جمبذا ادم البارت الثاني والعشرون
من صارت روشه بلمطبخ كلبي مارتاح امي كامت والبنات هم والعيون صار كله عل تجمعهم كلبي مارتاح شويه وااجتي انسام كالت تعاي عمو يريدج خليت شال كبير على راسي ويغطي اديه وطلعت كمت وياه وكلهم مجميعين بلمطبخ ومخلين امي وابويه بلنص وإبراهيم هم من شافني عموو فواز واني هذا ماارتاحله فد واحد غير عن عمامي مخلي نفسه بكلشي ويدخل بزغيره والجبيره كال
بنتي رشا تسمعيني تره الولد مجايب ابوه وياه واحنا عندنه هذا الشي ميصير يعني هوه لام هاي الناس كله ومكادر يجيب ابو تره مصايره الرجال غريب شمدرينه شبينه وبين ابوه وهوه ابنه الوحيد عل حسب حجيكم ومااجه بخطبت ال ابنه
جاوبه خالي
ابو بهاء رحمه لهلك الرجال مو جهال وانت دشوفه شلون معدل ومبين ادمي اني اشوف كلامك مومنطقي وهاي الناس الجايبه مقاصره ابو براهيم خويه الرجال جارك وانت تعرفه احجيبك كلمه
ياجماعه جاري صحيح بس اني ويا اخويه أبو بهاء ليش مجايب ابوه يعني شنو معنى اشو علاقتنا طيبه بيهم ويشوفني يسلم وبينه واجب ادري ليش من وصلت الخطبة بنتي مااجه
وهذا الصحيح مثل تفكيري بلضبط ابو إبراهيم ادخل عليه وكوله مالك مره يمنه اذا ابوك ميجي وياه هاي الناس الخيره
صلو عل نبي ابو إبراهيم عيني ابو بهاء ميصير هيج تفشلون الولد كدام الزلم هسه انطوو وعود يجيب ابو بغير وقت شمدريكم بضروفه يجوز مسافر طالع مريض
ماكو هيج حجي ابو جلال انت خاله صحيح بس اني عمهه واعرف بمصلحت بنت اخويه واني سالت شكم واحد من ذوله الجاين عل ابوه كالو موجود ورجال بعده بحيله يعني كل عذر ماعنده رشا احنا عمامج وادره بمصلحتج خلينه نتصرف
اسمع وارجف وماعرف شحجي وهمه ناس ترفع وناس تكبس كلبي كام يخفك سريع وعرفت راح تخرب إيمان لازمتني وانسام من الصفحه الثانيه همست
إيمان اتصرفي حاجي امي لج راح تخرب وزيد يتخبل
اووكفي رشا متشوفين عمج صار خير براسنه وكام يدور مثاليات
طلعو ورجعو للستقبال واني رجعت بس محموسه حمس ومادري شراح يصير النسوان كلمن تحجي شكل ومرت عموو بهاء انكس منا تفتر عل نسوان ودكلهن مجايب ابوه وام زيد بنصهن تبرر صرت اسمع بس صدى أصواتهم وعيوني بلكاع وحابسه الدمعه كوه بس لامحال طفرت من عيني من كالو خربت وطلعوو ام زيد تخبلت ليش وليش وسحر بذني سمعته دكله امشي يمعوده هم مطلكه وهم يعززون بيهه والله كله من وراه ابنج مسح بكرامتنه الكاع كل كرابيبنه سمعوهه جانت تحجي بعنتكه طلعوو لو روحي طلعت صعدت الغرفة إبراهيم وقفلته وكعدت ابجي من كل كلبي ليش هيج ديصير بيه معقوله خيره يعني دتوصل توصل وتخرب بجيت لحد ماتعبت رفعت راسي المرايه كدامي شفت وجهي صاير خريطه الكحل سايح والدموع مابطلن ولهزمت بغرفة براهيم عبالي اخلص لاكن وين كله لحكتني وعل نفس الرنه ونفس السالفه كرهت حتى روحي كمت بهمه فتحت كنتور نور طلعت دشادشه ورحت للحمام اسبح من القهر وابرد النار البكلبي انوب فوك كل هذا الناس مترحم والحجي أشكال سمعت سبحت وطلعت وهنا عل كعدتهن عل جربايه ودك سوالف بدون مستحه ولاتردد كتلهم مرخصتكم اريد انام ضلووو ضافنين عليه ندرت ومددت من الصفحه الثانيه عاد طلعن وصدك اني احتاجيت انام حتى مافكر بشي لان صدقا تعبت ولله تعبت من نفسي ومن كلشي حواليه زيد اوووووف يازيد هسه شسوه وشنو حاله ماريد حته اخابره اني شلوني عاد هوه من القهر والتعب والبجي نمت وماكعدت غير بليل نزلت البيت صنته كله رايحه دخلت غرفتي وهم مددت اجتي اسراء كعدت كبالي
رشا حبيبتي والله بيه صالح الج واله متدرين ربج شكاتب اصبري حبابه والله ابويه مراضي عل سواه بس هذا عموو فواز الله لايوفقه
