مذكرات القدر

البارت الاول

كلشي بالدنيا يصير هو قدر النا!
اقدارنا كلها مكتوبه علينه ولازم نعيشها....
ماكو شي اسمه صدفه!...
ماكو شي بالقدر او الدنيا اسمه صدفه!!
اكو شي اسمه تخطيط اللهي... الله يخططلك ويهيألك الاسباب الي احنا نطلق عليها مصطلح '' الصدفه'' حتى يصيرلك القدر...
قدرنا انو نلتقي باشخاص يجي اليوم الي يصيرون اعز الناس عدنا....
قدرنا انو نتألم ونتأذه.... كلشي مكتوبلنه واحنا لازم نعيشه... حتى الموت! قضاء وقدر...

             ....................................................

كاعده بالصف بدرس الاسلاميه شوية وطبت المديره علينه
المديره: قدر محمد
قدر: نعم ست اني
المديره: تعالي ماما نريدج جيبي جنظج ولمي كتبج وتعالي

اخاف من هاي الحجايه لان جنت دائما اسوي عركات بالمدرسه واسمع هالحجايه وانفصل وبابا يرجعني
انتبهت عليه خايفه كالتلي
المديره: حبيبي ماكو شي لتخافي محتنفصلين بس تعالي وياي عمج اجا
لميت الكتب مالتي وطلعت وياها ودتني للاداره واني خايفه ليش رايده تاخذني وليش عمي جاي عليه
طبيت للاداره لكيت عمي الوسطاني احمد جاي عليه بسرعه رحت حضنته وكمت ابجي

قدر: عمو والله مسويت شي صارلي خمس ايام ممسويه عركات ويا البنات
احمد: ادري ابويه ادري لتخافين جاي اخذج للبيت
قدر: ليش
احمد: تعالي هسه وياي وبالبيت افهمج يلا ست مع السلامه
المديره: مع السلامه عيني ابو محمود وان شاء الله اخر الأحزان
احمد: مشكوره ست

لزمني من ايدي وطلعنا ولحد هسه ممفتهما ليش جاي ياخذني
صعدنا بالسياره ومشينا

اعرفكم عليه اني قدر من ام مسيحيه واب مسلم
ابويه حب امي وامي هم حبت ابويه هواي
وواجه اهله وعشيرته كلهم في سبيل ياخذها
اهل امي متبرايين منها لحد ماتوفت هما نسو عدهم بنيه اسمها عذراء لان اخذت من غير ديانتها ووكفت بوجهم علمود بابا
عشنا ببيت جدي الي كل عمامي كاعدين ويانه لان جدي شيخ ومعروفسن كلنا
امي توفت هيا وداتولدني وبعد ثلاث سنين بابا تزوج بنت عمه وصار عندي خوات ثلاثه (لينا وجنى ورغدا) 
زوجة ابويه مالها دخل بيه اصلا لا اني احجي وياها ولا هيا يعني ابويه كله هو الي يربيني و عمتي
بابا هو كل حياتي هو ابويه واخويه وامي وكلشي ممخليني احتاج شي هو عندي بالدنيا كلها من صدك احسد نفسي عليه صح ميقصر ويا خواتي الباقي بس يكلي انتي غير انتي من ريحة عذراء على امي
معندي اخوان بس عندي ولد عم كومه

لمن اجا عليه عمي احمد للمدرسه جنت بصف سادس ابتدائي بس عقلي بعدا طفل ما احس روحي انو كبرت وسنةه الخ اطب متوسطه
طلعت وياه وصلنا البيت جان كله هوسه وزلم طابه طالعه صح احنا بيت شيخ واربعه وعشرين ساعه ناس طابه طالعه بس مو مثل اليوم
اليوم احس شي غريب وناس هوسه وسيارات ملتمه بالفرع
نزل عمي واجا نزلني وطببني للبيت لكيت الوجوه الي بالبيت كلها مدري شونها كئيبه وتخوف
طببني على غرفه بيها نسوان اجت عمتي حنان تركض عليه ولابسه اسود وعيونها مورمه