محمد بعد ماسمعت عمتي تصيح تعالو وبسرعه اخذت علي ورحنا وصلنا لغرفتها
دكينا الباب كالت تفضل
دخلنا وشفناها عصبيه وكامت وكفت وكالت علي انت من خطبت البنيه اخذت رأيها
علي .شنو!!! اكيد اني خطبتها واهلها رجعولنا خبر انه موافقه وحتى امي سمعت من امها انه فرحانه بالخطوبه ليش دكتوره تسالين هالسؤال
لان ياحضره الضابط المتعلم البنيه مجبوره عليك وخوفها من اهلها هو الي مسكتها
علي افرك بوجهي وممصدك مستحيل دكتوره اني اجبر بنيه تتزوجني يمكن بالبدايه صار تحدي وفهمته غلط بس لااا مستحيل مو اني الي اسويها
لاغيرتي ولا رجولتي تسمحلي
علي .حسيت نار وتطلع من عيوني اني انحط بهيج موقف ليش ليش
د.. علي على كيفك اني من كلت هيه رافضتك وسمعت منها جابريها تخبلت وشفت شلون حجيت ويه محمد
علي . عادي دكتوره اني الي اعتذر الي خليتج بهيج موقف واطمئني ميصير غير كل خير اسمحيلي اني اترخص
د.علي اتمنى هذا الشي مياثر على البنيه
نور طموحه وحلمها تكمل دراستها
علي انداريت عليها الظاهر متعرفيني دكتوره زين اني ابن اصول ومو اني الي اذي بنيه وهالمره مو اي وحده بنت عمي من دمي ولحمي
تركت الغرفه وتركت الكليه ومااريد اشوف احد
الطريق كله افكر ليش جبروها وليش وافقت صح اهلها صعبين بس هذا زواج ممعقوله اعيش ويه وحده رافضتني مستحيل اسويها ولازم الكي حل
نور بعد ماحجيت للدكتوره خفت ليوصل الموضوع لعلي واكيد مراح يسكت
اووف اني شنو الي خلاني احجي اول مره احد يعرف بقضيه خطوبتي وشلون صارت
تلكتني سوسن ها نور بشري شرادت الدكتوره
هاا مارادت شي سالتني عن الامتحان وصوتي ووضعي مبين مو طبيعي بس حاولت اغير موضوع اكلج اني رايحه اشرب جاي تجين
سوسن يله امشي امري لله ولو هسه اجيت من الكافتريا بس تدللين كم نور عدنا
نور هاي شنو هالاخلاق مداعرفج
سوسن اي اتلوكلج بلكت خطيبج يشوفلي فد شاب حليوه مثله ويخطبني هههه
مو داكول متسوين شي بلاش ضحكنا ورحنا للكافتريا كعدنا نشرب جاي واني بالي يم علي والي راح يسوي
انتهى الدوام ورجعت للبيت
دخلت وتلكتني ماما ها بنيتي شلونج
الحمد لله ماما اباوع عليها واحجي بقلبي اذا علي اجه وگال لاهلي الي حجيته عنه وعنهم شراح يصير بيه وبيهم اكيد راح اخسر نفسي واخسرهم
بس الحجي هسه شيفيد كطعت صفتني امي
ها نوره خيرج ماما شبيج شو صافنه
هاا لا ماما ماكو شي اروح ابدل ملابسي
ركضت لغرفتي غسلت وبدلت وسمعت رسل زوجة اخويه تصيحني على الغده
نزلت ومثلت كدامهم انه مابيه شي وطبيعيه وتغديت وياهم وكل شي تمام
بعد الغده كتلهم اني تعبانه وعندي امتحان باجر راح اصعد ارتاح قبل مابلش اقره
صعدت واني الخوف والقلق دمرني افتح التلفون مابي اي اتصال او مسج من علي
يوميه جان ميبطل مسجات الى ان اكله وصلت وراح اتغده وانام
وحتى من اكعد واريد اقره كل شويه يدز مسج لو يتصل
راسي حينفجر من التفكير تعبت والله
بهالاثناء اندكت الباب بدون وعي فزيت كلت تفضل
دخلت رسل ها هلو رسل تعالي تفضلي
نوره اريد احجي وياج عادي تسمعيني
اكيد رسوله اسمعج احجي
نور داحسج مو طبيعيه اني مو من عادتي اتدخل وانتِ تعرفيني زين بس اني اريد احجي لمصلحتك
شنو الي صاير مخليج قلقه ومتوتره
كلتلها ليش مبين عليه متوتره
اذا عبرتيها على الكل اني لا احجيلي يمكن اكدر اساعدج
وحجيتلها على الموضوع الي صار
كالتلي شوفي نور انت صح بالبدايه جانت خطوبتج حسب ماكلتي اجبار بس الولد ميتعيب ومشفتي من غير كل خير صح لولا
كتلها اي بس اني مااكدر اتقبله
نور مو كل شي بالدنيا يتفصل النا مثل منريد
انتِ اكثر وحده تعرفين اخوج شمسوي بيه كل شي حسره عليه الگومه والكعده والروحه والجيه بحساب واللبس على امره ورغم هاي قابله وراضيه لان هذا نصيبي مااكول مااحبه بالعكس بس الوحده هم مرات تتمنى كلمه حلوه طلعه تتعشى لو تتغده هيه ورجلها يعني تعيش حالها حال البنات
اني داشوف علي ممقصر وياج بشي ومحارمج من شي الي تكولي وتطلبي يركض ويجيبه حتى هاي الاتصالات والمسجات الي ضايجه منها غيرج يتمناها
لو مايحبج ميهمه انه وصلتي او اكتلي او درستي
حتى الدراسه عافج على راحتج ومكلج بيوم بطلي من الكليه
رسل اني مكلت هو مقصر بس الي صار من شفته والمواقف الي صارت ...قاطعتني رسل وكالت كافي نور انسي الي راح وعيشي الي جاي الولد يحبج حاولي وانطي لنفسج فرصه ساعدي وساعدي نفسج وعيشو حياة حلوه
مااكدر رسل مااكدر
على راحتج نور بس صدكي نور يجي يوم وتندمين ووكتها مينفع الندم
فكري زين ولتخسرين حياتج علمود شغلات مالها معنى ...
راحت رسل وهالمره صارت الافكار براسي تتضارب شسوي وشلون اتصرف ياربي ساعدني ..
نزلت جوه وحاولت اشغل نفسي وياهم حتى ماافكر
ماما كالت نور خلصتي دراستج مو كلتي عندج امتحان
اي ماما خلصت مجانت هوايه الماده واني حافظتها
زين ماما ساعدي مرة اخوج خطيه دتسوي كبه
ادللي ماما رايحتلها رحت يم رسل اشتغل وياها وابالي حجيها معقوله اني مداشوف الي ديشوفو همه الكل شايفه علي بصوره غير الصوره الي هو بيها لو اني الي حكمت عليه بيها ومنطيت مجال اغير حكمي رغم كل الي سواه ويايه
خلصنا الكبه وجهزنا العشه واني صفنه توديني وصفنه تجيبني وكل شويه اشوف التلفون مابي لا مسج ولا اتصال
مااعرف اني مرتاحه لو ضايجه لو خايفه من هالهدوء الي اخاف وراه عاصفه قويه تقتلع حتى جذوري وتخليني لا اني للسما ولا اني للكاع ويضيع كل شي
بقيت افكر الى ان تعبت ونمت كعدت ثاني يوم ورحت للدوام بس استغربت غياب مسجات علي واتصالاته شنو القصه يجوز يكون مشغول مااعرف من اشوفه اكيد راح اعرف السبب
دخلت محاضرات وطلعت ويايه البنات ورحنا للكافتريا كعدنا اكلنا وملتهين ونضحك
شفت علي جاي من بعيد وصل يمنا وسلم ردينا السلام
كال نور اذا ممكن عندي حجي وياج
كتله اوكي استاذنت من البنات ورحت
كال نور راح تسمعين مني كلام لاول مره اكوله الج وحجالي من اول يوم شافني لحد البارحه من عرف اني مجبوره عليه
حاولت انه احجي شي بس منطاني مجال
كال شوفي نور الي يحب انسان يهمه راحته حتى لو جان على حساب تعاسته
اني من هاللحظه اكلج كل الي بينا اعتبري انتهى ولتخافين مراح اسببلج مشاكل راح اكون اني سبب الانفصال واخلي الصوج بيه بس راح أجل هذا الشي لبعد الامتحانات النهائيه علمود مياثر هذا الشي عليج
اني اشكرج لان تحملتي كل هالفتره وانت مطابقتني ومجبوره عليه
واتمنالج السعاده بس يجي يوم وتعرفين انه محد حبج بكدي ومااكلج انت خسرتيني لان انت راح تحسين بهذا الشي
مع السلامه نور
نور اني واكفه ومصدومه بلي سمعته اجوي البنات عليه يسالوني شكو وشبيج نور واني مااعرف شجاوب ومااعرف احساسي شنو زين مو المفروض اكون فرحانه لان هذا الي اريده عفتهم ومشيت لوحدي وكانه مااسمع صوتهم ...
أنت تقرأ
حب على حافة الهاويه بقلم Zahraa Mohmad
Romanceقصه لفتاة جميله تعاني من ظلم الاهل وتحارب لانهاء الدراسه ودخول الجامعه وكلها امل انها تنتقل لحياه اخرى وتنصدم بابن عم لها في الجامعه وتعيش ماساه جديده
