مذكرات القدر

بارت الخامس عشر

وما اشوف الا بوجهي ايهم هو دايطب للاستقبال واني داطلع باوع عليه ومبتسم
اويلييييي
شكد صارلي مشايفته
شكد مشتاقتله ياربيييي...
مشتاقه لعيونه....
لشكله....
لطوله لكلشي بي...
حبي اله مو بس مجرد كلمه والله
حبيته بكل قوه عندي
حبيته من كل كلبي

هيا لحظه بس احس روحي احتييت من جديد
احس حتى عيوني داتركص من الفرح
كلبي يممه من كلبي
احسه دايطلع من الهدوم من قوة الضربه
احسه حيكسر القفص الصدري من قوته
بقينا واحد يصفن بالاخ
نسيت وجعي
نسيت الابره الي طابه بنص اصبعي
نسيت كلشي
حتى صده الي وحجيه وكلامه اخر مره نسيته

فزيت ورجعت لعالمي الحقيقي لمن عيط عليه
ايهم: هاي شنو شبيها ايدج
قدر: ها ولا شي بس اريد بلاستر
ايهم: اوكفي هاي شكو طابب بيها
ام ايهم: هاي شكو صخاااااام شبيها ايدج
قدر: ماكو شي يمه لتخافين
ايهم: اوكفي خلي اجيب المعقم هاي ابره فايته بيها مو
قدر: اي
ام ايهم: امدااااج شكد فاااهيه ولج ايدج داتجري دم لحكيهاااا

بسرعه كعدتني واجا كعد يمي ولزم ايدي
احس انتلت لمن طخني
مثل صعقه كهربائيه صابتني لمن لزم ايدي
جاب معقم وقطن
ولزم راس الابره حتى يطلعها
بسرعه غمضت عيوني
احس سجاجين داطب بكلبي
تأذيت حيييل
بس مصرخت ابد ولا حتى بجيت
لمن حسيت انو طلعها
هنا كامت دموعي تجر جري
عقم اصبعي وشده ببلاستر
واني كل هذا هسه يلا استوعبت انو لازم ابجي

خلص باوع رفع راسه وباوع عليه
ام ايهم جانت بالمطبخ
مسحت دموعي راسا وسحبت ايدي
قدر: شكرا
ايهم: على شنو
قدر: لان ساعدتني

ردت اكوم لزمني من ايدي وكعدني
ايهم: كعدي
قدر: شكو
ايهم: شونج
قدر: الحمدلله بخير
ايهم: متقصدتها؟
قدر: هيا شنو
ايهم: متقصده متشوفيني نفسج
قدر: شنو مافتهمت
ايهم: صارلي شكد مشايفج
قدر: اي مو تحولنا لغير بيت
ايهم: بس هيج؟ هو هذا السبب انو ماشوفج
قدر: ليش عندك سبب ثاني
ايهم: انتي الي عندج
قدر: لا معندي ويلا من رخصتك اكوم اني

كمت كبل ما اطلع من يما صاحني
ايهم: قدر
انداريت عليه وهزيتله براسي بمعنا شنو
بقى صافن بيه
جر تنهيده
حسيتها من روحي انجرت
قدر: شكو
ايهم: لا ولا شي روحي

رحت طبيت للاستقبال اكمل الخياط
باوعت على اصبعي السبابه الي انغزت بيها الابره
وبقيت اتلمس اللاصقه مالجرح
ابتسمت لا اراديا
معقوله اني جاي احلم؟
بس هم مجان مفروض تشوفه
مجان لازم اشوفه روحي
ماريد ارجع احن
ماريد يرجع كلبي ينبض اله ولو مانسيته اني
بس اعرف مصيرنا مو لبعض
هو وييين واني وين

بالي صار كله هو ويفكر بس بي
بس شجابه هسه باوعت عالساعه جانت وحده ونص
هو مو هيج وكته يرجع
بس الحظ شون يصير
خلصت شغل اليوم
باوعت من الشباك حانت الدنيا مطر زخ
كلت شويه تخف واطلع
بقيت انتظرها تنقطع شويه
خفت بس ابد مانقطعت
بسرعه لميت الغراض وكمت حتى الحك اروح كبل ماترجع تزخ
طبيت على ام ايهم جانت كاعده بالمطبخ داتسوي زلاطه ويمها ايهم كاعد كدامها