غدوة الصباح نضت قبل زينو رحت دوشت ونشفت شعري ولبست روبة ماشي قصيرة وماشي طويلة لونها اصفر مع صندالة صفرا وشعري طلقتو ورحت وجدت الفطور هكا شوي هبط زينو تحضني وسلم عليا وقعدنا نفطرو
زينو: راكي واجدة؟
شناز: وي واجدة😁
زينو: ضك نلبس ونروحو
شناز: داكوغ
راح زينو لبس وخرجنا..
وصلنا للمطار راح زينو يفري فالورق ومعارف واش😂 وانا قاعدة نتفرج فلي رايح ولي جاي..
زدنا نص ساعة وجا وقت الطيارة تاعنا..المهم ركبنا وانا ماحبيتش نبينلو بلي راني خايفة😂 قلت خلي نبقى ريلاكس وصاي..ربطنا الاحزمة وقلعت الطيارة غير قلعت عيطت عيطة وحدة😐 تبهديل😂 حكملي زينو يدي وقالي ماتخافيش راحلي شوي الرعب😂 بقينا نحكيو حتان رقدت..
فطنت على صوت زينو
زينو: شنااز شناااز نوضي وصلنا
شناز: ااا صح
بالسيف باش قدرت نوض😂 منبعد خرجنا وشدينا طاكسي وصلتنا للوتال..
وصلنا للوتال كبير منظم هايل😍 طلعنا لشمبرتنا كانت مجهزة من كلش😚 حطينا الفاليزات منبعد دوشنا وتعشينا،، وحنا نتعشاو صونا تلفون زينو،،، بصح ماحبش يرفد😕انا كملت ناكل عادي بصح بقى غير يصوني ماحبش يحبس
شناز: ارفد بلاك يحتاجك
زينو: لالا عادي صاحبي برك
شناز: ماحبيتش نبينلو بصح توسوست والله،،،،
فاتو يامات الفوياج حوسنا علكيف😍 وساعات كان تلفون زينو يصوني ومايرفدش وماحبيت نبينلو والو،،
وصلنا لدزاير فالليل طحنا رقدنا ديراكت وانا مزال ذاك السؤال في راسي قلت خلي الصباح نسقسيه،،
نضت الصباح وجدت الفطور ونوضت زينو باش يروح يخدم اليوم اول نهار عندو وهبطنا نفطرو
شناز: زينو حابة نسقسيك
زينو: سقسي
ولا لالا علابالي وش حا تسقسي😂 حا تقوليلي خي كنا فتركيا شكون لي عمرلك الحانوت! راجلك فحل ماتخافيش😌 عطيت لصحابي المفتاح وهوما تكفلو بكلش،،
هذا هو سؤالك ياك
شناز: وي هو😊
والله ماهو هو راني غير نحشيلو ماحبيتش نفسدلو نشاطو😑
راح زينو يخدم وانا قلت خلي نوض نسيق ،،سيقت الدار وبقيت نستنى فيه يجي ماجاش للعشا ونعيطلو تليفونو طافي😐 خفت وزيد خلاني وحدي في فيلا كاملة وصلت 10 والو 11،، 12 والو قلت نروح نرقد وصاي..
.....
يتبع..
