الحلقة السادسة عشر
#تزوجت_ابن_عمي
#بوسي_مصطفي
..............................
في العيادة
كريم/ طيب اهدي يافريدة واشربي العصير ده.
ندي / أهي ع الحال ده من وقت م خرجنا من الجامعة.
فريدة/ طمني ياكريم ع اللي في بطني.
كريم/ حاضر بس اهدي وخدي نفسك الأول.
فريدة/ مش قادرة اعصابي تعبانه وخايفة اوي.
كريم/ طيب اطلعي اطمن عليكي
بعد م خلص كريم كشف قعد ع كرسي المكتب واخد القلم وبدأ يكتب.
فريدة بانفعال/ انت هتسيبني كده من غير م طمني.
كريم بحزن يضغط ع الجرس
تدخل شابه صغيرة شغاله في العيادة
كريم/ منى ممكن تجيبي الأدوية دي من تحت؟
فريدة/ أدوية ايه دي؟
مني/ حاضر يادكتور.
كريم لفريدة/ دي أدوية هتاخديها اول م تروحي البيت وهبقى اتصل ب الليل اطمن عليكي.
فريدة/ يعني البيبي كويس؟
كريم/ لو منزلش هتحتاجي لعملية
فريدة بتبكي.
كريم/ مفيش نبض ولازم ينزل
متخافيش انا جنبك.
فريدة وهي بتبكي / يلا يا ندى
كريم/ استني هوصلك.
فريدة/ لا متشكره متتعبش نفسك.
خرجت ندى و سبتهم لوحدهم.
كريم اخد كرسي و قعد جنب فريدة.
فريدة و هي بتبكي / عارف إن الحمل دا كان الحاجه الوحيدة اللي ربطنا ببعض و نزوله هيخلي بابا يصمم على اللي في دماغه.
كريم / أنا عن نفسي متمسك بيكي المهم يكون ليكي موقف و رأي وتتمسكي بحقك.
فريدة : أنا تايهه مش قادرة أفكر.
كريم / متفكريش في أي حاجه دلوقت المهم صحتك و إنك تقومي بالسلامة و أي حاجه ممكن تتعوض
لما نرجع لبعض.
فريدة / كريم أنت بتحبني؟
كريم / لو مبحبكيش كنت تمسكت بيكي؟!
فريدة / ما انت مش عايز تتنازل يا كريم.
كريم / تقصدي إني اروح لباباكي و استحمل اهانته ليه؟!
و ليه اصلا كل دا ما هو ممكن نرجع لبعض من غير ما ترجعي لباباكي.
فريدة / كان دا ممكن يحصل لو حازم و بابا مكنوش في الموضوع من الأول.
كريم : و مين اللي دخل حازم في اللي بينا من الأول؟
فريدة / هو فهم الموضوع غلط و حاولت افهم بابا
و اقوله الحقيقة بس محدش اداني فرصه
و كمان انفعالك و كلامك مع بابا هو اللي ضايقه.
كريم / مكونتش شايف قدامي اللي حصلي في اليوم دا صعب حد يتخيله و أنا نزلت لعمي و اتكلمت معاه كان ايه رد فعله؟
فريدة / ممنوش فايدة الكلام يا كريم أنا هروح.
كريم / هوصلك و مش عايزك تفكري غير في صحتك و بس.
فريدة / اوعى تتخلى عني يا كريم.
كريم / فريدة أنا افديكي بروحي و انتي عارفه.
فريدة / طب يلا بينا.
....................................
رحمه/ يعني ايه مش فاهمه؟
إيهاب / يعني كان موضوع كده وخلص.
رحمه/ يعني محبتش فريدة بجد؟
إيهاب / مكدبش عليكي اكيد حبتها بس خلاص هي اتجوزت وبقى ليها حياتها و أنا لازم كمان اشوف مصلحتي.
رحمه / متزعلش نفسك هي اللي خسرانه.
إيهاب بيضحك بسخرية/ لا مش زعلان عادي جداً
يمكن دا حصل عشان مندمش ع اني ضيعت من أيدي حد تاني قلبي يستاهله.
رحمه / اكيد طبعاً خطيبتك طايره من الفرحه
ما هو اللي هترتبط بيك لازم تكون حد يستاهل.
إيهاب / انتي اللي تستاهلي واحد يقدرك و يعرف قيمتك.
رحمه/ ميرسي يامتر
ههههههههههه
مع إن ماما بتقول كلام غير دا.
إيهاب / هههههههههه
قوليلي بقي عامله ايه ف المذاكرة؟
رحمه / متلغبطه وتايهه مش عارفة اذاكر ولا فاهمه أي حاجه.
إيهاب / لو تحبي تجيلي المكتب بعد متخلصي جامعه اشرحلك شوية معنديش مانع.
رحمه/ بس كده هعطلك عن شغلك.
إيهاب / لا م هو هيبقى بعد الشغل بقى.
رحمه/ صحيح ياايهاب مش انت الأول ع دفعك ازاي متعينتش في الجامعة.
إيهاب / هههههههه
احنا في بلد الكوسه.
رحمه/ ههههههه
عندك حق.
إيهاب / قولتي ايه؟
رحمه / في ايه؟
ايهاب/ لحقتي تنسي ؟!
ههههه هتيجي ولا لأ؟
رحمه / طبعاً هاجي
هو حد يطول يجيله فرصة زي دي ويضيعها!
إيهاب / تمام نبدأ من بكره بقى.
رحمه/ ياريت
الامتحانات قربت وانا ميح خالص مش فاهمه أي حاجه.
إيهاب / لا انتي مع إيهاب هتبقي حاجه تانيه خالص.
رحمه ابتسمت بقلق وسكتت.
إيهاب / تعالي نخرج نتمشي شوية واختاري هدية كده ع ذوقك لخطيبتي.
رحمه/ انا ؟!
إيهاب /ههههههه
اكيد تعرفي ايه اكتر هدية تفرح أي بنت
رحمه / إن كان كده يبقي ماشي بس متأخرنيش بقى.
إيهاب / لا مش هأخرك متقلقيش.. يلا بينا.
................................
تحت قدام الصيدلية.
حلمي / ايه اللي بتقوله دا ياعماد؟!
عماد/ ايه مش دا حقي؟
اكرم/ ايوه ياعماد بس متوصلش إنك عايز تدخل حد غريب وسطينا!
عماد/ انا قولت اخواتي أولى من الغريب ولو مش هتقدروا تتصرفوا في المبلغ هبيع انا المحل لأي حد.
حلمي/ طيب أصبر شوية.
عماد/ قد ايه؟
حلمي/ هبيع حتة الأرض اللي عندي واشترى المحل.
عماد / أمتي يعني؟
حلمي/ معرفش على حسب الظروف.
عماد/ بس انا عايز اشطب شقة حازم عشان يتجوز في الصيف.
اكرم/ مفيش مشكلة ياعماد نأجل ميعاد الفرح.
عماد / هو مكانش اتفاق رجاله ولا ايه يااكرم؟!
اكرم/ جرا ايه ياعماد متحاسب ع كلامك
قول حاجه ياابو كريم.
حلمي/ هفضيلك المخزن وبيعه براحتك.
اكرم/ انت بتقول ايه ياابو كريم
ازاي يبعه لحد غيرنا؟!
عماد/ خلاص يبقي تفضيلي المخزن من الليلة عشان هعرضه للبيع من بكره.
حلمي/ بس دا فيه أدوية كتير
استني حتي أسبوعين أكون أتصرفت في الحاجات اللي في المخزن.
عماد/ بكره هيجي زبون يشوفه ولازم يبقي فاضي
والجزء اللي ليه في الصيدلية كمان عايزة.
اكرم/ في ايه ياعماد انت عايز تفض أي شراكة بينك وبينا ولا ايه!
عماد نظر لحلمي/ عايز اجوز ابني قبل م يكبر
مش هغلط غلطة غيري.
حلمي بغضب/ من بكره المخزن والصيدلية تحت أمرك.
عماد/ ماشي اتفقنا وأكرم شاهد ع كلامك عشان مترجعش تقولي محصلش.
حلمي/ انا مش عيل يا عماد عشان اقول حاجه وارجع فيها.
اكرم/ هو ميقصدش ياابو كريم.
حلمي/ ولا يقصد مبقتش فارقه.
كريم يوقف قدام الصيدلية
وينزل يفتح الباب ل فريدة يلمحهم عماد ويقرب من فريدة
عماد بانفعال/ كنتي فين؟!
فريدة بخوف/ في الجامعة يا بابا.
عماد/ ودا كان معاكو بيعمل ايه؟!
قرب أكرم وحلمي عشان يهدوا الموقف.
ندى / احنا كنا راجعين والدكتور عرض علينا إنه يوصلنا.
اكرم/ وايه المشكلة يعني في كده؟!
كريم بانفعال/ معرفش ياعمي فين المشكلة بالظبط
مراتي وبنت عمي
وصلتهم لحد البيت ايه اللي حصل لكل ده؟!
عماد بسخريه / لا محصلش حاجه يادكتور
بس بلاش مراتي دي عشان انت طلقتها وميصحش تركب معاك العربية ولا حتي تتكلم معاك.
حلمي/ ع فكرة بقي ياعماد
بنتك مفروض كانت تقعد ف شقتها لحد م تولد ومن حقهم يرجعوا لبعض م غير حتي ابني ميرجعلك
بس عشان احنا أهل سكتنا لما نشوف اخرك ايه.
عماد بغضب لفريدة/ قدامي يلا مستنيه ايه؟
كريم نظر لفريدة بحزن.
اخدها عماد من ايدها وطلعوا فوق.
...................................
في غرفة فريدة
تدخل منيرة / يلا يابنتي عشان تاكلي.
فريدة / مليش نفس.
منيرة/ لأ بقي هو كل يوم ملكيش نفس...لازم تاكلي عشان اللي ف بطنك.
فريدة نظرت لبطنها ودموعها نزلت ع خدها.
منيرة/ مالك يابنتي لونك مخطوف وبتترعشي ليه طمنيني عليكي يافريدة ؟
عماد بيزعق بره/ يامنيراااااا .
منيرة/ حاضر جايه
غيرى هدومك واطلعي نتغدا مع بعض.
فريدة بتغير هدومها التليفون يرن
فريدة/ ايوه ياكريم.
كريم / عامله ايه دلوقت؟
فريدة بحزن / كويسه.
كريم بحزن/ اخدتي الدوا؟
فريدة / لأ.
كريم/ لازم تاخدي الدوا وتاكلي كويس.
فريدة بتبكي / مش قادرة.
كريم/ فريدة انتي عندك انميا
ودا سبب إن النبض وقف عند البيبي.
فريدة بتبكي.
كريم/ اللي حصل حصل خلاص
بس لازم تاخدي الدوا.
لو م اخدتهوش مضطر أنزله وانتي عارفة أقصد ايه.
فريدة/ لأ بلاش عملية انا مش هستحمل.
كريم/ يبقي تاخدي الدوا وتاكلي كويس انا جمبك متخافيش في أي وقت اتصلي بيه وانا هتصل بيكي كتير اطمن عليكي.
فريدة بتبكي/ كريم انا تعبانه اوي.
كريم/ اقفلي هطلع اطمن عليكي.
فريدة/ لا ابوس ايدك ياكريم متطلعش عشان بابا
مش عايزة مشاكل معاه.
كريم/ خلاص اهتمي بصحتك دلوقت و هكلمك بـ الليل اطمن.
فريدة/ حاضر.
كريم/ فريدة خلي بالك من نفسك.
حلمي يخبط/ كريم عايز اتكلم معاك.
كريم/ اتفضل يابابا.
فريدة/ طيب مع السلامة دلوقتي.
...................................
في شقة عماد.
عماد/ بنتك مبتجيش ليه عشان تاكل؟
منيرة/ بتقول ملهاش نفس.
عماد/ ادخلي خليها تطلع تاكل
عشان انا العفاريت بتطنط قدامي دلوقتي.
منيرة/ هو في ايه ياعماد مالك مش طايق نفسك
ولا طايقنا ليه
البنت واديك مقعدها جنبك ورافض انها ترجع لجوزها لما بقت نفسيتها صفر لا بتاكل ولا بتشرب وطول الوقت مهمومه مش عارفة هتكمل حملها بالشكل دا ازاي عايز تعمل ايه تاني؟!
عماد/ انا بدعي ليل ونهار إن اللي في بطنها ينزل عشان نستريح.
منيرة/ ليه بتقول كده؟ ...بعيد الشر عليها.
عماد / عشان ابن اخويا ميمسكنيش من أيدي اللي بتوجعني بكره يجيلها احسن منه .
منيرة/ ليه هو انت خلاص هطلقها من جوزها ؟
عماد/ هو مش طلقها ؟!
منيرة/ ايوه بس دي اول مره يعني يقدر يردها تاني.
عماد/ بعد م طلقها قدامي وقدام كل اللي ف البيت
و معملش اعتبار ليه ولا كبرني
دا انا طلعتها ليه مع إنها كانت هاريه نفسها من العياط قبلها ومش عايزة تطلع وقولت اهو ابن اخويا برضو مفيش مشكلة مين غلطان واهي اول مره واكيد مش هيزعلها تاني بس محترمنيش ولا عملي اعتبار.
منيرة/ معلش بس بلاش اللي بتفكر فيه ده.
عماد/ قفلي ع الموضوع ده وقوليلي فين رحمه؟
كانت رحمه بتفتح الباب/ انا أهو ياحبيبي حد سأل عني؟
عماد / بطلي البكش بتاعك ده وقوليلي ايه اللي اخرك؟
رحمه/ نزلت مع صحابي يشتروا شوية حاجات.
منيرة/ ومتصلتيش ليه تطمنينا؟
عماد/ مقولتيش ليه الصبح عشان كنتي تاخدي فلوس تشتري انتي كمان.
رحمه / ماهو انا عجبتني حاجه كده واشترتها ايدك بقي ع تمنها علشان استلفت من صحابي.
منيرة بغضب / أجري اغسلي ايدك عشان الأكل برد.
عماد/ من عنيه الاتنين ناكل الأول وتاخدي الفلوس اللي انتي عايزاها.
رحمه بفرحه/ ياحبيبي يابابا
ايوه كده أهو الواحد نفسه تتفتح للمذاكرة.
منيرة / طيب اخلصي عشان مش هدخل المطبخ اجهز أكل تاني.
................................
إيهاب / ياض متبقاش عيل بقى.
سامي/ انا برضو؟!!
يعني مش فاكر انت قولتلي ايه؟
إيهاب / ميبقاش مخك صغير بقى
قولتلك كنت مضايق خلاص حقك عليا
المهم عايز اتكلم معاك في موضوع مهم.
سامي/ سيبك منها يا إيهاب وخليك في حالك.
ايهاب/ هي مين؟
سامي / فريدة..ولا انا غلطان ؟
إيهاب / مش قادر أنساها...حاولت مقدرتش.
سامي / اللي انت بتعمله دا أكبر غلط أبعد عنها وعن أختها عشان متندمش.
إيهاب / بالعكس هي اللي هتندم.
سامي / افتكر إني قولتلك بلاش
ع العموم انت حر.
إيهاب / مش قادر اتخيل إنها متجوزه حد غيري
أنت عارف اوقات بفكر ازاي ب يتعاملوا مع بعض جوه البيت أنت فاهمني أكيد ببقى هتجنن ازاي مع حد غيري دا حلمت بكل دا قبل ما هو يفكر فيها.
سامي / أنا مش مستريح للي ناوي تعمله يا إيهاب.
إيهاب / مش هخسر أكتر من اللي خسرته
متشغلش دماغك بيه أنا عارف أنا بعمل ايه.
....................
في شقة أكرم.
ميرفت / مبتاكليش ليه يا ندى؟
ندى / م انا باكل أهو ياماما.
اكرم/ هو حازم تحت؟
ندى / حضرتك بتسألني انا يابابا؟
اكرم/ ايوه امال بسأل مين؟!
ندى / معرفش.
ميرفت / ليه هو انت عايزة في حاجه؟
اكرم/ اتصلي وقوليله اني عايز اتكلم معاه بـ الليل شوية يبقى يطلعلي و ميتأخرش.
ندى / حاضر يابابا.
ميرفت / خير يا أبو علي.
أكرم / خير يا ميرفت متقلقيش.
.......................
في التليفون 📞
رحمه/بقولك نزلنا انا وهو وكان عاملي مفاجأة فظيعه الهديه اللي اخترتها كانت ليه انا مش لخطيبته.
داليا / طيب😏
رحمه/ ايه مالك متفاجئتيش يعني!
داليا / واتفاجئ ليه؟!
اسمعي يارحمه لازم تفهمي كويس إن دا كان ممكن في يوم من الأيام إنه يبقي خطيب اختك
وبعدين تعالي هنا انتي ايه اللي عرفك انه لسه مبيحبهاش وبيتسلي بيكي عشان يعرف أخبار اختك؟!
رحمه/ أولا دا مش صحيح هو قالي
خلاص مبقاش بيحبها وكمان مبيتكلمش عنها ولا بـ سألني خالص عنها.
داليا بسخرية/ لا واضح فعلاً إنها مش شاغله دماغه
انتي مصدقه اللي بتقوليه ده؟!
رحمه / المهم بقي اني خلاص لقيت الشخص المناسب اللي كنت بحلم بيه
شاب عنده طموح وله مستقبل ومبيفكرش ف اللي انتي بتفكري فيه ده
دا أهم حاجه عنده شغله وبس
ناجح وشاطر في دراسته وشغله يعني شاب أي واحدة تتمناه.
داليا/ اقفلي يارحمه قبل م مرارتي تتفقع منك.
رحمه / انا غلطانه اني بكلمك
ومن غير سلام يلا في داهيه.
داليا/ ههههههههههه
سلام يا مجنونه.
الباب يخبط..
فريدة / افتحي انتي قافله الباب بالمفتاح ليه؟!
رحمه / طيب حاضر.
سلام دلوقتي وهبقي اكلمك بعدين.
فريدة / قافله الباب ليه؟
رحمه / عادي كنت بغير هدومي
وبعدين مالك كل شوية تجري ع الحمام
انتي تعبانه؟
فريدة / لا انا كويسه .
رحمه / طيب أنا هطلع اقعد مع ماما شوية.
فريدة / رحمه انتي بتشوفي إيهاب؟
رحمه بارتباك / اشمعنه؟
فريدة / أهو سؤال كده جه ع بالي.
رحمه / اه بشوفه.
فريدة / خلي بالك من نفسك.
رحمه بسخرية / حاضر.
فريدة / الاحسن إنك متقابلهوش ومتتكلميش معاه انا خايفه عليكي وبنصحك ملكيش علاقة بالواد ده خالص.
رحمه / ايه غيرانه؟!
فريدة / غيرانه !
هغير من ايه مش فاهمه؟!
رحمه / لا انتي فاهمه انا أقصد ايه.
الباب يخبط..
رحمه/ اتفضل يااستاذ ادخل.
حازم/ استاذ !!!
خير يارحمه هانم مش عوايدك تبقي مؤدبة اوي كده؟!
رحمه/ يعني لا كده عاجب ولا كده عاجب
طيب !
حازم / فريدة كنت عايز اتكلم معاكي شوية.
رحمه/ طيب...بعد اذنكو
فريدة/ خير !!!
حازم بخجل/ انا آسف.
فريدة بحزن/ ع ايه؟
حازم / بلاش نظراتك اللي بتموتني دي يا فريدة.
فريدة بتبكي / حازم أنا تعبانه.
حازم قرب منها واحتضنها / مالك ياقلب اخوكي.
فريدة/ كان زمان.
حازم/ انا عارف اني غلطت بس مكانش قصدي صدقيني انتي بنتي مش دايماً بتقوليلي كده.
فريدة/ يااااه قد ايه وحشتني الكلمة دي.
حازم/ فريدة انا هعمل المستحيل عشان ترجعي بيتك.
فريدة/ هتقدر تقنع بابا؟
حازم/ ادعي بس دماغ بابا تلين شويه
بس هو فعلاً كريم اترفد من المستشفى اللي كان شغال فيها؟
فريدة / مش بالظبط كده
الموضوع إن في مشكله في الشغل وفي ناس بتحاول تأذيه.
حازم/ كريم محترم جداً وطيب و
كل مشاكله ممكن تتحل لسه زعلانه مني؟
فريدة/ مقدرتش أزعل منك ياحبيبي.
حازم/ يااااه ريحتي قلبي.
التليفون يرن.
فريدة / ايه مبتردش ليه؟
حازم / لا دي ندى.
فريدة/ طيب وفيها ايه ما ترد.
حازم / قالبه عليا بقالها كام يوم وانا مش عايز اتخانق بصراحة.
فريدة / طيب مترد مش يمكن بتتصل تصالحك.
حازم/ تفتكري كده؟
فريدة/ كلمها عشان تتأكد وشوف.
حازم/ لا مش طالبه معايا خناق خالص انا مصدقت إنك سامحتيني.
ابتسمت فريدة رغم اللي جواها.
حازم/ قوليلي بقى يافريدة كنتي بتعيطي ليه في الليله اياها؟
متكذبيش عشان بيبان عليكي ع فكرة.
فريدة/ ممكن م جاوبش؟
حازم/ اه طبعاً براحتك.
فريدة/ لما ابقي قادرة اتكلم هقولك اكيد.
حازم ببتسامة/ لو اعتذرت لكريم تفتكري هي سامحني.
فريدة/ اكيد
كريم قلبه طيب ومفيش حد ف الدنيا دي في حنيته ولا بيحبني قده.
حازم بمزح/ ايه دا بقى انا كده اغير.
..............................
في شقة حلمي...
كريم/ حسابات ايه يابابا؟
حلمي / لسه هقول تاني ياكريم.
كريم/ ليه دا كله ؟
حلمي/ عمك عايز حقه.
كريم/ اوك من حقه بس ليه السرعة دي وبعدين ليه بيعمل كده معانا؟
حلمي/ لو جدع بقي ترد مراتك وملكش دعوة بيه.
كريم/ فريدة تعبانه اوي يابابا.
حلمي/ ليه ياابني مالها؟
كريم بحزن / الجنين توفي في بطنها
حلمي / ايه ! أمتي الكلام ده؟
كريم/ جاتلي العيادة النهاردة وهي تعبانه و اتأكدت.
حلمي/ متزعلش نفسك ياابني.
كريم/ كل حاجه حلمت بيها راحت خلاص...شغلي وبيتي ومراتي حتي الطفل اللي كنت مستنيه.
حلمي/ متعترضش يا كريم.
كريم / مش معترض يا بابا بس غصب عني حاسس إني قلبي اتكسر.
حلمي / يا حبيبي متقولش كده
المهم بنت عمك تقوم بالسلامة عملت معاها ايه؟
كريم/ اخدت أدوية للاجهاض ولسه مستني لو منزلش هعملها عملية أنزله.
حلمي/ كده عمك هيعند اكتر.
كريم/ يعني ايه يابابا؟
اتنهد حلمي/ زي م تيجي تيجي ياابني هنعمل ايه.
كريم/ هشتري المخزن والصيدليه يابابا.
حلمي/ بجد!
كريم/ مش هسيب حد غريب يجي يشتري في ملكنا.
حلمي/ طيب مش تعرف الأول السعر يمكن المبلغ اللي معاك ميكفيش .
كريم / كام ؟
.........................
في الصباح
ندى نازله من فوق ورحمه واقفه قدام بابا الشقة بتظبط الميكب.
ندى / بتعملي ايه ياموكوسه عندك؟
رحمه بخضه/ ايه مش تتنحنحي قبل متتكلمي خضتيني.
ندى / احم احم.. بتعملي ايه بقى؟
رحمه/ زي م انتي شايفه.
ندى / دا لو اخوكي شافك كده هيعلقك من رموشك اللي شبه المقشات دي.
رحمه/ لا نايم جوه.
ندى / ايه ده هو مش هيوصلك الجامعه؟
رحمه/ لأ...هروح لوحدي ادخلي انتي صحيه.
ندى / نعم!
اصحيه ليه كنت مامته؟!
رحمه / عشان يوصلك مش دا اللي جايبك؟
ندي / لا ياظريفة انا جايه لفريدة وسعي بقي متعطلنيش.
رحمه / طيب سلام عشان متأخرش.
ندى / انتي متأكدة إنك رايحه الجامعة
رحمه مردتش
ندى / دي مبقتش جامعة.. روحي يااختي.
ترن الجرس
فريدة/ ادخلي يا ندى.
ندى / صباح الخير يافريدة عامله ايه؟
فريدة/ تمام ادخلي.
ندى / اخدتي الدوا؟
فريدة/ اششش تعالي نتكلم جوه.
ندى / ايه دا يااختي هو سر ولا ايه؟!
فريدة / محدش هنا يعرف أي حاجه.
ندي/ ياسلام ماهما اكيد هيعرفوا.
فريدة/ يعرفوا ولا ميعرفوش ميفرقش معايا
ندى / هو اخوكي فين؟
حازم / انا أهو يانونه صباح الخير.
ندى بخضه/ بيطلعوا أمتي دول؟!
حازم/ بيطلعوا الصبح ياظريفة.
ندى / دمك سم.
حازم/ في واحده تقول لخطيبها الكلام ده !!
ندى / بتصل مبتردش ليه؟
حازم / مليش مزاج.
ندى / لا ياشيخ.. بقى ملكش مزاج ولا كنت بتتصرمح بره!
حازم / ع أساس إنك مكونتيش واقفه ف البلكونة وشايفه العربية واقفه تحت!
ندى / انت شوفتني ازاي؟!
حازم / قشر اللب اللي كنتي بتقزقزيه طول الليل وصلني.
ندى / يعني منامتش امال مردتش ليه؟
حازم / بقولك مليش مزاج.
ندى / انت زعلان بقي!
حازم مردش.
ندى / خلاص متزعلش اتفضل.
حازم / ايه ده؟!
ندى / شوية لب.
حازم / انتي عاوزاني أكل اللب دا؟!
ندى / ايه ماله مش عاجبك؟
حازم / يعني عرقان في ايدك وعاوزاني اكله🤢
فريدة /هههههههههههههههه
ندى / دا بيبقى طعمه جميل اوي.
حازم / بطلي جنان بقى.
فريدة / هههههههههههههههه
متزعليش ياندى هاتي شوية لرحمه.
حازم / انتي زعلتي يانونه.
ندى /😜 لا انا مبزعلش.
حازم / اصلك معندكيش دم.
ندى / مش هرد عليك.
حازم/ غريبه اوي...من أمتي العقل ده ؟
ندى / انا طول عمري عاقله
انت اللي مجنون
حازم/ اه م انا قولت مستحيل لسانك دا يقول كلام حلو لازم يقلب ع طول .
ندى / هي مجنون وحشه؟
دا انا كنت هقول كلمة تانية بس خوفت تزعل.
حازم / لا عادي متعود منك ع كده
قولي متخافيش
ندى / كنت هقول عليك اهبل وعبيط
حازم / نعم!
فريدة / اهدي بس ياحازم
اخرجي يا ندى دلوقتي.
ندى / وادى قعده اما اشوف هيعمل ايه؟
حازم / هعملك كفته يالي متتسمي انتي.
ندى / سامعه يافريدة بيغلط ازاي؟!
حازم / ع أساس إنك ملغطيش يعني؟!
فريدة / خلاص بقي ياحازم هي مش هتكررها تاني.
ندي / لا هقولها كتير من هنا ورايح وأبقى اطلع لبابا عشان عايزك فوق.
قاطعها حازم وحدف الريموت اللي جه ف دماغها.
ندى بضيق / انا ابقي جزمه لو نزلت تاني.
وفتحت الباب وخرجت بسرعة
حازم/ في داهيه يكونش هنموت من غيرك.
فريدة / اطلع بقي شوف عمي عايزك في ايه.
حازم / لما تغور تنزل هبقي اطلع.
فريدة / انت مش هتوصلها
حازم / أوصل مين؟ !!أم لسان طويل دي؟
لا خليها تنزل لوحدها يكون يطلع عليها العصابة اللي بتخطف الستات ياخدوها ويريحونا منها
فريدة / ههههههه بعيد الشر عنها.
حازم / دي هي الشر نفسه
انا شكلي كده هرجع في الخطوبة دي وفي داهيه بقي الفلوس اللي دفعتهم في الدبله اللي ربطتني بيها.
فريدة / ههههههه
ضحكتني وانا مليش نفس
يخرج عماد من الغرفة وهو بيتكلم في التليفون
عماد/ دقيقة واكون عندك.. سلام
حازم/ بابا حضرتك خارج؟
مردش عماد ونزل بسرعة.
حازم لفريدة / هو في ايه؟
فريدة/ معرفش اهو أنا زيي زيك.
............
سميرة تدخل غرفة كريم.
سميرة / كريم أنزل شوف في ايه تحت.
كريم بيفتح عينه بتعب/ في ايه ماما؟
سميرة / أيمن كان بيسأل ع بابا بيقول في راجل تحت جاي يشتري المخزن و الصيدلية.
كريم / ايه!!
سميرة / ألبس بقي بسرعة وشوف في ايه تحت.
كريم / حاضر.
.....................
في شقة أكرم..
ندى لحازم / أدخل هتفضل واقف كده؟
حازم / متعرفيش باباكي عايزني في ايه؟
ندى / لا معرفش.
اكرم/ ادخل ياحازم.
حازم بارتباك/ صباح الخير ياعمي.
اكرم/ صباح النور ياابني اقعد.
حازم/ خير ياعمي؟
ندى قالتلي إن حضرتك عايزين.
اكرم/ استريح الأول
ندى اعمللنا شاي يابنتي.
ندي/ حاضر يابابا.
أكرم / اسمع ياحازم هو احنا كنا حددنا ميعاد فرحك انت وندى؟
حازم/ لا ياعمي حضرتك قولت مفيش فرح قبل ندى متخلص دراستها.
اكرم/ تمام يعني مقولناش إن الفرح في الاجازة.
حازم/ لأ محددناش هو في حاجه حصلت ياعمي؟
اكرم/ واحنا مش مستعجلين ياابني وقت متخلص شقتك وتظبط أمورك احنا هنبقى جاهزين.
حازم/ متشكر اوي ياعمي
انا كنت قولت لعلاء ابن عمي إنه يتنازل عن شقته ليا وانا هشطبله الشقة اللي فوقيها وهو وافق.
اكرم/ وليه ياابني خليك في شقتك وسيب ابن عمك في شقته يمكن يحتاجها قريب بلاش تحرجه.
حازم/ انا رجعت فكرت في الموضوع وقولت بلاش عشان كده
بس هو صمم وقالي انها بقت شقتي خلاص.
اكرم/ مش عارف اقولك ايه غير إن حلمي اخويا عرف يربي ولاده كويس ياريت تحاول تصلح الامور بين فريدة وجوزها.
حازم/ انا كنت لسه هنزل لدكتور كريم قبل معرف إن حضرتك عايزني.
ندى / الشاي.
اكرم/ تسلم ايدك اقعدي اشربيه معانا بقى.
ندى / يعني اقعد عادي ولا في كلام سر ميصحش اسمعه؟
اكرم/ هههههههه
خطيبك بيقولك انا نازل بقي عشان اتأخرت.
فريدة بتتصل بحازم.
حازم/ ايوه يا فريدة في ايه
طيب اهدي بتعيطي ليه؟
اكرم/ مالها فريدة ياابني؟
حازم/ بابا وكريم بيتخانقوا
يادي المصيبه ليه تاني؟!
فريدة/ معرفش أنزل شوف في ايه تحت.
حازم/ طيب...سلام
أكرم / ايه ياحازم مالها فريدة؟
حازم / بابا تحت بيتخانق مع كريم.
..............
تحت قدام الصيدلية
كريم/ ميصحش كده ياعمي الناس بتتفرج علينا.
عماد/ ايه خايف الناس تعرف حقيقتك؟!
كريم/ انا معملتش حاجه عشان أخاف من الناس وكفاية بقي كده ياعمي.
عماد/ اوعى تفكر إنك هتلوي دراعي لأ اسمع بنتي مش هتشوف كعب رجلها وأبقى حل مشاكلك بعيد عننا وانسى اني حطيت أيدي في أيدك في يوم من الأيام.
اكرم/ في ايه بس يا عماد؟
كريم/ عمي جايب مشتري للمخزن والصيدلية بكلمه فضل يزعق ولم علينا الناس بالشكل ده.
عماد / انا مبعملش فضايح الفضايح دي انت اللي تعرفها.
كريم/ لحد كده وكفاية بقي
حضرتك عايز تركبني الغلط وخلاص.
اكرم/ اطلع ياكريم دلوقتي.
عماد/ لو راجل ميطلعش وطالما عامل فيها سبع رجاله في بعض يشتري هو.
كريم/ اوك موافق.
اكرم/ استنى بس ياابني
تعالى بينا جوه ياعماد ميصحش نتكلم في الشارع كده.
عماد/ نص مليون ودا آخر كلام عندي.
حازم/ نص مليون لـ ايه يابابا؟!
اكرم/ احنا مش اتفقنا إنك تدينا مهله كام يوم لحد منتصرف في المبلغ وبعدين نص مليون ايه اللي بتتكلم عنهم انت عارف إن المحزن بنسبتك في الصيدلية ميجيش المبلغ دا خالص.
كريم / وانا موافق.
عماد/ وقصادهم كمان تخلص بنتي وطلقها.
اكرم/ انت عايز تخربها بقي !
عماد/ هو اللي ابتدا وبعدين انا مأمنش ع بنتي مع واحد زي ده عينه زايغه و داير يضحك على دي و دي
طب يتكسف على دمه دا يعتبر لسه عريس
و لا هي طفاسه و خلاص و بعدين هي بنتي وحشه
علشان يبص لغيرها.
كريم مردش و سابهم وطلع فوق.
أكرم اخد عماد جوه في الصيدلية ومعاه حازم
اكرم/ ماله كريم ياعماد مش عاجبك في ايه؟
عماد/ متعرفش إن ابن اخوك اترفد من المستشفى وبيتحقق معاه.
اكرم/ كريم! ليه عمل ايه؟
عماد/ عشان قليل الأدب ومترباش ومش سايب لا بنت ولا ست في المستشفى.
قاطعه حازم/ لا يابابا لو سمحت متتكلمش كده ع كريم حضرتك عارفه كويس ودايما تقوللنا إنك اللي مربيه ولو الناس كلها صدقت مينفعش احنا نصدق الكلام ده واضح إن في مشاكل في المستشفى وفي حد عايز يخلص منه.
عماد / ايه شغل الافلام ده
عايزين متصدقوش براحتكو بس انا مش هسكت إلا لما يجيب المأذون ويطلق بنتي بالتلاته عشان ميرجعاش تاني.
اكرم/ دا بدل م توقف جنبه
عماد انت بقيت غريب اوي معرفش انت عايز ايه بالظبط؟!
حلمي / سلام عليكم.
.................................
أنت تقرأ
تزوجت ابن عمي👰🤵
Romanceرومانسية اجتماعية لفتاة تزوجت ابن عمها التي لم تكن تحبه ثم أحببته بعد ذلك لتأتي اختها وتقلب حياتها رأساً على عقب وتسبب لها الكثير من المشكلات.
