مذكرات القدر

البارت التاسع

نزلت راسي للكاع حتى اعدل شعري وارجع اسوي طبوسه
بس رفعت راسي لكيت هذا الدكتور المغرور طالع من المستشفى ومتوجه لسيارته
ضربت صفنه عليه
جان لابس قميص ماروني ويا بنطرون اسود وحذاء قهوائي طوخ...
والشعر مرجعه لي خلف...
واللحيه العدله....
يربي كلشي بي يجذب الواحد
واحد غصبا عنا يباوعله..
من صدك الله متفنن بخلقته.... وخالقه بدقه تخبل
صحاني من صفنتي علي الحقير وهو يهزني من جتفي

علي: قدرررر
قدر: ولك هاااا شبيييك
علي: منو هذا الداتصفنين بي ولج
قدر: منو
علي: هذا الداتصفنين بي من طلع
قدر: محد يجوز شردت شويه شبيك
علي: ديلا روحي نادلي لعمه حنان خلي نروح
قدر: اي

رحت ناديتلها ورجعنا للبيت
والكل رجع فتح نفس الموضوع ويرزلني على انو وين جنت
بس الحمدلله ابو الوكفات الصعبه علاوي العسل
كاللهم طلبت منها تروح تشتريلي شغله
والكل بقى يصيح عليه ويرزله
واني طلعت منها
وحجيتله للسالفه الحقيقيه لعلي وفرح بس كال لو جاي وياي حتى يرزلهم وياي
.
.
.
مر اسبوعين واليوم الكل مخبصو يرجع حمزه افندي
اني جنت بغير عالم
هالدكتور براسي عايشمدري ليش هيج تصرفاته واسلوبه بقو بذاكرتي
من اول لقاء النا واهو ببالي
الكل فرحان يجي حمزه بس اني لا
ابد مامشتاقلته ولا اريد اشوفه
بعد توني رجعت نفسيتي واسترجعت عافيتي
بس هلمره ممسويه شي انكتل عليه
بس شكد طيبه احد شايفني ويكوله شفنا بنت عمك كاعده تتعارك ويا الولد
الللله هاهيه هلمره يكتلني خلاص مابيها مجال
خبرنا كال حيجي المغرب او العصر
انخبصو بالازيد

جنت كاعده اتفرج عالتلفزيون
طبت عليه عمتي قمر
قمر: قدر
قدر: بلي عمه
قمر: حبيبتي كومي شطفيلي الحوش
قدر: عمه برا ايمان ونور خلي هما يشطفوه
قمر: ميخالف حيساعدوني نسوي جدر دولمه كومي انتي شطفي
قدر: حاضر عمه
كمت واني اغلي على بنات عمي يعني كلهم اكبر مني وكاعدين معدهم شي ليش الا اني
ماكوو غيري قابل
عندي بنات عم دود مو بنات

طلعت برا جان الدنيا ظهر وشمس حاره بله ليش الا اني اشطفه يعني
شكلت الصونده وجيت اشطف
اجو يمي اختي لينا ومسره بنت عمي يلعبون
شويه وما اسمع الا صوت هبده قويه برا
بسرعه طلعت وششوف كدامي

شفت كيه مالتحويله كدام بيتنا وطالع فوكها رجال ضخم ممبين شكله
وجوا بالكاع واكع واحد شباب وديضحك
ويما اكو كومدينه مكسوره
وهذا الفوك ديصير على هذا الواكع
والواكع بس ديضحك
من صدك شكله يضحك
بقينا نباوع عليهم مبين توهم جايين ديتحولون وكدام بيتنا النوب
رجعت اشطف درت عيوني من عليهم
اصلا الشمس صايره عليهم ماكدر حتى اباوعلهم عيوني راسا تصورب
صوتهم ترس الفرع
باوعت لصفحه لكيت عمي كريم جاي بسرعه طبيت وطببت الجهال وياي
.
.
جنا كاعدين دنحضر العشى من العصر لحمزه افندي يحجي يشرفنا
ماكو شي مسواه جدي ومرت عمي قمر
انواع الحلويات جابو
انواع الاكلات سوو
كلها علمود حمزه
الكل فرحان لجيته الا اني كلت بس يجي راسا اطلع للغرفه واسد الباب واكللهم حنام