شناز: جاز الكورتاج هايل غير شطيح ورديح وصحاب زينو هولو العرس😍
.....
يتبع..
