نور ..اي بابا شفته بالكليه
وليش مكلتي لعد
نور ها بابا نسيت انشغلت بالدراسه ونسيت
المهم عمج مرتضى خابرني وكال جاي هو ابن عمج علي
نور .. اني جمدت من الخوف كتله اي بابا هله بيهم
ام رياض .زين گلتلنا حتى نحضر ضيافه لو يجون على العشا
ابو رياض كالو نجي المغرب حسبو حساب العشا ونشوف
ام رياض تدلل كل شي موجود خير من الله
نور احسن روحي رادت تطلع مكدرت ابقى كاعده استأذنت وكمت
شو كمتي يمه ماما ماكله بالكليه قبل مااجي مو جوعانه
زين يمه ارتاحي ونزلي حتى انظف ونحضر كل شي قبل مايجون
صار ماما
نور رحت لغرفتي واني الافكار ازدحمت براسي ليش جايين وشراح يحجي ويه ابويه معقوله راح ينفذ تهديده ويخلي ابويه يبطلني من الكليه شسوي ياربي
مكدرت انام من التفكير كلت خلي انزل والهي نفسي بالتنظيف والشغل حتى انسى
نظفت البيت طلعت حرگت قلبي بي ورحت ساعدت ماما وحضرنا كل شي
كلتلها لماما راح اسبح وابدل وانزلج
كملت ونزلت وشفتها ماما بعدها بالمطبخ كاعده شويه واندك الجرس ودخلو اخواني تلكيناهم مشتاقيلهم هوايه وتصورتو جوي صدفه طلع بابا مخابرهم وداز عليهم
هالمره خفت اكثر كلت لازم اكو شي مو خاليه الشغله
هناك واسمع بابا يكول اجوي دخلو للاستقبال وتلكوهم بابا واخواني وحتى يوسف جان موجود رحبو بيهم صار فتره ممتشاوفين كل واحد ملتهي بشغله وبامور الدنيا هاي باقين على التلفونات واحد يسال على الثاني
اجه يوسف وكال ها شمحضرين انطوني
امي كالتله هاي يمه هذا العصير والكيك حاضر اخذهم وراح
رسل طبعا جانت موجوده اجتي ويه يوسف جان من يروح يلتحق يوديها لاهلها امها وحدها ومريضه ومن يجي يجيبها
واسمع صوتهم يسولفون ويضحكون اطمئن شويه ومن يجي يوسف اكول جاي عليه اخاف بس خطيه يطلع جاي على المي لو على الضيافه
مقبلو يتعشون جان عمي عنده شغله ومااكدر يبقى وطلعو
اني هنا بقيت انتظر الي راح يصير بيه تخيلت راح يجي ابويه يسحلني سحل ويبطلني
صاح علينا بابا وكال تعالو اني رجليه ماتو گوه مشيت
دخلنا للاستقبال والكل كاعدين بابا گال نور ابن عمج جان جاي يطلب ايدج وهو بعد ميحتاج اسال عليه ابن اخويه الله يرحمه خوش ولد وسوه نفسه بنفسه يعني مايتعيب ولا ينرفض
امي فرحت گالت اي مانلكه احسن منه وام علي ورده مال الله ماسمعنا منها مغثه فد يوم الله بوفقج بنتي ويسعدج
واباوع اخواني كلهم فرحانين ومأيدين كلام بابا
نور من الصدمه مااعرف شاحجي وشنو احجي خلص قررو ووافقو واتفقو حتى بدون محد يلتفت ويكولي شنو رأيج
الكل تباركلي وفرحانه الا اني صاحبه الشأن خفت دموعي تنزل گدامهم استأذنت وطلعت اركض لغرفتي واكيد همه فسروها خجل
رحت شمرت نفسي على الفراش وابجي
هاي نهايتي اكيد گدر ينفذ تهديده وراح يكسرني
نمت من التعب والتفكير والبجي والحمد لله جان ثاني جمعه وماكو دوام والا شكلي مينطلع بي عيوني وارمه وحمر
نزلت ورحت للمطبخ صبحت عليهم وردو عليه كالت ماما تعالي اكعدي تريكي ويانه
ورسل تتشاقه ويايه وتكولي تعالي عروستنا الحلوه كعدي يمي
كعدت وبابا بده يحجي كأنه رسل ذكرته كال صدك تره الولد جاهز وماعنده شي اتفقت ويا الخطوبه والعقد مال السيد بعد اسبوعين والزواج من تخلص الامتحانات وتعطلون
يعني كل شي متفقين عليه ومجرد يبلغوني بي واني انطي موافقه لاوامرهم
هزيت راسي بمعنى نعم الي مااكدر اكول غيرها
تريگنا وكمنا بلشنا بالتنظيف والتحضير اليوم جمعه يعني الاجتماع العائلي للكل على الغده واجوي الكل وياهم عصابه الاطفال الي تگلب البيت گلب
جانو الكل فرحانين من سمعو بخبر الخطوبه
والكل حارت شتحضر وشتجهز ملابس للخطوبه الا اني الي حتى مفكرت شاسوي
مر اليوم وراحو كل واحد لبيته وبقينا اني ورسل نعدل الدمار الي سوو بالبيت
تعبنا حيل وكل وحده راحت لغرفتها
اجه الاحد وداومت وجنت كاعده اني والبنات على المسطبه دنقره البنات كالو رايحين للحمام تجين كتلهم لا خلي اقره شويه التهيت هاليومين
بديت اقره ومدنكه شفت ظل واحد واكف شلت راسي ولد ويانه كال صباح الخير كتله صباح النور كال ممكن المحاضره الاخيره بس اصورها وارجعها مااتاخر كتله زين
بعدني داكلب بالمحاضرات مااشوف غير علي فوك راسي كال السلام عليكم ردينا كال كومي نور اريدج بشغله كتله لحظه بس خلي مكملت كلامي مااشوفه غير عصب وصاح كتلج كومي وجرني من ايدي
كتله شدتسوي فضحتني بالكليه شجاك تخبلت
اي تخبلت اني شكايل مو متحجين ويه اي ولد ومتتقربين عليهم
الولد راد محاضرات ودانطيها اله وانت صدكتي مو هاي سوالف الولد اعرفها يجي بحجه محاضره حتى يسولف ويباوع
شيباوع شبيك انت
كام يصيح لتردين ولتناقشين تسمعين وبس اذا جان قبل عندج حجه وتكولين شعندك وشتريد
هسه كلمه وحده متحجين وكلامي يتنفذ وبس
سمعتي لو لا بعياط
اني بس اريده يسكت لان فضحني بالكليه
كتله اي اي سمعت
امشي هسه من گدامي على محاضرتج
نور مشيت واني افور ومعصبه شراح يخلص العمر ويا
يوميه حارگ دمي رحت للمحاضره وكملت اليوم ورجعت للبيت
ومرت الايام وصار قريب موعد الخطوبه واني ممحضره شي
كاعده بغرفتي اقره واجتي عليه ماما گالت يمه ام علي جوه نزلي سلمي عليها
نزلت سلمت وكعدت يمها واسولف وتسالني عن الدوام ومن هالحجي
تالي كالت ليش منروح للسوك حتى نشتريلج فستان للخطوبه وشغلات الي تحتاجيها
امي أيدت الفكره بعد مكدرت افشلهم واكلهم لا
وافقت رحت بدلت ورحنا للسوك اشتريت الفستان والحذاء وكل شغلات الخطوبه
ورجعنا تعشينا سويه وراحت بعد مااجاها علي واني تحججت حتى مااشوفه
كل كم يوم يجي للكليه واني ايدي على قلبي ليسويلي مشكله ويفضحني جنت اسكت وماارد عليه
حاولت افهمه انه اني ماافيده وخلي يشوف غيري بس مجان ينطيني مجال وميسمع مني
واجه يوم الخطوبه الي هو احلى يوم بحياة اي بنيه بس بالنسبه اليه جان يوم صعب جان يوم راح اوقع بي على اعدامي ....يتبع
أنت تقرأ
حب على حافة الهاويه بقلم Zahraa Mohmad
Lãng mạnقصه لفتاة جميله تعاني من ظلم الاهل وتحارب لانهاء الدراسه ودخول الجامعه وكلها امل انها تنتقل لحياه اخرى وتنصدم بابن عم لها في الجامعه وتعيش ماساه جديده
